Ɛfɛsa 6:11 - ALLALA KUMƐ

¹¹ Alla ye kɛlɛ-kɛ-miran min bɛɛsi dila wo ma, wo ni wo bɛɛsi bi, woletɔ wo sɔnɛ si to Setanɛta halliya-yogomɛnu kuma.

Ɛfɛsa 6:11 Iomraidhean Croise

Nihɛmaya 4:13

Woletɔ n ya kɛlɛ-mirannu don wɔli-kɛlɛnu bolo, faan wo, tanba wo, kalabɛn wo. Kan tinɛ minnu na ma ban bɛ, n ya anu sigi tarɛ kɔma iko anu kebilɛ ye nya min.

Maraka 13:22

ado minnu ya anu nyɛrɛ mayira iko Alla le ya anu sɔ, wonu si bɔ gbɛ rɔ. Donu si anu nyɛrɛ ma nɛbinu na fanan. Anu si kabana-ko-belebele-wɛnu kɛ Allala mɔgɔ-yabɔnɛnu yanfa-koe la, ni a si ke mala, kɔni.

Romu 13:12

Suyi-banmatoe le. Banda-ka-dɛ ara gbɛrɛn. Ma ni pinpirɔ-koenu boloka wona ka mala kɛlɛ-kɛ-mirannu bi ka Allata kɛlɛ kɛ wan-takanɛ rɔ.

Romu 13:14

Ma ni Mari Yisa, Allata-Mɔgɔ-Yabɔnɛ kelen pe le lɔn ma tigi la. Ma si ma nyɛrɛ wasa min na, ma kana wo ko ladan.

1 Kɔrɛnti 10:13

Kɔrɔbɔlɛ wa kɛ wo ma tumɛ min, wo ni wo yili to kɛ ko ko kɔrɔbɔlɔ-su wo duruta kɛla mɔgɔ-gbɛrɛnu fanan na. Alla ti nyina ala lanyiri-kirinɛ ko. A ti sɔn kɔrɔbɔlɛ su-wo-su ni ke wo ma, wo ti min nɔ. Kɔnɔ kɔrɔbɔlɛ wa kɛ wo ma tumɛ min, a si kilɛ yira wo la alako wo si a nɔ nya min.

2 Kɔrɛnti 10:4

Ma ye kɛlɛ-kɛ-fan minnu bila kɛlɛ-kɛ-tinɛ, duninyata kɛlɛ-kɛ-fen ma wonu na. Ma ye Allata kɛlɛ-kɛ-fen-sɛnbɛmɛnu bila ka Setanɛta kan-tina-latankanɛnu tinya wonu na. Anu bi hɛnkili minnu nabɔla,

2 Kɔrɛnti 11:3

N kilannɛ ko fenfen kana wo hɛnkili yabasan iko duguma-fan ya ma mama Hawa yanfa ala foninya-wɛ la nya min. Wo kana bɔ wola keninteya-bɛrɛ rɔ min bi wo bolo Kirasiti wara la.

2 Kɔrɛnti 2:11

Setanɛ kana nɔ-ko sɔrɔn ma ma, ado ma ya ale Setanɛ kɛ-nyanu lɔn.

2 Kɔrɛnti 4:4

Setanɛ min bi duninya kɛ kun na, wo ara a ma, anu ma ke lala Yisa la bawo anu yisi ara to pinpi rɔ. A ya a ma, anu ti ke kibara-nyimɛta waan yenna min bi malanna anu ye, ado kibara-nyimɛ wo ye Kirasitita gbiliyɛ kɛla ko la. Allala muninyɛ nyɛrɛ le ale la.

2 Kɔrɛnti 6:7

Ma ya tonya-kumɛ fɔ ka Allala sɛnbɛ yira alako ka a yira ko Allata wɔli-kɛlɛ le male la. Telenbagayɛ le mala kɛlɛ-kɛ-miran la. Ma si bui mɔgɛnu ma wo la ka ma nyɛrɛ matanka a la fanan.

Ɛfɛsa 4:14

Nba, wo kana ma dennɛnu na tun ka to finki-fankala. Wo kana ma iko fɔnyɔ ye kulɔn latonko-tankala nya min. Woletɔ hallitorenu ba anu taya ka wo yanfa karan-kurɛ la tumɛ min, anu kana wo lasama kilɛ ma.

Ɛfɛsa 4:24

Fɔ wo ni kɛ-nya-kurɛ bi min nadannɛ iko Allatɛ ye nya min. Mɔgɛ min si kɛ-nya-kurɛ bi, wo si gbɛ ko wonu telennɛ Alla yala, ado wo bɛɛ sɛninyani de!

Ɛfɛsa 6:13

Woletɔ fɔ wo ni Allata kɛlɛ-kɛ-miran kɛnu bi kaka, ado wo kɛlɛ-tele wa ke tumɛ min, wo si ke ka wo yoge kɛlɛ ka a nɔ. Wo wa ban kɛlɛ kɛla tumɛ min, wo sɔnɛ si to wo gbɛ rɔ gben!

Kɔlɔsi 3:10

Wo ara ko-kurɛ bila wo kan na. Ko-kurɛ kɛ ladanta Alla le bolo, ado a ye tola wo lakurayala alako a ni to wo lakanbalila Yisa-nyɛrɛ-lɔn-koe rɔ. Ale le ya ko-kurɛ kɛ ladon wo yisi rɔ.

1 Tɛsalonaika 5:8

Kɔnɔ teleta-mɔgɛ le male la, woletɔ fɔ ma ni ma hɛnkili masɔ. Ma ni dɛnkɛninyɛ anubɛ keninteyɛ don iko kɔgɔ-matanka-fan. Alla ara lɔnnɛ min di ma ma ko ma ara kisi, wo ni ma mala kɛlɛ-kɛ-fulɛ la.

Hiburunu 7:25

ado minnu bi nala Alla ma Yisa baraka rɔ, ale le si ke wonu nakisila feu, bawo a ye a kɛndɛ la habadan! A ye Alla madiyala wonu ye tɛban!

Yemesi 4:7

Woletɔ wo ni wo famayigi Alla ye ka wo kan-kɔ sɔ Setanɛ la. Setanɛ si a buri wo kɔrɔ.

1 Pita 5:8

Wo ni wo yɛ laka, ado wo yɛ lakanɛ ni to dɛɛ! Wo yoge, Setanɛ ye wo manɛgɛnna iko yarɛ min bi borondo-borondola. A ye mɔgɛ nyinina, a si min dɔn.

Yude 1:24

Nba, ale Mari min si ke wo marala alako wo kana na bui, alamɛ wo sewanɛ sɔra a yakɔrɔ, fɛɛ-wo-fɛɛ sa wo la ala gbiliyɛ rɔ.

Lankɛnimayɛ 12:9

Ninkinanka-wɛ min ya duninya bɛɛ yanfa, ale duguma-fen-kɔrɛ, kɔni, wo lafilita dugu-kole kuma anubɛ ata melika bɛɛ. Anu si a kele ko nyinɛ, ni wo ma, Setanɛ.

Lankɛnimayɛ 19:20

Anu ya sogo-feremɛ wo bira anubɛ foninya-nɛbi min ya kabana-ko-siyaman kɛ sogo-feremɛ wo yala. (Sogo-feremɛ wola mandan ye mɔgɛ minnu ma anubɛ minnu ya sogo-feremɛ wola muninyɛ kɔ, a ya wonu yanfa ala kabana-koe wonu fɛ.) Sogo-feremɛ wonubɛ foninya-nɛbi, wonu filɛ bɛɛ kɛndɛ lafilita ta-dalɛ rɔ min bi mintanna tɛ anubɛ munku-gbɛ la.

Lankɛnimayɛ 2:24

“ ‘Kɔnɔ donu bi wole Tayataira chɔchi-mɔgɛnu tɛma minnu ma bila karan-yogomɛ kɛ fɛ. Mɔgɛnu bi min kelela ko, “Setanɛla gbundu-ko-wɛ,” wo ma wo karan. Nba, n ti dunu-gbɛrɛ sa wo kuma.