Daniyɛli 7:4 - ALLALA KUMƐ

⁴ N ya a fɔlɔtɛ min yen, wo mani de iko yarɛ kɔnɔ a kanbannu bi a ma iko kokɛ. N bi a mafɛlan wo kun na, n ya fan do yen a kanban wonu wurunnɛ a ma. Fan do ya a bi ka a sɔ a kin filɛ kun na iko hadama-dan. Hadama-den-miriya dira a ma wati wo rɔ.

Daniyɛli 7:4 Iomraidhean Croise

2 Samuwɛli 1:23

“Mansa Sɔli anubɛ Yonatan, anu di mɔgɛnu ye. Anu sɔn bɛɛ kelen, ado anu niyi bɔra anu nyɔgɔn fɛ le. Anu natiri kokɛ ko, ado anu tagbɛlɛ yarɛ ko.

Yobu 25:6

Kumanato hadama-dan ma, tunbi ye wo min na. Nfen bi hadama-dan la Alla yala?

Yaburi 9:20

A ma, anu ni kilan. Anu ni a lɔn yati, ko hadama-dan le anu na dɔrɔn!

Yɛrɛmaya 25:38

Mari ara ala nyamanɛ boloka iko yarɛ wa bɔ faran la dɔnta-nyini-tinɛ a yisi ma. Mari ara wola nyamanɛ bɛɛ tinya a fondo-bɔnɛ la, ado yan bara ma nyamani-makilannɛ la ka a tɛgɛ kɛlɛ ma.

Yɛrɛmaya 4:13

Ma yogenu bi nala iko banda-finyɛ. Anuna kɛlɛ-kɛ-kirindinu bi nala anu burila iko tɔnkɔlɔn. Anuna soeenu bi anu burila iko kokɛ. A si gbɛlɛya ma kuma bawo wo ye nala kasarala le kɛ la.

Yɛrɛmaya 4:7

Sibolenuta kasara-kɛlɛ ara fɔlɔla nala iko yarɛ wa bɔ faran la. A ara a warɛ boloka ka na wola nyamanɛ tinya-tinɛ. Wola soenu si tii mɛmɛ! Hali mɔgɔ-den-kelan, a ti to wonu tɔ.

Yɛrɛmaya 48:40

Mari ko, “Wo ni wo yɛ lata kɛlɛ-dannu mayigila Mohabu kan ma iko kokɛ-kanban tafulennɛ tenbi yigila fen kan ma.

Yɛrɛmaya 49:19

Mari ko a si a ma, Idɔm kɛnu ni anu buri iko yarɛ wa bɔ Yorodan-ba-gbɔngbɔn rɔ ka ta a kun nabɔ kolo-fen de-nyini-tinɛ ma. Wo kɔma, Mari wa mɔgɛ min yabɔ, wo le ye Idɔm kɛnuna nyamanɛ wo marala. Mari ko ale Mari nyɔgɔn sa nyɔ. Yon si a kɔgɔ raka a ye? Kun-tigi yon si ke a rasɛla?

Nimisa Koe 4:19

Ma yogenu yigira ma kan ma iko tanbakɔrɔmanɛ si bɔ san ma nya na fii! Anu ya ma sagaran kɔnkɛnu tɛma. Anu ya ma latɛrɛna wulɛ rɔ ka ma bira.

Isikiyɛli 17:3

alako anu ni a lɔn nde, wo Tigi Mari ye min fɔla wo ye. Kokɛ-belebele do ye nyɔ nun min kanban tafulennɛ. A kanban-tiyi wonu kin dɔgɔma-ma-de! A kanban wonu tagbɛlɛ. A gbanta ka ta Lɛbanan kɔnkɛnu kuma. A ke nyɔ, a ya sida-kɔn-sungban do keri.

Isikiyɛli 28:2

“Ile hadama-dan, i ni nde, wo Tigi Mari kuman-kan kɛ latenbi Taya mansɛ ma. A fɔ a ye ko a kɔrɔbinɛ wasinteyɛ la a bolo. A ye a nyɛrɛ mala Alla la. A ye a fɔla ko a siginɛ Allala mansaya-waganɛ rɔ, kɔgɔ-yi ye ala foolɛ rɔ. A ye a nyɛrɛ mala iko Alla, ado hadama-den-gbansan le ale la.

Isikiyɛli 28:9

Anu ba na a faga-tinɛ tumɛ min, a si to a fɔla ko Alla le ale la, wa? Anubɛ a fagalɛ yakɔrɛ wa ma kelen na, a si a lɔn worɔ ko hadama-den-gbansan le ale la. Alla ma ale la feu!

Daniyɛli 2:38

Ale le ya i ma duninya mumɛ mansɛ la ka mɔgɛnu anubɛ sogenu anubɛ konanu ma itɛ la duninya kɛ rɔ. Ile, ma tigi, kiyora kunyɛ min na, a manɛ sɛnɛ la, ile le wo la.

Daniyɛli 4:36

“N hɛnkili sɛgira a gbɛ rɔ tumɛ min, Alla ya nta mansayɛ anubɛ nta gbiliyɛ lasɛgi n ma tun. Nna makawandilɛnu anubɛ nna mɔgɔ-banu ya n sɛnibɔ ka nna sɔ tinɛ bɛɛsi lasɛgi n ma tun, ado n ya gbiliyɛ sɔrɔn anu bolo ka tenbi nna mansayɛ fɔlɔtɛ la.

Daniyɛli 7:12

Sogo sawɛ minnu tora, anu ya wonuta sɛnbɛ bi anu bolo kɔnɔ wonu tora anu niyi la wati-kundu-ni kɔrɔ.

Daniyɛli 7:5

“Wo kɔma, n ya sogo-ferema fila nyɔgɛ min yen, wo mani de iko yarama-yɛlɛnkan. Wo sɔnɛ a kɔma kin filɛ kun na. Kɔgɔ-barasa-kolo sawa kankannɛ a dɛ la. Soge wo ya kuman-kan lamɔɛn ko, ‘Ta, i ni soge dɔn iko a di i ye nya min.’

Matiyu 24:28

“Suyi taranta kan min, dogɛnu si anu nadɛn nyɔ le.

Tɔn-Fɔɛ-Fila-Nyɔgɛ 28:49

“Mari si a ma, sibolo-gbɛrɛkɛ-mɔgɛnu si na wo tɛma ka bɔ wula-yan la pon, wo ti minnu kuman-kan lamɔɛn hali! Wonu si na kɛ wo ma iko bibinu.

Lankɛnimayɛ 13:2

N ya sogo-feremɛ min yen wo la, a manɛ iko kuli. A kiannu mani de iko suluku-kinama-wɛtɛ. A dɛ mani de iko yarɛ-dɛ. Ninkinankɛ le ya a nyɛrɛta sɛnbɛ di sogo-feremɛ wo ma anubɛ ata mansayɛ anubɛ ata sarati-wɛ.