Daniyɛli 4:17 - ALLALA KUMƐ

¹⁷ Melikanu denu-denu bara ban a latɛgɛla wo nya. Woletɔ duninya-mɔgɛ bɛɛ si a lɔn ko Alla Min Bi Fan Bɛɛ Kun Na, sɛnbɛ ye wo le bolo duninya-mansɛnu kun na. Min ba diya a ye, a si ke le mansayɛ dila wo ma, hali wo tigi ma kolo.’

Daniyɛli 4:17 Iomraidhean Croise

1 Mansɛnu 21:25

(Mɔgɔ-wo-mɔgɔ sa nyɔ min bara bila Mari la ka ala ko-yogomɛ sa gbɛ rɔ iko Mansa Ehabu kɛ, ado ala musi Yɛsɛbɛli le ya a latuntun ko-yogomɛ kɛnu ma-tinɛ.

2 Ko-Kɔrɔta-Karan 28:22

Tɔrɔyɛ fafara Mansa Ehasi kuma tumɛ min, wo ya a ma, a ya hakɛ kɛ Mari la ka a dan-natenbi.

Yaburi 103:19

Mari ya ata mansaya-waganɛ sigi san-kole rɔ. Ale le mansayɛ la fan bɛɛ kun na.

Yaburi 9:16

Mari ye a kɛ-nya yirala ala mɔgɛnu na iko a ye kiti tɛgɛla a kilɛ fɛ nya min. Karagbɛlɛnu fanan si bira anu nyɛrɛta yili-lasiginɛ la.

Bɔ-Koe-Iyipiti 9:16

N bara a to a niyi la alako n ni nna sɛnbɛ mayira, woletɔ duninya-mɔgɛ bɛɛ si n tɔgɛ lɔn.

Aiseya 6:3

Nima-fan wonu kulu-mayɛlɛnɛ ye a fɔla anu nyɔgɔn fɛ ko, Sɛnima, sɛnima, sɛnima! Mari Sɛnbɛ-Bɛɛ-Tigi sɛnima! Duninya lafanɛ ala gbiliyɛ la pen!

Aiseya 6:8

Wo kɔma, n ya Mari kan lamɔɛn ko, “N si yon sɔ? Yon si ma mala kilayɛ la?” Nde ya a fɔ ko, “Nde sɔ, n si ta le!”

Isikiyɛli 25:17

N si anu tɔrɔ kosɛbɛ ka n tayili sara anu na. Anu si nna yisi-bɔɛ lɔn. Wo kɔma, anu si n lɔn Mari la, yɔ!”

Isikiyɛli 7:24

Sibole minnu wunduyogo hoo, n si wonu natugu wo ma ka wola bɔnnu bi wo bolo. Sibolo-gbɛrɛnu ba wola bato-tinɛnu natinya, n si a ma, wola kolo-gbɛlɛnu yigi si tɛgɛ gbede!

Daniyɛli 11:21

Melika wo ya a fɔ n ye tun ko, “Mɔgɔ-gbɛrɛ min bi nala mala mansɛ la, karagbɛlɛ le wo la, ado a ti bɔ mansaya-bɔn na. A si mɔgɛnu natɛrɛna ka mansayɛ bi kɛwuyɛ la.

Daniyɛli 2:21

Ale le ye samɛ ladonna. Ale le ye telemɛ labɔla. Ale le ye mɔgɛ mala mansɛ la. Ale le ye mɔgɛ bɔla mansayɛ la. Ale le ye hɛnkili dila mɔgɛ ma, ado ale le ye a mala fanan, mɔgɛ ni ko nya-yen.

Daniyɛli 4:2

Alla Min Bi Fan Bɛɛ Kun Na, wo ara kabana-ko-siyaman yira n na. Wo ni wo tole masɔ. A di n ye, n ni wonu takaran wo ye.

Daniyɛli 4:25

anu si nde gben mɔgɔni-gbuyinu tɛma alako n ni ta basan sogenu na binyɛ rɔ. A ko san wɔrɔnfila, n bi binyɛ dɔnna iko ninki. A ko n si to kila gbɛkole ma. Duri si to yigila n ma nyɔ. A ko wonu ba ma n na tumɛ min, wo ara a yira n na worɔ ko Alla Min Bi Fan Bɛɛ Kun Na, sɛnbɛ ye wo bolo duninya-mansɛnu kun na. Min ba diya a ye, a si ke le mansayɛ dila wo ma.

Daniyɛli 7:25

Alla Min Bi Fan Bɛɛ Kun Na, mansɛ wo si wo rasɛ ka ala mɔgɔ-sɛnimɛnu nyankankantan. A si anuta ladɛn-sɛnimɛnu tinya anubɛ anuta tɔnnu, ado Allata mɔgɛnu si taran ata sɛnbɛ kɔrɔ san sawa anubɛ a tala.

Romu 13:1

Mɔgɛ bɛɛ ni nyamanita mɔgɔ-banuna kumɛ bira. Ma ni wo ma bawo kun-tigi wo kun-tigi sa nyɔ Alla ma min sigi. Alla kelen pe le si sɛnbɛ di mɔgɛ ma ka mansayɛ kɛ.

1 Kɔrɛnti 1:28

Duninya ye yoola min ma ka a bɔrɔbɔ ko fen ma, Alla ya wo le yabɔ. A ya wo yabɔ alako duninya ya min lɔn ko-wɛ la, a ni wo ma fuyi la.

1 Timoti 5:21

N bi kɛ fɔla i ye Alla anubɛ Yisa Kirasiti anubɛ melika-sɛnimɛnu yala ko i ni kawandili kɛnu bira. I kana mɔgɛ do latenbi mɔgɛ do la. I ni ko-latelennɛ kɛ mɔgɛnu tɛma koe bɛɛ rɔ.

Lankɛnimayɛ 4:8

Kanban wɔrɔ ye dali-fen nani wo kelen-kelennamɛ-bɛɛ ma. Anu kanban bɛɛ fanɛ yɛnu na. Anu ti bandan bɛti bɔla su-ni-tele. Anu bi a fɔla ko, “Sɛnima, sɛnima, sɛnima, Mari Alla, sɛnbɛ-bɛɛ-tigi le. A ye nyɔ kebi fɔlɔ, a ye nyɔ kaka, ado a ye nyɔ habadan!”

1 Samuwɛli 2:8

Ale le si bolo-kolɔnnu bɔ gbangban rɔ ka mɔgɔ-fɛlɛtenɛnu hayu kasa. A si sɛnbɛ di anu ma iko mansa-dannu ka gbiliya-tinɛnu di anu ma. Mari leta ye dugu-kole sɛnbɛrɛn-kɔnnu na, ado ale ya dugu-kole sa wonu kuma.