Aiseya 66:3 - ALLALA KUMƐ

³ Minnu bi turɛ fagala sarakayɛ la, wonu manɛ ale Mari yala iko mɔgɔni-gbu-fagalɛ. Minnu bi sagɛ fagala sarakayɛ la wonu manɛ fanan iko minnu bi wuli-kan kerila. Minnu bi fui-fan mala sarakɛ la wonu mani de iko minnu bi ale Mari kɔla kɔsɔ-yele rɔ. Minnu bi isɛnti mintanna sarakayɛ la wo, minnu bi bɛsɛ kɔla wo, fen kelen de wonu na ale Mari yala. Mɔgɛ kɛnu bi anu nyɛrɛ sɔndɔmɛ le fɛ, aleta ma de! Anu bi kisimiriya-koe min kun na, wonu di anu ye kosɛbɛ!

Aiseya 66:3 Iomraidhean Croise

Hɛnkilimaya-Kumɛnu 15:8

Hali karagbɛlɛla sarakɛ, Mari ti sɔn a la kɔnɔ mɔgɔ-latelennɛ tenbi a madiyala, wo di ale Mari ye kosɛbɛ!

Hɛnkilimaya-Kumɛnu 21:27

Karagbɛlɛla saraka-bɔɛ ma di Mari ye katarala ni ko-yogoma-kɛ-sɔgɛ tonɛ a yisi rɔ.

Aiseya 44:19

Kun-takolɔn wo min ya bɛsɛ ladan, wo ti a fɔ ko, “N bara n gbala do la ka biredi mintan do la ka soge mintan do la. N ya a kɔlɔma-toe ma kisimiriya-fan la. N bi n nyɛnkinna kɔlɔma le dɔrɔn ye.”

Aiseya 53:6

Ma dama ara yilan-yilan iko sagɛnu. Bɛɛ ara ta a kun fɛ. Kɔnɔ Mari ara tɔrɔyɛ sigi ale ma ka a tɛgɛ mala ko-yogomɛnu ma.

Aiseya 57:17

A ko a kɔrɔtɔnɛ wo ma ka a tɛgɛ wola kin-kɔrɔla-fasɛ ma. A ko a ya a kan-kɔ sɔ wo la ka wo tɔrɔ ala fondo-bɔɛ la. A ko hali wo, wo ma wo bɔ wo gbɛ da la. Wo ye ko-yogomɛ kun na tolon!

Aiseya 65:12

Mari ko ko-latɛgɛnɛ wo si ma wo ye faan la. Wo dama si wo kan panparan kan-natɛgɛlɛ ye. Ni i ya a yen, kɛ ye mala wo la bawo Mari ya wo kele min kɛ, wo ma a denkun defan! A kumara wo ye kɔnɔ wo ma wo tole masɔ a la. Koe minnu ma kin, wo ni wo fara wonu na. Wo tora wo gbɛ wonu denu da la, ado wo ma ale Mari hɛnɛ.

Aiseya 65:2

A ko telen-gbɛn, a kɔɛn rasiginɛ mɔgɔ-murutiyanɛ wonu ye. Minnu bi sɛgila a ma, a rabɛnnɛ wonu tabira-koe la. Kɔnɔ anu kɛ-nya manɛ nya min, wo ma kin. Min ba diya anu ye, anu bi wo le mala.

Aiseya 66:17

Mɔgɛ wonu bi anu nyɛrɛ mala mɔgɔ-sɛninyanɛ la alako anu si ta anuna bɛsɛnu kɔ nya min anuna kan-tina-hakikɛnu tɔ. Anu kungban-kungban kɛnɛna bilala anu nyɔgɔn fɛ ka ta kan-tina-hakikɛ wonu tɔ. Anu bi kɔsɔ-soge anubɛ tula-soge anubɛ fen-haramunɛ donu dɔnna nyɔ. Kɔnɔ Mari ko anu dama si na halaki anu nyɔgɔn fɛ tiriya!

Yɛrɛmaya 6:20

Mari ko nfenna wole, Yuda kɛnu bi Siba nyamanita isɛnti mala sarakɛ la a ye? Nfenna wo ye nala fɔrɔnyakalɛ la ka bɔ wulɛ rɔ pon? A ko a ti sɔn wola saraka-mintantɛnu na. Wola sarakɛnu sa a hɛnɛna hali!

Saraka-Masɔlɛnuta Tɔnnu 2:2

Dɛgɛ-munke min yabasannɛ tuli kɛ la, saraka-masɔlɛ si a bolo-nya kelen bi ka a sa tɛ rɔ anubɛ isɛnti. Wo sumɛ si diya Mari ye. Bolo-nya kelan wo si ma iko a ya a damasi mintan Mari ye.

Hegayi 2:14

Nde, Nɛbi Hegayi ya Marita kumɛ kɛ le fɔ ko, “Ka a bi Marita Bon-tinya-wati ma ha ka a sigi kaka la, wo biranɛ Mari bolo ka le. Wo mani de iko mɔgɛ kɛnu min sɛninyabɛlɛ. Wo ya fenfen fui, a ti ma-a-la. Wo ya saraka-wo-saraka bɔ, a ti wo munanfaga.

Tɔn-Fɔɛ-Fila-Nyɔgɛ 14:8

Wo kana kɔsɛ anubɛ kungbilan dɔn bawo hali anu tore faranɛ, anu ti dɔntɛ nunku anu da rɔ. Wo kana soge kɛnu dɔn, hali ka i bole tugu anu suyi la.

Tɔn-Fɔɛ-Fila-Nyɔgɛ 23:18

Ni min ya wodi sɔrɔn yɛlɛnyɛ wo rɔ, a kana na wodi wo la wota Mari Alla Bato-Bɔn la ka wo ma a dakan-kanbali-fan la. Wo ko-sunu gbo Mari ye.

Kɛlɛ-Kurugbɛnu 10:14

Wo ni ta di wola bɛsɛ wonu dala wo ara min nyini wo nyɛrɛ ye. Ni wo ye tɔrɔyɛ le tɔ, nba, anu denu ni wo lakisi.”

Kɛlɛ-Kurugbɛnu 21:25

Kɛnu bi mala wati min, wo ya a taran, mansa sa Isirɛla mɔgɛnu kun na. Bɛɛ ye ata diyana-koe mala iko a di a nyɛrɛ ye nya min.

Kɛlɛ-Kurugbɛnu 5:8

Kɛlɛ buira Isirɛla mɔgɛnu kuma tumɛ min, kɛlɛ-kɛ-fen wo fenfen ma taran mɔgɔ waga bi-nanɛ wo fenfen bolo. A mara wo nya bawo anu bara anu kan-kɔ sɔ Mari la ka anu don bɛsi-kɔ-koe rɔ.