Aiseya 4:6 - ALLALA KUMƐ

⁶ Ata gbiliyɛ si ma ninɛ la soe ye ka a tɛgɛ telela ko ma. Nyɔ si ma kan-tina-latankanɛ la. Gbɔrɔndɛ anubɛ fɔnyɔ ti ke nyɔ ma.

Aiseya 4:6 Iomraidhean Croise

Yaburi 27:5

N tenbi tɔrɔyɛ rɔ, a si n nakanan. A si n nakanan ata Bato-Bɔn la. A si n sigi fara-kolo-wɛ kuma n si kisi kan min.

Yaburi 55:8

N si n buri nun. N ni ta n ye kan tinɛ do rɔ, fɔnyɔ anubɛ bandɛ ti ke n ma kan min.

Yaburi 91:1

Ni min bi tala Mari wara a lakanan-koe la, ni min bi tola Alla Sɛnbɛ-Bɛɛ-Tigita latankɛ kɔrɔ,

Hɛnkilimaya-Kumɛnu 18:10

Mari le mɔgɔ niyi lakisilɛ la iko so-latankanɛ, telenbagɛnu si anu buri ka ta anu dogon kan min.

Aiseya 14:32

Ma si Filisitinuna kilayɛ yabi kama? Ma si anu yabi ko Mari ara ban Yerusalɛm kian banbanna. Ata mɔgɔ-tɔrɔnɛ si sigi lafɛrɛ rɔ nyɔ.

Aiseya 25:4

Bolo-kolɔnnu anubɛ fugarɛnu dimatoe ara na i wara anu dɛnbɛn-koe rɔ. Anu bi tɔrɔyɛ rɔ tumɛ min, i ya anu kumafunfan. Fɔn-digidigi-wɛ nanɛ, i mara anu ye bɔn la. Ala kunayɛ tele bolo anu kuma, i mara anu ye ninɛ la. Karagbɛlɛnu taranta anu kan ma iko banda tenbi gbesila dandan la.

Aiseya 30:30

Mari si a ma, bɛɛ ni a nyɛrɛ kuman-kan-makilannɛ lamɔɛn. Bɛɛ si ata diminya-sɛnbɛ lɔn. A ta-mɛlɛn wo, a fɔn-digidigi-wa wo, a banda-kolo-wa wo, a gbɔrɔndɔ-yi wo, bɛɛ si wo yen a yɛ la.

Aiseya 32:1

Wati do ye nala, mansɛ si taran min si mɔgɛnu namara telenbagayɛ rɔ. Ata mɔgɔ-banu si to ko-telennɛ mala.

Aiseya 32:2

Anu kelen-kelennamɛ-bɛɛ si ma iko toge min si mɔgɛnu tanka bandɛ anubɛ fɔnyɔ ma. Wonu si ma iko yi-kimɛ dugu-ragbalanɛ rɔ. Anu si ma iko fara-gbilɔn-bɛ-ninɛ dugu-fafanɛ rɔ.

Aiseya 8:14

Ka a tɛgɛ ata sɛninya-makawanɛ ma, a ko ale si ma kuri la, mɔgɛnu si anu kian latugu min na. A ko a si ma gbɛrɛ fanan na min si Yuda anubɛ Isirɛla anubɛ Yerusalɛm kɛnu bira.

Isikiyɛli 11:16

“Ta nde, Marita kumɛ fɔ i na-kelen-nyɔgɔ mɔgɔ-biranɛ wonu ye. A fɔ anu ye ko nde le ya anu tanyɛnsɛn ka anu nata wula-yannu na sibolo-gbɛrɛnu tɛma. A fɔ anu ye ko hali anu bi kan-tinɛ minnu tɔ wo la, n bi anu fɛ nyɔnu tɔ, ado anu si n bato nyɔnu tɔ.

Hiburunu 11:7

Dɛnkɛninyɛ le fɛ, Nowa ya Allata kawandilɛnu namɔɛn ka a bɛn koe minnu bi nala yarɔ, a ti ke minnu yenna. A ya Allala kumɛ bira ka kulɔn ladan, anubɛ ala denbayɛ kisira min tɔ. Ata kuma-birɛ le ya a ma, Alla ya duninya bɛɛ halaki, ado Nowa ya telenbagayɛ sɔrɔn Alla bolo dɛnkɛninyɛ le fɛ.

Hiburunu 6:18

ado Alla nyɛrɛ ya ata kelili sa ata lanyiri wo kuma. Fen filɛ kɛnu ti yɛlɛma bawo Alla ti foninyɛ fɔ. Woletɔ male minnu bara ma buri tala a wara la ma latanka-koe la, ma si yisi-latɛgɛ sɔrɔn alako yigi min bi ma yarɔ, ma ni wo bira gben!

Lankɛnimayɛ 7:16

Kɔnkɛ ti anu bira tun. Anu kan la ti gbala tun. Tele anubɛ a wuyan, wo fenfen ti anu mintan,