2 Samuwɛli 24:10 - ALLALA KUMƐ

¹⁰ Mansa Dawuda ban mɔgɛnu danna, a yisi ma kima tun. A ya a fɔ Mari ye ko, “N bara min ma kɛ la, n bara hakɛ-wɛ le kɛ kɛ la ka bila ile Mari le la wo la. I yandi, Mari, n makoto. N bara kun-takolonya-koe le ladan kɛ la.”

2 Samuwɛli 24:10 Iomraidhean Croise

2 Samuwɛli 12:13

Mansa Dawuda ya a sɔn a hakɛ la, a ko, “N bara bila Mari la.” Nɛbi Netan ya a fɔ a ye ko, “Mari ara i makoto, i ti faga.

2 Samuwɛli 24:17

Mansa Dawuda ya ale niyi-bɔ-melika yen. A ya a fɔ Mari ye ko, “Ko-tinyanɛ ye nde le la. Nde le wara ko-yogomɛ ma. Mɔgɔ-makinikininɛ kɛnu bara nfen ko-yogoma ma? A bɛnnɛ tɔrɔyɛ kɛ ni sigi mabɛ nna denbayɛ le la.”

1 Mansɛnu 8:35

“Ni i ya filiyan sɔ kamasɔrɔn ila mɔgɛnu bara hakɛ kɛ i la, ni anu ya anu ya-lamunun kan tinɛ kɛ la ka anu sɔ anuna hakɛ la,

1 Ko-Kɔrɔta-Karan 21:7

Mansa Dawuda ya min ma wo la, wo ma diya Alla ye. Wo le ya a ma, Alla ya Isirɛla mɔgɛnu tɔrɔ.

1 Ko-Kɔrɔta-Karan 21:8

Mansa Dawuda ya a fɔ Alla ye ko, “N bara min ma kɛ la, n bara hakɛ kɛ ka bila ile, Alla le la wo la. I yandi, n makoto. N bara kun-takolonya-koe le ladan kɛ la.”

2 Ko-Kɔrɔta-Karan 16:9

Mari ye duninya mumɛ bɛɛ kumafɛlɛnna, ado a si ata sɛnbɛ di ata mɔgɔ-latelennɛnu ma. Mansɛ, i wara yuwayɛ kɛ. Ka a bi bi ma ha tumɛ min di ale ye, kɛlɛ ti bɔ i kun ma mumɛ!”

2 Ko-Kɔrɔta-Karan 32:26

Kɔnɔ tɔ-a-la, Mansa Hɛsakaya anubɛ ala mɔgɛ minnu bi Yerusalɛm, wonu ya anu famayigi. Woletɔ Mari ma anu tɔrɔ wo tumɛ ale mansɛ ye a kɛndɛ la.

Yobu 7:21

Ha bi, i ti n hakɛ makoto? I ti i muin nna fɛɛnu ma? A ti mɛ tun, n si taran nna kanbɛ rɔ. Ni i ya n nyini, i ti n yen.

Yaburi 32:5

Wo kɔma, n ya n sɔ n hakɛ la i ye. N bara ko-yogomɛ minnu ma, n ma wonu dogon. N bara a latɛgɛ n burɔ ka n sɔ a bɛɛ la i ye, ado i ya n hakɛ bɛɛ makoto.

Bɔ-Koe-Iyipiti 10:16

Ale mansɛ ya Musa anubɛ Aruna kele tiriya! A ko, “N bara bila wole la hali wota Mari Alla.

Hɛnkilimaya-Kumɛnu 28:13

Mɔgɛ min si a hakɛ dogon, wo tigi ti ta yarɔ. Kɔnɔ mɔgɛ min bi a hakɛ bɛɛ labɔla gbɛ ma ka anu boloka, Mari si kinikini wo tigi ma.

Hoseya 14:2

Wo sɛgi Mari ma. Wo ni matarali-su-kɛ kɛ ko, “Ma makoto ma hakɛ la ka mala matarali-kan labira. Wo kɔma, ma si i matɔgɔ iko ma ara lanyiri kiri i ye nya min.”

Yowɛli 2:12

Mari ko wo ni sunyɛ don ka di. Wo ni tubi bɛrɛbɛrɛkɛ kaka ka wo fan nasɛgi a ma.

Yilan-Yilan Koe 12:11

a ya a fɔ Musa ye ko, “E, ma tigi, i yandi, i kana ma tɔrɔ mala kuntanya-hakɛ kɛla ko la.

Yɔni 1:29

Wo banda kɛ, Yɔni ya Yisa yen nala a wara la. A ko, “Allala Saga-Dan le kɛ la, min si duninya-mɔgɛ bɛɛ hakɛ bi ka ta a la!

Yɔni 8:9

Anu ya kɛ lamɔɛn tumɛ min, anu dama bɔra kelen-kelenyɛ ma ka a dabira kinanu ma ka yigi. Yisa kelen pe le tora anubɛ musi wo sɔnɛ a yakɔrɔ.

Tɔn-Fɔɛ-Fila-Nyɔgɛ 32:6

Wole mɔgɔ-fufafuyinu anubɛ hɛnkilibɔnɛnu, wo ya Mari sara wola fisiriwɔlitayɛ kɛ le la, wa? Wo fa anubɛ wo Dali-Mari le ale la min ya wole ma bɔnsɔn kelen na.

Taita 3:3

Fɔlɔ-nun, kuntan anubɛ kuma-birabɛlɛ anubɛ ko-yogoma-kɛlɛ le male la. Mɔgɛnu ya ma yanfa ko ma ni ma yɔɔnnu na fɛrɛ-nata anubɛ nyɛrɛ-diyana-ko-sufa-bɛɛ bolo. Ma ya mala wati bɛɛ tinya wunduyogoyɛ anubɛ keliyɛ rɔ. Ma gboyara mɔgɛnu ye, ado anu fanan gboyara ma ye.

1 Yɔni 1:9

Ni ma ya ma sɔ ma hakɛ la Alla ye, a si ma sɛninya ka ma bɔ mala ko-yogomɛ-bɛɛ rɔ, ado ale min telennɛ, a ye wo le mala. A si ma hakɛ makoto.

1 Samuwɛli 13:13

Samuwɛli ya a fɔ a ye ko, “I wara yuwaya-koe le ma wo la. Ita Mari Alla ya tɔn minnu di i ma, i ma sɔn wonu bira-koe ma. Ni i ya a sako le kɛ nun, a si a ma, wobɛ i kegeyɛnu ni to mansayɛ la Isirɛla kun na burubukai!

1 Samuwɛli 24:5

Dawuda sɛgira a kɔma ala mɔgɛnu bara. Wo kɔma, a yisi donta a tɔrɛ rɔ a ma bawo a ara Mansa Sɔlila duruki tɛgɛ a la.

1 Samuwɛli 24:6

Dawuda ya a fɔ ala keminɛ wonu ye ko, “Ka ko-yogomɛ ma nna kun-tigi la, alamɛ Mari ya n tanka wo ma bawo Mari le ya ale yabɔ ka a ma mansɛ la. N kana ko-wo-ko ma a la bawo Mari le ya a sigi mansayɛ la.”

1 Samuwɛli 26:21

Mansa Sɔli ya a fɔ a ye tun ko, “Nde le wara hakɛ kɛ i la. Nna den Dawuda, na n bara. Nba, i wara n niyi latanka bi suyi rɔ, n ti ko-wo-ko ma i la tun. N bara yuwayɛ le ladan i la wo la. N bara sama dɔgɔma-ma-de!”