2 Samuwɛli 2:26 - ALLALA KUMƐ

²⁶ Abina ya Yohabu rakele, a ko, “A sɔgɛ ye i la, ma ni to kɛlɛ kɛla burubukai? I ma a lɔn ko kɛlɛ-laban ma fenfen na fɔ koninteyɛ? I ti a fɔ ila keminɛnu ye ko anu ni fara ma la, ado ma dama na-kelen-nyɔgɔma-gbansan de?”

2 Samuwɛli 2:26 Iomraidhean Croise

2 Samuwɛli 11:25

Mansa Dawuda ya a fɔ kilayɛ wo ye ko, “Ta a fɔ Yohabu ye ko a ma-kunya sa, hali a yisi ma tinya bawo mɔgɔ ti a lɔn ni min kunyɛ ye tola kɛlɛ rɔ. A fɔ anu ye ko anu ni anu sɛbɛ don ha anu ni nɔ-ko sɔrɔn soe wo ma.”

2 Samuwɛli 2:14

Abina ya a fɔ Yohabu ye ko, “Ma ni mala kɛlɛ-dan donu nabɔ, anu ni solomurila kɛlɛ-kɛ ka a lɔn ni min si a ta-nyɔgɛ nɔ.” Yohabu fanan sɔnta wo ma.

2 Samuwɛli 2:16

Anu yatɛ bɛnta mɔgɔ mogan-ni-nani ma. Bɛɛ ya a ta-nyɔgɔ bira a kan-kɔlɔma ma. Bɛɛ ya ata solomuri sɔrɔngbɔ fanan a ta-nyɔgɛ tɔnkɔn rɔ. Anu dama fagara anu nyɔgɔn fɛ nya-kun-kelen. Woletɔ anu ya kan tinɛ wo tɔgɔ sa Solomuru-Dugu.

2 Samuwɛli 2:25

Bɛnyamɛ bɔnsɔn-mɔgɛnu ya anu nadɛn Abina fɛ kɔnkɛ wo kuma ka anu sɔ-bole rabɛn.

2 Samuwɛli 2:27

Yohabu ya a fɔ a ye ko, “N bara n keli Alla-nimɛ rɔ, ni i ma kuma sufa kɛ fɔ nun, ma ti bɔ i kɔma ha sina sɔgɔma.”

Yaburi 4:2

E, wole n yogenu, wo ti fara n nafɛyɛ la? Kun-takolonya-kumɛnu anubɛ foninya-fɔɛ di wo ye, ado wo bilanɛ bɛsi-fuyinu fɛ tolon!

Hɛnkilimaya-Kumɛnu 17:14

Ka sɔsɔlɛ lawuli, wo mani de iko yi wa balan sɔgɔ. I ni sɔsɔlɛ wo ban yona alako a kana na to koloyala.

Aiseya 1:20

Kɔnɔ ni wo bilara a la, fɔ wo kunyɛ wa to kɛlɛ rɔ serr! Ale Mari kan le kɛ la.

Yɛrɛmaya 12:12

Kɛlɛ-den-siyaman si tenbi kɔnkɔ-manunkunɛ wonu ma. Nde, Mari si a ma, kɛlɛ-dan wonu ni nyamanɛ wo tɔrɔ. Ka a bi nyamanɛ-dan doi ma ka a sigi a dan doi la, anu si mɔgɛ wo bɛɛ tɔrɔ. Mɔgɔ-wo-mɔgɔ ti kisi.

Yɛrɛmaya 2:30

A ko a ya wole Isirɛla mɔgɛnu tɔrɔ kɔnɔ tɔrɛ wo ma wo yɛ mabɔ. Wo ya wola nɛbinu faga iko yara-kɔnkɔtoe wa a labɔ soge ma, a ye wo fagala nya min.

Yɛrɛmaya 4:21

N yɛ si to gbalani kɛlɛ-mandan tamasere la ha tumɛ mintan? N tole si to kɛlɛ-buri la ha muntuma?

Yɛrɛmaya 46:10

Ma Tigi Mari Alla Sɛnbɛ-Bɛɛ-Tigita tele le kɛ la. A ye nala a tayili sarala bi. A ye nala anu yogenu tɔrɔla bi. Ala faan si anu dɔn ha a buyi la ni fa. A si anu yele min ha a ni wasa. Mari Sɛnbɛ-Bɛɛ-Tigi si a ma, Babilɔn kɛlɛ-dannu bi a yogenu kan natɛgɛla Yufereti bɛ dafɛ kantɔ-wara la.

Yɛrɛmaya 46:14

nde, Yɛrɛmaya ni kumɛ kɛ lawanka Iyipiti nyamanɛ rɔ. N ni a mayon Migidɔli anubɛ Mɛmfisi anubɛ Tapanisi soe burɔ ko, “Wo ni wo rabɛn kɛlɛ kan ma bawo wo bɛɛ ye nala lakira sɔrɔnna kɛlɛ rɔ.

Hoseya 11:6

Kɛlɛ si wola soe tarɛ don-dɛnu keri ka wola soenu ban fegba! N si wole nta mɔgɛnu tɔrɔ bawo wo miri ko wo ye tonyɛ le tɔ.

Kɛwɔlɛnu 7:26

Wo banda kɛ, a ya Isirɛla mɔgɔ fila yen kɛlɛla. A ya a raya ka kɛlɛ ban anu tɛma. A ko, ‘N bɔnu, wo ni wo tole masɔ. Na-kelen-nyɔgɛ le wole la. Nfenna wo ye ko-yogomɛ kɛla wo nyɔgɔn na?’