2 Samuwɛli 19:24 - ALLALA KUMƐ

²⁴ Mansa Sɔli mamanɛ Mɛfibasɛti ya a lamɔɛn min kɛ ko Mansa Dawuda ye nala Yerusalɛm, a tara a labɛn tinɛ. Kebi Mansa Dawuda ya a to nya min, a ya a taran wo nya na le. A ma a kin maku, a ma a buya matɛgɛ, a ma ala kura ku, ado a ma sɔn wo do-wo-do mala fɔ Mansa Dawuda ya nɔ-ko sɔrɔn min kɛ ka sɛgi Yerusalɛm, a nara to a kula.

2 Samuwɛli 19:24 Iomraidhean Croise

2 Samuwɛli 12:20

Mansa Dawuda ya a lasɔ dugi ma. A tara a ku ka a kunyɛ rabɔ. A ya a mayɛlɛma. Wo kɔma, a tara Mari bato tinɛ. A bɔɛ nyɔ, a nara bɔn la. A ya dɔn-fan makele. Anu nara wo la tumɛ min, a ya a dɔn.

2 Samuwɛli 15:30

Mansa Dawuda dimatoe ya Ɔlifi kɔnkɛ yɛlɛ. A salɛ yamatogonnɛ, ado a tonta-rakolɔn ye tagamana ka a yira ko a yisi tinyanɛ. Minnu damasi bilara a fɛ, wo dama kunyɛ yamatogonnɛ wo nya na le.

2 Samuwɛli 16:3

Mansɛ ya a manyinika, a ko, “Mansa Sɔli mamanɛ Mɛfibasɛti, wo ye mintɔ kaka?” Saiba ko, “N ya a to Yerusalɛm soe burɔ le bawo a miri le ko Isirɛla mɔgɛnu bi a benbala nyamanɛ lasɛgila a ma le tun.”

2 Samuwɛli 9:11

Saiba ko, “N tigi, i ya fenfen fɔ, n si wo ma le.” Mɛfibasɛti tora fen-dɔn-kɛla Mansa Dawuda fɛ iko a halala dan.

1 Mansɛnu 2:8

“Nba, Kɛrala den Simayi min bɔra Bahurim soe burɔ Bɛnyamɛ bɔnsɔn nyamanɛ rɔ, wo tumɛ n tanɛ Mahanama soe burɔ, wo le ya n mɔɛn bɛrɛkɛ! Kɔnɔ a nara n taran Yorodan bɛ dafɛ tumɛ min ka n madiya, n ya n keli a ye Mari rɔ ko n ti a faga wulɔn.

Bɔ-Koe-Iyipiti 19:10

Musa ya mɔgɛnuna yabilɛ wo latenbi Mari ma. Mari ya a fɔ Musa ye ko, “Ta a fɔ mɔgɛnu ye ko anu ni anu sɛninya bi anubɛ sina. Anu ni anuna kurɛnu ku.

Aiseya 15:2

Dibon so-burɔ-mɔgɛnu ye tala anuna bɛsi-kɔ-tinɛ kɔnkɛ kuma kesi-koe la. Mohabu kɛnu ya Nibɔ anubɛ Midaba so-tinyanɛ yen min kɛ, anu donta anu sɔnsɔn rɔ diyi-kɛ bolo. Anu ya anu kunyɛ gbanna ka anu dɛ masii ka a yira ko anu yisi tinyanɛ.

Yɛrɛmaya 41:5

mɔgɔ bi-segin nara ka bɔ Sɛkɛm anubɛ Sailo anubɛ Samariya soenu tɔ. Anu ya anu buyɛ masii ka anuna durukinu tafara yisi-tinya bolo ka anu nyɛrɛ matanban ka a tɛgɛ Yerusalɛm tinya-koe ma. Anu nara fui-fan anubɛ isɛnti la anu bolo Mari kɔ-tinɛ Bato-Bɔn la.

Matiyu 6:16

“Wo wa sunyɛ don tumɛ min, wo kana wo yakɔrɛ sa-a-rɔ iko nyɛrɛ-mayiralɛnu si a ma nya min. Anu kɛnɛna anu nyɛrɛ makinikinina alako mɔgɛnu ni a lɔn ko anu bi sunyɛ le tɔ. Wo ni wo hɛnkili to kɛ ko! Anu bara ban anu sarɛ sɔrɔnna feu!

Romu 12:15

Sewa wonu fɛ minnu bi sewala. Di wonu fɛ minnu bi dila.

Hiburunu 13:3

Wo ni wo hɛnkili to yelela-mɔgɛnu ko iko wo ye anu fɛ yele le la. Wo ni wo hɛnkili to mɔgɔ-tɔrɔnɛnu ko. A ni ma iko wole fanan tɔrɔnɛ anu fɛ le.