2 Samuwɛli 16:1 - ALLALA KUMƐ

¹ Mansa Dawuda tenbi Ɔlifi kɔnkɛ la doni, a ya Mɛfibasɛtila wɔli-kɛlɛ Saiba taran nyɔ. Sofɛlɛ fila ye a bolo. Fenfen kirinɛ sa wonu kɔ tɛma fɔ dɔn-fannu, biredi-lɔngbɔn kɛmɛ fila, anubɛ nɔnbɔ-gbɔ-gbalanɛ tɔnsɔn kɛmɛ, anubɛ toro-gbɔ-gbalanɛ gbu kɛmɛ, anubɛ nɔnbɔ-gbɔ-yi gbolo-bɔrɔ kelen.

2 Samuwɛli 16:1 Iomraidhean Croise

2 Samuwɛli 15:30

Mansa Dawuda dimatoe ya Ɔlifi kɔnkɛ yɛlɛ. A salɛ yamatogonnɛ, ado a tonta-rakolɔn ye tagamana ka a yira ko a yisi tinyanɛ. Minnu damasi bilara a fɛ, wo dama kunyɛ yamatogonnɛ wo nya na le.

2 Samuwɛli 15:32

Mansa Dawuda ke Alla bato tinɛ do ma kɔnkɛ wo kun tɛma, a diyana-mɔgɔ-bɛrɛbɛrɛ Araka soe kɛ Husayi, wo ya a taran nyɔ. Wo ye kela a ma tumɛ min, ala duruki rafaranɛ, gbangban ye a kunyɛ rɔ.

2 Samuwɛli 19:17

Wo nara a ta-nyɔgɛ Bɛnyamɛ bɔnsɔn-mɔgɔ waga kelen na a bolo. Mansa Sɔlila wɔli-kɛlɛ, Saiba nara ala den-kei mɔgɔ tan-ni-loli la a bolo fanan anubɛ yɔɔn mɔgɔ mogan. Wonu fɔlɔn kera Yorodan bɛ ma mansɛ ko.

2 Samuwɛli 19:32

Basilayi kɛ, kɛmɔgɛ le ale la. A ara san bi-segin bɔ. Kɛmɔgɛ kɛ, nɔnfulu-tigi-wɛ le a la, ado Mansa Dawuda siginɛ Mahanayim soe burɔ tumɛ min, a ya dɔn-fen siyaman di a ma.

1 Ko-Kɔrɔta-Karan 12:40

Hali bɔnsɔn minnu barɛ fɛ-yan nyɔ la pɔn, iko Isakari wo, Sɛbulɔn wo, anubɛ Nafatali, wonuna sofɛlɛnu anubɛ anuna nyomɛnu anubɛ anuna sara-ninkinu nara dɔn-fan gbansan-gbansan le la ladɛn wo rɔ. Anu nara dɛgɛ-munke la anubɛ toro-gbɔ-gbalanɛ anubɛ nɔnbɔ-gbɔ-gbalanɛ anubɛ minni-fen anubɛ tuli la anu bolo ladɛn wo rɔ. Anu nara ninkinu anubɛ sagɛnu na anu bolo, anu bi minnu mala ladɛn wo manfan la. Anu bi wonu mala bawo Isirɛla nyamanita-mɔgɛnu sewanɛ.

Hɛnkilimaya-Kumɛnu 18:16

Sanbɛ si kilɛ laka mɔgɛ ye, ado ni mɔgɔ-ba do yen-sɔgɛ ye i la, i ni a sanba fan do la.

Yɛrɛmaya 40:10

Nde si to sigini Misipa soe burɔ. Wo ya soe minnu bira, wole si ta sigi wonu tɔ. Babilɔn kɛnu ba na, n si to wo gbɛ rɔ. Wo si to nɔnbɔ-gbɔ-yi ladɛnna anubɛ kɔn-gbɔɛ anubɛ tuli.”

Yɛrɛmaya 40:12

Woletɔ anu bɔra nyamani-gbɛrɛ wonu tɔ kɛlɛ-maburi ya anu nata kan min ka sɛgi anu barɛ. Anu nara anu dantɛgɛ Kɛdalaya ma Misipa soe burɔ. Anu ya minni-fan anubɛ kɔn-gbɔ siyaman nadɛn anu nyɛrɛ ye Yuda nyamanɛ rɔ nyɔ.

Emɔsi 8:1

Allatala ya ko-rayirɛ min yira n na, wo le kɛ la. N ya sende-lafanɛ yen kɔn-gbɔ-mɔɛ la.

Maika 7:1

Nɛbi Maika ya a fɔ ko, “Mata tɔrɔyɛ ara to ma ma fufafu! N yigi tɛgɛnɛ iko kɔnkɔtoe wa a labɔ ki-fannu ma kɔnɔ a ma a gbɔ taran a la. Kɔn-gbɔɛ min dɔn-sɔgɛ wa a bira, a wa ta nyɔ, a ni wo lakolɔn taran filili!

1 Samuwɛli 10:3

I wa bɔ nyɔ fanan, i si ta furr, ha i ni ta ke kɔlɔma-kuru-latankanɛ do kɔrɔ Tebɔ soe dafɛ. I si bɛn kɛmɔgɔ sawa la nyɔ minnu bi tala Alla bato tinɛ Bɛtɛli soe burɔ. Kelan, baa-den sawa ye wo bolo. Wo ye tala wonu na. Doi, biredi-lɔngbɔn sawa ye wo bolo. A sawa nyɔgɛ, i si nɔnbɔ-gbɔ-yi yen gbolo-bɔrɛ do rɔ a bolo.

1 Samuwɛli 16:20

Yɛsi ye Dawuda latala Mansa Sɔli ma tumɛ min, a ya Mansa Sɔli sanbɛnu nata, baa-bulun kelen anubɛ sofɛli-dunu kelen biredi la anubɛ nɔnbɔ-gbɔ-yi gbolo-bɔrɔ kelen.

1 Samuwɛli 25:18

Abigɛli ya wo lamɔɛn tumɛ min, tiriyante wo rɔ a ya dɔn-fen siyaman bi. A ya biredi-lɔngbɔn kɛmɛ fila bi anubɛ nɔnbɔ-gbɔ-yi gbolo-bɔrɔ fila. Wo kɔma, a ya saga-mintanni loli bi ka buyi pani-kunbɛ-nya tan-ni-wɔrɔnfila sa a kuma. Wo kɔma, a ya nɔnbɔ-gbɔ-gbalanɛ tɔnsɔn kɛmɛ anubɛ toro-gbɔ-gbalanɛ bolo-nya kɛmɛ fila bi ka wonu damasi kiri sofɛlɛnu kɔ tɛma.