2 Samuwɛli 15:32 - ALLALA KUMƐ

³² Mansa Dawuda ke Alla bato tinɛ do ma kɔnkɛ wo kun tɛma, a diyana-mɔgɔ-bɛrɛbɛrɛ Araka soe kɛ Husayi, wo ya a taran nyɔ. Wo ye kela a ma tumɛ min, ala duruki rafaranɛ, gbangban ye a kunyɛ rɔ.

2 Samuwɛli 15:32 Iomraidhean Croise

2 Samuwɛli 1:2

a sawa nyɔgɛ wo kɔma, keminɛ do burimatoe bɔra Mansa Sɔlila dagɛ rɔ. Kɔnɔ yanni a ni ke Dawuda ma, a ya ala duruki rafara ka gbangban kɛ a kunyɛ rɔ yisi-tinya bolo. A ke Dawuda ma, a ya a madu Dawuda kɔrɔ ka a gbiliya.

2 Samuwɛli 13:19

A ya ta-gbangban kɛ a kunyɛ rɔ ka ala duruki wo rafara a kan na. A ya a bolo filɛ burun a yɛ la. A dimatoe tara.

2 Samuwɛli 15:30

Mansa Dawuda dimatoe ya Ɔlifi kɔnkɛ yɛlɛ. A salɛ yamatogonnɛ, ado a tonta-rakolɔn ye tagamana ka a yira ko a yisi tinyanɛ. Minnu damasi bilara a fɛ, wo dama kunyɛ yamatogonnɛ wo nya na le.

2 Samuwɛli 16:1

Mansa Dawuda tenbi Ɔlifi kɔnkɛ la doni, a ya Mɛfibasɛtila wɔli-kɛlɛ Saiba taran nyɔ. Sofɛlɛ fila ye a bolo. Fenfen kirinɛ sa wonu kɔ tɛma fɔ dɔn-fannu, biredi-lɔngbɔn kɛmɛ fila, anubɛ nɔnbɔ-gbɔ-gbalanɛ tɔnsɔn kɛmɛ, anubɛ toro-gbɔ-gbalanɛ gbu kɛmɛ, anubɛ nɔnbɔ-gbɔ-yi gbolo-bɔrɔ kelen.

2 Samuwɛli 16:15

Abasalɔm anubɛ a gba-fɛ-bilalɛnu, Isirɛla mɔgɛnu, kɔni, wonu tara Yerusalɛm. Ahitafɛli fanan bilanɛ anu fɛ.

2 Samuwɛli 17:5

Abasalɔm ya a fɔ anu ye ko, “Nba, wo ni Husayi fanan kele. Ma ni a lɔn ale fanan bi min fɔla.”

1 Mansɛnu 11:7

A ya bɔn sɔ Mohabu kɛnuna bɛsi Kimasi ye kɔnkɛ kuma Yerusalɛm soe tele-bɔɛ wara la. Bɛsɛ wo sɔgɔ labɔnɛ Alla la. Wo kɔma, a ya bɔn sɔ Amonnuna bɛsi Molɛki ye fanan kɔnkɛ wo kuma.

1 Mansɛnu 4:16

Husayila den Beyana ye Asɛra sigisɔn-nyamanɛ anubɛ Beloti soe kun na.

1 Ko-Kɔrɔta-Karan 27:33

Mansɛ makawandilɛ do le ale Ahitafɛli fanan na. Mansɛ diyana-mɔgɛ anubɛ a hɛnkili-kɔlɛ le Husayi la min bɔra Araka soe burɔ.

Yaburi 3:7

E, Mari Alla, na n nakisi tinɛ. I ni n yoge bɛɛsi dɛ ratii ka anu nyin murundu anu da rɔ alako anu kana na ko ma n na.

Yaburi 50:15

Tɔrɔyɛ wa na wo ma, ni wo ya n kele, n si wo dɛnbɛ, ado wo si n gbiliya.”

Yaburi 91:15

A ko anu ba a rakele, a si a labira. Anu tenbi yakɔrɔ-mamɔɛ rɔ, a ye anu fɛ. A ko a si anu nakisi ka a ma, anu ni gbiliyɛ sɔrɔn.

Luka 19:29

A gbɛrɛnta Bɛtifagi anubɛ Bɛtani soenu ma tumɛ min Ɔlifi kɔnkɛ dafɛ, a ya ala karan-den filɛ sɔ a yarɔ.

Yasowa 16:2

Ka bɔ nyɔ, dan wo le tara ha Lusi soe ka tenbi nyɔ ha Ataroti-Ada soe ma Araka mɔgɛnu bi kan min.

1 Samuwɛli 4:12

Bɛnyamɛ bɔnsɔn-mɔgɛ do burimatoe bɔra kɛlɛ rɔ ka ta fɔɔ Sailo. A kera nyɔ wulɔn-tele kɔrɔ. A ya ala duruki wo rafara ka gbangban kɛ a kunyɛ rɔ ka a yira mɔgɛnu na ko a yisi tinyanɛ.