2 Kɔrɛnti 9:7 - ALLALA KUMƐ

⁷ Bɛɛ ni kɔlɛ kɛ worɔ iko a ara a miri a burɔ nya min. A kana kɔli kɛ yisi-magboyɛ la. A kana kɔli kɛ bawo anu bi i lagbengbenna. Mɔgɛ min bi fan dila a sewanɛ, wo le di Alla ye.

2 Kɔrɛnti 9:7 Iomraidhean Croise

1 Ko-Kɔrɔta-Karan 29:17

Nta Alla, ile le si mɔgɔ damasi kɔrɔbɔ, ado fɔ mɔgɔ-latelennɛnu, wonu denu bi i hɛnɛna. N bara kɛ damasi latenbi i ma n yisi bɛɛ la. Mɔgɛ min bɛɛsi ladɛnnɛ, anu ya min bɛɛsi labɔ, anu ya a labɔ anu yisi-gbɛnɛ le la.

1 Ko-Kɔrɔta-Karan 29:9

Mɔgɛnu sewanɛ ya fan wonu nabɔ Marila wɔlɛla ko la. Anu dama ya a yen min kɛ ko fen-siyamɛ wo nyɔgɔn bara bɔ, anu dama sewara anubɛ anuna mansɛ.

Bɔ-Koe-Iyipiti 25:2

“A fɔ Isirɛla mɔgɛnu ye ko anu ni na n kɔ-fannu na n ye. Mɔgɛnu ba minnu di n ma anu yisi-sewanɛ la, i si wonu bira anu bolo nde ye.

Bɔ-Koe-Iyipiti 35:5

“Wo ni na wola kɔ-fannu na Mari ye. Wo wa minnu di wo yisi-sewanɛ la, wo ni wonu don nde bolo. Wo ye nala kɔ-fan minnu na, wo le kɛnu na, sɛnɛ wo, wodi-gbɛ wo, anubɛ silɛɛ.

Hɛnkilimaya-Kumɛnu 11:25

Hinante si to fan sɔrɔnna tuma-wo-tuma, ado mɔgɛ min si a ta-nyɔgɛ dɛnbɛ, wo fanan si a sɔrɔn duk!

Hɛnkilimaya-Kumɛnu 22:9

Mɔgɔ-kɔlɛ anubɛ duwɛ le bawo a ye dɔn-fan dila bolo-kolɔnnu ma.

Aiseya 32:5

Wo wati rɔ, mɔgɔ-wo-mɔgɔ ti a miri ko gbiliya-koe le kuntanyɛ la, ni wo ma, ko kensunte telenta.

Aiseya 32:8

Kɔnɔ gbiliya-mɔgɛ si ko-telennɛ ladan. A si a sɔ gben, ko-telennɛla ko la.

Kɛwɔlɛnu 20:35

Wo si to sɛnbɛbɔnɛnu dɛnbɛna nya min, n bara wo dama yira wo la nta wɔlɔ-gbɛlɛmɛ fɛ. Mari Yisa nyɛrɛ ya kumɛ minnu fɔ, wo ni wo yili to wonu ko. A ko, ‘Min bi fan nila, wota sewɛ kolo ka tenbi a ye a dila min ma.’ ”

Romu 12:8

Ni mala sanbɛ le ka donu sɛnbɛ don, ma ni wo ma. Ni nɔnfuli ye min bolo ka donu kɔ, ma ni wo ma ma yisi bɛɛ la. Ni mata sanbɛ le kun-tigiyɛ la, ma ni wo kɛ a kilɛ fɛ. Ni mata sanbɛ le ko-nyima-kɛ la, ma ni a kɛ sewɛ la.

2 Kɔrɛnti 8:12

Ni fen bi wo bolo min ni-sɔgɛ ye wo la, Alla si sɔn wola kɔ-fan wo la iko wo bole danta kan min. Fan min sa wo bolo, wo sɛ sa wo ye.

Tɔn-Fɔɛ-Fila-Nyɔgɛ 15:14

a ki-fen tɔ wo, a kolo-fen tɔ wo, a fui-fen tɔ wo, fɔ ka a boloka gbegesa, iko Mari Allata duwɛ tora wo fɛ nya min. Ni a taranta, wo na-kelen-nyɔgɛ min bi wɔlila wo kɔrɔ iko yɔɔn san wɔrɔ kɔrɔ, i tenbi wo bolokala, i kana i yisi magboya a la bawo a bɛnta, i ni min nyɔgɔ di wɔli-kɛlɛnu ma, i ye wo le talɛ dila ale ma. Ni min ya wo ma, Mari Allata duwɛ si to wo fɛ boi! Wo ni wo miri ko wole fanan bi yɔɔnyɛ rɔ Iyipiti nun. Wota Mari Alla le ya wo labɔ nyɔ. Woletɔ wota Mari Alla ara tɔn kɛ di wo ma bi. “Kɔnɔ ni a taranta, ile anubɛ ila denbayɛnu diyara le ila yɔɔn wo ye, ado a sigi-bole i fɛ kin, i si a bi worɔ ka ta a la ila bonda-dɛ la ka a tole sɔgɔ bɛɛn la kankan ma nyɔ. Wo si a yira mɔgɛ la ko yɔɔn wo si to wɔlila i ye a siyi-tele-bɛɛ kɔrɔ. Hali yɔɔn-musi fanan si ma wo nya na.”

Failiman 1:14

N sa a fɛ ka i fɔrɔsɛ ko fɔ i ni n dɛnbɛ. N bi a fɛ ko i ni a kɛ i nyɛrɛ sako la. Woletɔ n ti ko-wo-ko kɛ fɔ i wa sɔn.

Yemesi 5:9

N na-kelen-nyɔgɛnu, wo kana gbunya wo nyɔgɔn kɔrɔ, ni wo ma, Alla si wo kiti tɛgɛ. Wo ni wo yɛ lata. Kiti-tɛgɛlɛ sɔnɛ dɛ la. A sɔgɛ ye a la, a ni don.

1 Pita 4:9

Wo ni wo nyɔgɔn yiya, ado yisi-magboyɛ kana taran a rɔ.