1 Timoti 3:2 - ALLALA KUMƐ

² Fɛɛ-wo-fɛɛ kana taran chɔchi-mɔgɔ-ba la. A ni a telen ala musi ye. A ni ma sɛbɛna-mɔgɛ la koe bɛɛ rɔ. A ni ma nyɛrɛ-mara-mɔgɛ la anubɛ ala ko-ladan-nya ni telen. A ni sundannu tabira a kin na! A ni kusanya mɔgɛnu karanna.

1 Timoti 3:2 Iomraidhean Croise

Aiseya 56:10

Kun-tigi minnu bɛnta ka mɔgɛnu kandan, wonu fiyonyanɛ. Anu ma a lɔn anu bi min kun na. Anu dama manɛ iko wuli min ti ke gbongbonna. Anu ti ke wonwonna mɔgɛnu ma. Kinɔgɛ di anu ye ha! Anu sa fenfen kun na fɔ kiyo-kunba-sɛ.

Luka 1:6

Anu filɛ bɛɛ telennɛ Alla yala. Anu ya Marita tɔn anubɛ sereya bɛɛ bira a kila-bɛrɛbɛrɛ fɛ.

Luka 2:36

Nɛbi-musi do ye nyɔ nun, a tɔgɛ Anna. Fanuwɛlila dan le wo la ka bɔ Asɛra bɔnsɔn rɔ. Musu-kɔrɔ-ba le min bara san bi-segin ani san nani bɔ. A ya san wɔrɔnfila dɔrɔn kɛ kei-wara-sigi rɔ, yanni a ni ma kɛɛ-musi la. A ye Alla-Bato-Bɔn la tolon ka to Alla batola su-ni-tele madiyalɛ anubɛ sunyɛ rɔ.

Romu 12:13

Dɛnkɛninya-mɔgɔ bolo-kolɔn minnu bi wo tɛma, wo ni hɔn wonu na. Wo ni sundannu tabira.

Filipai 2:15

Wo ni ma Allala den-sɛninyanɛnu na minnu telennɛ, ado fɛɛ-wo-fɛɛ sa wole la. Hali wo siginɛ duninya-mɔgɔ-radunɛnu anubɛ mɔgɔ-yogomɛnu tɛma, wo tenbi anu makawandila nimaya-kumɛ la, wole ni malan iko lolenu. Ni wo ya wo ma, Kirasiti wa na lunyɛ min, n si n nyɛrɛ-matɔgɔ-kunya sɔrɔn wola ko la worɔ, ado a si gbɛ bɛɛ yala ko nta wɔlɛ ma kɛ fu!

1 Timoti 3:12

Chɔchi-dɛnbɛni-kɛlɛ ni telen ala musi ye. A ni ala dannu anubɛ ala bonna-mɔgɛnu mara a kin na!

1 Timoti 3:8

Chɔchi-dɛnbɛni-kɛlɛnu fanan ni ma sɔn-nyima-tiginu na. Anu ni ma kan-kelen-tiginu na. Anu kana ma baan-minnɛnu na, ni wo ma, tɔnɔ-yogo-nyininɛnu.

1 Timoti 4:3

Wo mɔgɔ-sufanu bi mɔgɛnu karanna ko furu-kiri-koe anubɛ dɔn-fan-donu dɔn-koe, ko-yogomɛ le wonu na. Kɔnɔ ni i wara ban baraka birala Alla ye wonuna ko la, Alla ko wonu ma yogo. A ya wonu nadan dɛnkɛninya-mɔgɛnu ye minnu bara ban tonyɛ lɔnna.

1 Timoti 5:10

Ni mɔgɛnu bi musi wo matɔgɔla ala kɛwɔli-nyimɛnuna ko la, anu ni a tɔgɛ sɛbɛ. A ni ma musi la min bara ala dannu makolo a kin na ka sundannu yiya a warɛ. A ni famayigiya-wɔlɛ kɛ a ta-nyɔgɛ dɛnkɛninya-mɔgɛnu ye ka mɔgɔ-tɔrɔnɛnu fanan dɛnbɛ. A ni a nyɛrɛ di kɛwɔli-nyimɛ-sufa-bɛɛ ma.

1 Timoti 5:22

I kana gbaran i nyɛrɛ la ka i bole sa mɔgɔ kuma tiriya Marita wɔlɛla ko la. Ni i ya wo ma, wo wa bui, wo filɛ ara don hakɛ rɔ. I ni i nyɛrɛ mara sɛninyɛ rɔ wati bɛɛ.

1 Timoti 5:9

Kɛɛ-musi min sɔrɔn ma tenbi wɛ san bi-wɔrɔ la, i kana wo tɔgɛ sɛbɛ kɛɛ-musi-doinu tɔgɛ sɛbɛnɛ kan min, ado a nyɛrɛ latɛgɛnɛ ala kei kelen pe le ma.

2 Timoti 2:24

Marita wɔli-kɛlɛ kana kɛlɛ kɛ fɔ ka ko-nyimɛ kɛ bɛɛ ye. A ni ma karan-mɔgɔ-nyimɛ la min si a munyu mɔgɛnu kɔrɔ.

Taita 2:2

A fɔ kɛmɔgɛnu ye ko anu ni ma sɛbɛna-mɔgɛnu anubɛ hɛnkilimɛnu anubɛ nyɛrɛ-maralɛnu na. Anu ni ma mɔgɔ-kɛndɛnu na anuna dɛnkɛninyɛ rɔ. Anu ni mɔgɛnu keni ka anu munyu mɔgɛnu kɔrɔ.

Hiburunu 13:2

Wo ni wo hɛnkili to sundannu ko ka anu yiya wola bɔnnu na. Mɔgɛ donu ya wo ma tumɛ min, anu ya melikanu yiya, anu ma taran a kalama.

Hiburunu 3:14

Ni ma tora lanayɛ kɛla ka bi a fɔlɔtɛ ha ala ban, ma dama ye ta-nyɔgɔnyɛ kɛla Kirasiti fɛ worɔ.

1 Pita 4:7

Koe bɛɛ ban-tumɛ ara gbɛrɛn. Wo ni wo nyɛrɛ mara ka wo yɛ lakalan, woletɔ wo si ke ka Alla matara a kilɛ fɛ.

1 Pita 4:9

Wo ni wo nyɔgɔn yiya, ado yisi-magboyɛ kana taran a rɔ.

1 Pita 5:8

Wo ni wo yɛ laka, ado wo yɛ lakanɛ ni to dɛɛ! Wo yoge, Setanɛ ye wo manɛgɛnna iko yarɛ min bi borondo-borondola. A ye mɔgɛ nyinina, a si min dɔn.