ZEPHANIAH 1:4 - Khumi Common Language Bible

⁴ “Kai ly Jerusalem mary hawi Juda pri y awm nai khumi bawibawichi ai katamyh ai. Huni meingtym y Bala tameuh ai chiu nai sai kataphra be ai i, amimi py huni tameuh teng y kalop sa nai pathyp pi nai keungchi ai pany jo ai ny y.

ZEPHANIAH 1:4 Iomraidhean Croise

2 ARENG KEH 21:13

Samari mary hawi Israela samrang Ahaz hawi katu chanauchi ai pajeng nai kamta, Jerusalem mary y kapajeng ai. Tamui changpyn iy pakhiu meuh nai samtang kamta, Jerusalem mary theung y khumi leaungrei py by y na pa-rei katamyh ai.

2 ARENG KEH 23:12

Samrang Ahaz i awm nai samrang yhm amphu salo y Juda samrangchi sa nai maichamchi py, Achura yhm apai nyhrei theung y samrang Manase i sa nai maichamchi py, samrang Joseah ly taphra iy dei lawm pa-rei sa chum baly, Kidron leaunghawi theung y aphi pawn nai ne.

2 NENG SATANG 34:4

Ni i leu pei nai kamta Bala tameuh ai chiu nai maichamchi taphra pawn iy, tameuhnu Asherah mynchi hawi takhra mynchi py taphra piupa pawn chum baly, huni maichamchira apathyp nai khumichi i tapreaungchi salo y hei u phro bo.

THEU NAI 15:12

Nang ly lamtang kiu pheu nai deaungkho y, khaileaung my kaichi i paleung ka-echi ai pajawn pawn nai ne.

JEREMIA 15:6

Nangchi ly kai ai khai u su bo. Nangchi ly kai ai nithun thun u bo. Kai ly kado theu nai am-yh keaung nai deaungkho y, kiu pheu iy nangchi ai kang taphra bo,” napi.

JEREMIA 6:12

Nichi i yhmchi, li hlauchi hawi ajuchi ly ami i kiu y tym ai. Kai ly hini pri i khumichi ai kiu pheu iy pajeng ai.

Ezekiela 25:7

Ati mana nai mo na baly kai i kiu pheu iy nangchi ai tiu ai nai khumi takhrachi i kiu y kaimy pei ai. Kai ly nangchi ai tamyh pyn ai nai pa-rei kasa ai i, nangchi ly nangmychi i saleaung y awm ai nai nga u ai ny y. Khumi cheng harei kamta py angdo u pajau ai ny y. Huna nai khala kai ly Areng ne, nanai nangchi pany u ai,” napi.

Ezekiela 6:14

Kai ly kiu pheu iy nichi i pri taphra ai. Israela chengchi i awm nai meingtym ngierei y kangheng patleaung y naimy, tokalawi mang daichi ka-vym dengdai, tosyh mang Riblah mary khrairei, khumi angso savai tlang nai meingtym kalawn hai ai. Huna nai khala kai ly Areng ne, nanai khumi bawibawichi my pany u ai.

HOSEA 10:5

Samari mary i khumichi ly Bethavan mary y awm nai muku si katai myn tama vui nai molam y, jei i vo tangam u ai. Huni myn ai chiu nai khumichi hawi pathyp pi nai keungchi ly muku si katai myn i vui y vo u ai. Huni muku si katai myn i sa thai naira tama iy, pri takhra mang y syn vui nai khala, nichi ly tangam u ai.

MIKHA 5:13

Kai ly nangchi i chiu nai mynchi hawi nangchi i chiu nai leungchengchi taphra ai. Mo mang y ly nangmychi kiu hawi sa naichi ai chiu u moh.

ZEPHANIAH 2:11

Areng ly nichi ai kaso theu hai ai. Mymy ly khaileaung pri y awm nai tameuhchi ai tama hai ai i, khumi cheng cheaungkhangchi ly mymychi i pri tleitleirei y, mymy ai chiu u ai.

ZEPHANIAH 2:13

Areng ly kiu pheu iy sa thai naira hawi, Asuria pri taphra ai. Mymy ly Ninevi mary y, tui by y nai daichi ka-vym kamta, khumi angso savai tlang nai mary kaphra lawm hai ai.