NEHEMIA 9:32 - Khumi Common Language Bible

³² “Aw Tameuh, kaichi i Tameuh, nang ly khri pa-rei tahm asang parai na ly! Khri pa-rei jei hyn ai nai hawi iy, sa thai naira len parai na ly! Nang ly nangmy i Leu Maikawm molam adeu naichi ai ka-ym awm naimy kry bo. Kaichi ly kaimychi teng y Asuria samrangchi my ana kali kachi nai neng dengdairei, vaini khrairei ngari kamtang ka-vum u na bo ly! Kaichi i samrangchi, lu sa naichi, pathyp pi nai keungchi, amochi, kaimychi i amsi pajochi hawi mipui bawibawichi ly ngari kamtang avum u bo. Kaichi mana tanrei ngari kamtang avum mo, nanai pany pi jo kyh ba!

NEHEMIA 9:32 Iomraidhean Croise

1 ARENG KEH 8:23

“Aw Israela chengchi i Areng Tameuh, kani mang y py, khaileaung y py, nang hawi atawm nai tameuh ly by y; nang i khumichi ly nang i leu ai paleung hawi verei tangai nai khala y, nang ly nichi hawi asa nai Leu Maikawm ai khaw hai iy, nang i pahen nai patei pi ba.

2 ARENG KEH 15:19

Asuria empara samrang Tiklath Pilesa ly Israela pri theung y kun iy tavai tiu bo. Huna nai khala Menahem ly mymy i sa thai naira khaw jo ai nai molam y, tangka chang sie 552,50rei hawi meimai sa.

2 ARENG KEH 15:29

Samrang Pekah my peang nai thym khala, Asuria empara samrang Tiklath Pilesa ly Ijon mary, Abelbet Maaka mary, Janoah mary, Kedesh mary, Hazo mary hawi Kilead pri, Kalili hawi Naphtali prichi ai peang vui iy, khumichi ai py Asuria pri mang y langheng y hawi pawn nai ne.

2 ARENG KEH 17:23

Naibaly Areng ly nichi ai, mymy i miseaung amochi dengdairei pany hai nai leu pei nai kamta, mymy mei ka-niu i nai patheu vui bo. Hunai deaungkho y Israela chengchi ly Asuria pri y pri pala nai avum u i, huni pri y vaini khrairei awm u nai ne.

2 ARENG KEH 17:3

Asuria empara samrang Shalmaneser my tavai tiu nai khala, Hosea ly tavai sum nai deaungkho y saneng tleirei kahm pei ai nai tla.

2 ARENG KEH 17:6

Hosea my peang nai saneng takawrei nai khala y, Asuria empara samrang ly Samari mary ai peang vui iy, Israela chengchi ai Asuria pri mang y langheng hawi vui bo. Hunichi theung i phyreichi ai ly Halah mary theung y khai; phyreichi ai ly Kozan ka-peang Habor tavo sahawi y khai, phyreichi ai ly Media pri i marychira y khai nai ne.

2 ARENG KEH 23:29

Samrang Joseah i peang nai thym khala y Aikupta samrang Neko ly Asuria empara samrang ai sabawm ai nai tavaimichi hawi Euphrat tavo mang y amsa bo. Samrang Joseah ly Mekido mary y Aikupta tavaimichi ai paka ai nai atho sa i, tavai keung y dei nai ne.

2 ARENG KEH 25:7

Zedekiah i chapochi ai my i mei ka-niu y padei chum baly, Nebukhadnezar my Zedekiah i mei hmchi tha piu vui iy sengkry hawi pakheng i, Babulon pri mang y hawi jo bo.

EZARA 4:10

Samari mary hawi Euphrat tavo pui nidym prika-peangra y ang pyn hai ai nai sa thai naira len nai samrang Ashubanipa my pato nai takhra khumi mipuichi teng i cha ne.

EZARA 4:2

Hunai deaungkho y nichi ly Zerubabela hawi nupaichira y lu sa nai khumichi teng y chei u iy, “Achura yhm sa naira y kaichi ai py nangchi hawi vanrei abawi ai nai pei kyh; kaichi ly nangchi i chiu nai Tameuh ai chiu teang nai ne. Kaichi ai hini meingtym y awm ai nai Asuria samrang Esarahadon my ang pato nai dengdairei, huni Tameuh teng y kapathyp u nai ne,” napi u bo.

EZARA 9:13

Kaichi ly kaimychi i kamngo nai molam y hina tanrei pajeng naira avum u teu i py, aw kaichi i Tameuh, nang ly kaichi i tlang tleaung y pajeng ai nai avo khyp teu i py, nang i pahen nai saho y tlang vui tem hai y nai ne, nanai kaichi pany.

NEHEMIA 1:5

Tameuh teng y, “Aw kani pri mang y awm nai Areng Tameuh! Nang ly tahm asang nai deaungkho y kaichi ly jei kaji naimy tahm kang khai u nai ne; nang ly nangmy ai tamen iy leu pei nai tangai nai khumichi hawi leu maikawm asa nai khaw hai bo.

SAM 47:2

Tahm asang parai nai Areng ly ka-jei hawi parai; mymy ly khaileaung pri verei y peang nai, nang parai nai samrang ne.

SAM 66:3

“Nang i sa nai saichi ly khrikhri pa-rei lyh ai hawi parai na ly! Nang i sa thai naira ly khri pa-rei len parai nai deaungkho y, paleung ka-echi ly nang i mo y jei naimy, abyh kajeaung kaji na bo.

SAM 66:5

Tameuh i sa nai saichi hawi, khumichi i vui y mymy i sa nai lyh ai hawi parai nai saichi ai, jeu ly khen u.

THEU NAI 18:8

Mosi my ampu Jethro teng y, Areng ly Israela chengchi ai atleu pi ai nai molam, Aikupta samrang hawi Aikupta chengchi tlang tleaung y atiti tym hai nai leaungsai bawibawichi amti pi nai ne. Huni bo y Israela chengchi lam sala y avum nai rai nairachi hawi vanrei, Areng ly Israela chengchi ai atleu pi nai satang py amti pi bo.

ISAIA 9:6

Kaichi i vui deaungdi tapen pi! Kaichi i vui chapo ang pei bo! Ni ly kaichi ai ang peang ai. “Ni i amyn ly rengrang tlai,” “Tau pei nai keung,” “Sathai naira len parai nai Tameuh,” “Deungtasarei Ampo,” “Tlamsa nai samrang i Chapo,” nanai amyn pathi ai.

DANIELA 9:4

Kai ly kaimy i Areng Tameuh teng y chiu sa iy, kaimy khumichi i kamngochi ahui pi bo. Kaimy, “Aw Areng Tameuh, nang ly nang parai nai ne i, kaichi my nang ai tahm kang pasang u bo. Nang ly nangmy i Leu Maikawm khaw hai iy nangmy ai tamen i, Reita leu pei naichi sa patawm nai khumichi teng y, khaw parai nai tamen naira patei pi nai ne.

DANIELA 9:6

Kaichi ly kaimychi i samrangchi, samrang i cho chanauchi, amsi pajochi dengdairei mipui bawibawichi i tlang tleaung y, nang i miseaung amochi my nang i amyn y thui pi naichi kaichi ly tangai u y nai ne.

DANIELA 9:8

Aw Areng, kaichi i samrangchi, samrang i cho chanauchi hawi amsi pajochi ly angji ngai nairachi sa naimy, nang i tlang tleaung y kamngo sa u bo.

Levi 26:18

“Nangchi ly huna tanrei pajeng naira avum u i py, kai i leu tangai y asai baly, kai ly nangchi i tlang tleaung y pajeng naira phy tlen saryhrei kang tym hai panawi bi ai.

Levi 26:21

“Nangchi ly kai ai ka-awi sa iy kai i leu tangai y asai baly, kai ly pajeng naira phy tlen saryhrei kang tym hai panawi bi ai.

Levi 26:24

kai ly nangchi ai nithun thun pi vui iy, angchei i tleaung y pajeng naira ty keh nai phy tlen saryhrei kang tym hai panawi bi ai.

Levi 26:28

kai ly kado theu kang tlau ai i, vaichi khala i tleaung y ty keh nai pajeng naira phy tlen saryhrei kang tym hai panawi bi ai.

Leu Thui Nai 7:12

“Nangchi ly hini leu pei naichi ai ka-ym awm parai naimy tangai u baly, nangchi i Areng Tameuh my nangchi i amsi pajochi teng y adeu nai kamta, Leu Maikawm ai khaw hai jojo ai i, mymy i khaw parai nai tamen nai sai py patei ai.

Leu Thui Nai 7:13

Mymy ly nangchi ai tamen iy amtheaungra pei nai deaungkho y, nangchi ly peung ai i, cho chanau neangneang sa u ai; mymy ly nangchi i li hlauchi ai amtheaung hai nai deaungkho y, amti amjang, kreip hang hawi olive asitui neangneang nga u ai Mymy ly nangchi ai amtheaung hai nai y, si, beram tawnbawichi py peung ai. Nangchi i amsi pajochi teng adeu nai pri y nangchi tym nai khala, huni amtheaung nairachi ang pei ai.

Leu Thui Nai 7:21

Hunai deaungkho y hini khumichi ai jei u moh. Nangchi i Areng Tameuh ly nangchi hawi vanrei awm; mymy ly sa thai naira len iy ka-jei hawi nai Tameuh ne.

Leu Thui Nai 7:9

Nangchi i Areng Tameuh naini Tameuh tatang ne; mymy ly ka-ym awm nai keung ne, nanai pany u. Areng ly mymy ai tamen iy leu pei naichi tangai nai khumichi ai, deung kangthau sang neangneang khrairei, mymy i Leu Maikawm khaw hai iy, nichi teng y tamen naira patei pi jojo ai.