Nichi ly tako paawi nai takeang mai kamta, atiu ai ngai nai paleung angveaung naimy awm u nai ne. Nichi i kado theu nai ly angveaung pa-jei na. Khawn khutawi baly mai angveaung bo.
Hunai ny y baly ami my khumi atho kaawm ai kawm manme y baly, atho kaawm i yhm y kun iy mymy i yhmtheaung ly mana la pi thai ai mo? Hunai bo y naini la pi thai ai ngang.
Hunaibaly chei iy mymy tleaung y kamngo keh nai vawinam takhra saryhrei hawi i, hu y kun iy awm u jo ryp; naibaly huni khumi i kangkhym i awm nai sai ly angchei i tleaung y hawi y keh bo. Hunai kamta ly vai deung i kangthau kamngo parai naichi i tlang tleaung y tym ai,” nanai pathang.
(Huni leu ly khumi kamawnchi ai dawn hai nai deaungkho y thui nai ny y leang; mymy ly paviu nai keung ne i, tangka sakheu kry iy theung y tangka khai nai ly la reng nai deaungkho y thui nai teu.)
hunira y ly nangchi ly jangni y hini khaileaung pri i reita kamta tako u nai ly, ali y aly peang nai areng, vai ym y nai chanauchi theung y sa dudu nai phailo i reita kamta.
Nichi ly achi theung i dengdairei theu bo, na i py nichi ly achi i khumi tatang ny y leang; nichi ly achi i khumi tatang ne i khyly achi teng y ang awm jojo ai bo; na i py nichi bawibawi ly ha py achi i khumi tatang ny y leang, nanai hawihai palai amteng thai ai nai ang theu pi veng nai bo.
Bechi awi, nangchi ly Tameuh i dengdairei ne i, nangmychi y awm nai keung ly khaileaung pri y awm nai keung tleaung y len keh nai deaungkho y, nangchi ly hunichi ai pajau bo.