LUKA 9:26 - Khumi Common Language Bible

²⁶ Ami py kaimy ai hawi kai i leu ai py kaji hai nai ngierei ly, Khumi i chapo ly mymy i nang parai naira hawi, Ampo i nang parai naira hawi, kani pri amtaw thau nai kachaichi i nang parai naira py apu naimy ang jeu nai neng khala y ly, huni khumi ai ly ang kaji hai teang ai.

LUKA 9:26 Iomraidhean Croise

ISAIA 53:3

Kaichi ly ni ai paso i, khai su nai ne. Ni ly ngari kamtang hawi no patang nai avum. Ni ai khen alengli nai khumi leaungrei py by y. Kaichi ly ni ai vang teng y nai khumi kamta, athang khai y naimy nai ne.

DANIELA 7:10

Huni areng atehra mang dengdairei, tavo leaung nai kamta kangvang sangso theu. Huni meingtym y ly mymy i kalop sa nai khumi sang neangneangchi awm. Mymy i mo y angdo naimy kalop sa nai py, meaung neangneangchi awm nai ne. Tara chih nai neng amteaung ai bo i, cha-iuchi kadai u bo.

MATTHAI 16:27

Naibaly Khumi i Chapo ly mymy i kani pri i amtaw thau naichi hawi Ampo i nang parai naira apu naimy ang jeu ai, hunai khala y ly khumi leaung leaungrei ai ni i atiti sa nai kamta heung teang ai.

MATTHAI 25:31

“Na i py Khumi i Chapo ly kani pri i amtaw thau nai bawibawichi hawi, mymy i nang parai naira amthyp naimy ang jeu nai neng khala y ly, mymy i nang parai nai atehra y ateh ai;

MATTHAI 26:64

Isu my ly ni teng y, “Nang ly thui khyp bo. Na i py kang thui pi, nangchi ly vai mo mang y Khumi i Chapo ly atiti py sa thai nai keung i lamtang mang y ateh nai, kani mang i khupanym tleaung y jeu nai niu u ai,” napi.

MARKA 8:38

Ami py vai deung kangthau pajang sa nai hawi kamngo sa reng naichi theung y kaimy ai hawi kai i leu ai py kaji hai nai ngierei ly, Khumi i Chapo ly kani pri i amtaw thau naichi hawi mymy i Ampo i nang parai naira apu naimy ang jeu nai neng khala y ly, huni khumi ai ly ang kaji hai teang ai”, napi.

JOHAN 12:43

ati mana nai mo nabaly nichi ly Tameuh my palo nai tleaung y khumi i palo nai ngai keh.

JOHAN 5:44

Nangmychi my apalo leungtang i, Leaungrei Awm Khyh nai Tameuh i dengdairei theu nai palo naira ai ly nangchi hau y: mana ym u thai ai mo?

AMTAW 10:22

Naibaly nichi my ly, “Kornelia, tavaimi chungvaiei lu, khumi kahawi, Tameuh ai tahm khai nai, Juda cheng bawibawi theung i amyn kahawi awm nai, ni teng y kani pri i amtaw thau nai kachai leaungrei ly nang i leu thui nai pany ai nai hawi, mymy i yhm y nangmy ai palau ai nai py thui pi na a,” napi.

ROM AVANGCHI TENG Y PAWLA I CHA PA NAI 1:16

Kai ly Satang Kahawi ai ly kakaji hai y leang; huni ly ami py ym nai ngierei i vui ly paheng ai naira lawn ai nai Tameuh i atiti sa thai naira ne; angchei y ly Judachi i vui ne, naibaly krikchi i vui py ne teang.

II KORINTH 12:10

Hunai deaungkho y Krista i molam y ham y naira y py, kangji pei naira y py, rai naira y py, ana hai naira y py, dawn amchei naira y py kakawn lawh nai ne; kai i ham y naira tleirei y kaham lawh nai ne.

KALATIA 6:14

Na i py kai naini achi i Areng Isu Krista i kraws ai ny y baly kai i amlyh ai naira awm moh sy, huni i saho y ly khaileaung pri ly kai i vui tahen nai awm bo, kai py khaileaung pri i vui y tahen nai kaawm teang nai ne.

I TIMOTHEI 5:21

Nang ly hawihai deng y naimy cheh iy patle takhra nai tarawi y ati sai py so y naimy, Tameuh hawi Krista hawi vawi takhra nai kani pri i amtaw thau naichi i mei ka-niu y py huni leu patawm ai nai leu kang pei.

II TIMOTHEI 1:12

Hunai deaungkho y kai ly hini atitichi kapatang : na i py kai ly kaji y leang; kai i ym nai keung ai ly kapany i, ni teng y kaau nai ly huni kani i vui y mymy ly hawihai kry thai, nanai kapany khyp bo.

II TIMOTHEI 2:12

Achi ly kham baly, Achi ly mymy hawi vanrei peang ai; Achi ly mymy ai apha baly Mymy py achi ai apha teang ai;

HEBRAI 11:26

naibaly ni ly kawn nai vang nga ai nai angdeang lawh veng nai deaungkho y Krista ai tahm khai y naira ai ly Aikupta pri i yhmtheaung tleaung y ly yhmtheaung nang keh nai palawn lawh.

HEBRAI 13:13

Hunaibaly achi ly mymy ai tahm khai y naira ai pho iy, avang yhm meaungteng y mymy teng y chei u sina.

JUDA 1:14

Naibaly Adam i dengdairei kangthau saryhrei nai Enoka ly hunichi teng y py leu thui yb i, “Khen cham, khumi bawibawichi ai tara chih ai nai hawi,

AMTENG HAI NAI 1:7

Khen u cham, mymy ly khupanym theung y ang jeu ai bo; naibaly mei bawibawi hawi, ni ai thun naichi py mymy ai niu ai; naibaly khaileaung pri cheng cheaungkhangchi ly mymy deaungkho y vo hang u ai. Ne sy. Amen.

AMTENG HAI NAI 20:11

Hunaibaly areng atehra kangleung kalen pui hawi, huni tleaung y ateh nai keung ai py kaniu; mymy i mei ka-niu dengdairei ly kani khaileaung preang pawn bo: hunini i vui y awmra py by y leang bo.

AMTENG HAI NAI 21:8

Na i py jei naichi hawi, ym y naichi hawi, amso ngailai naichi hawi, khumi ai padei naichi hawi, angai naichi hawi, atam kawp naichi hawi, myn y chiu naichi hawi, ka-chawi thui nai bawibawichi py mai hawi kan kang nai ang y phy nga ai nai nichi i vui ne ai: huni ly pa-nyh dei naira ne,” napi.

AMTENG HAI NAI 3:5

Pajau nai keung ai ly hunai kamta ateaung kangleung amthyp hai ai, naibaly heng naira cha-iu theung i nai mymy i amyn kataphra pi ai ny y: Ngaai i mo y hawi, ni i kani pri i amtaw thau naichi i mo y py mymy i amyn ly kaimy asa hai ai.