LUKA 13:34 - Khumi Common Language Bible

³⁴ Aw Jerusalem, Jerusalem amochi ai padei nai keung nang teng y pato naichi ai ly lengseaung y aphi ka nai keung awi: A nu my mymy i chochi ai pakhi anui y o hai achu nai kamta, nang i chanuchi ai o hai achu ai nai tlen majirei kang tau mo? Na i py nangchi ly ngai u y.

LUKA 13:34 Iomraidhean Croise

NEHEMIA 9:26

“Na i py nang i khumichi ly nang ai tiu iy, nang i leu tangai u y; nichi ly nang i Reita leu pei naichi khai u su nai ne. mymychi ai pany hai nai keung, mymychi ai nang teng y ali teaung ai nai thui pi nai keung amochi ai padei u. Nichi ly nang i tlang tleaung y avawrei mei aniu u y nai ne.

NEHEMIA 9:30

Nang ly nichi i tlang tleaung y saneng tlei tleirei neaung kham naimy pany hai bo. Nang i pany hai nai keung amochi my thui parip u teu i py, nang i khumichi ly kano pang u nai ne. Huna nai y nang ly cheng takhra khumichi teng y nang i khumichi ai tiu ai nai pei bo.

SAM 149:2

Israela chengchi awi, nangchi ai sa nai keung molam y amo theu u; Zion mary i khumichi awi, nangchi i samrang molam y amo theu u!

SAM 17:8

Nangmy i meicho kangvai kamta kai ai kry kyh ba. Khumi hawi y naichi my tiu naira i nai kai ai

SAM 36:7

Aw Tameuh, nang i khaw parai nai tamen naira ly khri pa-rei khrei ai nai hawi! Kaichi ly nang i pakhi ka-khui anui y chymme naimy kaawm u bo.

SAM 57:1

Kai ly nang teng y abyh ai nai ahihawi nai ne; hunai deaungkho y kai ai pahen kyh ba; aw Tameuh pahen kyh ba. Ali pui khu pui theu nai aham nai ryrei, kai ly nang i pakhi ka-khuira y abyh nai ne.

SAM 81:13

Kai i khumichi ai kai i leu tangai ai nai kangai hai; kai i leu pei naichi sa patawm ai nai kangai hai!

SAM 91:4

Mymy ly my i pakhi hawimy, nang ai ang khiu ai; nang ly mymy i kry nai saho y chymme naimy awm ai; mymy i ka-ym awm naimy ly nang ai ama hai naira khupui lawm ai.

ISAIA 30:15

Israela chengchi i chai parai nai Areng Tameuh my khumichi teng y, “Nangchi ly kai teng y vawi iy kajeaung kaji naimy kai ai ym u. Hunaibaly nangchi ly atho ham naira nga iy, atleu naira nga u ai,” napi. Na i py nangchi ly tangai u y!

ISAIA 50:2

Kai ly kaimy i khumichi ai atleu ai nai jeu nai thym khala y, ati mana nai y nichi ly kai ai ka-vum so u y lawh mo? Kaimy palau nai khala, ati mana nai y pathang u y lawh mo? Kai ly nichi ai atleu pajau y na pa-rei, atho di nai sai a? Kaimy pangli ai leu pei baly tui kang hai pajau. Tavochi ai khutaha daichi ka-vym lawm hai vui pajau nai ne. Huni tavochi ra y tui by y nai deaungkho y, ngochi ly dei be bo.

JEREMIA 2:30

Kai ly nangchi ai kang parip i py, kamran by y. Nangchi ly thui rip nai ai ngai u y. Khri pa-rei kado theu nai khrangsi kamta, nangchi ly nangmychi i amochi ai padei u bo.

JEREMIA 26:23

Nichi ly Uriah ai Aikupta pri i dengdairei samrang Jehojakim teng y pahawi ali teang i, samrang ly ni ai padei iy ni i veu ai ly khumichi i tapreaung y aphi hai su bo.)

JEREMIA 35:14

Jonada i katu chanauchi ly kreip hang nei y ai nai Jonada my pei nai reita patawm u bo. Nichi ly mychi i amsi pajo my leu pei nai tangai u nai deaungkho y, vaini khrairei ami py kreip hang nei u y nai ne. Na i py nangchi ly kaimy kang thui pi veangveang teu i py, kai i leu tangai u y.

JEREMIA 35:17

Hunai deaungkho y Israela chengchi i Tameuh, ati cheaungkhang sa thai nai keung kai Areng ly kaimy i adeu nai ka-jeira ai Juda khumichi hawi Jerusalem mary i khumichi tlang tleaung y tym hai ai. Ati mana nai mo nabaly nangchi ly kaimy thui nai khala tangai u y. Kaimy palau nai khala pathang u y nai deaungkho y ne, nanai leu pei nai thui pi,” napi.

JEREMIA 6:16

Areng ly mymy i khumichi teng y, “Lam sangumchira y angdo u ly khen u cham. Jangni i lam kangngymchi hau u. Hawi keh nai lam ly ma mang y mo, nanai deng iy, huni lam mang tako baly nangchi i phailo ly tlamsa naira nga ai,” napi. Na i py nichi my, “Huni lam y kaichi abang ai nai ngai y leang!” napi u.

TANGAM NAI LEU 1:16

“Hunai deaungkho y kai i meichira i, mei katuichi leaung bo. Kai ai ami py awmnem naira pei pajau y. Ami py paleung atho ham pa-rei pei pajau y. Paleung ka-echi ly kaichi ai ang pajau u vui bo. Kai i khumichi teng y py, yhmtheaung katui ati sai py by y leaung bo.”

TANGAM NAI LEU 4:13

Na i py huna nai tiu naimy kun nai ly tym chum veng bo. Ati mana nai mo na baly mary i amochi hawi pathyp pi nai keungchi ly kamngo sa tamang u iy, kamngo by y naichi dei u nai deaungkho y ne.

HOSEA 11:2

Na i py kai ly ni ai kapalau baly, kai teng i nai angpreng ra bo. Kai i khumichi ly Bala tameuh teng y apathyp iy, mynchi teng y rimui patawi u.

HOSEA 11:7

Nichi ly kai teng i nai angphri vui iy tako u reng nai ne. Nichi tleang nai kaneaung tamtleang molam y tangam naimy aeu u teu i py, ami py huni tamtleang ai dawmkhawn pi ai ny y.

JOELA 2:23

“Aw Zion mary i khumichi awi, amo theu u; nangchi tlang tleaung y nangchi i Areng Tameuh my ang sa pi nai sai molam y amo theu u. Mymy ly nangchi ai kaseih kani angym pa-rei nai hai bo. Kaseih khei nai kani ai py, vaichi khala i kamta nai hai iy, kanipui kamteaung kani ai py, nangchi teng y nai hai bo.

ZEKHARIAH 1:4

Nangchi ly nangmychi i amsi pajochi kamta so u moh. Jangni khala i amochi ly nichi teng y hawi y nai saichi anawn u ai nai thui pi teu i py, nichi ly tangai y, dawn dan u y.

MATTHAI 22:3

Naibaly aju palyn nai pawi biu cha naira y jeu ai nai napi yb naichi ai heang ai nai mymy i miseaungchi ai pato: na i py nichi ly jeu ai nai ngai u y bo.

MATTHAI 22:6

khumi takhrachi my ly mymy i miseaungchi ai patiu iy angji ngailai pa-rei my sa i padei u bo.

LUKA 15:28

Naibaly mymy ly kado theu i kun ngai y bo; naibaly ampo my ly theu iy ni ai parawi.

LUKA 19:44

Nang theung i nang i chanauchi hawi nangmy ai py khaileaung y athorei my aphi ai i, nang theung i lengseaung tleangleang nai ha py ang khai ai ny y; nang ly ang de nai neng khala nang pany y nai deaungkho y; huna nai kani ly nang i tlang tleaung y ang tym ai,” napi.

LUKA 23:28

Na i py Isu my ly nichi mang y hi iy, “Jerusalem chaniuchi awi, kai ai vo hai y han, nangmychi ai hawi, nangchi i chanauchi i vui phai vo hai u.

AMTAW 7:52

Nangchi i amsi sangumchi my amochi theung y ano y nai ly ami awm mo? Khumi Kahawi jeu ai nai satang thui pi rym nai keungchi ai py nichi padei; ni ai ly patiu hai nai keungchi hawi, padei nai keungchi py vai nangmychi lawn u bo;

AMTAW 7:59

Hunaibaly Stephana ly, “Areng Isu awi, kai i phailo lo ba,” nanai palau nai thym khala y ly nichi ly lengseaung y aphi tliu siu na.

AMTAW 8:1

Naibaly huni kani ly Jerusalem i awm nai palau takhra kamkawmchi ai khri pa-rei ana ai nai amteaung bo; hunaibaly amtaw thau naichi ny y baly nichi ly Judai pri hawi Samari pri meingtym tleirei y ahei bebe bo.

Leu Thui Nai 32:29

Nichi ly ati mana nai y tavai sum u nai mo, nanai pany u y; ati mana nai deaungkho y mo, nanai py dawn pajau y.

Leu Thui Nai 5:29

Nichi ly hina nai kamta kai ai Jei kaji naimy tahm khai u iy, kai i leu pei nai bawibawichi tangai u ai na baly, nichi hawi nichi i kangpreangchi ly ati cheaungkhangra y hawi naira nga u ai.

AMTENG HAI NAI 11:8

Naibaly nini i Areng ai kraws tleaung y tahen naira, phailo mang i dawn pata naira y ly Sodom hawi Aikupta napi nai avang kalen pui i lam ly nini i veu awm hawi ai.

RUTHI 2:12

Areng ly huna nai molam y nang ai kawn nai vang pei sy; nang i abyh nai Israela chengchi i Areng Tameuh ly nang ai amtheaung naira angym pa-rei pei na sy!” napi.