JOSUA 22:28 - Khumi Common Language Bible

²⁸ Leu kabeaung y thui lawh baly. kaichi i kangpreangchi my, ‘khen cham, kaichi i amsi pajochi ly Areng i maicham kamta, maicham harei sa u bo. Huni maicham ly leng patlum nai napi nai kapathyprachi talam ai nai ny y. Nangchi i khumichi hawi kaichi i khumichi i vui, pany nai ka-ma-ra naini ne,’ nanai thui pajau ai nai athang khai.

JOSUA 22:28 Iomraidhean Croise

ATITI AWM ANGCHEI NAI 31:48

Labana my Jakob teng y, “Hini lengseaung pakheng achu nai ly ani leaung nyhrei pany jo ai nai ka-ma-ra ne,” napi. Huna nai y hini meingtym ai Kaleed, nanai amyn pathi nai ne.

2 ARENG KEH 16:10

Samrang Ahaz ly empara samrang Tiklath Pilesa hawi avum ai nai Damaska mary y chei nai khala, huni mary y maicham niu i, huni maicham kupe ka-tawm khyp sa iy, pathyp pi nai keung Uriah teng y pa pi.

THEU NAI 25:40

Kaimy mawi salo y kang patei nai ka-tawm khyp, sa ai nai dawn patyp ba.

ISAIA 19:19

Huni neng tym nai khala y Aikupta pri y Areng i vui maicham harei sa ai. Mymy ai tahm pasang iy leng nai leungcheng harei ly pri khujyhra y awm ai.

HEBRAI 8:5

nichi ly kani pri mang i atiti ka-tawmchi hawi pa-pui i kalop sa u lawh reng. Ne, Mosi my achura yhm jang ai nai tau thym khala y ly Tameuh my thui pi nai kamta, “Mawi y khen pata ai naira ang patei nai kamta ly cheaungkhang sa ai nai amkym,” napi.

JOSUA 22:27

Kaichi i khumichi i vui py, nangchi i khumichi hawi mo mang deung kangthauchi i vui py, pany hawi nai ka-ma-ra lawm ai nai sa nai ne. Kaichi ly kapathypra hawi katalamrachi ai leng patlum nai katalamra dengdairei, katalamra cheaungkhang hawi Tabynako mo y naini Areng ai chiu ai, nanai hini maicham my pany hai ai. Hini molam y nangchi i kangpreangchi my, kaichi i kangpreangchi teng y, ‘Nangchi ly Areng hawi amtawn abi y leang,’ nanai thui u pajau ai ny y.

JOSUA 22:29

Kaichi ly leng patlum nai kapathypra, teicha teinei talam nai kapathypra, napi nai kapathyprachi talam ai nai maicham harei sa iy, Aeng ai tiu naimy, mymy ai khai su ai ny y. Kaichi ly kaichi i Areng Tameuh i awm naira Tabynako mo y awm nai maicham ny y baly, takhra mani maicham ai py sa ai ny y,” nanai thui u bo.

JOSUA 24:27

Josua my khumi bawibawichi teng y, “Hini lengseaung ly achi i vui pany hai naira lawm ai. Achi teng y Areng my leu pei nai ngiereichi ai, hini lengseaung ly thai ai. Hunai deaungkho y nangchi ly nangchi i Tameuh ai tiu lawh baly, hini lengseaung ly pany hai naira lawm ai,” nanai leu pei bo.