JEREMIA 9:7 - Khumi Common Language Bible

⁷ Hini molam y ati cheaungkhang sa thai nai keung Areng my, “Kai ly tamo ngan patlawn iy pachai nai kamta, kai i khumichi ai chai pa-rei kasa ai. Nichi ai kaimy cham ai. Kai i khumichi ly sa tamang u bo. Kai ly nichi ai mana kasa ai mo?

JEREMIA 9:7 Iomraidhean Croise

2 SAMUELA 13:26

Na i py Abasalom my, “Tuna lawh baly ati py ne sy, kai i amjo Amanon ai chei ai nai pei ba,” napi. Samrang my, “Ati deaungkho y ni ai chei hai ai mo?” napi.

2 NENG SATANG 36:15

Nichi amsi pajochi i Areng Tameuh ly mymy i khumichi hawi Achura yhm law tleaungra nga ai ngai hai nai deaungkho y, nichi ai pany hai pi ai nai amochi pato pi bi nai ne.

SAM 120:4

Risachi i chiu parai nai thailiho chyn hawi py, aai-jo nanai mai-aichi hawi py, ang pajeng ai!

SAM 55:22

Nang i myn kaji ai ly Areng teng y au; mymy ly nang ai ama hai iy ang kry ai; khumi kahawichi ai mana khala py, sum hai ai ny y.

SAM 62:5

Kai ly Tameuh ai naini abyh nai ne; mymy ai athang khai bo.

ISAIA 1:25

Kai ly nang ai bawi la iy kang pajeng ai. Tamo ngan ai pachai nai kamta, nang i kakhawi kangjenchi py pachai iy, nang ai kachai sa ai.

ISAIA 48:10

Tangka ai mai y pachai nai kamta, kai ly nangchi ai ngari kamtang mai hawi cham chum nai ne. Na i py nangchi ai ly vang teng y nai kaniu.

ISAIA 59:3

Nangchi ly ka-chawi leu katheu nai, nangchi i kiuchi hawi kiu pajeungchira y thi abawi nai, khumi ai tleh nai, hunichi molam y kamngo awm u nai ne.

JEREMIA 31:20

“Israela awi, nang ly kai i ngai keh nai chapo hawi, kai i tamen keh nai chapo py ne. Kai ly nang i amyn kathui nai tleirei, nang ai aawi jojo nai ne. Kai i paleung ly nang teng y apei keh nai ne i, kang pahen ai.

JEREMIA 5:1

Jerusalem mary i khumichi awi, nangmychi i lamchira y chei u! Tengpang sahawi y hau u! Adawn pasym u! Seng mang y chei iy hau u! Kahawi sa nai khumi, Tameuh i tlang tleaung y ka-ym awm ai nai atho sa nai khumi leaungrei niu pajau na a? Huni khumi ai nang avum lawh teu baly, Areng ly Jerusalem mary i kamngo lawi hai ai.

JEREMIA 6:27

Jeremia awi, kai i khumichi ai tamo ngan y cham nai kamta, nichi i amhi amtlau naichi pany ai nai khen patawm ba.

HOSEA 4:1

Israela chengchi awi, Areng i leu pei nai tangai u. Hini pri y awm nai khumichi ai Tameuh my seu nai awm. Mymy ly “Hini pri y ly tamen naira, ka-ym awm naira by y. Kai ly Tameuh ne, nanai khumichi my pany u y.

ZEKHARIAH 13:9

Naibaly kai ly tangka ai mai hawi pachai nai kamta, dei kamthum phy thomrei y phyrei ai pachai ai. Nichi ai cham iy khen ai. Kai ly muku ai cham nai kamta, nichi ai cham ai. Naibaly nichi ly kai teng y chiu sa u ai, Kai py pathang pi ai. Nichi ly kai i khumichi ne, nanai nichi teng y thui pi ai. Nichi my py kai ly mychi i Tameuh ne, nanai pany u ai,” napi.

MALAKHI 3:3

Mymy ly ei chaipyn hai ai nai tangka patlawn nai keung kamta, ang jeu iy tara chih ai. Muku ateaung, tangka ateaung thip kawp nai keung my, muku hawi tangka ai patlawn nai kamta, Areng i amtaw thau naimy ly pathyp nai keungchi ai chai pa-rei sa ai. Huna nai kamta sa nai ly pathyp pi nai keungchi my Areng teng y avo nai kapathyprachi syn pajau ai nai ne.

I PETERA 1:7

Isu Krista amteng nai khala y ly palo naira hawi, nang parai naira hawi, tahm asang naira py lawn thai ai nai, kra y nai sala y parawi naira cheaungkhang deaungkho y nangchi ly paleung mawn u rai.

I PETERA 4:12

Amjo amnau ngai parai naichi awi, nangmychi ai cham ai nai, nangchi i tlang tleaung y tym nai, nangchi theung y awm nai mai kamta cham naira ly rengrang tlai, nanai dawn u moh: