JEREMIA 8:13 - Khumi Common Language Bible

¹³ “Li hlau sa nai khumi ly my i amti amjangchi pakym achu nai kamta, kai Areng ly kaimy i khumichi ai pakym achu ai nai ngai. Na i py nichi ly ngamchi ajawi iy athai by y nai kreip keungchi, athai y nai thaidu keungchi hawi atawm nai ne. Hunai deaungkho y kaimy kang pei nai pri ly cheng takhrachi kiu y tym hai veng bo.

JEREMIA 8:13 Iomraidhean Croise

ISAIA 5:10

Choh teaung apomrei apeaung awm nai kreip akhobai i kreip hang py, palang tariureichy nga ai khyh. Ti teaung apom phai pangrei hei i py, teaungnyh pa-thom si tariurei naini nga khyh ai.”

JEREMIA 14:12

Nichi ly biu hai naimy kasabawmra hnei takeng teu i malawn py, kai ly khumichi i aeu nai raawi katangai pi ai ny y. Nichi ly kai teng y leng patlum nai kapathypra hawi katalamrachi talam i py, kai ly kawn pi ai ny y. Huna nai kakawn pi ai nai tleaung y ly tavai keung y dei hai ai. Takang theu hai iy no kanghawi y dei hai asi,” napi.

JEREMIA 14:15

Kaimy pato nai ny y pawi naimy kai i amyn angam iy, hini pri y tavai takai hawi tahum takang ka-jeira tym ai ny y, nanai thui u nai amochi ai, kai mana kasa ai mo, nanai nang teng y kai Areng my thui pi ai. Kai ly nichi ai tavai keung hawi tahum takang y dei hai ai.

JEREMIA 17:8

Huni khumichi ly tavo peang y prau iy tui awm nai mang y tangjyn pala nai dengkeaung keung hawi atawm. Huni keung ly ngamchi heng-yh jo nai deaungkho y, kanipui i kani kabi ai jei y. Kani khang khala py mawnra by y i, athaichi athai jojo reng nai ne.

JEREMIA 5:17

Nichi ly nangchi i thengthaichi hawi teicha teineichi cha nei iy, nangchi i cho chanauchi ai tleh u ai. Nichi ly nangchi i beram kanghu hawi si kanghuchi cha u ai. Nangchi i kreip keungchi hawi thaidu keungchi taphra pawn ai. Nichi i tavaimi kamkawm ly nangchi i a-ym nai amtangra mary kakhawchi taphra pi pawn ai.”

JEREMIA 7:20

Hunai deaungkho y kai i Areng ly kaimy i khri pa-rei kado theu nai ai, hini Achura yhm y kaleih ai. Khumichi hawi tawnbawichi tlang tleaung y py, dengkeaungchi hawi amti amjangchi salo y py kaleih ai. Kai i kado theu nai ly ami py pathym pajau y nai mai hawi atawm ai.

Ezekiela 22:31

Hunai deaungkho y kai ly kado theu naira tym hai iy nichi i tlang tleaung y kado katheu mai kangveaung kamta tym hai ai. Nichi i sa nai saichi molam y nichi i lu tleaung y tym hai ai,” napi. Hini ly sa thai naira angym nai Areng i pei nai leu ne.

HOSEA 2:12

Ni i tavawichi my langseaung palawn iy ni ai pei nai kreip keung, thaidu keungchi py, kaimy taphra pi vui ai. Kai ly ni i kreip akho hawi thengthai akhochi ai, daichi mawichi my taphra nai deaungkho y, kabeng aleng kawi nanai meingtym lawm hai ai.

JOELA 1:7

Nichi ly achi i kreip angjyn keungchi taphra iy, achi i thaidu keungchi ai kei pawn nai ne. Nichi ly changpichi kaleungrau na pa-rei, keung kichi ai be pawn nai ne.

Levi 26:20

Nangchi i khaileaung ly amti amjang thawn ai ny y, thengthai khulawn py athai y nai deaungkho y, nangchi atho no kalop sa nai ngierei ly atyhtyh lawm ai.

HABAKKUK 3:17

Thaidu keungchira y athai by y, kreip keungchi ly kreip athai athai y; Olive keungchi eaung y, li hlauchira y amti amjang thawn y, beramchi ly dei be i, tawnbawi yhmchi akeu rang teu i py,

HAKAI 1:11

Kai ly hini pri y jengrawm hai bo. Hini pri i mawi aheungchi, li hlauchi, kreip akhochi hawi olive akhochira y py, khaileaung i theu nai amti amjang ngiereichira y py, khumi hawi tawnbawichi ai py, nangchi i atho sa naimy pati nai amti amjangchira y py, kani khang hai bo,” napi.

HAKAI 2:17

Kai ly nangchi atho sa iy pati nai amti amjang ngiereichi ai ali kabi hawi py, kaleung my cha iy jeirawm hai nai py, ji amai hawi py taphra bo. Na i py nangchi uikheih u y.

MALAKHI 3:11

Kai ly mipochi ai nangchi i amti amjangchi taphra ai nai pei ai ny y; nangchi i kreip keungchi py athaichi pasu hai ai.

MATTHAI 21:19

Naibaly mymy ly lam teng y thaidu keung niu i chei tapai iy, ngam ny y baly ati sai py niu y; naibaly mymy ly huni teng y, “Vai dengdairei deungtasa khrairei athai moh sy,” napi.

JAKOB 1:11

Kani si iy ali bi ho nai aho i, acha ai ly jei hai; naibaly pau ly tla i, awm nai sai apu nai ly tama; hunai kamta teang, khumi kanang ly ni i tako naira y rawm ai.