JAKOB 2:1 - Khumi Common Language Bible

¹ Amjo amnauchi awi, achi i Areng Isu Krista, nang parai nai Areng ai ym nai tarawi y khumi ai patle u takhra reng moh.

JAKOB 2:1 Iomraidhean Croise

2 NENG SATANG 19:7

Areng ai jei kaji naimy, hawihai palai so u. Ati mana nai mo na baly achi i Areng Tameuh ly li-tapawp nai, meimai khen patleh nai, un cha naichi ai niu ngai y nai deaungkho y ne,” napi.

LEU KACHENG 24:23

Khumi kachengchi ly hini parip nai leu hawi, thui parip nai ne. Meimai khen iy tara chih nai ly tamang nai ne.

LEU KACHENG 28:21

Meimai khen nai ly hawi y. Na i py phyrei tara chih nai keungchi ly un langseaung maidenreichy nga ai nai molam, tau hawi y nai sa u nai ne.

Levi 19:15

Ka-jo kahmchi ai leu meitang naimy chih pi ai nai tla. Khumi kamawn ai patleh takhra moh; kanangchi ai ly meimai khen moh.

MATTHAI 22:16

Naibaly nichi ly mymychi teng y abangnaichi hawi, Heroda i kamkawmchi ai mymy teng y pato i hunichi my ly, “Sara awi, nang ly khumi meitang ne, Tameuh i lam y py leu meitang khyp naimy patiu iy, ami ai py meimai akhen y, nanai kaichi pany: ati mana nai mo nabaly nang ly ami ai py patle takhra lawh nai py by y.

AMTAW 10:34

Naibaly Petera ly leu thui i, “Tameuh my ly khumi ai patle takhra y leang, nanai kai hawihai palai pany:

AMTAW 20:21

Judachi hawi Krikchi teng y py Tameuh mang y uikhei nai leu hawi, achi i Areng Isu Krista mang y ym ai nai leu kang thai hai reng nai ly.

AMTAW 24:24

Naibaly kani majirei mo khala y Felika ly mymy i aju Drusila, Juda neampachy hawi jeu iy, Pawla ai palau hai i, Krista Isu ai ym nai leu tangai.

AMTAW 7:2

Naibaly Stephana my ly, “Amjo amnauchi hawi ngaaichi awi, tangai cham.

ROM AVANGCHI TENG Y PAWLA I CHA PA NAI 1:11

Naibaly nangchi ly khaw pa-rei awm thai ai nai, phailo mang i atiti pei nai ly nangchi ai phy nga hai thai ai nai, kang niu ai nai khri pa-rei ngai na;

I KORINTH 2:8

Huni ly hini khaileaung pri i peang nai keungchi ly leaung py pany y: pany iy khyly nang parai nai Areng ai ly kraws tleaung y tahen ai ny y.

Leu Thui Nai 1:17

Padyh padawi nai khala meimai katheang kalen khen y naimy, adyh adawi pa-rei chih u. Nangchi i padyh padawi nai ly Tameuh i kangai ne nai deaungkho y, jei u moh. Nangchi my chih pajau y nai awm lawh baly kai teng y tym hai u, kaimy chih pi ai.

Leu Thui Nai 16:19

Nichi ly tara chih nai khala teng y nai hawi meimai khen ai nai tlo y, un tangka py cha ai nai tlo y. Huni un langseaungchi ly khumi kachengchi hawi khumi kahawichi i mei paju hai iy, tara lam tamang hai reng nai ne.

KOLOSA 1:4

nangchi i khumi kachai bawibawichi i tlang tleaung y tamen naira awm nai sai satang py kaichi ly thai iy, nangchi i vui chiu kang sa pi jojo i, Tameuh achi i Areng Isu Krista i Ampo teng y ly kaichi ly kawn nai leu thui.

I TIMOTHEI 1:19

phyreichi ly huni ai aphi i paleung kawi nai kamta ly ym naira lam y ly phra bo:

I TIMOTHEI 5:21

Nang ly hawihai deng y naimy cheh iy patle takhra nai tarawi y ati sai py so y naimy, Tameuh hawi Krista hawi vawi takhra nai kani pri i amtaw thau naichi i mei ka-niu y py huni leu patawm ai nai leu kang pei.

TITA 1:1

Pawla, Tameuh i miseaung hawi, Tameuh i vawi naichi i ym naira hawi, nichi i Tameuh ai dawn ryhryh nai leu meitang pany nai sai py angym hai ai nai Isu Krista i amtaw thau nai ne: naibaly deungtasarei hengra nga ai nai athang khai nai ly huni i sangum ne:

TITA 2:13

vai heng nai sala ryrei ly amkym naira y py, hawi naira y py, Tameuh ai dawn ryhryh naira y py awm ai nai tla, nanai ang patiu bo;

HEBRAI 1:3

Ni ly mymy i nang parai naira kangvang sangso hawi awm nai sai atawm khypkhyp nai ne, naibaly mymy i atiti sa thai nai leu deaungkho y ati cheaungkhang khaw hai; naibaly ni ly kamngo pachai nai bo y salo mang y Tahm Asang Keh Nai i lamtang mang y ateh bo;

HEBRAI 12:2

naibaly achi i ym naira sa nai hawi angym hai nai keung Isu mang y khen iy, achi i mo y awm nai angpreng acham naira y ly kham tanga pa-rei angpreng u veangveang sina; ni ly my i mo y amo theu naira awm nai deaungkho y amthang leaung naira sai py tahm khai y naimy kraws tleaung y patang i, Tameuh i areng atehra lamtang mang y ateh bo.

JAKOB 1:16

Amjo amnau ngai parai naichi awi, tamang u moh.

JAKOB 1:19

Amjo amnau ngai parai naichi awi, huna nai nangchi pany. Na i py khumi leaung leaungrei tangai akaneu sy, leu thui ai nai awn moh sy, kado theu ryp moh sy;

JAKOB 2:3

Naibaly kanih hawi parai akhiu nai ai ly dawn hai iy ni teng y, “Nang ly hini meingtym kahawi ra y ateh ba,” napi iy, khumi kamawn teng y ly, “Nang ly hu mang angdo,” ti y baly “Kai i kheu khaira ahawi y ateh,” napi baly,

JAKOB 2:9

na i py khumi ai patle takhra nai awm baly nangchi kamngo sa, naibaly Reita my ly Reita taphra nai keung ai ang palawn bo.

JAKOB 3:17

Na i py salo mang i dengdairei cheng naira theu nai ly angchei y chai vui rai, hunai bo y ly aly ai nai ngai i neaung py hawi parai, ado ai nai py ngai, pahen naira hawi athai kahawi my kawi, naibaly patle takhra y i tapawp nai py by y.

II PETERA 1:1

Simon Petera, Isu Krista i miseaung hawi amtaw thau nai my ly achi i Tameuh hawi achi ai Paheng Keung Isu Krista i hawi naira deaungkho y kaichi hawi vanrei ym naira vang teng parai nai nga teang naichi teng y ly:

JUDA 1:16

Hunichi ly athui apreaung naichi, cheh nai keungchi ne, mymychi i ngai phi teng y nai kamta khyp naimy tako nai ne; nichi i labeaung py am-e parai nai leu kawi bo, atiti kamran cha ai nai khumichi ai patle takhra naichi ne.

AMTENG HAI NAI 14:12

Hinira y ly Tameuh i leu pei naichi hawi, Isu ai ym naira patawm kheng nai khumi kachaichi i kham tanga nai sai amteng hai nai ne,” napi.