ISAIA 3:8 - Khumi Common Language Bible

⁸ Jerusalem mary ly taham si lawh ly! Juda pri py phra lawh bo ly! Nichi i sa nai ngiereichi hawi, thui nai ngiereichi ly Areng hawi ka-awi naini lawm nai ne. Nichi ly Tameuh kypkyp ai mei aniu y nai sa nai ly amthang leaung na bo.

ISAIA 3:8 Iomraidhean Croise

2 NENG SATANG 28:18

Huni neng khala my Philistia chengchi ly Juda pri tokalawi hawi nidym mang y awm nai mawi kheutangra i marychi ai tiu u bo. Nichi ly Beth Sheme mary, Aijalon mary, Kedaro mary, Sokoh mary, Timnah mary. Kimazo mary hawi avangchi peang vui iy, huni marychira y khuteng sa u nai ne.

2 NENG SATANG 33:11

Hunai deaungkho y Areng ly Asuria tavaimi kamkawm hawi tavai luchi ai, Juda pri y kun ai nai pei bo. Nichi ly Manase ai patiu i tamo leangkhawn hawi ve iy, sengkry hawi pakheng naimy Babulon mary mang y hawi jo nai ne.

LEU KACHENG 26:27

Khumi takhrachi i vui deaungchi pateung pi nai khumichi ly huni deaungchira y, mymychi ai man lawh nai ne. Khumi takhra i tlang tleang y khaileaung akai hai ai nai sa nai khumi ly mymy i tlang tleaung y akai hai lawh reng nai ne.

ISAIA 1:7

Nangchi i pri ly phra iy nangchi i marychi py, maidym satlawi lawm vui bo. Nang khen nai thym khala my py, pri takhra khumichi ly nangchi i khu peang vui iy, ati cheaungkhangchi ai phra hai pawn bo.

ISAIA 49:19

“Nang i pri ly phra seaungkhrang iy, khumi angso savai tlang veng bo. Na i py vai ly awm nai khumichi i vui huni pri ly theang ala veng nai ne. Nang ai phra seaungkhrang hai nai khumichi ly kamlora y tym u veng ai.

ISAIA 57:4

Nangchi ly ami ai panui hai u nai mo? Tapawp nai khumichi awi, nangchi ly ami ai thui tamawn u nai mo?

ISAIA 59:3

Nangchi ly ka-chawi leu katheu nai, nangchi i kiuchi hawi kiu pajeungchira y thi abawi nai, khumi ai tleh nai, hunichi molam y kamngo awm u nai ne.

ISAIA 6:11

Kaimy py, “Aw Areng, hina nai tym nai ly mana tanrei kra ai mo?,” nanai deng. Mymy ly “Marychi phra seaungkhrang iy daihaulau naimy awm nai neng ryrei awm ai. Yhmchira y khumi by y i, huni pri py khumi angso savai tlang nai neng ryrei awm ai.

ISAIA 9:17

Hunai deaungkho y Areng ly mani thawndeang deaungdi ai py, law tleaung naira pei ai ny y. Lumai cheaungtichi hawi nuro nukaichochi ai py, pahen pi ai ny y. Ati mana nai mo nabaly khumi bawibawichi ly tameuh by y iy kamngo sa u nai bo y, chai y nai leuchi naini katheu u nai deaungkho y ne. Hunai deaungkho y Areng ly kado katheu rym y naimy, kamngo pajeng ai nai kiu pheu jojo nai ne.

JEREMIA 23:36

Hunai deaungkho y, ‘Areng i mynji,’ nanai nichi thui ai nai tlo y. Ati mana nai mo nabaly khumi leaungrei my huna nai thui lawh teu baly, kai i leu pei nai ai huna nai kamta thui nai keung ai ly mynji lawm hai angchi khyp ai. Khumichi ly mychi i Tameuh, ati cheaungkhang sa thai nai keung Areng, Tameuh kangheng i leuchi ai tamang hai piupa u bo.

JEREMIA 26:18

“Juda samrang Hezekia deung y Morise avang i amo Mikha ly khumi bawibawichi teng y ati cheaungkhang sa thai nai keung Areng my, ‘Zion mawi ly li khaileaung kamta, thawn piu nai avum ai; Jerusalem mary ly lengseaung ka-nawi pakheng achu nai lawm iy, Achura yhm mawi py thengreung lawm ai,’ nanai ang thui pi bo.

JEREMIA 26:6

Nangchi ly tangai y veangveang lawh baly, kai ly huni Achura yhm ai Siloh kamta lawm hai ai. Khaileaung pri y awm nai khumi cheng cheaungkhangchi py, pasawi patau naira y hini mary i amyn teaung u ai, nanai amti pi,” napi.

JEREMIA 4:13

Khen u cham, paleung ka-e ly khupanym kamta ang jeu ai. Ni i tavai ka-richi ly ali lengli hawi atawm iy, nichi i keaungngochi ly ahmtlauchi tleaung y rang nai ne. Kaichi ly sum bo! kaichi ly taham si lawh bo ly!

JEREMIA 44:3

Huna nai kamta kaimy tym hai nai ly huni mary i khumichi my hawi y nairachi sa iy kai ai kado patheu u nai deaungkho y ne. Nichi ly tameuh takhrachi teng y apathyp u iy, mychi kypkyp my, nangchi hawi nangchi i amsi pajochi chiu vai y nai tameuhchi ai chiu u bo.

TANGAM NAI LEU 1:9

Ni i chai y nai sai niu hawihai pajau teu i py, ni ly my i avum nai khym taham ai dawndan y. Ni i phra nai sai ly ka-jei hawi parai na. Ami my py awmnem naira pei pajau y. Ni ai paleung ka-echi my pajau vui nai deaungkho y, ni ly pahen naira nga ai nai Areng teng y hnei takeng bo.

Ezekiela 8:12

Tameuh my kai ai, “Nang khumi cho awi, Israela cheng luchi i kangviu kam-ai y sa naichi nang niu a? Nichi ly mymychi kypkyp i mynchi awm nai takun theung y chiu u. Nichi my, ‘Areng ly achi ai niu y leang! mymy ly achi i pri khai su bo,’ nanai akhi u,” napi.

Ezekiela 9:9

Tameuh my, “Israela hawi Juda mipuichi i kamngochi ly khri pa-rei len parai na; nichi ly pri theung i meingtym tleirei y khumi ai padei naichi hawi Jerusalem mary verei y kamngo kawi hai nai y, ‘Areng ly achi pri ai khai su bo, Areng ly achi ai niu ngai y leang bo,’ nanai thui u nai ne.

HOSEA 5:5

Israela khumichi i paleung len amlyh nai sai ly mychi i vui pany hai ai. Nichi ly mychi i kamngo molam y atlym u nai ne. Juda khumichi py, nichi hawi vanrei atlym u bo.

HOSEA 7:16

Nichi ly kai ai khai su iy sa thai naira by y nai tameuh teng y ahihawi u bo. Nichi ly akawi nai thailiho kamta, ka-ym by y. Nichi i lu sa naichi ly khumi aniu y nai leu katheu u nai deaungkho y, dei kahawi dei u y ai. Hunaibaly Aikupta chengchi my panui hai ai.”

MIKHA 3:12

Hunai deaungkho y nangchi i molam y Zion mary ly thawn piu yb nai li khaileaung kamta lawm ai. Jerusalem mary ly phra nairachi pakheng mang nai meingtym lawm ai. Achura yhm awm nai mawi ly daichi lawm ai.

MIKHA 6:12

Yhmtheaung katui nang nai khumichi ly khumi kamawnchi tlang tleaung y thi pajawp u bo. Nangchi bawibawi ly tapawp nai khumichi ne.

HABAKKUK 1:13

Na i py nang ly khumi hawi y nai, ka-ym by y nai khumichi tlang tleaung y mana nai kham pi pajau ai mo? Nang i mei ly khri pa-rei chai parai nai ne i, hawi y nai ai khen pajau y. Nang ly khumichi i sa tamang nai py, kham pi pajau y. Hunai deaungkho y amychi tleaung y kabo kaja hawi nai khumichi ai, huni khumichi my taphra nai khala nang ly ati mana nai y awm pypy lawh mo?

I KORINTH 10:22

Ti y baly achi ly Areng my takho ai nai pacheang nai tau lawh a? Achi ly mymy tleaung y ham keh lawh a?

JUDA 1:15

Tameuh ai tahm khai y nai bawibawichi i tahm khai y nai sala y Tameuh ai dawndan y nai sa naira bawibawi lam y hawi, Tameuh ai tahm khai y nai kamngo sa nai keungchi i mymy i tlang tleaung y leu kasi thui nai bawibawi lam y py pasum ai nai, Areng my ly mymy i tep rep ma pany y nai khumi kachaichi hawi ang jeu nai bo,” napi.