HOSEA 9:4 - Khumi Common Language Bible

⁴ Huni prichira y nichi ly Areng teng y kreip hang py, tawnbawi py, talam pajau ai ny y. Nichi cha nei nai teicha teinei ly si keung i teicha teinei kamta, cha nai khumichi ai chai hai y ai. Nichi ly kajeu kanglam dam ai nai, huni teicha teinei cha u ai. Huni teicha teinei ai katalamra palawn iy, Areng i Achura yhm y syn u moh.

HOSEA 9:4 Iomraidhean Croise

THEU NAI 29:40

Angchei i talam nai beram cho ly chajai tako dei sierei hawi olive asitui palang nyhrei katlen nai kapathypra talam ai nai tla. Kreip hang palang nyhrei py katalamra palawn iy leih ai nai tla.

THEU NAI 40:23

Areng my leu pei nai kamta Areng teng y talam ai nai tako ly sabawi salo y khai bo.

ISAIA 57:6

Hunira i suileng nai lengseaungchi la iy, nangchi i tameuhchi palawn iy chiu u. Nangchi ly kreip hang leih iy huni tameuhchi teng y talam u nai ne. Cha nei kapathypra py talam u bo. Nangchi hina nai sa nai ly kaimy kawn pi ai, nanai nangchi athang khai u a?

ISAIA 66:3

“Khumichi ly mychi i kangai sa u reng nai ne. Mychi i vui si tleh iy apathyp nai ly khumi ai padei iy apathyp nai hawi atawm. Beram pathyp nai hawi ui pathyp nai py vanrei ne. Amti amjang talam nai ly eu thi talam nai hawi atawm. Mui katui leng patlum iy talam nai ly myn ai chiu nai hawi atawm teang. Nichi ly amso ngai ai hawi chiu sa naichira y amo theu u lawh nai ne.

JEREMIA 16:7

Nangmy tamen nai khumi leaungrei dei nai molam y paleung awmnem hai ai nai ami py sikeung hawi vanrei cha nei ai ny y. Amhm ampo dei nai khumichi malawn py, ami py pahen naira amteng pi ai ny y.

JEREMIA 6:20

Seba pri i dengdairei nichi syn nai kathan py, pri kamlora i syn nai mui katui py, kai aly ngai y. Nichi i katalamrachi kai ngai y; nichi i kapathyprachi py kai ngai y,” napi.

Ezekiela 24:17

Nang i vo sang-eng nai katyn khumichi thai moh sy; paleung si nai meimai amteng nai lupeu ajeng y nai hawi, phainai amchiu y naimy tako moh. Nang i meimai tamym moh. Paleungsi paleung mawn nai khumichi cha nai teicha teinei py cho moh,” napi.

Ezekiela 24:22

Huna nai khala nangchi ly kai i sa nai kamta sa u ai. Nangmychi i meimaichi py atamym u ai ny y. Paleungsi paleung mawn nai khumichi ly teicha teinei cha u ai ny y.

DANIELA 1:8

Daniela ly samrang i cha nei kahawi hawi, kreip hangchi cha nei nai dengdairei, amymy ai reita leaungsai molam y, chai hai y nai so y ai, nanai mymy i paleung y dawn bo. Hunai deaungkho y Asapenaza teng y kasabawmra hnei nai ne.

HOSEA 3:4

Huna nai kamta Israela khumichi ly samrang by y, lu sa nai keung by y, apathyp nai by y, chiu ai nai lengseaung leng naichi by y, leung khen nai khala teaung nai mynchi by y naimy, neng kakra awm u ai.

HOSEA 7:16

Nichi ly kai ai khai su iy sa thai naira by y nai tameuh teng y ahihawi u bo. Nichi ly akawi nai thailiho kamta, ka-ym by y. Nichi i lu sa naichi ly khumi aniu y nai leu katheu u nai deaungkho y, dei kahawi dei u y ai. Hunaibaly Aikupta chengchi my panui hai ai.”

HOSEA 8:13

Nichi ly kai teng y apathyp iy, kapathyp mawi cha u bo. Na i py kai, Areng ly nichi i sa nai ngai pi y leang. Vai, kai ly nichi i kamngo pany pi iy, kamngo nai molam pajeng ai. Nichi ai Aikupta pri mang y pato teang ai!

JOELA 1:13

Maichamra amsi nai nangchi pathyp pi nai keungchi awi, paisiu kanih akhiu iy vo tangam u! Kai i Tameuh mo y kalop sa nai keungchi awi, Achura yhm theung y kun iy, vumtorei vo tangam u! Nangchi i Tameuh teng y talam ai nai chohpui chomaw hawi, kreip hangchi by y leang bo.

JOELA 1:9

Achura Yhm y talam ai nai chohpui chomaw py, kreip hang py, by y leang bo; pathyp pi nai keungchi ly Areng teng y talam ai naichi by y nai deaungkho y, vo tangam u bo.

JOELA 2:14

Nangchi i Areng Tameuh ly paleung amtlau tan amtlau lym ai i, nangchi ai amti amjang neangneangchi hawi amtheaung hai ai. Huna nai khala nangchi ly mymy teng y chohpui chomaw hawi, kreip hang katalamrachi talam u pajau ai.

Levi 17:11

Heng nai amjychi i hengra ly thi y awm nai deaungkho y, Areng ly khumichi i kamngo pahen pi ai nai thi ngierei maicham tleaung y leih ai nai tla, nanai leu pei nai ne. Thi ly heng naira ne i, kamngo pachai thai.

Levi 21:17

Aron teng y amti pi ai nai leu pei nai ly “Nang i kangpreangchi theung i, tleungtlang jy nai khumi ly kai teng y teicha teinei kapathyprachi talam ngau y. Hini reita leu pei nai teaung patawm jojo ai nai tla.

Levi 21:21

Aron i kangpreang theung i tleungtlang ha harei jy nai pathyp pi nai keung ly kai teng y kapathypra talam ai nai avo y.

Levi 21:6

Ni ly kachai awm ai nai tla; kai i amyn thui tamawn moh. Ni ly kai teng y teicha teinei katalamrachi talam pi nai keung ne i, chai ai nai tla.

Levi 21:8

Ni ly kai teng y teicha teinei kapathyprachi talam pi nai keung ne nai deaungkho y, khumichi ly ni ai khumi kachai, nanai palawn ai nai tla. Kai ly Areng ne. Kai ly kachai ne i, kaimy i khumichi ai py chai hai nai ne.

AMOS 5:22

Nangchi i leng patlum nai kapathyp, teicha teinei talam naichi ai kai aly ngai y. Veung hawi nai tawnbawichi hawi apathyp nai py, kai aly ngai y.

MALAKHI 2:13

Nangchi i sa nai takhra harei awm rai; nangchi ly nangmychi syn nai katalamrachi ai Areng my kawn pi y nai deaungkho y, vo tangam naimy mymy i maicham ai meikatuira y anum hai bo.

Kati Nai 19:11

Khumi tlaiveu ai nam nai khumi ly reita leaungsai y kani saryhrei chai y ai.

Kati Nai 28:2

Israela chengchi ly Tameuh my kawn nai teicha teinei katalamrachi ai dawn yb nai neng khala talam ai nai tla, nanai leu pei nai ne.

Kati Nai 4:7

Areng teng y tako talam nai sabawi salo y an kamngau kanih bai iy, huni salo y samtangchi, rimui khauchi, rahumchi, kreip hang khai nai tui kacheangchi khai ai nai tla. Talam nai tako py sabawi salo y awm jojo ai nai tla.

JOHAN 6:51

Kani pri mang i dengdairei satla kathiu nai heng nai tako kai ne, ami py hini tako cha baly deungtasarei heng jojo ai; ne, khaileaung pri heng ai nai kai i kang pei ai nai tako ly kai i ngan ne,” napi.

Leu Thui Nai 26:14

Kai ly dei nai khumi i vui paleung si nai khala, horei y harei theung i la iy cho mai y leang; kai ly reita leaungsai y chai y nai thym khala y py, huni horei y harei ly yhm angam mang y patheu y leang; huni horei y harei theung i la iy dei nai khumi i vui talam y leang; aw Areng, nang i leu pei nai kai ly tangai nai ne; horei y harei molam nang i leu pei nai kamta kasa be bo.