HOSEA 4:16 - Khumi Common Language Bible

¹⁶ Israela khumichi ly kry rai nai si nu tanglo kamta, paleung tang u cheng lawh. Kai ly nichi ai beram chochi kamta, sui tlai naira y mana kry pajau ai mo?

HOSEA 4:16 Iomraidhean Croise

SAM 78:8

Nichi ly Tameuh i leu tangai y nai hawi, atiu reng nai amsi pajochi kamta lawn u y ai; huni amsi pajochi ly mana khala py, Tameuh ai ym khaw kalingie nai by y; mymy i tlang tleaung y py ka-ym by y jojo.

ISAIA 22:18

Mymy ly nang ai lijai alyn kamta kalym vui iy, khri pa-rei kau parai nai pri mang y aphi vui ai. Nang ly huni pri y nangmy ai tahm apasang nai tavai ka-ri sahawi y dei ai. Nang ly nangmy yhmkeung i yhm y tahm anem hai ai.

ISAIA 30:23

Nangchi amti amjangchi pati u nai neng tleirei y prau hai ai nai, Areng ly kani nai hai ai. Nangchi tyn ai nai amti amjangchi thawn hai iy, si, painochi py sui tlaira ka-leu nga ai.

ISAIA 5:17

Phra seaungkhrang nai marychira y beramchochi ly acha cha naimy, mi-ichi py sui tlaira meingtymchi avum ai.

JEREMIA 14:7

Kai i khumichi my kai teng y, ‘Kaichi ly kaimychi i kamngo my thui tamawn teu i py, aw Areng, kaichi ai nangmy i amyn y sabawm kyh ba. Kaichi ly nang ai avaw avawrei, nithun kathun u bo. Nang i tlang tleaung y kamngo kasa u lawh bo,’ nanai aeu u.

JEREMIA 3:11

Naibaly Areng my kai teng y, “Israela ly kai teng i nai meimai hi vui teu i py, ka-ym by y nai Juda tanrei hawi y nai ny y,” napi.

JEREMIA 3:6

Samrang Josia deung y Areng my kai ai, “Huni leu atangai y nai neampachy Israela ly kai ai ati mana khai su mo, nanai nang niu bo a? Ni ly mawi ka-sang tleirei y py, apu parai nai dengkeaung tleirei anui y py, bima kalop sa nai ne.

JEREMIA 3:8

Israela ly kai ai khai su iy bima kalop sa nai deaungkho y, kaimy khai vui i, kapatheu praw bo. Na i py Israela i tuicho ka-ym by y nai tuicho ly jei y i, mymy naimy bima kalop sa iy,

JEREMIA 31:18

“Israela chengchi i paleung si naimy takeng nai ly kai thai bo. ‘Aw Areng, kaichi ly aveng nai sicho hawi atawm; na i py nang ly kaichi ai leu tangai ai nai patiu pi nai ne. Kaichi ai pahen ali teang kyh ba. Kaichi ly nang teng y vawi ali teang ai nai angveirym bo. Nang ly kaichi i Areng Tameuh ne.

JEREMIA 5:6

Huna nai deaungkho y daichi mang i khrangsichi ly nichi ai kei u ai. Khutaha daichi ka-vym i kasuichi ly nichi ai keileu keileu ai. Takai kheangchi py nichi i marychi sahawi y o iy, mary angam mang y theu nai khumi ngiereichi ai keileu keileu pawn ai. Ati mana nai mo nabaly huni khumichi ly kamngo nawi nai khyh chang y i, Tameuh ai avaw avawrei nithun thun u nai deaungkho y ne.

JEREMIA 7:24

Na i py nichi ly kai i leu tangai y, tahm py khai u y. Nichi ly mychi i hawi y nai paleung katangra i theu nai ka-dawnchi kamta sa u. Nichi ly hawi ai nai tleaung y ly hawi y kehra bo.

JEREMIA 8:5

Kai i khumichi awi, nangchi ly ati mana nai y kai teng i nai amphri vui iy jeu teang y lawh mo? Nangchi ly li-tapawp naira y paleung apei thleng nai deaungkho y, kai teng y ali teang ai nai akhi u bo.

HOSEA 10:11

“Vaichi khala Israela chengchi ly amtiu yb iy, choh ati ai nai khai yb nai si nu tanglo hawi atawm. Na i py kai ly ni i apu parai nai kaneaung y tamtleang tang iy kalop sa hai ai. Kai ly Juda chengchi ai li thawn hai iy, Israela chengchi ai khaileaung padyh hai ai.

HOSEA 11:6

Nichi i marychi ly tavai takai avum u iy, mary apai katheuchi ly phra ai. Kai i khumichi ly mychi i kangai sa u nai deaungkho y, tamyh nai avum u ai.

HOSEA 11:7

Nichi ly kai teng i nai angphri vui iy tako u reng nai ne. Nichi tleang nai kaneaung tamtleang molam y tangam naimy aeu u teu i py, ami py huni tamtleang ai dawmkhawn pi ai ny y.

Levi 26:33

Kai ly nangchi teng y tavai takai tym hai iy, nangchi ai pri takhra mang y ahei hai ai. Nangchi i pri ly khumi angso by y iy nangchi i marychi py phra seaungkhrang ai.

ZEKHARIAH 7:11

“Na i py kai i khumichi ly dawndan u y naimy, paleung tang u i, kai i leu tangai u y. Nichi ly mychi i kano tamym u.

1 SAMUELA 15:11

“Sawla ai samrang kapalyn nai ly tamang bo; ni ly kai ai hi vui iy, kai i leu tangai y lawh bo,” napi. Samuela ly kado theu bo. Ni ly Areng teng y vumtorei ahui pi iy,