DANIELA 1:17 - Khumi Common Language Bible

¹⁷ Tameuh ly huni thawndeang kacheng leaung palyhreichi ai, cha hawi cheng naira cheaungkhangchi kawp ai nai pei bo. Huni bo y Daniela teng y paleung mei y niu nai satang hawi amangchi thui pachai kawp nai, sa thai naira py pei pi nai ne.

DANIELA 1:17 Iomraidhean Croise

1 ARENG KEH 3:12

nang i hnei nai kamta kang sa pi ai. Nang ny y rai khala i ami py ngo vai y nai, nang i bo y py nga ai ny y nai cheng naira hawi pany thai naira ly nang ai kaimy kang pei ai.

1 ARENG KEH 3:28

Solomon i tara chih nai sai ai Israela pri khumi mipuichi my thai nai khala, ni ai khri pa-rei tahm khai u bo. Ati mana nai mo nabaly leu meitang ka-dyh ka-dawi tara chih kawp ai nai, Tameuh my samrang ai pei pi bo, nanai nichi pany u nai deaungkho y ne.

2 NENG SATANG 1:10

Hunai deaungkho y huni khumichi ai peang ai nai cheng naira hawi pany thai naira pei kyh ba. Ti y baly kai ly hina tanrei nawi nai nang i khumichi ai ati mana peang pajau ai mo?,” nanai pathang.

2 NENG SATANG 1:12

Huni bo y jangni y py, vai mo mang y py samrang leaungrei py ngo y nai yhmtheaung katuichi hawi amyn amthang nai py kang pei bi ai,” napi.

2 NENG SATANG 26:5

Ni ly my i reita leaungsai tau pei nai keung Zekhariah heng nai ryrei ly Areng ai ka-ym awm naimy chiu nai deaungkho y, Tameuh ly ni ai amtheaung hai bo.

JOBA 32:8

Na i py khumichi ai cheng naira pei nai keung ly ati cheaungkhang sa thai nai Tameuh i phailo ne.

LEU KACHENG 2:6

Cheng naira pei nai keung ly Areng ne. Cheng naira hawi pany thai naira ly mymy teng i dengdairei ang tym nai ne.

Parip nai leu 2:26

Tameuh ly cheng naira, pany thai naira hawi amo theu naira ly mymy khrei nai khumi ai pei nai ne. Na i py mymy ly kamngo sa nai khumichi ai patang parai naimy kalopchi sa hai iy, nichi i nga nai yhmtheaung katuichi ly mymy ai kawn hai nai khumichi teng y pei. Huni bawibawichi py atyhtyh teu, ali ai patiu nai kamta ne.

ISAIA 28:26

Tameuh ly ni teng y cheng naira pei pi nai deaungkho y, ni ly amy i sa ai nai pany.

Ezekiela 28:3

Nang ly nangmy ai Daniela tleaung y cheng keh nanai py, nangmy teng y ati sai py apha thai y, nanai py athang khai nai ne.

DANIELA 1:18

Samrang my neng pei nai saneng thomrei neng khei nai khala y, Asapenaza ly thawndeang kacheng bawibawichi ai, samrang Nebukhadnezar teng y tha bo.

DANIELA 1:20

Samrang ly mani leu deng nai py ne sy, mani rai nai py ne sy, huni khumi leaung palyhreichi ly pri verei y awm nai leung kakawpchi, atam kakawpchi tleaung y phy horei pany kawp nai niu.

DANIELA 1:4

mo-cha hawi nai, tau cheng nai, ami tleaungtha cheng nai, kiu kheu tabai y nai, kawp nai sai rai y nai, huna nai leaungsaichi hawi angym iy, samrang i yhm y kalop sa pajau ai nai, thawndeang kacheng phyreichi ai vawi takhra ai nai leu pei bo. Nichi ai Babulon cheng leu phain kawp, tajiu kawp ai nai Asapenaza my patiu pi ai nai leu pei nai ne.

DANIELA 10:1

Pasia empara samrang Kuru my peang nai pa-thom saneng y, Beltesazar amyn nga nai Daniela teng y amteng hai bo. Huni amteng hai naira y abawi nai leu ly teng i py, pany ai nai khri pa-rei rai parai. Daniela ly huni leu i awm nai sai ai, paleung mei hawi niu nai y pany thai nai ne.

DANIELA 2:19

Tameuh ly huni vum y my Daniela teng y, khri pa-rei rai nai amang thui pachai kawp ai nai pany hai bo. Naibaly Daniela ly kani pri mang y awm nai Tameuh ai, hina nai kamta palo nai ne.

DANIELA 2:21

Mymy ly neng hawi kani lo kamtlehchi ai peang nai ne. Mymy ly samrangchi ai palyn py palyn, pala py pala. Khumichi teng y cheng naira hawi pany thai naira pei bo.

DANIELA 2:23

Kai i amsi pajochi my chiu nai Tameuh, Nang ly kai ai cheng naira hawi sa thai naira pei iy, kai i hnei nai kamta, samrang i amang pany hai pi nai y, kawn nai leu kang thui,” napi.

DANIELA 2:30

Tameuh ly huni thiu parai nairachi ai kai teng y pany hai nai ly kai ly takhra khumichi tleaung y, tau cheng nai deaungkho y ny y leang. Samrang nang ai amang i awm nai sai pany ai nai hawi, paleung theung y adawn pasym nai saichi pany hai ai nai ne.

DANIELA 4:6

Kai ly amang i awm nai sai thui pi pachai pi ai nai, tau pei nai miteaung keh bawibawichi ai kapalau bo.

DANIELA 5:14

Tameuhchii phailo ly nang teng y awm nai ne i, nang ly pany thai naira, tau cheng nairachi kawi angym nai ne, nanai kai ly thai bo.

DANIELA 7:1

Babulon samrang Belshazar my peang nai angchei saneng y, kai ly vum y paleung mei y niu nai amang amang bo. Huni amang satang ai hina nai kamta, katajiu typ nai ne.

DANIELA 8:1

Samrang Belshazar my peang nai pa-thom saneng y, kai Daniela ly tlen pa-nyh paleung mei y kaniu bo.

Kati Nai 12:6

Areng my, “Vai kai i leu pei nai tangai hawi! Nangchi theung y amochi awm khala kai ly nichi teng y amang mang py, amei-amang jyh y py amteng hai iy kang thui pi.

LUKA 21:15

Nangchi i paleung ka-e bawibawichi my paka iy ei thai y ai nai, labeaung hawi cheng naira kang pei ai.

AMTAW 6:10

Na i py ni i cheng naira hawi thui hai nai keung Pahilo ai ly ei pajau y.

AMTAW 7:10

mymy i patang naira bawibawi y lawi hai jojo: Aikupta pri i samrang Pharaoa ai py tamen hai i, khumi cheng parai nanai py pany hai; hunaibaly mymy ai ly Aikupta pri hawi mymy i yhm y awm nai khumi bawibawichi i tlang tleaung y krykeung y palawn bo.

AMTAW 7:22

“Naibaly Mosi ai ly Aikupta pri khumichi i cheng naira bawibawi patiu i, mymy i leu y hawi atiti sa naira y py khrikhri pa-rei ham na.

KOLOSA 1:9

Hunai deaungkho y kaichi ly huni satang pany nai kani dengdairei nangchi ly phailo mang i cheng naira hawi, pany thai naira bawibawi i saho y mymy i kangai pany naira kawi u thai ai nai hawi,

JAKOB 1:17

Atiti pei nai kahawi hawi, atiti pei angym nai bawibawi ly salo mang i dengdairei, kangvangchi i Ampo teng i nai ang kathiu nai ne; mymy y ly takhra naira hawi ami nai pa-pui den py awm thai y.

JAKOB 1:5

Na i py nangchi theung y ami py cheng naira avaw baly, khumi bawibawi teng y jo y nai hawi pasai y naimy pei reng nai keung Tameuh teng y hnei sy, naibaly ang pei takengkei ai.