2 SAMUELA 8:2 - Khumi Common Language Bible

² Naibaly Samrang ly Moba khumichi ai tiu nai pajau i, patiu naira i nga nai khumichi ai khaileaung y atlym hai iy, phy thomrei y phy nyhreichi ai padei hai bo. Hunai deaungkho y Moba khumichi ly Davida i anui y awm i, kahm pei u nai ne.

2 SAMUELA 8:2 Iomraidhean Croise

2 SAMUELA 12:31

Huni mary i khumichi ai hawi i, rawchi, phalavachi, atiuchi hawi sa nai kalop py, iukhi sa nai kalop py sa hai bo. Samrang ly Ammon pri i takhra marychira i khumichi ai py, hina nai kamta sa hai. Naibaly mymy hawi mymy i khumichi ly Jerusalem mary y vawi u bo.

2 SAMUELA 8:6

Naibaly samrang ly huni khumichi i khu ka-peang theung y tavai tairachi sa nai deaungkho y, nichi ly samrang i peang nai anui y awm i, kahm pei u. Areng my Davida i chei naira tleirei y eaung hai bo.

1 ARENG KEH 4:21

Solomon ly Euphrat tavo dengdairei Philistin pri hawi Aikupta pri khujyh khrairei awm nai pri bawibawichi ai peang nai ne. Huni prichi ly samrang teng y kahm pei u iy, samrang heng nai ryrei ly ni i anui y awm nai prichi lawm bo.

2 ARENG KEH 1:1

Israela samrang Ahad dei nai khala, Moba pri ly Israela pri y tiu nai ne.

2 ARENG KEH 17:3

Asuria empara samrang Shalmaneser my tavai tiu nai khala, Hosea ly tavai sum nai deaungkho y saneng tleirei kahm pei ai nai tla.

1 NENG SATANG 18:2

Moba chengchi ai py tiu i, eaung nai deaungkho y nichi ly ni i peang nai anui y awm u iy, kahmchi pei u bo.

2 NENG SATANG 26:8

Ammon chengchi ly Uzia teng y langseaungchi pei u nai ne. Ni ly khri pa-rei sa thai naira len parai nai deaungkho y, ni i satang ly Aikupta pri mang khrairei amthang bo.

SAM 108:9

Na i py kai ly Moba pri ai kai i kheu asira rahum kamta teaung ai; Edom pri ai kaimy peang i, kai i phainai khaira y teaung ai; Philistin pri tlang tleaung y eaung naimy aeu ai,” napi.

SAM 18:45

Nichi ly sorai paleung by y bo i, mychi i khengsi apaichi theung i dengdairei, kaso theu naimy ang thau u bo.

SAM 60:10

Nang ly kaichi ai khai su tatang nai bo a? Kaichi i tavaimichi hawi vanrei, tavai thau y naimy awm ai bo a?

SAM 60:8

Na i py kai ly Moba pri ai kai i kheu asira, Edom pri ai kai i phainai alengra, kapalawn ai. Philistia pri ly kai ai pajau iy, eaung naira raawi aeu pajau ai, nanai athang khai ai,” napi.

SAM 83:6

Huni amsawi amnai asa naira y Edom hawi Ismaela chengchi, Moba hawi Kakara chengchi,

ISAIA 36:16

Hezekia i leu tangai u moh! Mary theung i nai theu iy apasum ai nai, nangchi ai Asuria empara samrang my leu pei nai awm. Nangchi ai empara samrang ly nangchi i pri hawi atawm nai pri, chohpui chomaw chohnei hawi kreip hang kangtha, meaungkaten hawi kreip akho nawi nai pri mang y tha y rai nai thym khala y, nangmychi i kreip keungchi hawi thaidu keungchira i athaichi cha hai iy, nangmychi i tuikanchira i tui py nei ai nai pei ai.

Kati Nai 24:17

Kai ly mo mang i satang dawn nai khala, Israela pri ai kaniu. Huni pri y samrang leaungrei ly angvang parai nai ka-si kamta amteng ai. Huni samrang ly ka-si tempo kamta Israela pri y amteng ai. Ni ly Moba chengchi i lu sa nai keungchi ai tiu iy Setha theaungchi ai pajau vui ai.

1 SAMUELA 10:27

Na i py khumi hawi y naichi my, “Hini khumi ly kaichi ai ati kahawi ang sa pi pajau ai mo?,” napi u. Nichi ly Sawla ai tahm khai u y i, ati langseaung py pei u y.

1 SAMUELA 14:47

Sawla ly Israela pri y samrang lawm nai bo y, ni ly meingtym tleirei y awm nai, my i paleung ka-echi napi nai Moba khumichi, Ammon khumichi hawi Edom khumichi ai py, Zobah samrangchi hawi Philistia khumichi ai py, tavai tiu nai ne. Ni ly mani meingtym y atiu nai py ne sy, tavai eaung.

1 SAMUELA 22:3

Davida ly hu i dengdairei Moba pri Mizapa mary y chei iy, Moba samrang teng y, “Kai i vui Areng my ati mana pasym pi mo, nanai pany y nai sala y, kai i amhm ampo ni ai, nang teng y awm ai nai pei kyh ba,” nanai takeng.

1 SAMUELA 22:4

Hunaibaly Davida ly amhm ni ampo ai, Moba samrang teng y daw jo bo; amhm ampo ni ly Davida tapiu theung y aheu nai ryrei, Moba samrang teng y awm hawi jo nai ne.