Zẹfanaya 1:5 - FỊAFỊA BAỊBỤLỤ

⁵ Ḅẹḅọ-ḅẹḅọ tẹ warị-isun kpọlị tẹ sunsin ịrụa na, akalụ mẹ na, lolia ma na pịrịarị ḅọ, arị mḅọ ḅaa guluguluma ḅa. À pịkị sunsin ị̀ pịrịarị tẹ ye karị tẹ sịḅị-tuu ị̀ pịrịarị tẹ pịkị Mịlịkọmụ nwẹn-sịn oru-tamụnọ ḅe ẹrẹ kẹ ye karịarị ḅọ ḅaa guluguluma ḅa.

Zẹfanaya 1:5 Iomraidhean Croise

1 Amadapụ 11:33

À miemẹ mịẹ ḅa gbala Sọlọmọnị ì sịkị tẹ mu sunsin igoni oru-atamụnọ Asịtatị, Sayịdọnị ḅẹ ere-oru na; Kẹmosi, Mohabụ ḅẹ oru-tamụnọ na; Mịlịkọmụ, Amọnị ḅẹ oru-tamụnọ na pịrị tẹ ẹrẹsị. Sọlọmọnị ḅarị ì ḅịḅị poki-a tẹ ọ̀ mịẹ-irima tẹẹ, tẹ ḅarị ì oloko ma na à tọn aị ma na koko-a, ọ̀ ḍa Devidi wẹrịtẹ mịẹ ḅara.

1 Amadapụ 11:5

Ọ̀ nwẹnị mu sunsin Asịtarọtị, Sayịdọnị ḅẹ apụ ere-oru na, Mịlịkọmụ, Amọnị ḅẹ apụ tọn-tọn oru-atamụnọ ma pịrị.

1 Amadapụ 18:21

Ịlayịja nwẹnị sọma-ḅo tomi mamgba kpeki tẹ ḅẹẹ, “ọmịnị ọmịna kuroma ḅụ maa warị kpọọ oḅori sọ mu tọ sakị la ḅẹ? KỊNỊNYANAḄỌ ḅe anie Tamụnọ ḅẹḅẹ, ọmịnị ò ḍuka mẹnjịị, ori-a, kụma Balị anie Tamụnọ ḅẹḅẹ, ọmịnị ò ḍukamẹnjịị.” Kụma tomi ma gbọrụ ẹkwẹn-ḅịḅị sọ kẹ ọ̀ pakịrị-a.

2 Amadapụ 17:32

Ịn KỊNỊNYANAḄỌ ḅe sọ ḍiki ḅalafaam, tẹ ịna ogboku ḅụ kịrị-kịrị apụ tọnm gele-ayeyọ ma ḅẹ agbamịẹapụ ḅara ḅụ; inima tẹ oru-awarị ma ḅio agba mịẹ ịn pịrị ḅarị apụ ma.

2 Amadapụ 17:33

Mị-ḅara mie ịn kẹ KỊNỊNYANAḄỌ ḅe mangịma ḅara, kụma ịn pịkị fịrịmẹnjị ịna oru-atamụnọ ma sọ pịrịm ịna opu asịẹ ma tẹ ini ịna dogi-so apụ ma ama anga anga ḅara ḅụ.

2 Amadapụ 17:41

Mị-ḅara mie mịna opu asịẹ ma kẹ KỊNỊNYANAḄỌ ḅe ḍiki-ḅalafafa tẹ fịrịmẹnjị ini ḅara kẹ tẹmẹ-aị ma sọ pịrị ḅara; ịna awọmẹ ma-o, ịna awọmẹ ma awọmẹ sọ anị gbọrụ ḅara mịẹm ịna aḍapụ ma wẹrịtẹ mịẹ ḅara, mie ịn mịẹ ḅo mịmgba la ye.

2 Amadapụ 23:12

Ahazi warị mẹ ḅẹ ọgọnọ ḅẹ ḅio mẹ isun ọgọnọ sime ebeka mẹ, aniemẹ tẹ Juda ḅẹ amadapụ ma nama ye mẹ na, Manasẹ KỊNỊNYANAḄỌ ḅe warị mẹ ḅẹ anụngọ ma ḅụ nama ebeka ma na, kan sara tẹ kẹ pakịrị-pakịrị puu tẹ dọkịma fọọn mịẹ, tẹ nwẹnị arịḅẹ afọn ma kẹ Kidirọnị ḍaḅa ḅio nguma.

Ayịzaya 22:1

Mie Ịkịan Ẹrị Tụndụ-suku mẹ gboloma oku mẹẹ. Tiye ẹrẹsị ama mẹ ḅo atomi mamgba warị isun-isun ḅụ sime tẹ tii-arị?

Ayịzaya 44:5

“Gbọrụḅọ-gbọrụḅọ ḅẹẹ ḅa, ‘Yẹrị KỊNỊNYANAḄỌ ḅe nyee.’ In ḅo Izirẹlịapụ ma ḅụ sọ ḅa. Ọrụḅọ-ọrụḅọ KỊNỊNYANAḄỌ ḅe ẹrẹ kẹ amịna ḅara-kọngọ kẹẹ ḅa, elekima ḅara ḅụ tẹ ori Tamụnọ atomi ma ḅẹ gbọrụḅọ kẹ amịna ḅụụ sịn ḅa.”

Ayịzaya 45:23

À minini kịnị pịrị ye mẹ karakaram tẹ anị ḍima ḅịa. Yẹrị sime-ḅara ḅụ à mininiarị tẹmẹ-la ḅara ḅụ: Ḅẹḅọ-ḅẹḅọ ḅo tẹ ị̀ tọrọkọ kparakị ḅa tẹ ye karị ḅa mịnẹ mḅọ amadaḅọ kụn kẹ ị̀ pịrị ḅa.

Ayịzaya 48:1

Ó miemẹ pokii, Izirẹlịapụ, ọmịnị tẹ Juda furo ḅụ paka apụ! KỊNỊNYANAḄỌ ḅe ẹrẹ ḅụ mie ó ye karịarị, pịkị ọkịarị mịnẹ ó sunsin Izirẹlị Tamụnọ ḅe pịrịarị kụma ó ḍukoarị ye anie ó fiearị ye anị-a.

Jerimaya 12:16

Ịn nwẹnị ịna ḅioḅẹngbọ mẹmgba kẹ ị̀ atomi Tamụnọ-nimi ḅara mẹ ọkị, tẹ in ye karị ḅẹ sakị ḅẹẹ ḅa, ‘KỊNỊNYANAḄỌ ḅe ḍumo wararị ogbo’ anie gbọrụ sakị ḅụ ini ị̀ atomi toluma tẹ in Balị ḅụ karị-karị ḅara mẹ — anị sakị rẹ mie ini ị̀ atomi ma ḅẹ apụ sọ ḅarịye, tẹ pịkị lolo ḅa.

Jerimaya 19:13

Jeruselemu ḅẹ awarị ma na, Juda ḅẹ amadapụ awarị ma na, tẹ karakara-ḅara-ḅụ warị mamgba tẹ ini arị isun ọgọnọ kụnụaị dọkịma lolia ma pịrị tẹ aị ma, pịkị iru sara ḍiepịrịye kẹ oru-atamụnọ pịrị tẹ ayọ ma — arịmgba fịafịa-a ḅara sime ḅa Tofẹti sime-ḅara.”

Jerimaya 32:29

tẹ anị dọkịma ḅa. Ịn dọkịma ḅo kiri lama ḅa. Tomi ma arịḅẹ isun ọgọnọ-jụ ḅụ kụnụaị dọkịma-dọkịma Balị pịrị tẹ pịkị iru sara oru-atamụnọ pịrị-pịrị tẹ kẹ ị́ ịganịma sime awarị ma sọ dọkị ḅa.

Jerimaya 4:2

anị kuraye sọ ḅa ọmịnị ị̀ ẹrẹ ḅụ ye karị-karị. Anịtẹso sịẹ-sịẹ mamgba ị̀ ḅara ḅii ḅa arị in bomaa, tẹ ịn nwẹnị ì tokini ḅa.

Jerimaya 49:1

Mie KỊNỊNYANAḄỌ ḅe ḍuko tẹ ye Amọnị gboloma ye ḅụ: “Ndẹẹ Izirẹlị ḅẹ atomi ma? Gbọrụḅọ sọ ofori ịna amakiri mẹ ḍụa? In tiegotẹ wẹrịso tẹ Mịlịkọmụ tẹkẹarị apụ ma Gadi furo-ḅẹ-apụ ma kiri mẹ ọkị tẹ kẹ amịna nye sọma tẹ anị yọ ḅụ anga?

Jerimaya 5:2

Ọmịnị ọkịarị ó sunsin KỊNỊNYANAḄỌ ḅe pịrịarị sọ, ó ḍukoarị ye na ó fiearị ye na gberie-a.

Jerimaya 5:7

KỊNỊNYANAḄỌ ḅe nwẹnị gbela, “À tiegotẹ ị̀ atomi asi ma wẹrịso ḅẹ? Ini ị̀ kẹ gbin-koroma-so tẹ karakaramatẹ tamụnọ-a aị ma mie in sunsin pịrịarị. Àrị ịn pịrị fị furo ḅinmam, kụma ịn sẹfịm tẹ ama-mẹnjị-ereme na koro-simem.

Jerimaya 7:10

Ọ́ mịna à ḍiki-ḅioḅuarị aị ma mịẹarị, tẹ ḅo ị̀ tọrọkọ sịẹ tẹ ị̀ ḅara-kuḅu ḅẹ Warị mẹ ḅio ḅẹẹarị: “Wa la-la ye ofori!”

Jerimaya 7:9

Ó furuarị, kịnị ḅaarị, sẹfịarị, ye karị tẹ iruo aị ḍukoarị, agbamịẹ Balị pịrịarị, tẹ sunsin ó nimi sọ nimi wẹrị-a atamụnọ pịrịarị.

Jerimaya 8:2

Ini arị kobiri tẹ ḍiḅi ḅẹ nakara ịna mgbe ma vooma kiri ḅio sara sime ḅa, kẹ ḍụọ ḍiḅi ḅẹ ḅụrụtẹ fun sara ḅara. Ini arị gala-galama sara ịrụa na akalụ na lolia ma na pịrị ḅa, anie mịna atomi ma ḅẹlẹma tẹ fịrịmẹnjị pịrị sime aị ma, anie ini arị aḅịḅị ḅii tẹ sunsin pịrị aị ma.

Hosiya 10:2

Amịna aḅioḅẹngbọ oḅori-kẹ-kịnịsịn ḅara sime wararị apụ ma mịọkụ ịna asi gotẹ tọrụsiẹrị ḅa. Tamụnọ ịna agbamịẹ-anga ma kan kiri lama tẹ pịkị ịna tọn-tọn ḍụḅarị ḅeriaị ma guluguluma ḅa.

Hosiya 4:15

“Izirẹlịapụ ma nwẹnị ḅioḅẹngbọ-kẹ-sịrẹrẹ-niḅi-a ḅara sime ị̀ pịrịarị sọ, yee Juda paa anị gbọrụ si mẹ mịẹ ma. Giligalị anịanịa Bẹtẹlị ḅụ sunsin oru pịrị ma, anịanịa anị anga ḅụ ḍumo wararị Tamụnọ ḅe ẹrẹ ḅụ ye minini.”

Emọsị 5:26

Kụma mịọkụ, ó sunsin Sakutu, ọmịna ama-da tamụnọ ḅe afụḅara ma pịrịarị ẹrẹsị, pịkị Kayịwanị, ọmịnị ọmịna oru-afụḅara ma dogi-dogi mẹnjị ḅa,

Matiyo 6:24

Gbọrụḅọ-sọ inetẹ gbọrụ sakị ḅụ omoni-sọ maa sịḅịdapụ pịrị ḅịa; ọ̀ gbọrụḅọ ḍiki-ḅioḅu tẹ osi-ḅọ ḅẹlẹma ḅa; ọ̀ sịḅị-tuu gbọrụḅọ pịrị tẹ osi-ḅọ ḍiki-sima ḅa. Ọmịnị inetẹ Tamụnọ na igbigi na kẹ pii-pii ḅẹẹ ḅara kẹ fịrịmẹnjị pịrị ḅịa.

Fịrịmẹnjịapụ 10:9

Anị ḅẹ ene-ḅaa ḅụ oku mu apụ ma mu Jọpa mẹ kpeki sakị, Pita sọ pịkị mu warị isun ọgọnọ eneḅaka ogbo ḅẹ tẹkẹ kọn ḅẹ mu tẹ.

Romu 14:11

Kẹ gotẹ ọkọ ḍukoarị, Fịafịa Ḍiri mẹ ḅẹẹarị, “Piki-pikiye-ofori ḅara ḅụ yẹrị anie ḍumo wararị Tamụnọ ḅe nwẹn ḅẹẹ sakị goyegoye, KỊNỊNYANAḄỌ ḅẹẹarị, ḅẹḅọ-ḅẹḅọ ị̀ tọrọkọ kparakị ḅa tẹ ọrụḅọ-ọrụḅọ ḍuko-pakama ḅa mịnẹ yẹrị anie Tamụnọ.”

Ditẹrọnọmị 10:20

Ọ́ KỊNỊNYANAḄỌ ọmịna Tamụnọ ḅe ḍiki ḅalafa ḅa, ọ́ fịrịmẹnjị ọ̀ pịrị tẹ ọ̀ fịnama ḅa anịsakị ori ẹrẹ ḅụ mie ọ́ ḅụụ pikima ḅarịye.

Ditẹrọnọmị 4:19

Anịsakị ọmịnị ọmịna aḅụụ ẹbị anieofori ó ḅofa ọmịna atọrụ saakị So daa, tẹ So-ḅio sime aị mamgba — ịrụa mẹ na, akalụ mẹ na, lolia ma na — ẹrị sakị ó ḅofa pịkị tẹ sunsin tẹ fịrịmẹnjị arị pịrị. KỊNỊNYANAḄỌ ọmịna Tamụnọ ḅe mịna aị ma kẹ bebe So mẹ suku-ḅio simearị asịẹ mamgba pịrị tẹẹ.

Jọsụwa 23:7

mịẹtẹ ọ́ mịanga ọmịna ogbo-ḅio kọn wararị mịna opu asịẹ ma na pikiri pikiri, anịanịa ịna oru-atamụnọ ma ẹrẹ go, anịanịa ịn kẹ ye karị, anịanịa fịrịmẹnjị ịn pịrị, anịanịa sịḅị-tuu ịn pịrị ḅịa ḅara,