Luku 16:15 - FỊAFỊA BAỊBỤLỤ

¹⁵ Jizọsị nwẹnị ịn ḅẹẹ, “Ọmịnị anie tomina tọrụ iḅi ọkị ḅẹ ḅara kẹ ye mịẹarị apụ, kụma Tamụnọ ọmịna ḅioḅẹngbọ sime ye nimi wararị. Tomi kẹ opu ye sịn-arị ye Tamụnọ tọrọkọ gberie-sọ gberie-a.

Luku 16:15 Iomraidhean Croise

1 Paka-aị 29:17

Ị̀ Tamụnọ, à nimi wararị mịnẹ ḅioḅẹngbọ mẹ mie ị́ daaḍikiarị ye tẹ tụkụ sịẹ ḅụ ḅioḅẹlẹ nyanam; ị̀ ḅioḅẹngbọ kẹ karakara ḅụ à mịna aị mamgba kẹ tọn ị̀ pịrị-a ḅara ḅụ agba mịẹ ị́ pịrị tẹẹ, à pịkị mịọkụ ị́ atomi ma ẹrị tẹẹ, inima tẹ mịanga ḅụ sime tẹ ḅioḅẹlẹ ḅara kẹ tọn ịn pịrị-a ḅara ḅụ agba mịẹ ị́ pịrịarị apụ ma.

2 Paka-aị 6:30

So-ḅio í sime anga ḅụ naa, tẹ si-wẹrịsoo, tẹ mịẹ ḅụọ-ḅụọ pịrịị, ị́ wẹrịtẹ mḅọ ḅioḅẹngbọ na mḅọ etela mamgba na nimi ḅara. Kẹ gotẹ ọkọ ḅẹẹarị, ị́yẹrị ngẹrị anie tomina awọmẹ ma aḅioḅẹngbọ nimi ḅọọ;

Devidi-Anume 10:3

Si-sịḅịḅio-sụa tomḅọ ḅe ọ̀ mịẹ ḅẹ tẹ kuromarị siye mẹ kẹ ḅụụ bomarị: Opu pọkọ-ḅẹngbọ sụa tomḅọ ḅe Tamụnọ wori-wori tẹ ọ̀ sịkịarị.

Devidi-Anume 49:13

Amịna aḅụụ kẹ ḅiokpọmarị apụ ma ḅụ pakarị ye ḍikii, anie ịn kọọn sara ngọ gotẹ ọkịarị mịnẹ ye ini na iḅi wararị nwẹn ḅẹẹ apụ ma;

Devidi-Anume 49:18

Tomḅọ nwẹnị ọkị mịnẹ mịẹ ḍumo mẹ ḅụ ye mḅọ na iḅi fama tẹ, tẹ kịnị anịẹrẹsị mḅọ tokiniarị sọ,

Devidi-Anume 7:9

Ị́yẹrị anie kuraye mịẹarị Tamụnọ tẹ wamịna akuroma ma na wa ḅiiarị aị na kọn-arị. Si atomi ma si-sịḅịḅio mẹ dasịẹmaa tẹ iḅi kẹ iḅi-apụ ma mịẹẹ.

Egberima-Ẹkwẹn 16:5

KỊNỊNYANAḄỌ ḅe opu ẹkwẹn kọn-arị ḅọ goḅọ-goḅọ ḍiki-ḅioḅuarị; gbala-gbala ọ̀ ḍụkụ tẹ fomu-ḅara ịn gbarị ḅịa.

Egberima-Ẹkwẹn 20:6

Ḅẹḅọ-ḅẹḅọ mḅọ sịḅị-tuu la ḅara na ḅioḅẹngbọ-kẹ-sịrẹrẹ-niḅi ḅara na ḅẹ aị ḍukoarị, kụma ị́yẹrị paa ḅụụkụrọma tẹ karakaramatẹ ọkọ sime ḅọ mẹ ḍọkị-ẹrịị!

Egberima-Ẹkwẹn 21:2

Ẹbịsịya í kuroma ḅa mịnẹ ị́ mịẹarị ye goyegoye kuram, kụma kẹ ḅiokoroma mịnẹ KỊNỊNYANAḄỌ ḅe í gotẹ mịẹarị aị ma pekele-ḍikiarị.

Jerimaya 17:10

Yẹrị, KỊNỊNYANAḄỌ ḅe, anie kuroma ma sọkịrịarị ḅọ, pịkị tomina aḅioḅẹngbọ daaḍikiarị. Ọrụḅọ-ọrụḅọ kẹ ḍumo kọn-arị ḅara mie à ḍiki tẹ mḅọ na mịẹarị, mḅọ mịẹarị ye sime-ḅara.”

Malakayị 3:15

Wa ẹrịarị ḅara ḅụ, ḅụụ-gelemarị atomi anie ḅioḅẹlẹarị apụ ma. Si atomi loloarị ngẹrị-a, kụma ịn pịkị Tamụnọ ḅe ye-inema daaḍikiarị ịna si-amịẹaị ḅụ, tẹ gberie-sọ ịn la-a.’ ”

Matiyo 23:5

Ịn mịẹarị ye goyegoye tomi ini ẹrị ḅẹ ḅara mie in gotẹ mịẹarị. Fịafịa Ḍiri mẹ ḅio paka-ḅo ẹkwẹn kẹ gbin, tẹ ịn kẹ ịna afụḅara ḅọkọ na ḅara-kọngọ na kpọọ wararị ịrụ-ịrụtẹ apara igbe ma tẹ ịn Tamụnọ ẹkwẹn-aḅịḅị kẹẹ su wararị aị ma badara la ḅara ḍikii! Pịkị ịn kẹ ịna akpa suku pono wararị ịsịramụ ma nangwọ la ḅara ḍikii!

Matiyo 6:16

“Tẹ í ḅuru-ịmọ ḅarị sakị, ị́ kururuarị ḅara kẹ ị́ tọrụkuḅu wẹrị ḅịa, anie mịẹ tomi ḍie apụ ma mịẹ-mịẹ ḅara mẹ. In go ịna tọrụ kuḅu mịẹ simearị ye tomi in ḅuru-ịmọarị mẹ nimi ḅarị ḅara. Ó nimi mịnẹ ịna gbẹẹ-ye ịn nyana gbasịma kụra ḅio iḅerea.

Matiyo 6:2

“Mie ḅụ ị́ ḅọrọ ye kẹ mịẹ ọkụ ofori ḅọ pịrịarị ḅẹḅẹ, anị kẹ kpokpo gbolo ma, anị ḅara anie mịẹ tomi ḍie atomi ma mịẹ-mịẹ ḅara, ama-awarị ma ḅio na, etela ogbo ma ḅụ na. Ini ọkọ mịẹ tẹ tomi ẹrị tẹ in tokini ḅarị ḅara. Ó nimi mịnẹ ịna gbẹẹ-ye ini ọkị gbasịma tẹ.

Matiyo 6:5

“Ị́ tẹkẹarị sakị mịẹ tomi ḍie apụ ma tẹkẹ, tẹkẹ ḅara tẹkẹ ma. Ini ma ịna ḅụụ-ḅẹlẹarị ye anie ama-awarị ḅio na, etela akaka na ḅụ, sịẹsime tẹ tẹkẹ, mịẹtẹ kịnị ịn tẹkẹarị mẹ kẹ ini ẹrị ḅarị ḅara. Ó nimi mịnẹ ini ịna gbẹẹ-ye nyana gbasịma kụra ḅio iḅerea.

Luku 10:29

Kụma Oloko tolumaḅọ ḅe paa amịna ḅụụ kẹ iḅi kiri sịẹma ḍọkị ḅụ nwẹnị Jizọsị ḅii, “Ị̀ na kpeki tẹ anga ḅọ ḅọrọ tụḅọ?”

Luku 11:39

Mie ḅụ KỊNỊNYANAḄỌ ḅe nwẹnị ọ̀ ḅẹẹ, “Mịọkụ ọmịnị Farịsiiapụ, ọmịna akọpụ ma na ẹfẹrẹ ma na ọḅụjụ mịẹ ọ́ kẹ ye sịn tẹ sịkịrị, sịkịrị ye, kụma ọmịna aḅụụ ḅio ḅụ ọ́ ḅụrụ kọsị wararị, kụrọ-kụrọ amịẹaị na, si na, ọmịna aḅụụ ḅio ḅin wararị!

Luku 18:11

“Farịsiiḅọ ḅe nwẹnị sikima ḅele tẹ tẹkẹ, ‘Tamụnọ, àrị ịmịẹtẹ kẹ ị́ ḅẹẹm, mịnẹ à ja tomi sime-ḅara sime-a — opu pọkọ-ḅẹngbọ sụa, ja apụ mingirima, anịanịa sẹfị ma ḅọrọ. Ịmịẹtẹ mịnẹ àrị anịanga simearị ama-igbigi da ḅọ ḅe na kịka-a.

Luku 18:14

Jizọsị nwẹnị ḅẹẹ, à ḍuko ọ́ pịrịarị, ama-igbigi da ḅọ ḅe mie Tamụnọ na ḅẹrẹ-fama tẹ ye, ọ̀ warị la sakị, Farịsiiḅọ ḅe-a. Gbala amịna ḅụụ gelema ḅọ, gelema ḅọ ini mḅọ iderima ḅa, tẹ amịna ḅụụ iderima ḅọ, iderima ḅọ ini mḅọ kẹ opu sọma ḅa.”

Luku 18:21

Tomḅọ ḅe nwẹnị pakịrị, “Ị̀ ịwọ sakị kụra-ḅio à mịna oloko ma kokoarị.”

Luku 18:9

Jizọsị nwẹnị pịkị mị egberi mẹ gbaa amịna ḅụụ kẹ iḅi-apụ sịn tẹ ja apụ ḍiki-simarị apụ ma pịrị.

Luku 20:20

Miemẹ ḅụ ịn nwẹnị ini na-iḅi ḅẹ sakị ḍọkị. Ini ọḅụ kẹ ja atomi pịrị fịm mịnẹ ini ịna ḅụụ kẹ ó ḍukamẹnjịarị karakara atomi elekima, tẹ ini ịn kẹ fịrịma tẹ in mu ọ̀ ḅịḅị ḅụ ye naa ḅo, tẹ ịn kẹ ọ̀ kẹ Romu ḅẹ Ḅẹrẹtọnḅọ ḅe opu kụrọ ḅara-ḅio suu ḅẹ ḅara, kịrị-kịrị aị kẹ Jizọsị gbela ḅụ.

Luku 20:47

Ini ma anie diapụ-fịtẹ-ereme ma sime-ḅara ḍiki tẹ ịn nyana aị fọịn ọkị tẹ nwẹnị nangwọ atẹkẹ kọn-kọn ịn pịrịarị apụ. Ḅo ịn la ḅarị fomu-ḅara sii ḅaka lama ḅa!”

Jọnị 2:25

Kịnị pịkị gotẹ in gboloma ye ḍuko ọ̀ pịrị-pịrị ye ofori, tomina aḅioḅẹngbọ sime ye ò nimi famam ẹrẹsị.

Jọnị 21:17

Jizọsị tẹra sakị karama ye kẹ ḅẹẹm, “Sayịmọnị, Jọnị tụḅọ ị́ ị̀ ḅẹlẹmarị, ọkọ-a?” Pita nwẹnị kururu. Jizọsị tẹra asakị karama ye kẹ ó gbela ye ẹrẹsị, “Ị́ ị̀ ḅẹlẹmarị, ọkọ-a?” Mie ḅụ ori ọ̀ ḅẹẹm, “KỊNỊNYANAḄỌ, í nimi kọnma ye ofori, í nimi wararị mịnẹ àrị ị́ ḅẹlẹmarị.” Jizọsị nwẹnị ọ̀ ḅẹẹ, “Tọrụ kẹ ị̀ anana ma ḅụụ wẹrịị.

Fịrịmẹnjịapụ 1:18

(Judasị, ò si ḅọkọ ḅụ nyana ḅo igbigi kẹ kiri fẹm, anị ḅụ anie ọ̀ ḅịkị-koro tẹ fịị ye. Ọ̀ nwẹnị sun kanakana tẹ kan, tẹ ò furo ḅẹ ịla mamgba sara paka-ḅo.

Fịrịmẹnjịapụ 1:24

Anịtẹso ịn nwẹnị tẹkẹ, “KỊNỊNYANAḄỌ, anie tomi kuromarị aị mamgba nimi ḅọ, mịna maa apụ ma ḅụ ị́ sẹlẹ-ọkị tẹ ḅọ kẹ wa ḍie, tẹ mḅọ

Fịrịmẹnjịapụ 15:8

Tẹ Tamụnọ, ọrụḅọ-ọrụḅọ akuroma nimi ḅọ ḅe, Ja asịẹ ḅẹ apụ ma daa-ọkị ye mẹ ḍie-pakamam, ori ọ̀ Fịafịa Tẹmẹ ḅe kẹ wa pịrị gbọrụ ḅara mẹ kẹ ini sọ pịrị ḅụ.

Romu 3:20

Oloko mẹ koko ẹrẹsị Tamụnọ tọrọkọ karakara ḅẹ ḅọ ofori; Oloko mẹ bebe kọrịarị ye anie mịẹtẹ tomḅọ nimi mịnẹ mḅọ si mịẹ tẹ.

Romu 8:27

Tẹ wamịna ḅioḅẹngbọ ẹrịarị Tamụnọ ḅe, Tẹmẹ ḅe kuromarị ye mẹ nimi wararị; gbala Tẹmẹ ḅe Tamụnọ atomi gotẹ ọ̀ ḅara ḅiiarị aị ma anie pịkị ọ̀ tọn aị ma.

1 Kọrịntị 4:5

Anie mịẹ tẹ, sakị mẹ amụ la-a ogbo ọ́ ḅẹrẹ-ḅarasii pẹlẹ gbọrụḅọ-sọ pịrị ma. Kunoma ḅẹrẹkọn mẹ koru mu KỊNỊNYANAḄỌ ḅe sakị la, tẹ mịọkụ kanakana ḅio kikima wararị aị mamgba, ori ọkị-ḅo bele ḅio sara fama tẹ, pịkị tomina ḅioḅẹngbọ jụ ḅio simearị akuroma mamgba pakama-ḅo fama ḅa. Anị ḅo ọkọ la sakị ọrụḅọ-ọrụḅọ Tamụnọ ḅara mḅọ la tokini nyana ḅa.

1 Pita 3:4

Anie nakara, ye ọmịna iḅi ḅụụ ḅio ḅụ sime, omongi-omongi-a iḅi, gbenetẹ deintẹ tẹmẹ, aniemẹ mie Tamụnọ tọrụ ḅụ yela tẹịn ye.

1 Pita 5:5

Ọmịnị asawọ ma sọ ọkọ ḍikima tẹ sịḅị-tuu omongiapụ ma pịrịị, tẹ ọmịnị-mgba ḅụụ iderima kẹ tọrọkọ kikima ḅịtẹ sọma tẹ fịrịmẹnjị jụmọ-jụmọ pịrịị, kẹ gotẹ ọkọ ḍukoarị, Fịafịa Ḍiri mẹ ḅẹẹarị, “Tamụnọ ḅụụ-gelemarị ḅọ na tụḅụrụarị, kụma ḅụụ iderimarị ḅọ mẹ mie ori iḅi tọrụ kẹ ḍikiarị.”

Mịẹfinji 2:23

À pịkị á ḍukamẹnjịarị apụ ma ḅaa ḅa, anịsakị sọsị mamgba nimi ḅa mịnẹ yẹrị anie ọrụḅọ-ọrụḅọ sime-ḅara nimi ḅọ. Ọmịna ḅụ ọrụḅọ-ọrụḅọ mịẹye à nwẹn ḍiki tẹ mḅọ gbẹẹ ḅa.

1 Samụẹlị 16:7

Kụma KỊNỊNYANAḄỌ ḅe nwẹnị Samụwẹlị ḅẹẹ, “Ọ̀ sime-ḅara, anịanịa ò gele la ḅara ḍiki ma. Àrị ọ̀ sịkị tẹẹ ẹrẹsị, kẹ gotẹ ọkọ ḅẹẹarị, à tomḅọ ye ḍiki ḅara kẹ ye ḍiki-a. Tomḅọ paka-ḅo tẹ sime-ḅara mie tomi ḍikiarị ye, kụma yẹrị, ḅioḅẹngbọ mẹ mịẹ à ḍikiarị ye.”