Jerimaya 3:8 - FỊAFỊA BAỊBỤLỤ

⁸ Juda sọ ẹrịm mịnẹ arị Izirẹlị siya tẹ á dee-pakama tẹẹ, arị ị́ ḅụ so tẹ ama-mẹnjị-ẹrẹḅọ sọ tẹ ẹrẹsị. Kụma, Juda, Izirẹlị si ịyịmbara ma, á ḅalafa-a. Árị sọ ḅo ama-mẹnjị-ẹrẹḅọ sọm,

Jerimaya 3:8 Iomraidhean Croise

2 Paka-aị 21:11

Anie sikima, ọ̀ pịkị gele ayeyọ pakamam Juda ḅẹ tụndụ opu sịẹ mẹ ḅụ, tẹ Jeruselemu ḅụ angarị apụ ma toluma mu minini nyana-a ḅụ su, pịkị mịẹ tẹ Juda etela-irim.

Ayịzaya 50:1

KỊNỊNYANAḄỌ ḅe mẹẹ, Í kuromarị à diḅọ na siya tẹ ẹrẹḅọ ḅara kẹ ị̀ atomi ḅẹẹ tẹ in so? Nwẹnị ọkọ kụma ndẹẹ ḅọrọ siya aḍiri ma? Ó kuromarị arị ọ́ kẹ dẹrị tẹ ini tomḅọ amịna awọmẹ kẹ omoni ḅara dẹrị ḅara? Ẹn-ẹn, ọmịna asi mie ó gotẹ kun ḅio sọ yee; ọmịna asi mịẹ-aị ẹrẹsị ini ọ́ kẹ ala-jụ fịrịmam.

Jerimaya 2:19

Ị́yẹrị ḅarana mịẹ si mie ị́ fomu ḅarịye, ị́ ị̀ ḅụụ pịkị-so ye mẹ ḅẹrẹ kọn ị́ ḅara sima ḅa. Ị́ ḍawọ ḅo ḅa anị akụ tẹ kura-a la ḅara ị́ KỊNỊNYANAḄỌ ị́ Tamụnọ ḅe koroma mangị-so ye mẹ tẹ ḅarị jen kẹ ḅioḅẹngbọ-kẹ-sịrẹrẹ-niḅi ḅara sime ị̀ pịrị-a. Yẹrị, Tẹịn-Ḅẹrẹtọn-Kụrọ-Nyana KỊNỊNYANAḄỌ, Kụrọmamgba Nyanaḅọ ḅe ọkọ ḅẹẹm.”

Jerimaya 3:1

KỊNỊNYANAḄỌ ḅe mẹẹ, “Tomḅọ nwẹnị ọ̀ ta na siya tẹ á jụmọ sime kụma ọ̀ ḅarị inetẹ jen kẹ árị ọkị sime ḅịa. Miemẹ gbọrụ sịḅị amakiri mẹ pilema fama ḅa. Kụma, Izirẹlị, mịọkụ ị́ tọnwa oloapụ nyana tẹrẹmẹ pịkịma ị̀ ḍọkụma-ḅo ḅẹ-ḅiiarị!

Jerimaya 33:24

“Tomi ḍukoarị ye ị́ kẹ elekima sụa tẹ, mịnẹ yẹrị Izirẹlị na Juda na sịkị tẹ, maa afuro ma tẹ à sẹlẹ ọkị apụ ma? Tẹ anie ḅụ ini ị̀ atomi ma ḍiki-iderima tẹ ḅarị jen kẹ sịẹ ḅara kẹ ini ọkị-a.

Jerimaya 5:7

KỊNỊNYANAḄỌ ḅe nwẹnị gbela, “À tiegotẹ ị̀ atomi asi ma wẹrịso ḅẹ? Ini ị̀ kẹ gbin-koroma-so tẹ karakaramatẹ tamụnọ-a aị ma mie in sunsin pịrịarị. Àrị ịn pịrị fị furo ḅinmam, kụma ịn sẹfịm tẹ ama-mẹnjị-ereme na koro-simem.

Izikẹlị 16:46

“Ị́ mịnaḅọ ẹrẹḅọ omongiḅọ anie Sameriya, ọgọnọ-jụ da anga emi ama mẹ, árị na árị akala-ama ma na. Ị́ mịnaḅọ kala ẹrẹḅọtụḅọ, na arị akala-ama ma na, anie Sọdọmụ, abajị-suku da anga ḅụ.

Izikẹlị 16:47

Ịna aḅụọ ḍiki-mẹnjị tẹ ịna sịḅị-ngụngụnma amịẹaị ma ḍiki mịẹ ị́ na iḅi? Gbala-gbala, boowa kala sakị kịngẹ, kụma ị́ mịẹ ye goyegoye ḅụ í sii ịn nẹngị tẹẹ.”

Izikẹlị 16:51

“Ị́ mịẹ tẹ si kẹ maa anga ḍiya ḅẹ gbọrụ anga na gbasị ye sọ Sameriya mịẹ-a. Ị́ kpọma ḅụụ-ngụngụma aị mịẹ jene á mịẹ tẹ ḅara goyegoye nẹngịm. Ị́ ḅụrụ-kọsị mẹ mịẹ tẹ ị́ amịnapụ ereme ma ḍiki-tọrụ ḅụ amụ gbọrụ si sọ mịẹ-a apụ kịka tẹẹ, kẹ tọnma ḅụ.

Izikẹlị 23:44

Ịn pịkịma arị ama-mẹnjị-ereme ma dama-mu-mu-mum. In siin Ohola na Oholiba na dama-mum, arị ama-mẹnjị si mịẹ ma ḅọrọarị ereme ma.

Izikẹlị 23:9

Mie ḅụ àrị á saḅama árị Asiriya ḅẹ ḅẹlẹmapụ pịrịm, anie á kpọma ḅii sime apụ ma.

Hosiya 3:4

Paa mị gbọrụ ḅara mẹ Izirẹlịapụ ma sime tẹ ḍumo nyanam, mu alama lama, amadapụ anịanịa sịḅịdapụ nyana-a ḅara, agba ma anịanịa tọn-tọn aḍụḅarị ofori ḅara, oru-afụḅara anịanịa mḅudu amẹẹ tẹ kẹ ḅịrị ḅii ḅẹ aị ofori ḅara.

Ditẹrọnọmị 24:1

Owiḅọ ẹrẹḅọ ọkị tẹ árị na simem, anịtẹrẹmẹ ori á ḅụụ ḅụ tọrụ gbẹẹ-a ye ḍọkị-ẹrịm, ẹrẹsị á ḅarị ọ̀ ḅụụ-ḅẹlẹ-a ḅẹḅẹ tẹ ò siya ḍiri kẹẹ tẹ anị kẹ á ḅara-ḅio sụa tẹ ọ̀ warị ḅio á dee pakamam, tẹ á som,

Ditẹrọnọmị 24:3

tẹ ọḅụkọ á sime diḅọ ḅe á ḅarị ọ̀ ḅụụ-ḅẹlẹ-a tẹ siya ḍiri kẹẹ tẹ anị kẹ á ḅara-ḅio sụa, tẹ ọ̀ warị ḅio á dee pakamam, anịanịa á maaịn karama diḅọ ḅe tẹ arị ọkị ọ̀ ta sọma ḅọ ḅe fị-fịị,