Jerimaya 27:5 - FỊAFỊA BAỊBỤLỤ

⁵ “Ì opu kụrọ na ịnyọ na ḅụ, à tomikiri mẹ tẹmẹm, tomi na nama amẹẹ na tẹ tomikiri angarị aị mamgba na sọ; tẹ yẹrị sẹlẹ pakama-ḅo ḅọ goyegoye mie à kẹ pịrịarị.

Jerimaya 27:5 Iomraidhean Croise

Suku-saakị 1:25

Tamụnọ nwẹnị tọrụ-kịrịkịrị piri-ḅio-ḅẹ anama ma na, warị-ḅio ḅẹ anama ma na, kpongbo ọgọnọ simetẹ ikiriarị anama mamgba na tẹmẹ. Tẹ Tamụnọ nwẹnị ẹrị mịnẹ arị iḅim.

Suku-saakị 9:6

Tomḅọ ọmbie ọsụma ḅọ ọsụma ḅọ, mḅọ pembema tomḅọ pịkị mḅọ ọmbie sọ ọsụma ḅa, kẹ gotẹ ọkọ ḅẹẹarị, Tamụnọ tomi kẹ ọ̀ ḅụụ kịkama tẹmẹm.

1 Amadapụ 8:42

gbala ini ị́ gburo-gburotẹ ẹrẹ mẹ na, ị́ ḍụḅa ḅụra tẹ ḅara mẹ na, gburo-gburotẹ akọrịnama ma tẹ ị́ kọrị aị ma naa tẹ tọrụ kẹ mị Tẹkẹ-warị mẹ daa tẹ tẹkẹ tẹkẹ,

Ẹzịra 1:2

“Mị-ḅara mie Sayịrọsị Pasịya ḅẹ amadaḅọ ḅe ḍuko yee, KỊNỊNYANAḄỌ ḅe, So-ḅio ḅẹ Tamụnọ ḅe tomi kiri mẹ ḅẹ ama-da kụrọ mamgba kẹ ị̀ pịrị tẹ, tẹ tọn ị̀ pịrị tẹ à Jeruselemu, Juda ḅụ simearị ama mẹ ḅio gbọrụ warị nama ọ̀ pịrị.

Nehimaya 9:22

Ị́ ama-da na tomi na kẹ in pịrịm, tẹ ịkọlị goyegoye kẹ in pịrịm. Anị ḅara ḅụ in Siyọnị Ẹsịbọnị ḅẹ Amadaḅọ ḅe ama ọkị nyanam; in pịkị Ọgụ Bẹsani ḅẹ Amadaḅọ ḅe ama ọkị nyanam.

Devidi-Anume 102:25

iḅere-iḅerea kụra-ḅio í kiri mẹ tẹmẹm, ị́yẹrị ḅarana So ma sọ mịẹm.

Devidi-Anume 96:5

Osi asịẹ ma ḅẹ atamụnọ mamgba papaa oru-afụḅara famam, kụma KỊNỊNYANAḄỌ ḅe So ma tẹmẹm.

Paka-so 20:11

Gbala sonio aḍin mie yẹrị KỊNỊNYANAḄỌ ḅe kẹ So ma na Kiri mẹ na, tọrụ mẹ na anị ḅio simearị aị mamgba tẹmẹ ye, tẹ nwẹnị sọnọma aḍin karama ene mẹ ḅụ ịnyọsara yee. Miemẹ gotẹ anie à sọnọma aḍin karama ene mẹ boma tẹ anị wẹrị fịafịama yee.

Paka-so 6:6

Anịẹrẹsị Izirẹlịapụ ma ḅẹẹ, ‘Yẹrị anie KỊNỊNYANAḄỌ ḅee, anịsakị arị Ijiputi ḅẹ apụ ma dogi-aị ma suku-ḅio ḅụ ọ́ pakama-ḅo ḅa tẹ arị ọ́ ḍụa-ḅọrọma ḅa ịna omoni ḅara mẹ ḅio, sụụn-pakatẹ ḅara-kọngọ na, gburo-gburotẹ opu ḅẹrẹkọn amịẹaị mịẹ ḅara na à nwẹn kẹ ọ́ pakịrị ọkị ḅa;

Ayịzaya 42:5

Tamụnọ So-tọrụ mẹ tẹmẹ tẹ anị kẹ anị finji mu la anga lamam; Ori tomikiri mẹ na anị ọgọnọ angarị aị mamgba na mịẹm; Ori ḍumo na ọwụ-sara na kẹ ori atomi pịrịm. Tẹ mịọkụ KỊNỊNYANA-TAMỤNỌ ḅe ọ̀ fịrịmẹnjịḅọ ḅẹẹarị,

Ayịzaya 44:24

“Yẹrị anie KỊNỊNYANAḄỌ ḅee, ị́ ḅọrọmaḅọ; Yẹrị anie ị́ tẹmẹḅọ ḅee. Yẹrị anie KỊNỊNYANAḄỌ ḅe, ye mamgba Tẹmẹḅọ ḅee. Yẹrị ngẹrị So mẹ nụnụ finjimam à kiri mẹ tẹmẹ sakị, ḅarasụa gbọrụḅọ-sọ ofori.

Ayịzaya 45:12

Yẹrị anie kiri mẹ tẹmẹḅọ ḅe tẹ tomḅọ tẹmẹm ori anị yọ anga. Ị̀ kụrọ ḅụ à So mẹ finjima saram; Yẹrị ḅẹrẹtọn ịrụa mẹ na, akalụ mẹ na, lolia ma na pịrịarị.

Ayịzaya 48:13

Ị̀ aḅara kiri mẹ suku-saakịm tẹ pịkị So ma nụnụ finjimam. À Kiri na So na sịn kụma, anị-gbọrụ-kirikiri in tolu-pakarị ị̀ tọrọkọ.

Ayịzaya 51:13

Ọ́ tẹmẹ KỊNỊNYANAḄỌ ḅe ọmịnị ọ̀ kẹ ḅioḅọrọma tẹ, anie So ma nụnụ finjima tẹ kiri mẹ suku-saakị ḅọ ḅe? Ó tiegotẹ sakị mamgba ḅalafa ḅara kẹ ḍumo kọn ḅẹ ó ponomarị apụ ma owi-ịganị ḅụ, tẹlẹma tẹ ọ́ ḅaa guluguluma ḅẹ-yearị apụ ḅụ? Ịna owi-ịganị mẹ ḅarị jen kẹ ọ́ la ḅịa.

Jerimaya 27:4

Kụrọmamgba nyana KỊNỊNYANAḄỌ ḅe, Izirẹlịapụ tẹkẹarị Tamụnọ ḅe, ḍuko ị̀ pịrịm à tọn ịn pịrị tẹ in ḍuko ịna amadapụ ma pịrị mịnẹ KỊNỊNYANAḄỌ ḅe ḍuko tẹẹ:

Jerimaya 32:17

“Ḍụḅa Tẹịn-Ḅẹrẹtọn-Kụrọ-Nyana KỊNỊNYANAḄỌ, ị́yẹrị So mẹ na Kiri mẹ na tẹmẹm í opu kụrọ ḅụ; ị́ ḅụụ ḅụụ-fụkama ḅaka gberie sọ ofori.

Jerimaya 51:15

KỊNỊNYANAḄỌ ḅe kiri mẹ mịẹm ọ̀ kụrọ ḅụ; ori tomikiri mẹ tẹmẹm ò nimi ḅụ, tẹ So mẹ mịẹfinjimam.

Danẹlị 2:38

Ori ị́ kẹ tomikiri angarị apụ mamgba ḅẹrẹtọnḅọ mịẹ tẹẹ, pịkị nama na feni na amẹẹ mamgba ḅẹrẹtọnḅọ naa. Ị́yẹrị anie golu sịḅị mẹẹ.

Danẹlị 4:14

Ọ̀ nwẹnị kụrọma oloku tẹ ḅẹẹ, “Sịn mẹ pẹlẹ-gbin tẹ anị ḅẹ aḅara ma pẹlẹ-pẹlẹ sịraa; anị ḅẹ ịnyịnya ma kịrị siin tẹ anị ḅẹ asịnmgbọlụ ma gala-galamaa. Anị suku-ḅio simearị anama ma na anị ḅẹ aḅara ọgọnọ angarị afeni ma na dee.

Danẹlị 4:17

Mie ye-goyegoye ḍikiarị fịafịa apụ ma tọn koroma yee. Anịẹrẹsị, yee tomi mamgba ḅẹẹ-anga ḅẹẹ-anga ḅụ nimi mịnẹ, Kụrọmamgba-Nyana Tamụnọ ḅe tomina asịẹ ma ḅụ kụrọ nyana wararị tẹ ọ̀ pịkị inetẹ arị kẹ ọ̀ sẹlẹ-ọkịḅọ-ọkịḅọ pịrị ḅa — jen-a jen-a tomina ḍiki-tọrụ ḅụ ye ḅụ ofori apụ sọ.”

Danẹlị 4:22

“Gburo-gburo Opuḅọ, ị́yẹrị anie sịn mẹẹ, anie gele-fa tẹ pịkị kụrọ wararị sịn mẹ. Ị́ ḍụḅa ḅụra tẹ So la tẹẹ, ị́ kụrọ pịkị tomikiri-ngisịẹ mẹ kana tẹẹ.

Danẹlị 4:25

Ini í dee-pakama ḅa tomi ogboku ḅụ, tẹ í piri-ḅio-ḅẹ anama na anga ḅa. Ị́ sọnọma kụra kẹ nambulo osuka fị ḅara kẹ osuka fị ḅa, tẹ etela-ogbo mono ḅa, igirigi mẹ ị́ ọgọnọ sịra ḅarị anga. Anịsakị í minini ḅa mịnẹ, Kụrọmamgba-Nyana Tamụnọ ḅe tomina asịẹ ma ḅụ kụrọ nyana wararị tẹ ọ̀ pịkị inetẹ arị kẹ ọ̀ sẹlẹ-ọkịḅọ-ọkịḅọ pịrị ḅa.

Danẹlị 5:18

“Kụrọmamgba-Nyana Tamụnọ ḅe ị́ ḍa kẹ gburo-gburo amadaḅọ sọmam tẹ ebube na opu na kẹ ọ̀ pịrịm.

Fịrịmẹnjịapụ 14:15

“Ó tiegotẹ nwẹn sime ye mịẹarị? Wamịnị kọkọ ọmịna pembema tomi! Wa gotẹ mịanga ḅo ye Iḅi Oku mẹ ḍuko ọ́ pịrị tẹ ọ́ mịna papaa aị ma ḅụ pịkị ḍumo wararị tẹ So na Kiri na, tọrụ na, arị ḅio sime aị mamgba tẹmẹ Tamụnọ ḅe da ḅẹ ḅara.

Fịrịmẹnjịapụ 17:24

Tomikiri mẹ na anị ḅio sime ye goyegoye na tẹmẹ Tamụnọ ḅe, tẹ So na Kiri na Nyanaḅọ ḅe, ò tomi ḅara kẹ nama awarị ḅio anga anga-a.

Fịrịmẹnjịapụ 17:26

Kpọkpọ gbọrụ tomḅọ ḅụ mie ọ̀ saakị tomi kịrị-kịrị ma tẹmẹ tẹ ịn wasama bebe tomikiri mẹ anga ḅinma ye. Tomi ḍumo mu la ḅẹ sakị na ini anga mu daasịẹ ḅẹ oke na ọ̀ tarị nwẹn tọn koromam.

Ditẹrọnọmị 2:19

anịsakị ó ḅo Amọnị owiapụ-awọmẹ ma ye-yọ la sakị, ọmịnị ịna aḅụụ fụkama, anịanịa ini na ye na ịgbanịya ma, kẹ gotẹ ọkọ ḅẹẹarị, Amọnị owiapụ-awọmẹ ma ama mẹ ḅụ à gberie-sọ kẹ ọ́ nyana ḅẹ ḅara kẹ ọ́ pịrị ḅịa, gbala à kẹ Lọtị owiapụ-awọmẹ ma anị nyana ḅẹ ḅara kẹ ịn pịrị tẹ ẹrẹsị.

Ditẹrọnọmị 2:21

tọnwa nonji-atomi tẹ ịn kẹ Anakimu sịn ḍụḅa tomi nẹngị-nẹngịtẹ apụ ma gele ḅara gelem, kụma KỊNỊNYANAḄỌ ḅe ịna tọrọkọ ḅụ ịn ḅaam, tẹ ịna aḅara ḅụ anị ọkị, tẹ ịna sime kiri ḅụ simem;

Ditẹrọnọmị 2:7

Kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe ọmịna aḅara ḅẹ kọrịnama mamgba ḅụ ó boma tẹ, ọ́ mị gburo-gburotẹ ịkpa mẹ mẹnjị-toluḅọrọarị ye mẹ ò nimim; mịna akụra amesi ma ḅụ KỊNỊNYANAḄỌ ọmịna Tamụnọ ḅe ọmịnị na simem, ó ḅii tẹ ọ́ nyana-a gberie-sọ ofori.

Ditẹrọnọmị 2:9

Tẹ KỊNỊNYANAḄỌ ḅe nwẹnị ị̀ ḅẹẹ: Ó Mohabụ ḅụụ-fụkama, anịanịa ini na ye-nụnụa tẹ owu-sọ ma, kẹ gotẹ ọkọ ḅẹẹarị, àrị ịna ama ḅụ kpọkpọ gberie-sọ kẹ ọ́ pịrị nyana ḅịa, gbala à A-a nwẹn-sịn opu ama mẹ kẹ Lọtị owiapụ-awọmẹ ma pịrị nyana tẹ ẹrẹsị.

Ditẹrọnọmị 32:8

Geletẹịn Ḅọ ḅe ịna sime-anga kẹ opu asịẹ ma pịrị sakị ò tomina owiapụ-awọmẹ ma ḅelema sakị, Tamụnọ owiapụ-awọmẹ ma kịẹn-ḅịḅị ḅụ ò tomi-kụlọkụlọ ma oke ma mie koromam.

Ditẹrọnọmị 4:17

anị, ḅẹ nama, ḅẹ nama tẹ tomikiri ḅụ simearị ye na kịkaye, ḅẹẹye-ḅẹẹye tẹ pamba-sụa tẹ So-tọrụ mẹ ḅụ fiin-arị feni na kịkaye,

Ditẹrọnọmị 4:25

Ọmịnị ama mẹ ḅio simetẹ omongi, tẹ awọmẹ na taa-awọmẹ na ile-awọmẹ na iyi sakị, ọ́ ḅẹẹye-ḅẹẹye kịkama tẹmẹ ḅụ si mịẹ ḅara kẹ ye mịẹ tẹ KỊNỊNYANAḄỌ ọmịna Tamụnọ ḅe ḍiki-tọrụ ḅụ siye mịẹ ma. Miemẹ anie siye tẹ ori ịganịma ḅa.

Ditẹrọnọmị 4:32

Mịọkụ ọ́ ḅọrọtẹ amụ ọmịnị iyi-a sakị ḅẹ ene ma ḅụ mịẹ aị ma gbelaa, anị ene mẹ tẹ Tamụnọ tomikiri mẹ ḅụ tomi tẹmẹ eneḅaka kụra-ḅio. Tomikiri-ngisịẹ mamgba ḅụ ḍọkịị. Miemẹ pembema gburo-gburotẹ ye jen ene ḅụ paka tẹ, anịanịa kịnị ọkọ sime ye naa tẹ ḅoto?

Ditẹrọnọmị 4:35

Ọmịnị mie ini anị kẹ ḍie ye, mịẹtẹ ó nimi ḅẹ ḅara mịnẹ KỊNỊNYANAḄỌ ḅe anie Tamụnọ; ò sikima jụmọ ofori.

Ditẹrọnọmị 5:16

Ọmịnị ọmịna aḍapụ na, ọmịna iyingiapụ na kụụn, yẹrị KỊNỊNYANAḄỌ ọmịna Tamụnọ ḅe wẹrịtẹ tọn ọ́ pịrị ḅara, mịẹtẹ ọ́ nangwọ ḍumo kọn ḅẹ ḅara ama mẹ tẹ yẹrị KỊNỊNYANAḄỌ ọmịna Tamụnọ ḅe kẹ ọ́ pịrịarị ama mẹ ḅio.

Ditẹrọnọmị 9:29

Kẹ gotẹ ọkọ ḅẹẹarị, inima anie ị́ atomi, tẹ ị́ kẹ ínye mịẹ tẹ apụ ma, inima tẹ ị́ ị́ opu kụrọ na sụụn-paka tẹ ḅara-kọngọ na ḅụ pakama-ḅo apụ ma.

Kọlọsị 1:16

Kẹ gotẹ ọkọ ḍukoarị, ọ̀ ḅụụ mie Tamụnọ ḅọrọ tẹ ḅẹẹye-ḅẹẹye tẹmẹ ye, So-ḅio sime ye-o, kiri-ḅio sime ye-o, tọrụngbọ ẹrịarị aị-o, tọrụngbọ ẹrị-a aị-o, tẹmẹ ḅụ simearị akụrọ mamgba na, kịnịnyanapụ na, ḅẹrẹtọn-apụ na ịn kụrọ kẹ ḅara ḅụ sụa wararị apụ na sọ anị ḅụ sọ wararị. Tamụnọ ò gotẹ, pịkị ọ̀ ḅụụ ḅọrọ tẹ So na Kiri na arị ḅio simearị aị mamgba na tẹmẹm.

Hiburu 1:2

kụma mịna kunoma ene ma ḅụ ori ọ̀ Tụḅọ ḅụ ḅọrọ tẹ ẹkwẹn wa pịrị tẹ. Ọ̀ ḅụụ mie Tamụnọ ḅọrọ tẹ bebe tomikiri mẹ na So-tọrụ simearị aị mamgba na tẹmẹ ye, ori anie Tamụnọ pịkị sẹlẹ-ọkị ḅọ ḅe mịnẹ kunoma ḅụ ye mamgba ò nye sọ.

Mịẹfinji 4:11

“Wanyanaḅọ, pịkị wamịna Tamụnọ! Ị́ ebube na, kụn na, kụrọ na nyana gbẹẹm. Kẹ gotẹ ọkọ ḅẹẹarị, ị́yẹrị ye mẹmgba tẹmẹm, tẹ ị́ ḅụụ-ḅẹlẹm ẹrẹsị arịmgba emi tẹ ḍumoarị.”