Jerimaya 17:13 - FỊAFỊA BAỊBỤLỤ

¹³ KỊNỊNYANAḄỌ, anie Izirẹlị ḅiokpọ; í koroma tẹ so apụ mamgba ịna tọrụ-tuu ḅa. Ini ịmaịn-faa ḅarị ḅara fọọn ọgọnọ kẹ ẹrẹ kịka ḅa, ini, KỊNỊNYANAḄỌ ḅe, sịkị tẹ ẹrẹsị, ḍumo-pịrịarị ngụngụḅa minji ḅe.

Jerimaya 17:13 Iomraidhean Croise

Devidi-Anume 22:4

Wamịna elemu aḍapụ ma ị́ kẹ ḅiokpọmam: ini ị́ kẹ ḅiokpọma ye ḅụ ị́ ịn ḅọrọmam.

Devidi-Anume 69:29

Kụma fụka-ye ị̀ ḅaarị, tẹ à ḅarị tẹmẹ nyana-a; Yei Tamụnọ, ị̀ saakị sịẹma, tẹ ị̀ ḅọrọma-a!

Devidi-Anume 71:5

KỊNỊNYANAḄỌ, àrị ị́ kẹ ḅiokpọmarị; ị̀ asambịrịma sakị kụra-ḅio ị́ ḅụụ mie à ḅioḅẹngbọ kẹ gbanarị.

Devidi-Anume 73:27

Piki-pikiye-ofori ḅara ị́ ḅụ mangị-so apụ ma ịn fịị fa ḅa; ḅioḅẹngbọ-kẹ-sịrẹrẹ-niḅi-a ḅara kẹ ị́ na mịẹ apụ ma ị́ ịn ḅaa guluguluma ḅa.

Devidi-Anume 97:7

Sunsin oru-afụḅara pịrịarị-ḅọ pịrịarị-ḅọ ḅụụ-jịrị ḅa; papaa atamụnọ mamgba KỊNỊNYANAḄỌ ḅe tọrọkọ iḅoarị.

Egberima-Ẹkwẹn 10:7

Ini iḅi atomi kẹ ḅiokoroma ḅa Tamụnọ boma ḅara ḅụ, kụma Si-sịḅịḅio-sụa apụ ma ala-a tomi ịn kẹ ḅioḅọrọma ḅa.

Egberima-Ẹkwẹn 14:14

Si atomi sime ịn pịrị gbẹẹ-ye nyana ḅa. Iḅi atomi ịna mịẹ-aị ḅẹ gbẹẹ-ye nyana ḅa.

Ayịzaya 1:28

Kụma ò si mịẹ tẹ kọngọ-kụrọma ọ̀ pịrịarị-ḅọ, pịrịarị-ḅọ nanga kiri pịrị ḅa; Ọ̀ sịkị ḅọ sịkị ḅọ ori mḅọ ḅaa ḅa.

Ayịzaya 66:5

Ọ́ KỊNỊNYANAḄỌ ḅe ḍukoarị ye mẹ pokii, ọ̀ mangịma tẹ ọ̀ ḅịḅị pokiarị apụ, “Ọmịnị ì minini wararị ẹrẹsị, ọmịna atomi ma ḅẹ jen-apụ ó ḍiki-ḅioḅu tẹ ḅarị ọmịnị na gbọrụ mịẹ ye sọ mịẹ gboloma ḅẹ ḅii-a. Ini ó kombo tẹ ḅẹẹarị, ‘Yee KỊNỊNYANAḄỌ ḅe ori opu ḍie-pakama tẹ ọ́ ḅọrọma, mịẹ tẹ wa ẹrị tẹ ḍereku ḅẹ ḅara.’ Kụma ini ma ḅioju sọ ịna tọrụ-tuu ḅa!

Jerimaya 14:8

Ị́yẹrị ngẹrị mie Izirẹlị nyana ḅiokpọ; anie opu ḅụụ-fụka ḅụ wa ḅọrọmarị ḅọ, Tiye ẹrẹsị ị́ wamịna amakiri mẹ ḅụ kịnị tọrụ-nimi-a ḅọ kịkarị, gbala ḅọrọ ye muarị tẹ agba tẹ ḍin mẹ kịngẹ kẹ sime ḅọ ọkụ.

Jerimaya 17:17

Tẹmẹ-naịn-naịnma ye sọ ị̀ pịrị ma. Ị́yẹrị anie à sime tẹ ye ị̀ la ḅịa yọ ḅụụ-fụka ḅoarị sakị.

Jerimaya 17:18

Tọrụ-tuu ọkị-ḅo ḅaa-ḅọkọ kẹ ị̀ ḍọkịarị apụ ma pịrịị, kụma ḅara-wẹrị ị̀ pịrị, KỊNỊNYANAḄỌ. Tẹmẹ-naịn-naịn kẹ ịna ḅụụ ḅio suu ḅinma, kụma yẹrị ị̀ tẹmẹ-naịn-naịnma ma. Opu ḅụụ-fụka ọkị-ḅo ịna ọgọnọ gbana tẹ ịn gbẹẹ-kọsịmaa.

Jerimaya 17:5

KỊNỊNYANAḄỌ ḅe mẹẹ: À ḅẹrẹ-ḅarasii pẹlẹ anị apụ ma pịrị ḅa anie ị̀ ḅụ pịkị-so tẹ ḅioḅẹngbọ kẹ tomi ọgọnọ gbanarị apụ ma, fị-fị atomi nyana wararị ịnyọ kẹ ḅiokpọmarị apụ ma.

Jerimaya 19:4

À gotẹ miemẹ mịẹ ḅẹ-yearị, ị̀ atomi ma ị̀ kẹ gbin koroma-so tẹ agba mịẹ-mịẹ oru-atamụnọ ma pịrị ḅụ mị yọ mẹ pilema tẹẹ — oru-atamụnọ ma tẹ ịna elemu aḍapụ-o, Juda ḅẹ amadapụ ma-o arị gboloma ye ḅụ ḅẹ gberie-sọ nimi-a aị ma. Ịn mịẹye-ofori apụ ọmbie kẹ mị yọ mẹ ḅinma tẹẹ,

Jerimaya 2:13

kẹ gotẹ ọkọ ḍukoarị ì atomi maa asi mịẹ tẹẹ: ini ị̀ ḅụ pịkị so tẹẹ, ḍumo-pịrịarị ngụngụḅa minji ḅe, tẹ minji koko olulu soku tẹ, paịn-paịn-sararị olulu ma tẹ gbala-gbala inetẹ minji ọlọ wẹrị-a aị ma.

Jerimaya 2:17

Izirẹlị, ị́ ḅarana miemẹ dogi-ḅo ị́ ḅụụ pịrịm! Ị́ yẹrị KỊNỊNYANAḄỌ, ị́ Tamụnọ ḅe ḅụ mangị-som, yẹrị tọrọkọ tarị ị́ pịrị ma muarị ogbo.

Jerimaya 50:7

Ini ẹrịapụ-ẹrịapụ owu kẹ ịn pakam. Si kẹ ịn tọn apụ ma ḅẹẹarị, ‘In si kẹ KỊNỊNYANAḄỌ ḅe mịẹ tẹẹ, tẹ anie ḅụ wa mịẹ ye kura-aye-a. Ịna atẹngịapụ ma KỊNỊNYANAḄỌ ḅe kẹ ḅiokpọmam, tẹ ini ma ḅioju sọ ḅioḅẹngbọ-kẹ-sịrẹrẹ-niḅi ḅara sime ọ̀ pịrị na-iḅim.’ ”

Izikẹlị 13:9

À fomu-ḅara kẹ ọmịnị ịkịankoroapụ ma tẹ papaa ịkịan ẹrịarị tẹ pịkị kịnị toluma irimarị aḅịrị ẹrịarị apụ ma pịrị ḅẹ-yearị. Ị̀ atomi kobiri tẹ ḅẹrẹ-ḅiya ḅarị anga ḅụ ó sime ḅịa; ini Izirẹlị furo-ḅẹ-apụ ẹrẹ kẹẹ-kẹẹ koroma ḅarị ḍiri ḅio ọmịna ẹrẹ sọ ḅịa; gbala-gbala ọ́ pịkịma ḅo ọmịna amakiri la ḅịa. Anịtẹso ó nimi ḅa mịnẹ yẹrị anie Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe.”

Izikẹlị 16:63

Mịẹ-irima-aị mamgba tẹ ị́ mịẹ tẹ aị ma à wẹrịso ị́ pịrị ḅa, kụma ị́ arị kẹ ḅiokoroma tẹ ḅụụ-jịrị ḅaka tẹ ḅarị ị́ ḅịḅị sọ finji ḅịa.” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

Izikẹlị 36:32

Izirẹlị, à ḅiiarị ó nimi mịnẹ àrị ọmịna asịḅị gotẹ mie-mẹmgba mịẹ-a. À ḅiiarị ọ́ mịẹarị aị ma ḅẹ ḅụụ-jịrị na tọrụ-tuu na ọmịna aḅụụ ịnọ. Yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.’ ”

Danẹlị 12:2

Ini ḅẹ tọnwa-apụ tẹ fịị tẹrẹmẹ sakị mẹ laa apụ fị-ḅụ-saakị tẹ ḍumo ḅa: jen-apụ sime gbamaso ḍumo tọrụ-ḅẹlẹ nyana ḅa, tẹ jen-apụ sime gbamaso tọrụ-tuu ḅụụ-fụka da ḅa.

Jowẹlị 3:16

KỊNỊNYANAḄỌ ḅe ekirearị Zayọnị ḅụ; ọ̀ pọkọọ so-alagba fie ḅara fie paka-ḅoarị Jeruselemu ḅụ, Kiri na So-tọrụ na jikearị. Kụma ori ori atomi ḍụa ḅa.

Zẹkaraya 13:1

Kụrọmamgba nyana KỊNỊNYANAḄỌ ḅe ḅẹẹarị, “Anị ene mẹ ḅụ, ngụngụḅa finji ḅa, kẹ Devidi furo-ḅẹ-apụ ma na Jeruselemu ḅẹ apụ ma na sịkịrị fịafịama ịna si na oru-afụḅara tẹkẹ na ḅụ.

Zẹkaraya 9:12

Jen sịẹ ḅụ angarị tẹ mịọkụ ḅiokpọmaye nyanatẹ apụ, ọ́ pịkịma ḅoo, ọ́ pịkịma ọ́ kpaịn-sime ḅarị anga ḅoo, Mịọkụ à ḍuko ọ́ pịrịarị, à maa kiri kẹ ọ́ gbẹẹ wama ḅa ọmịnị ẹrị tẹ tọrụsiẹrị mamgba ḅụ ó boma ḅụ.

Luku 10:20

Kụma ó si-atẹmẹ ọ́ tọn ye mịẹ ye gotẹ ḅioḅẹlẹ ma, anie nakara ọmịna ẹrẹ So-ḅio kẹẹ tẹ ye mẹ anie ọmịna ḅioḅẹlẹma ḅarịye.”

Jọnị 4:10

Jizọsị nwẹnị pakịrị, “Ị́ nwẹnị Tamụnọ kẹ tomi pịrị, pịrị ye na, ị́ ḅara minji mẹ ḅiiarị ḅọ ḅe na nimi namịna, mimgbe rẹ mie ọ̀ ḅara ị́ ḍumo-pịrịarị minji ḅii ọkị ḅarịye.”

Jọnị 4:14

kụma ị̀ ḅara ḅo minji mẹ ḅuu ḅọ, ḅuu ḅọ minji ḅarị jen kẹ mḅọ pọkọ tarị ḅịa. À kẹ mḅọ pịrị ḅuu ḅarị minji mẹ mḅọ ḅụụ ḅio ngụngụḅa sọ tẹ ḍumo pịrị minji pakama, pakama mḅọ sime pịrị ḅa, tẹ mḅọ gbamaso ḍumo nyana ḅa.”

Fịrịmẹnjịapụ 28:20

Mie à ḍuko ọ́ pịrị ḅẹ tẹ fịrịma ọ́ sịn ye. Ye ḅẹ karakara ḅụ, Izirẹlịapụ kẹ ḅiokpọmaḅọ tẹ ịn tọrụ kẹ ḍikiarị ḅọ ḅe anie ịn gotẹ ma ikoli ma kẹ ị̀ sụa wararị.”

1 Timoti 1:1

Pọlụ, Kịrayịsị Jizọsị fịrịmẹnjịḅọ ḅe, Tamụnọ wamịna Ḅọrọmaḅọ ḅe na Kịrayịsị Jizọsị wamịna ḅiokpọ ḅe na tọn ḅara ḅụ:

Mịẹfinji 20:15

Ḍumo wararị apụ ma ḍiri mẹ ḅio ẹrẹ ofori ḅọ, ofori ḅọ ini mḅọ kẹ kọrị-fịnị tọrụ mẹ ḅio gbin suum.

Mịẹfinji 21:6

Tẹ ọ̀ nwẹnị ḅẹẹ, “À kọrị fama tẹẹ! Yẹrị anie Alịfa ḅee, pịkị Omega ḅee, ye ḅẹ suku-saakị, pịkị anị ḅẹ kunoma. Minji ḅuu pọkọ-tarịarị ḅọ emi ḅẹḅẹ, à kụrọ pịrị tẹ mḅọ ḍumo ngụngụḅa minji ḅuu ḅa, ye gbẹẹ-a ḅara ḅụ.

Mịẹfinji 22:1

Enjẹlị ḅe pịkị ḍumo minji tọrụ kẹ ì ḍiem, anị kịọnkịọn-arị, kirisitalị nwẹn-sịn ye mẹ sime-ḅara, tẹ Tamụnọ na Anana-Tụḅọ ḅe na emine mẹ ḅụ mie anị sarasara paka ḅoarị ye,

Mịẹfinji 22:17

Tẹmẹ ḅe na Ịya ḅẹ ẹrẹḅọ ma na mẹẹ, “Ḅoo!” Miemẹ naa ḅọ, naa ḅọ sọ tẹ ḅẹẹ, “Ò ḅoo!” Minji pọkọ tarị ḅọ, tarị ḅọ ḅoo; ḅii ḅọ, ḅii ḅọ ḅo ḍumo minji mẹ ọkị ḅuu, ḍiepịrịye ḅara ḅụ.

Mịẹfinji 7:17

kẹ gotẹ ọkọ ḍukoarị, Anana Tụḅọ ḅe tẹ emine mẹ karakara ogboku ḅụ emi ḅọ ḅe in ḍikiḍiki tẹ tọrọkọ-sụn ịn pịrị mu ḍumo-pịrịarị ngụngụḅa minji mẹ la ḅa. Tẹ Tamụnọ ịna atọrụ ḅẹ owu aminji ma sin fama ḅa.”