Jerimaya 15:6 - FỊAFỊA BAỊBỤLỤ

⁶ Ọmịnị ma ị̀ sịkị tẹẹ, Ọmịnị ọḅụ pịkị ì gbin tẹẹ. Anie ḅụ àrị ị̀ ḅara sụn-pakama tẹ kẹ ọ́ kọsịma tẹẹ ị̀ ịganị ọlọ-sịẹma ịnyọ kẹ ị̀ tama tẹẹ ẹrẹsị.

Jerimaya 15:6 Iomraidhean Croise

Ayịzaya 1:4

Yei, si amịẹaị mịẹarị sịẹ, ọ́ fa tẹẹ! Ọmịnị anie ḅụrụ-kọsịtẹ si-mịẹapụ. Ọmịna asi ma ọ́ jịjịma tẹ iku ọ́ ḅaa ḅẹ-yearị! Ọ́ KỊNỊNYANAḄỌ, Izirẹlịapụ tẹkẹarị Fịafịa Tamụnọ ḅe sịkị tẹ ọḅụ kẹ ò gbin tẹ.

Ayịzaya 28:13

Anie mie KỊNỊNYANAḄỌ ḅe gotẹ ẹkwẹn-ngbọ-ngbọ na, ọrụ-ọrụ na, ḍawọye, ḍawọye ḅụ ye kẹ ó toluma ḅẹ-yearị. Anịtẹso ó siin ḅụọ, ḅụọ ḅụ ọ́ pụmbụ ḅa. Ye ọ́ la ḅa, ḍiein ó kun sịẹma ḅa, tẹ ini ikoliapụ ḅara kẹ ó kun so ḅa.

Ayịzaya 31:3

Ijiputi-ḅẹ-apụ ma ini tamụnọ-a, ini tomii. Ịna asụ ma tẹmẹ ḅụ ḅẹ asụ. KỊNỊNYANAḄỌ ḅe ori amịẹaị mịẹarị sakị, kụrọ sịẹ mẹ kọsị-sara tẹ ịnyọ nyana-a tẹ anị ḅarasụa pịrị sime ye mẹ ḅịkị ḅa. Ini maa apụ ma gulugulu fa ḅa.

Jerimaya 1:16

À fomu-ḅara kẹ ị̀ atomi pịrị ḅa, in si mịẹ tẹ ẹrẹsị; ini ị̀ sịkị tẹ agba mịẹ-mịẹ oru-atamụnọ pịrị tẹ ẹrẹsị, pịkị oru-afụḅara tẹmẹ tẹ sunsin arị pịrị tẹ.”

Jerimaya 13:14

Anịtẹso maa jongo kẹ jen-jen gbolo tẹ arị fịị kọsị-sara ḅara mie à kẹ ịn ḅaa kọsịma ḅarị ḅara, omongiapụ na ḍọkọḍọkọ-awọmẹ na gbọrụ ḅara mẹ. Ḍiki-ḅụụjịrị ofori ḅara, sịḅị-jịrị anịanịa ọkụrụkụrụ sọ ị̀ dasịẹma ḅịa ịn ḅaa ḅụ.”

Jerimaya 2:13

kẹ gotẹ ọkọ ḍukoarị ì atomi maa asi mịẹ tẹẹ: ini ị̀ ḅụ pịkị so tẹẹ, ḍumo-pịrịarị ngụngụḅa minji ḅe, tẹ minji koko olulu soku tẹ, paịn-paịn-sararị olulu ma tẹ gbala-gbala inetẹ minji ọlọ wẹrị-a aị ma.

Jerimaya 2:17

Izirẹlị, ị́ ḅarana miemẹ dogi-ḅo ị́ ḅụụ pịrịm! Ị́ yẹrị KỊNỊNYANAḄỌ, ị́ Tamụnọ ḅe ḅụ mangị-som, yẹrị tọrọkọ tarị ị́ pịrị ma muarị ogbo.

Jerimaya 2:19

Ị́yẹrị ḅarana mịẹ si mie ị́ fomu ḅarịye, ị́ ị̀ ḅụụ pịkị-so ye mẹ ḅẹrẹ kọn ị́ ḅara sima ḅa. Ị́ ḍawọ ḅo ḅa anị akụ tẹ kura-a la ḅara ị́ KỊNỊNYANAḄỌ ị́ Tamụnọ ḅe koroma mangị-so ye mẹ tẹ ḅarị jen kẹ ḅioḅẹngbọ-kẹ-sịrẹrẹ-niḅi ḅara sime ị̀ pịrị-a. Yẹrị, Tẹịn-Ḅẹrẹtọn-Kụrọ-Nyana KỊNỊNYANAḄỌ, Kụrọmamgba Nyanaḅọ ḅe ọkọ ḅẹẹm.”

Jerimaya 20:9

Kụma à ḅẹẹarị sakị, “À KỊNỊNYANAḄỌ ḅe kẹ ḅioḅọrọma ḅa tẹ ḅarị jen kẹ ori ẹrẹ ḅụ ẹkwẹn ḅịa,” anịtẹso í oku mẹ fịnị kịka tẹ ị̀ ḅụụ ḅio kọrịarị. À ḅụụkụrọma tẹ anị ọlọ-sịẹmarị ị̀ ḅụụ ḅio, kụma à ḅarị inetẹ jen kẹ anị da ọḅụ pịrị-a.

Jerimaya 44:22

Mịmgba ḅẹ eneḅaka mẹ ḅụ ọmịna amakiri mẹ si kọsị-sara wararị, tẹ gbọrụḅọ-sọ anị ḅio anga-a. Anị ḅo sịḅị-kanakanama ye sọ tẹ ḍiki-tọrụ ḅụ, tẹ tomi pịkị anị ẹrẹ kẹ ye karịarị KỊNỊNYANAḄỌ ḅe ḅarị jen kẹ ọmịna si-sịḅịḅio mẹ na si amịẹaị ma na inema-a ẹrẹsị.

Jerimaya 6:11

KỊNỊNYANAḄỌ, ị́ ịganị tẹ sime ịn pịrị ye mẹ, ị̀ ḅụụ ḅio sọ fịnị kọrị ḅara kọrịarị, tẹ à ḅarị inetẹ jen kẹ anị ọlọ-sịẹma-a.” Anịtẹso KỊNỊNYANAḄỌ ḅe ị̀ ḅẹẹm, “Ị̀ ịganị mẹ ọsụma etela ogbo ma ḅụ simearị awọmẹ ma ọgọnọ sara-a, pịkị asawọ ma tẹ kobiri wararị apụ ma ọgọnọ sọ. In diapụ na sime-ereme na ọkị-so ḅa, tẹ omongi lamatẹ apụ kịngẹ sọ ịn wẹrịso ḅịa.

Jerimaya 6:12

Ịna awarị ịn kẹ ja apụ pịrị ḅa, anie ịn pịkị kẹ ịna ḍụọ kọrị akiri na ịna sime-ereme na kẹ mịẹ ḅarị ḅara. À fomu-ḅara kẹ mị amakiri ḅẹ apụ ma pịrị ḅa.

Jerimaya 6:19

Kiri, pokii! Ịn ḅọị ḅara kẹ tọn tẹ mịẹ ḅẹ aị ma gotẹ à fomu-ḅara ọkị-ḅo mịna atomi ma pịrịarị, ini ì tolumaye sịkị tẹ ị̀ ẹkwẹn ma poki tẹ arịḅẹ ḅara mịẹ à ẹrẹsị.

Jerimaya 7:16

KỊNỊNYANAḄỌ ḅe ḅẹẹm, “Jerimaya, tẹkẹ mịna atomi ma pịrị ma. In gotẹ owu ma pịkị tẹkẹ ma; ịna iḅi gotẹ ị́ na ẹkwẹnma, kẹ gotẹ ọkọ ḍukoarị, àrị í poki ḅịa.

Jerimaya 7:24

Kụma in poki tẹ mịẹ-a, anịanịa anị kẹ ye sịn. Anie nakara ịna kụrọtẹ si ḅioḅẹngbọ ḍuko ịn pịrịm mịẹ ḅẹẹye-ḅẹẹye mie ịn mịẹ ye, tẹ nwẹnị ḅo sii elemu in si ḅara nẹngị tẹẹ.

Jerimaya 8:5

Ọkọ kụma tiye ẹrẹsị, ì atomi, ọmịnị ị̀ ḅụ pịkị-so tẹ ḅarị pịkị-ḅo-a? Ọmịnị ọmịna oru-afụḅara ma fịnama sịẹma tẹ ḍụkụ tẹ pịkị ị̀ ḍọkụma-ḅoa.

Jerimaya 8:9

Ini ọmịna ye-nimi atomi ma kẹ ḅụụ-jịrị ḅio suutẹ, in pikiri-pikiri tẹ ḍiein ḅio koro tẹ. Ini ị̀ ẹkwẹn ma sịkị tẹẹ; mịọkụ ịn nyana nimi mẹ ḅọrọ tọ nimi?

Izikẹlị 14:9

Gbọrụ ịkịankoroḅọ oḅori-sọ tẹ, papaa pakịrị-ḅịḅị pịrị-pịrị, anị gotẹ ọkọ paka ye yẹrị, KỊNỊNYANAḄỌ ḅe, oḅori kẹ ọ̀ sịn tẹẹ. Izirẹlịapụ ḅụ arị ò siin ḅa, mie ḅụ ó nimi ḅa mịnẹ yẹrị anie KỊNỊNYANAḄỌ ḅe.

Izikẹlị 25:7

Ị́ mịẹm ẹrẹsị, àrị ị́ saḅama osi asịẹ ḅẹ apụ tẹ kụrọ-ḅara kẹ ị́ aị furu tẹ ị́ fọịn ḅẹ apụ pịrị ḅa. À ye kọnma-a ḅara kẹ í guluguluma tẹ ị́ ḅarị jen kẹ sịẹ ẹrẹ fị ḅịa, anịanịa ị́ ḅara-kuḅu ḅẹ bebe amakiri nyana. Anịtẹso í nimi ḅa mịnẹ yẹrị anie KỊNỊNYANAḄỌ ḅe.”

Izikẹlị 35:3

Ḍuko tomi ma pịrịị, yẹrị Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ḍukoarị ye: Idọmụ ḅẹ tụndụ amẹẹ, yẹrị ọmịnị na fịya-a ḅọ! Àrị ọ́ mịẹ tẹ ọ́ papaa fa tẹ mịẹ-mịẹ ye ofori ḅara kẹ koro-sime ḅa.

Hosiya 11:7

Ini ịgbanịarị ini ị̀ ḅụ pịkị so. Ịna kọngọ jịjịmarị kọngọ-kpọ-sịn mẹ gotẹ ini oloku pakama ḅa, kụma gbọrụḅọ-sọ anị saakị sin ịn pịrị ḅịa.

Hosiya 13:14

Ma tomi ma àrị ịn ḅọrọma ḅịa ḍuḅu ḅio ḅụ, anịanịa ịn pụkọ-pakamaḅo fị kụrọ ḅụ. Fị, ị́ ama-fama obi ma kẹ ḅoo! Ḍuḅu, í guluguluma mẹ kẹ ḅoo! À ḅarị jen kẹ sịḅị-kụrụkụrụ nyana mịna tomi ma pịrị ḅịa.

Hosiya 4:16

Izirẹlịapụ ma kụrọ-sịḅịsụa-asụ kịka tẹ ḅẹrẹ ḍụkụ-ḍụkụ-a opu anama ma kọngọ-kụrọma ḅara kẹ kọngọ-kụrọmarị. Ndẹẹ àrị inetẹ ịn kẹ anana awọmẹ kịkama tẹ tẹịn-tẹịntẹ osuka ḅio fịye kẹ ịn pịrị fị ḅẹ ḅara?

Zẹfanaya 1:4

“À Jeruselemu ḅẹ apụ na Juda mamgba na fomu ḅa. Kunoma ye tẹ kịnị kẹ nimi ḅarịye mịnẹ anịanga in Balị tẹkẹ-tẹkẹm ḅẹ ye sọ à guluguluma fama ḅa, tẹ gbọrụḅọ-sọ oru nimi agbamịẹapụ ma tẹ fịrịmẹnjị ọ̀ pịrị sime apụ ma kịngẹ sọ kẹ ḅiokoroma ḅịa.

Zẹkaraya 7:11

“Kụma ị̀ atomi kọngọ-kụrọma tẹ ì poki ḍụkụ-a. Ini ịna akuroma gbaịnm