Jerimaya 10:12 - FỊAFỊA BAỊBỤLỤ

¹² KỊNỊNYANAḄỌ ḅe kiri mẹ tẹmẹm ọ̀ kụrọ ḅụ; Ò nimi ḅụ ò tomikiri mẹ tẹmẹ tẹ So ma nụnụ finjimam.

Jerimaya 10:12 Iomraidhean Croise

Suku-saakị 1:1

Suku-saakị ḅụ Tamụnọ So ma na Kiri mẹ na tẹmẹ sakị,

Suku-saakị 2:5

kiri mẹ ọgọnọ gbọrụ sịn sọ ofori, gbọrụ sịnmgbọlị sọ amụ ḍiḅi tẹ so-paka-a, gbala amụ ori eene kẹ fịrịma-a ẹrẹsị, anịsakị kiri mẹ tẹlẹma tẹ ye ḍiḅi ḅẹ gbọrụḅọ-sọ pịkị ofori ẹrẹsị;

1 Paka-aị 16:26

Gbala tomi ma oru-atamụnọ mamgba Kpokobia famam ẹrẹsị kụma KỊNỊNYANAḄỌ ḅe So ma tẹmẹm.

Jobu 26:7

Ori ọgọnọ-jụ ḅẹ So-tọrụ mẹ sụn-pakamam ye ofori anga mẹ ḅụ tẹ kiri mẹ kẹ gberie-sọ ọgọnọ sololo-a.

Jobu 37:18

Ị́ inetẹ ò ye ḅara ḍikima So-tọrụ ma finjimatẹ, arị ịn sọọ-sara wararị tẹmẹ-ḍikiye kụrọ-ḅara kụrọ ḅẹ?

Jobu 9:8

Ori ḅe tẹ ngẹrị So ma sụn-pakama ḅọ ḅe, tẹ opu tọrụ mẹ ḅẹ ọnụngọ ma kẹ ḅụọ dẹẹ tẹ mẹnjị ḅọ ḅẹ.

Devidi-Anume 104:2

í bele kẹ ị́ ḅụụ gbaịn wararị. Í So-tọrụ mẹ finjima wasama wararị ḅara mẹ akpụrụ-warị na kịkam

Devidi-Anume 104:24

KỊNỊNYANAḄỌ, ị́ tọnwa-tọnwa ḅẹ aị tẹmẹm! Ị́ kpọma nimi ḅara kẹ arịmgba mịẹ ḅara ḍikii! Tomikiri mẹ tẹmẹ aị anị ḅio ḅin wararị.

Devidi-Anume 119:90

Ḅioḅẹngbọ kẹ ị́ ḅụụ ḅụ gbana na-iḅim mẹ sime mu ḅụọ-fa-ḅụọ-paka mamgba laarị, í kiri mẹ kẹ anị sime anga sịẹma tẹ anị ọkọ simearị.

Devidi-Anume 24:2

Ori anị nama pakama-ḅom kiri suku-ḅio simearị owolo mẹ ḅio tẹ abajị-wolowolo mẹ ḅio anị ḅẹ suku-saakịm.

Devidi-Anume 33:6

KỊNỊNYANAḄỌ ḅe tọn tẹ So ma tẹmẹm: ịrụa mẹ na akalụ mẹ na, lolia ma na sọ ori ẹkwẹn ḅụ tẹmẹm.

Devidi-Anume 65:7

Abajị ma ḍarịarị sakị arị deinmarị, pịkị ọnụngọ ma ḅẹ fie mẹ sọ; Tomi ma ḍụrụkụarị ye mẹ sọ í deinmarị.

Devidi-Anume 78:69

Anịanga mie ori ọ̀ Warị nama tẹ kẹ ò So-ḅio ḅẹ sime-yọ mẹ kịkama ye; ori anị mịẹ kụrọma kiri mẹ ḅioju kịkamam, sakị mamgba anị kụrọ sịẹ sime wararị.

Devidi-Anume 93:1

KỊNỊNYANAḄỌ ḅe anie amadaḅọọ. Ori opu na ḅaka na ịnyọ na kẹ kapa sọma tẹ sụa wararị. Ò tomikiri mẹ sịẹma kụrọma wararị, tẹ anị inetẹ saakị jen anga mu ḅịa.

Egberima-Ẹkwẹn 3:19

KỊNỊNYANAḄỌ ḅe ò nimi ḅụ ḅọrọ tẹ kiri mẹ tẹmẹm; ò ye-nimi ḅụ mie ọ̀ ḅọrọ tẹ So-tọrụ mẹ kẹ amịna kiri ḅụ wẹrị yee.

Egberima-Ẹkwẹn 30:4

Jen sakị tụḅọ So-ḅio ḅẹ aị ḍawọ ḍịn tẹ? Jen sakị tụḅọ amịna ḅara-ḅio fẹrụ mẹ kuun-sịẹma tẹ? Anịanịa ḅịtẹ ankịsị kẹ minji kobiri kpọọ tẹ? Anịanịa kiri mẹ mu daasịẹ ḅẹ anga tọn tẹ? Mḅọ ḅọrọ tụḅọ, í nimi wararị ḅẹḅẹ? Mḅọ tụḅọ ḅọrọ tụḅọ?

Ayịzaya 37:16

“Kụrọmamgba nyana KỊNỊNYANAḄỌ, Izirẹlị Tamụnọ, í í emine, ị́ tẹmẹ tẹ pamba-sụa wararị aị ma ọgọnọ-jụ simearị ye mẹ ḅụ lẹgị wararị, kịngẹ anie Tamụnọ, ḅẹrẹtọn tomikiri ḅụ amadapụ daarị ayọ mamgba pịrịarị. Ị́yẹrị kiri mẹ na So-tọrụ mẹ na tẹmẹm.

Ayịzaya 40:22

Amịna emine ọgọnọ lẹgị wararị ḅọ ḅe anie anị tẹmẹ ye, anị emine mẹ kiri mẹ ọgọnọ-jụ ḅio tẹ So-tọrụ mẹ ḅọrọ iwo ḅụ anị emi; anị yọ ḍiki ideri kụma tomi ma ịrụ ḅo mẹnẹ ma kịkarị. Ori mie So-tọrụ mẹ kẹ ye gbaịn ye ḅara finjima ye, gbala akpụrụ-warị tẹ kịnị sọ tẹ anga ḅẹ yọ ḅara.

Ayịzaya 42:5

Tamụnọ So-tọrụ mẹ tẹmẹ tẹ anị kẹ anị finji mu la anga lamam; Ori tomikiri mẹ na anị ọgọnọ angarị aị mamgba na mịẹm; Ori ḍumo na ọwụ-sara na kẹ ori atomi pịrịm. Tẹ mịọkụ KỊNỊNYANA-TAMỤNỌ ḅe ọ̀ fịrịmẹnjịḅọ ḅẹẹarị,

Ayịzaya 44:24

“Yẹrị anie KỊNỊNYANAḄỌ ḅee, ị́ ḅọrọmaḅọ; Yẹrị anie ị́ tẹmẹḅọ ḅee. Yẹrị anie KỊNỊNYANAḄỌ ḅe, ye mamgba Tẹmẹḅọ ḅee. Yẹrị ngẹrị So mẹ nụnụ finjimam à kiri mẹ tẹmẹ sakị, ḅarasụa gbọrụḅọ-sọ ofori.

Ayịzaya 45:12

Yẹrị anie kiri mẹ tẹmẹḅọ ḅe tẹ tomḅọ tẹmẹm ori anị yọ anga. Ị̀ kụrọ ḅụ à So mẹ finjima saram; Yẹrị ḅẹrẹtọn ịrụa mẹ na, akalụ mẹ na, lolia ma na pịrịarị.

Ayịzaya 45:18

KỊNỊNYANAḄỌ ḅe So ma tẹmẹm ori anie Tamụnọ ḅẹẹ! Ori kiri mẹ sime ḅẹ ḅara tọn tẹ anị mịẹm ori anị mịẹ tẹ anị kụrọ sịẹ tẹ sime alamarị. Ori anị mịẹ tẹ anị gberie-sọ anị ḅụ ofori ḅara sime-a, kụma kịnị sime tẹ anga ḅẹ yọ. Ori anie ḅẹẹarị ḅọ: Yẹrị anie KỊNỊNYANAḄỌ ḅee, anịsakị jen tamụnọ ofori.

Ayịzaya 48:13

Ị̀ aḅara kiri mẹ suku-saakịm tẹ pịkị So ma nụnụ finjimam. À Kiri na So na sịn kụma, anị-gbọrụ-kirikiri in tolu-pakarị ị̀ tọrọkọ.

Ayịzaya 49:8

KỊNỊNYANAḄỌ ḍuko ori atomi pịrịarị: Ọ́ ḅọrọma ḅẹ sakị mẹ ḅo sakị, arị iḅi tọrụ kẹ ó ḍiki ḅa, tẹ ọ́ ḅarasụa gotẹ kọn-arị owu mẹ pakịrị ḅa. Arị ó ḍikiḍiki tẹ ọ́ gbaịn ḅọrọma ḅa tẹ ọmịna ḅụụ ḅọrọtẹ tomi mamgba na ọḅọkụ fị ḅa, à mịẹ tẹ ọmịnị ọmịna anga sime tẹ fa tẹ koro-simearị amakiri mẹ ḅụ siin gbọrụ sakị kẹ anga ḅa.

Jerimaya 10:13

Ori tọn ḅara ḅụ So-tọrụ mẹ ọgọnọ-jụ ḅẹ minji mẹ ḍụrụkụarị; Ori oḅuto mẹ ọkị-ḅoarị tomikiri mẹ ḅẹ ịkọlị ma ḅụ. Eene ḅio ọ̀ mịẹ tẹ so-ḅalapụ tẹ kọrị ḅọrọarị tẹ fẹrụ fịrịma pakamarị ori anị koko wẹrị anga ḅụ.

Jerimaya 10:16

Jekọbụ Tamụnọ ḅe ori ịn kịka-a; Ori anie ḅẹẹye-ḅẹẹye tẹmẹḅọọ, tẹ Izirẹlị sẹlẹ ọkị tẹ ini ò soku-ḅẹ atomi sọm. Kụrọmamgba nyana KỊNỊNYANAḄỌ anie ori ẹrẹ.

Jerimaya 14:22

Tomikiri ḅẹ asịẹ ma oru-afụḅara ma ḅẹ gberie tẹ inetẹ eene koroma ḅẹ ye ofori; so tọrụ mẹ ḅioju sọ inetẹ nwẹịn-nwẹịn eene sọ koroma ḅịa. Ị́yẹrị mie wa kẹ ḅiokpọmarị ḅọ, yei KỊNỊNYANAḄỌ, wamịna Tamụnọ, ị́yẹrị anie mịna aị ma mịẹ-mịẹ ḅọ ẹrẹsị.

Jerimaya 27:5

“Ì opu kụrọ na ịnyọ na ḅụ, à tomikiri mẹ tẹmẹm, tomi na nama amẹẹ na tẹ tomikiri angarị aị mamgba na sọ; tẹ yẹrị sẹlẹ pakama-ḅo ḅọ goyegoye mie à kẹ pịrịarị.

Jerimaya 32:17

“Ḍụḅa Tẹịn-Ḅẹrẹtọn-Kụrọ-Nyana KỊNỊNYANAḄỌ, ị́yẹrị So mẹ na Kiri mẹ na tẹmẹm í opu kụrọ ḅụ; ị́ ḅụụ ḅụụ-fụkama ḅaka gberie sọ ofori.

Zẹkaraya 12:1

Mie Izirẹlị gboloma oku tẹ KỊNỊNYANAḄỌ ḅe, So-tọrụ mẹ finjima pakama, tẹ Kiri mẹ tẹmẹ, tẹ ḍumo kẹ tomi pịrị ḅọ ḅe ḅara ḅo ye. Ori mẹẹ,

Jọnị 1:3

Tamụnọ ọ̀ ḅụụ ḅọrọ tẹ ye mamgba tẹmẹm. Ori ofori tẹ tẹmẹ gberie-sọ ofori.

Kọlọsị 1:16

Kẹ gotẹ ọkọ ḍukoarị, ọ̀ ḅụụ mie Tamụnọ ḅọrọ tẹ ḅẹẹye-ḅẹẹye tẹmẹ ye, So-ḅio sime ye-o, kiri-ḅio sime ye-o, tọrụngbọ ẹrịarị aị-o, tọrụngbọ ẹrị-a aị-o, tẹmẹ ḅụ simearị akụrọ mamgba na, kịnịnyanapụ na, ḅẹrẹtọn-apụ na ịn kụrọ kẹ ḅara ḅụ sụa wararị apụ na sọ anị ḅụ sọ wararị. Tamụnọ ò gotẹ, pịkị ọ̀ ḅụụ ḅọrọ tẹ So na Kiri na arị ḅio simearị aị mamgba na tẹmẹm.