Hosiya 3:5 - FỊAFỊA BAỊBỤLỤ

⁵ Kụma sakị ḅo ḅa Izirẹlịapụ ma siin pịkị KỊNỊNYANAḄỌ ịna Tamụnọ ḅe dama-ḅo ḅarị sakị, pịkị Devidi furo paka-ḅo ịna amadaḅọ na. Anịtẹso ịn KỊNỊNYANAḄỌ ḅe ḍiki-ḅalafaa ḅa tẹ ori iḅi ḍiepịrị-aị daa-ọkị ḅa.

Hosiya 3:5 Iomraidhean Croise

1 Amadapụ 12:16

Bebe Izirẹlịapụ mamgba ḅo amadaḅọ ḅe kẹ in poki-a ḅara mẹ ẹrị tẹso, tomi ma nwẹnị amadaḅọ ḅe pakịrị, “Wa Devidi ḅụ tọ ḍiekiri nyana? Jese owiḅọtụḅọ ḅe ḅụụ wa ḍuḅu fị nyana-a. Yei Izirẹlịapụ, ‘ọrụ-warị-warịye-gbọ-kị-gbọ’! Devidi, tọrụ-pịkị ị́ nyana warị mẹ ḍikii mịọkụ.” Anieḅụ Izirẹlịapụ mamgba nwẹnị so ịna warị mu.

Ayịzaya 17:7

Anị ene mẹ ḅụ, kịnị ḅarasụa gotẹ pịkị ịna Tẹmẹḅọ, Izirẹlị tẹkẹarị Fịafịa Ḅọ ḅe ḍọkụma-ḅo ḅa.

Ayịzaya 2:2

Tọrọkọ-jụ ḅo ḅarị ene ma ḅụ Tamụnọ-warị mẹ sịẹ wararị tụndụ mẹ tụndụ mamgba ḅụ geletẹịn ye sọ ḅa, sịẹ gele tụndụ mamgba ḅọrọ faa ḅa. Tọnwa asịẹ minji seri sọ ḅara kẹ gbii-gbiima anị dama-ḅo ḅa,

Ayịzaya 2:3

tẹ ịna atomi ḅẹẹ ḅa, “Ó yee wa KỊNỊNYANAḄỌ ḅe tụndụ mẹ kpọlị iwo mu Izirẹlịapụ tẹkẹarị Tamụnọ ḅe Warị mẹ la. Ori ò ḅiiarị wa mịẹ ḅẹ ye kẹ wa toluma ḅa; wa ori sẹlẹ-ọkị tẹ etela mẹ ḅụ mẹnjị ḅa. KỊNỊNYANAḄỌ ḅe tolumaye mẹ Jeruselemu ḅụ paka-ḅoarị ẹrẹsị; Zayọnị mie ò sime tẹ ẹkwẹn ori atomi pịrịarị.”

Ayịzaya 60:5

Í miemẹ ẹrị tẹ ḍereku ị́ ḅụụ ḅio ḅin ḅa; Anị í ḅioḅẹlẹma ḅarị ḅara mịẹ tẹ í oju jike ḅa Ịn sịẹ-sịẹ ma ngọ ma ọkị-ḅo ị́ pịrị ḅa; Abajị mẹ saḅa ḅụ ịna ngọ ma ḅo ḅa.

Ayịzaya 9:13

Izirẹlịapụ amụ in si ḅụ pịkị-a, KỊNỊNYANAḄỌ ḅe in fomu tẹ sọ, ịn paa pịkịma ọ̀ dama-ḅoa,

Jerimaya 23:5

KỊNỊNYANAḄỌ ḅe mẹẹ, “Sakị mẹ ḅoarị, à karakara mịẹarị ḅọ sẹlẹ pakama-ḅo ḅarị sakị mẹ Devidi furo ḅụ, ama-da ḅẹ ḅọ ḅara ḅụ. Anị amadaḅọ ḅe nimi ḅara kẹ ḅẹrẹtọn ḅa, tẹ kura ḅara na inoma ofori ḅara kẹ ye mịẹ ḅa bebe amakiri mẹ ḅụ.

Jerimaya 30:24

KỊNỊNYANAḄỌ ḅe owi ịganị mẹ ọḅụ da ḅịa nwenii ò ḅin tẹ ḅara kẹ ò ḅioḅẹngbọ ọ̀ tọn wẹrị aị ma mịẹ fama ḅa. Tọrọkọ-jụ ḅo ḅarị ene ma ḅụ anie ó mie fiearị ye naa ḅarịye.

Jerimaya 30:9

Anie nakara yẹrị KỊNỊNYANAḄỌ ịna Tamụnọ ḅe mie ịn fịrịmẹnjị pịrị ḅarịye, pịkị Devidi furo-ḅẹ-ḅọ tẹ à kẹ emine ḅụ lẹgịma tẹ ama-da ḅẹ ḅọ ḅe na.

Jerimaya 33:17

Yẹrị, KỊNỊNYANAḄỌ ḅe, minini tẹ mịnẹ sakị mamgba Devidi furo paka-ḅo Izirẹlị ḅẹ amadaḅọ sọ ḅa

Jerimaya 33:9

Jeruselemu ḅo ḍereku dogi-ḅoarị yọ na kụn kẹ ḅụụ-tọn-arị yọ na sọ ị́ pịrị ḅa; tomikiri mẹ ḅio sịẹ goyegoye ḅalafa tẹ oju-sẹkị ḅa ini à mịẹ Jeruselemu pịrịarị iḅi aị ma na àrị ọkị-ḅo opu ama mẹ pịrịarị lọkọlọkọ na gboloma ye naa sakị.”

Izikẹlị 16:63

Mịẹ-irima-aị mamgba tẹ ị́ mịẹ tẹ aị ma à wẹrịso ị́ pịrị ḅa, kụma ị́ arị kẹ ḅiokoroma tẹ ḅụụ-jịrị ḅaka tẹ ḅarị ị́ ḅịḅị sọ finji ḅịa.” Tẹịn-Ḅẹrẹtọn-Kụrọ-Nyana KỊNỊNYANAḄỌ ḅe ọkọ ḅẹẹm.

Izikẹlị 38:16

Í owu kẹ ị̀ atomi Izirẹlị paka ḅa tẹ anị erise fie amakiri mẹ saḅa-ḅọrọ ye kịka ḅa. Sakị ḅo sakị, arị ị́ fịrịma mu owu kẹ ị̀ amakiri mẹ paka ḅa, kẹ mịẹ tẹ sịẹ-sịẹ ma ì lekiri ḅẹ ḅara, kẹ à kịrị ḅele ḅara ḍie-pakama, àrị ị́ ḅụ ḅọrọ tẹ mịẹarị ye ḅụ.

Izikẹlị 38:8

Tọnwa akụra ḅọrọtẹ so sakị, à tọn ọ̀ pịrị tẹ ori ọmụ kẹ bebe amakiri mẹ tẹ ịn tọnwa asịẹ ḅụ kobiri ḅo gboloma tẹ ini ọmụ ḅalafa ofori ḅara kẹ anga yọ mẹ koro ḅa. Ori ọmụ kẹ Izirẹlị ḅẹ tụndụ ma koro ḅa, anie papaa gbiin-koro sime tẹ kịnị anga-a tẹ alatẹ anga mẹ, kụma mịọkụ ḅụ kịnị mamgba ye ịn la-a ḅara kẹ angarị anga mẹ.

Danẹlị 10:14

À ḅo tẹ mịẹ tẹ ị́ tọrọkọ-jụ ḅụ ị́ ị́ atomi ma ḅụụ paka ḅẹ ye fiearị ye naa ḅẹ ḅara. Mie mẹ anie tọrọkọ-jụ paka ḅẹ ye gboloma ịkịan.”

Danẹlị 2:28

Kụma gbọrụ Tamụnọ So-ḅio emi, tẹ ḅọịye mịẹfinjiarị ḅọ. Ọ̀ mịẹ tẹ í nimi tẹẹ, Í Opu Ḅụ, tọrọkọ-jụ paka ḅẹ ye. Mịọkụ à ḍawọ mẹ ḍuko ị́ pịrị ḅa, í monoarị ogbo ị́ ẹrị ịkịan mẹ.”

Hosiya 1:11

Juda ḅẹ apụ ma na Izirẹlịapụ ma na gbọrụ apụ sọ ḅa. Ịn gbọrụ sịḅịdaḅọ sẹlẹ-pakama-ḅo ịna aḅụụ pịrị ḅa, tẹ gbọrụ sakị kẹ siin ịna amakiri mẹ ḅụ gburo-gburotẹ lolo ḅa. Inn, Jẹzirili ene mẹ gburo-gburotẹ ene sọ ḅa!

Hosiya 11:10

“Ị̀ atomi ị̀ ḍukamẹnjị ḅa àrị ọkụkụ kịka tẹ oloku si kẹ ịn tọn apụ pịrịarị sakị. Ini ịrụa-ideriarị-anga sime tẹ sarama ị̀ ḍọkụma-ḅo ḅa.

Hosiya 5:15

Àrị ị̀ atomi kẹ gbin koroma-so nwenii ịn tọrụsiẹrị furo ḅinma ḅa ịna asi ma gotẹ, tẹ in ḅo ị̀ ḍọkị ḅa. Ẹbịsịya ịna tọrụsiẹrị ḅụ ịn ḅụụkụrọma ị̀ ḍọkị ẹrị ḅa.”

Hosiya 5:6

Ini ịna anana ma na opu anama ma na kẹ agba mịẹ-mịẹ KỊNỊNYANAḄỌ ḅe pịrịarị, kụma anị gbọrụ iḅi sọ kẹ ịn mịẹ-a. Ini inetẹ ọ̀ ḍọkị ẹrị ḅịa, kẹ gotẹ ọkọ ḍukoarị àrị in koroma-so tẹẹ.

Hosiya 6:1

Tomi ma ḅẹẹarị, “Ó yee wa pịkị KỊNỊNYANAḄỌ ḅe dama-mu! Ó ye kẹ wa lama tẹ, kụma piki-pikiye-ofori ò wa gwọ ḅa; ọ̀ wamịna ḅụụ ịnọ pakama tẹ, kụma ọ̀ wamịna ịnọ ma fịna ḅa, ori ọkọ mịẹ ḅịa aro?

Emọsị 9:11

“Anị ene mẹ ḅụ, à siin Devidi ama-da yọ mẹ pakama-ḅo ḅarị sakị mẹ, anie kaan-sara tẹ warị kịkarị ye mẹ. À siin anị ḅẹ onu ma tẹlẹma tẹ anị tarị ḅara mẹ sime ḅa. À siin anị nama tẹ anị mịẹ tẹ anị iḅere-iḅerea kụra ḅio ḅara mẹ sime ḅa.

Mayịka 4:1

Ene ma ḅẹ gbọrụ ene ḅụ, anị giregire paka ḅa, KỊNỊNYANAḄỌ ḅe Tẹkẹ-warị mẹ sịẹ tụndụ mẹ, tụndụ mamgba ḅụ geletẹịn tụndụ sọ ḅa, sịẹ-sịẹ ḅẹ atomi mamgba, gbiri-gbirima anị sọma ḅo ḅa;

Kịẹn-aḅịḅị 24:14

Anịsakị mịọkụ ḍikii, à so ị̀ atomi ḍọkụma-muarị; ḅoo, à mịẹtẹ mịna atomi ma kẹ kunoma ene ma ḅụ ị́ atomi mịẹ ḅarịye í nimi ḅa.

Romu 11:25

Ị̀ amịnapụ, à mịẹtẹ ọ́ gbọrụ kikimatẹ karakaraye nimi ḅẹ-ḅiiarị, ọkọ-a kụma ó ḅofa ọkị mịnẹ ó ye nimi ḅakam. Mịọkụ Izirẹlịapụ ma nyana wararị kọngọ-kụrọ mẹ sime gbamaso ḅịa, kụma anị sime mu la ḅarị sakị anie pịkị Ja asịẹ ḅẹ apụ tẹ Tamụnọ ḍọkụma-ḅo ḅarị apụ kịẹn-ḅịḅị kara ḅẹ sakị.

Romu 2:4

Anịanịa, ori iḅi-yemịẹ-ḅara na, ò kiri foofoma mẹ na, ò ye inema mẹ na ị́ tọrụ-ḅaarị ḅoto. Í nimi lama wararị, Tamụnọ amịna iḅi ḅụ ị́ mịẹ tẹ í si ḅụ pịkị ḅẹ ḅara kẹ í ḍiearị.

Ditẹrọnọmị 4:30

Ọ́ ḅụụ-fụka ḅio sọ, tẹ mịna aị ma kunoma ene ma ḅụ ḅo ọmịna ọgọnọ gbana sakị, ọ́ pịkịma KỊNỊNYANAḄỌ ọmịna Tamụnọ ḅe ḍọkụma-ḅo tẹ ọ̀ pọkọ poki ḅa,