Hosiya 13:2 - FỊAFỊA BAỊBỤLỤ

² Ịn paa si mịẹ-mịẹ-mịẹarị, kiri ḅio paka-ḅo aị kẹ tẹmẹ mḅudu tẹ in sunsin pịrịarị — seleḅa oru-afụḅara, tomina akuroma ḅụ tọn tẹ tomina aḅara kẹ mịẹ aị. Anị tẹso, ịn ḅẹẹarị, “Ọmịnị agbamịẹ arị pịrị.” Ndẹẹ wa arị oru-afụḅara ma ḅịḅị nọnjị ḅẹ ḅara — oru-afụḅara tẹ nambulo sime-ḅara simearị aị ḍiki-tọrụ ḅụ!

Hosiya 13:2 Iomraidhean Croise

1 Amadapụ 19:18

Anịsọ àrị Izirẹlị ḅio ḅụ kịnị tẹra ẹndẹ ofori kịnị apuku na kịnị oyia asi na (7,000) wẹrị koko ḅa, inima tẹ amụ sịḅị-tuu tẹ sunsin Balị pịrị-a apụ ma.”

2 Paka-aị 28:13

tẹ in ḅẹẹm, “ọmịnị ó kun apụ ma kẹ mị yọ so ḅo ḅịa, kẹ gotẹ ọkọ ḅẹẹarị, ọ́ KỊNỊNYANAḄỌ ḅe ḅụụ ḅẹrẹ-ḅarasii ọkị-ḅo mịọkụ wa mịẹ tẹ asi na, nyana wararị ḅẹrẹ-ḅarasii na ḅụ sụa ḅẹ tẹ. Kẹ gotẹ ọkọ ḅẹẹarị, mịọkụ mẹ sọ wa nyana tẹ ḅẹrẹ-ḅarasii gburo-gburo tẹẹ, tẹ ḅalafama ịganị sime Izirẹlị pịrị wararị.”

2 Paka-aị 33:23

Ọ̀ KỊNỊNYANAḄỌ ḅe tọrọkọ ọ̀ ḅụụ iderima-a, ọ̀ ḍa Manasẹ wẹrịtẹ ọ̀ ḅụụ iderima ḅara, kụma anie nakara, mịẹ na-iḅi-a jaị na jaị na, mie ḅị Amọnị ḅe mịẹ yee.

Devidi-Anume 2:12

Ọmịnị oju sẹkịma mu ọ̀ tọrọkọ iḅoo; ọkọ-a kụma ori ịganị ala-a saakị ḅa, tẹ ó ḅiotọn-a sakị kẹ fịị ḅa. Ḅioḅẹlẹ sime ọ̀ ḍọkụma-ḅo tẹ ọ̀ gbaịn-arị apụ ma pịrịm.

Ayịzaya 1:5

Tiye ẹrẹsị ọ́ paa kọngọ-kụrọma ma-mu ḅẹ mọ? Ó ḅiiarị ọ́ paa fomu-ḅara da tọrọkọ-tọrọkọ mu? Izirẹlịapụ, ọmịna asịḅị puu tẹẹ, anịsakị ọmịna aḅioḅẹngbọ sọ obiarị.

Ayịzaya 30:1

KỊNỊNYANAḄỌ ḅe ḍuko tẹ, “Juda daarị apụ ma ịn fa tẹ, ịn kọngọ kụrọma ị̀ pịrịarị ẹrẹsị. Yẹrị tọn ịn pịrị-a aị mie in ḍukamẹnjịarị, tẹ ḅara pono ị̀ ḅịḅị-kẹ-ogbosọ ma pịrịarị, tẹ si kẹ si ọgọnọ gbana kpolimarị.

Ayịzaya 44:11

Sunsin arị pịrịarị-ḅọ pịrịarị-ḅọ iderima ḅa. Oru-afụḅara mịẹarị apụ ma tomi nwẹn ḅẹẹ sakị, ịn mịẹ ḅaka ḅẹ jen ye ofori. Yee ịn ḅẹrẹkọn ḅo — ịn tẹmẹ-naịn-naịn ḅa tẹ pịkị tọrụ-tuu ḅa.

Ayịzaya 45:20

KỊNỊNYANAḄỌ ḅe mẹẹ: Ó ḅo kobirii, sịẹ-sịẹ ma ḅẹ atomi; tẹ tomikiri mẹ daarị kụrọ mẹ ḅịkị ye ḅụ fịị-a so apụ, ọ́ ḅẹrẹkọn mẹ ḅoo! Tomi ma ịn sịn kẹ kịra oru-afụḅara ma dogi mẹnjịma-mẹnjịmarị tẹ inetẹ ịn ḅọrọma ḅịa atamụnọ ma tẹkẹarị arị atomi ma in nimi gberie-sọ ofori!

Ayịzaya 46:6

Tomi ịna akpa ma finji-finji tẹ golu ọsụma pakama-ḅoarị; tẹ in ye-tọn-aị ọgọnọ seleḅa tọn-tọn pakama-ḅoarị. In golu-tẹmẹḅọ ọkọ tẹ ori anị kẹ tamụnọ mịẹarị; anịtẹso ini iḅo tẹ sunsin anị pịrịarị.

Ayịzaya 46:8

Ó miemẹ kẹ ḅiokoromaa, ọmịnị si-mịẹapụ; ọmịnị à mịẹ tẹ ye kẹ kuroma ḅụ suu.

Jerimaya 10:4

tẹ seleḅa na golu na kẹ anị ḅirimarị. Ini ngbọ kẹ anị ḅakụ kụrọmarị, anị ḅarị fuku paka ḅịa ḅara.

Jerimaya 10:8

Inimgba oḅori atomi famam. Sịn kẹ kara oru-afụḅara ḅụ ịn ḍawọ ḅo ḅẹ ye tiye?

Jerimaya 8:5

Ọkọ kụma tiye ẹrẹsị, ì atomi, ọmịnị ị̀ ḅụ pịkị-so tẹ ḅarị pịkị-ḅo-a? Ọmịnị ọmịna oru-afụḅara ma fịnama sịẹma tẹ ḍụkụ tẹ pịkị ị̀ ḍọkụma-ḅoa.

Hosiya 10:1

Izirẹlịapụ ma kịkaye girepu mgbọlụ sụarị vaịnị sịn tẹ girepu sụa ḅinma wararị ye. Ịn lọkọlọkọ la ḅara anie ịn pịkị agbamịẹ-anga nama la ḅara. Ịna amakiri fịaị pakama sara la ḅara anie ịn pịkị kẹ ịn sunsin pịrịarị tọn-tọn ḍụḅarị ḅeriaị ma mịẹ iḅima la ḅara.

Hosiya 10:5

Sameriya opu ama mẹ ḅio angarị apụ ma ḅalafa tẹ kururu ḅa Bẹtẹlị ḅẹ golu nambulo ḅe fa mẹ gotẹ. Ini na agbamịẹapụ ma tẹ fịrịmẹnjị mḅudu mẹ pịrịarị apụ ma na owu anị pịrị ḅa. In pee-peema owu ḅa ini anị ḅẹ golu-golu iḅi ebube mẹ kpọrọnị sin-arị sakị.

Hosiya 11:2

Kụma àrị ọ̀ sịn-sịn-sịn ḅara, mie ọ̀ kẹ ị̀ ḅụ pịkị-so so ḅara. Ị̀ atomi agbamịẹ Balị pịrịm; ịn kụnụaị dọkịma oru-afụḅara pịrịm.

Hosiya 11:6

Ọmụ ịna opu ama ma ọfịn tẹ opu ama ma ogigo-aḅọkọ ma kan kiri lama ḅa. Anị ị̀ atomi guluguluma ḅa ini in kuromarị ịna ḅụụ ḅụ iḅi tẹịn ye mịẹarị ẹrẹsị.

Hosiya 14:3

Gbala-gbala Asiriya inetẹ wa ḅọrọma ḅịa, tẹ ọmụgbin-asụ inetẹ wa gbaịn ḅọrọma ḅịa. Wa ḅarị jen kẹ wamịna oru-afụḅara ma ḅẹẹ ḅịa mịnẹ arị wamịna Tamụnọọ. Yei KỊNỊNYANAḄỌ, ọkụrụkụrụ nyana jen ịn dama-mu tẹ ḅarasụa nyana ḅẹ anga ofori apụ pịrịarị ḅọ.”

Hosiya 2:8

Gbala-gbala á minini ḍụkụ-a mịnẹ yẹrị anie mgbọlị-fịye mẹ na, iru mẹ na, olivu-olo mẹ na, seleḅa mẹ na, golu mẹ na kẹ á pịrị tẹ á kẹ mu sunsin Balị pịrị ḅọ ḅee.

Hosiya 4:17

Izirẹlịapụ ma oru-afụḅara ịn pilema wararị. Wẹrịso ini ịna ḅara-kuḅu ḅẹ etela mu.

Hosiya 8:4

“Ị̀ atomi amadapụ sẹlẹ pakama-ḅom, kụma ịna ḅiotọn ḅara mie ịn kẹ mịẹ ye. Ịn sịḅịdapụ tọnm, kụma ị̀ ḅịḅị-sọ-a ḅara. Ini ịna seleḅa na golu na ọkị tẹ kẹ oru-afụḅara mịẹm — kẹ ịna ḅụụ guluguluma ḅẹm.

Hosiya 8:5

À Sameriya opu ama mẹ ḅẹ apụ ma sunsin pịrịarị golu mḅudu mẹ ḍiki-ḅioḅuarị. Àrị ịn gotẹ ịganị ḅụramarị. Mu tọ sakị la tẹrẹmẹ ini ịna oru-afụḅara tẹkẹ mẹ ḅụ ḅara-siin ḅẹ?

Hosiya 8:6

Gbọrụ ḅara-ḍịn Izirẹlị ḅẹ ḅọ oru-fụḅara mịẹm, tẹ ḅọkọ-ḅọkọ ḅụ mamgba anị tamụnọ-a! Sameriya ḅụ ịn tẹkẹarị golu mḅudu mẹ ini anị ḅaa gẹrẹ-gẹrẹma ḅa!

Kịẹn-aḅịḅị 32:14

Anịsakị ḍikii, ọmịnị ọmịna aḍapụ ma kiri ọkị tẹ si-aị si-aị mịẹ apụ sọ tẹẹ, mịẹtẹ KỊNỊNYANAḄỌ ḅe ḅalafama owi-ịganị mẹ paa Izirẹlị da-da paka ḅẹ ḅara.

Romu 11:4

Anị sakị Tamụnọ tiye kẹ ọ̀ pakịrị? “Amụ sunsin Balị nwẹn-sịn oru ḅe pịrị-a kịnị maa ẹndẹ oyia asi finji ofori kịnị puku à paa nwẹn kẹ ḅụụ wẹrịma wararị.”

Romu 2:5

Kụma ị́ kọngọ kụrọ na kụrọ ḅioḅẹngbọ na nyana wararị, miemẹ mịẹtẹ Tamụnọ ịganị na ọ̀ karakara ḅẹrẹkọn mẹ na ḅo ḅẹ Ene mẹ ḅụ anị si ị́ pịrị tẹịn ḅa.

2 Timoti 3:13

si-mịẹapụ na, ḅụụ kẹ in sime-a ḅara elekimarị apụ na, in sii tọrọkọ-tọrọkọ mu ḅa, ini oḅori kẹ ja apụ sịn-arị ḅara mie ini ma sọ ja apụ oḅori kẹ ịn sịn-arị ḅara.

1 Samụẹlị 10:1

Anịtẹso Samụwẹlị nwẹnị pulo gbọrụ kuku ọkị tẹ pulo mẹ kẹ ọ̀ sịḅị sara, tẹ ḅẹlẹma ḅara ḅụ ekpe kẹ ọ̀ lama tẹ ḅẹẹ, “KỊNỊNYANAḄỌ ḅe ị́ amadaḅọ sọ ori atomi pịrị ḅẹ ẹrẹsị pulo kẹ ị́ sịḅị sara tẹẹ. Anịsakị ị́ ama-da KỊNỊNYANAḄỌ ḅe atomi ma pịrị ḅa, tẹ ini ikelema-koro wararị ini na fịya-a apụ ma ḅara ḅụ ịn ḅọrọma ḅa. Anịsakị miemẹ elekima sọ ị́ pịrị ḅa mịnẹ KỊNỊNYANAḄỌ ḅe pulo kẹ ị́ sịḅị sara tẹ ị́ kẹ amadaḅọ sọma sime ọ̀ pịrị atomi pịrị ḅẹ ḅara: