Hiburu 3:1 - FỊAFỊA BAỊBỤLỤ

¹ Kịrayịsị ḅụ ị̀ amịnapụ, tẹ Tamụnọ kẹ wamịnị na sụa sịn apụ! Ó Jizọsị, Tamụnọ kẹ fịrịmaḅọ ḅe tẹ wa ḍuko pakamarị minini oku mẹ ḅẹ Sịḅịda-Agbamịẹḅọ sọma ḅọ ḅe, kẹ ḅiokoromaa.

Hiburu 3:1 Iomraidhean Croise

Devidi-Anume 110:4

KỊNỊNYANAḄỌ ḅe tẹmẹ-la ḅara kẹ minini ị́ pịrịye mẹ ḅụ ọ̀ ḅịḅị ḍima ḅịa: “Ị́ agbamịẹḅọ sọ gbamaso ḅa Mẹlịkizẹdẹkị agbamịẹ ọrụ sime-ḅara.”

Ayịzaya 1:3

Nambulo ma sọ amịna nyanaḅọ nimi wararị, yedogi-anama sọ ịn nyanaḅọ fịye kẹ ịn pịrị fị-fị yọ nimi wararị. Kụma ị̀ atomi, Izirẹlịapụ ma nimi-a mịnẹsẹ yẹrị ịna Tamụnọ. Gbala-gbala ini aniemẹ fieye naa-a.”

Ayịzaya 41:20

Tomi mie ẹrị tẹ nimi ḅa mịnẹ yẹrị, KỊNỊNYANAḄỌ ḅe, anị mịẹm. Ịn nwẹnị anị fiearị ye naa ḅa mịnẹ Izirẹlị tẹkẹarị Fịafịa Ḅọ ḅe mịẹ tẹ anị pakam.”

Ayịzaya 5:12

Ọmịna alalị ma ḅụ ọbọ na ja farị-farịaị na, ofuro-ofuro aị na emi — iru sọ. Kụma KỊNỊNYANAḄỌ ḅe mịẹarị ọ́ pịrịarị ye tiye-o tiye-o ó nimi-a,

Izikẹlị 12:3

“Mịọkụ, fịị-fịị tomḅọ, sarasarama saakị dogi ḅẹ aị kobiri fịna wẹrị, gbala ḍumo-mangị kọn ḅẹ ḅọ ḅara, tẹ ene amụ gbaịn koro-a ogbo saakị mẹnjị paka. Yee ḅẹḅọ-ḅẹḅọ í so jen anga muarị ye kẹ ị́ ẹrị. Ẹbịsịya arị kọngọ-kụrọ apụ ma ị́ kẹ elekima sụa ḅa.

Izikẹlị 18:28

Ori ọ̀ mịẹarị ye lekiriarị tẹ si mịẹ dasịẹmarị, anie ḅụ karakaraye ḅụ ọ̀ fịị ḅịa, kụma ò ḍumo tọrọkọ mu ḅa.

Hegayị 1:5

Ọmịna ḅụ pakarị ye ọmịnị ẹrị-a aro?

Hegayị 2:15

KỊNỊNYANAḄỌ ḅe ḅẹẹarị, “Ọmịnị inetẹ ẹrị-a aro, ọmịna ḅụ paka ye mẹ? Tẹrẹmẹ ọ́ saakị Tamụnọ-warị mẹ nama,

Jọnị 17:3

Anịsakị sime gbamaso ḍumo fiearị ye anie karakara kpọkpọ gbọrụ Tamụnọ ḅe, na Jizọsị Kịrayịsị ị́ kẹ fịrịmaḅọ ḅe na nimi.

Jọnị 20:21

Jizọsị nwẹnị maa sakị karama ye kẹ ịn ḅẹẹ, “Dein ọmịnị na simee. Ḍaḅọ ḅe ị̀ kẹ fịrịma ḅara mie yẹrị sọ ọ́ fịrịma pakamarị ḅara.”

Jọnị 20:27

Anịtẹso ọ̀ nwẹnị Tọmọsị ḅẹẹ, “Ị́ ḅara-tụngbalị kẹ mịanga suu, tẹ pịkị ị̀ aḅara ma ḍikii; anie ḅọrọ tẹ ḅẹḅẹ pịkị ị́ ḅara sụn-pakama tẹ kẹ ị̀ agaga ḅụ suu. Ḅarị jen kẹ ḅio maaịn maaịn tọnma, tẹ minini nyana-a!”

Fịrịmẹnjịapụ 1:15

Boowa aḍin ḅọrọ tẹso, Jizọsị minini apụ ma, kịnị sonioa si pembe ye, nwẹnị kobiri, tẹ Pita nwẹnị saakị sịẹ tẹ ẹkwẹn.

Romu 11:17

Anị gbala kịkarị ye anie, ḍụọ ḅio in ḍiḅi tẹlẹma wararị olivu sịn ḅụ ịkpangị anyịma sin tẹ piri ḅio ngẹrị so-paka ye ḅẹ ịkpangị kẹ ḅo anị kiri ḍima, tẹ anị olivu sịn mẹ na gbọrụ ḅụ sime-ḅara. Ọmịnị Ja asịẹ ḅẹ apụ ma anị piri-ḅio ngẹrị so-paka olivu sịn mẹ na kịkam, tẹ mịọkụ Juu-ḅẹ-apụ ma na sọ tẹ kụrọtẹ tẹmẹ ḅụ ḅẹ ḍumo iḅi mẹ fịarị.

Romu 15:27

Ini mie ḅarana ọkọ tọn ịna ḅụụ pịrị ye; kụma karakara-ḅara-ḅụ anie ịn pịkị mịẹ na-iḅi ḅara, ḅarasụa ịn pịrị mẹ. Anị sime-ḅara ḅụ, Ja asịẹ ḅe apụ ma Juu-ḅẹ-apụ ma na sọ tẹ ini Juu-ḅẹ-apụ ma tẹmẹ anga ḅẹ aboma ma nyanarị sakị goyegoye, Juu-ḅẹ-apụ ma sọ Ja asịẹ ḅe apụ ma nyana wararị tomikiri ḅẹ aị ma ḅụ ḅe aị ma ḅụ ḅẹ ḅarasụa nyana na-iḅim.

Romu 15:8

À gbala mịẹ tẹ ó nimiarị mịnẹ Kịrayịsị ḅo kọn, kọrịnama kọrị ja apụ pịrị ḍumo mẹ, Juu-ḅẹ-apụ sịḅị mie ó gotẹ anị kọn ye, kẹ mịẹtẹ tomi ẹrị, mịnẹ Tamụnọ anie ḅioḅẹngbọ-kẹ-sịrẹrẹ-niḅi ḅọ; ọ̀ mịẹ tẹ ò minini ịna atẹngịapụ ma pịrị aị ma mịẹ tẹ aị sọ ḅẹ ḅara;

Romu 9:24

Gbala wamịnị anie ọ̀ sịịn ọkị tẹ atomi ma, Juu-ḅẹ-apụ ma ogboku ḅụ ngẹrị-a, kụma Ja asịẹ ḅẹ apụ ogboku sọ.

1 Kọrịntị 1:2

Mị ḍiri mẹ kẹẹ tẹ kẹ Tamụnọ sọsị mẹ tẹ Kọrịntị ḅụ simearị apụ ma, inimgba tẹ Tamụnọ sịnm ḅo ọ̀ fịafịa atomi sọ ḅẹẹ apụ ma fịrịmam, anie sime ọ̀ pịrị apụ ma, Kịrayịsị Jizọsị na, ḅẹ anga, ḅẹ anga ḅụ simearị atomi ma, tẹ sunsin KỊNỊNYANAḄỌ Jizọsị Kịrayịsị pịrịarị apụ ma na gbọrụ ḅụ sime ḅụ, ori anie ịn Nyanaḅọ pịkị wa Nyanaḅọ.

1 Kọrịntị 10:17

Gbọrụ fịturu ngẹrị emi sakị goyegoye wamịnị-mgba, tọnwa-apụ ḅẹsọ, wa gbọrụ oju mịẹ tẹ, kẹ gotẹ ọkọ ḍukoarị, wamịnị-mgba gbọrụ fịturu kpo mẹ ḍiya tẹ.

1 Kọrịntị 9:23

Mie-mẹmgba à mịẹarị, Iḅi Oku mẹ gotẹ, mịẹtẹ ja apụ sọ anị ḅẹ boma mẹ nyana ḅarị ḅara.

2 Kọrịntị 1:7

Ọkọẹrẹsị ọmịna ḅụ wa nyana ḅiokpọ mẹ jike ḅịa gbala-gbala; wa nimi wararị mịnẹ ọ́ wamịnị na sọ tẹ tọrụsiẹrị ḅara anie ọ́ pịkị wamịnị na ḅiokpọ sọ nyanarị ḅara.

2 Kọrịntị 9:13

Tẹ ọ́ mẹnjịarị fịrị mẹ dogi-ḅo ye gotẹ, tọnwa atomi ọ́ sịḅị-tuu Kịrayịsị iḅi-oku mẹ pịrị ye ẹrẹsị Tamụnọ ebube mẹ boma ḅa, anie ó ḍuko-pakamarị ye mẹ, ọmịna ḅara sarasara ḅụ ọ́ nyana aị kẹ ḅẹḅọ-ḅẹḅọ na ḍiyarị mẹ.

Ẹfisọsị 3:6

Kikima sime ye mẹ anie, iḅi-oku mẹ ḅụ Ja asịẹ ḅẹ apụ ma ḅọrọ tẹ Juu-ḅẹ-apụ na sọ tẹ Tamụnọ aboma ma nyana tẹ; ịn gbọrụ ogbo mẹ ḅẹ apụ sọ tẹ, pịkị Kịrayịsị Jizọsị ḅụ ḅọrọ tẹ Tamụnọ minini ye mẹ ḅụ pịkị ḍiekiri nyana tẹ.

Ẹfisọsị 4:1

Yẹrị, fịrịmẹnjị KỊNỊNYANAḄỌ ḅe pịrịarị ẹrẹsị in kun ikoli suu wararị ḅọ ḅe ọmịna ḅara ḅii lamarị: mịnẹ ọ́ Tamụnọ ọ́ sịn tẹ ọ́ kọn ḅẹ ḍumo mẹ kọn busunumaa.

Ẹfisọsị 4:4

Gbọrụ oju na gbọrụ Tẹmẹ na emi, anie pịkị gbọrụ ḅiokpọma ye tẹ Tamụnọ gotẹ ọ́ sịn ye mẹ sọ emi ḅara.

Filipayị 3:14

Mie ḅụ, à mangị da-da kunoma mẹ muarị, mịẹtẹ à ḍiepịrịye mẹ nyana ḅẹ ḅara, anie Tamụnọ, Kịrayịsị ḅụ, ị̀ sịnm à ḅo So-ḅio kọn nwẹn ḅẹ ḍumo mẹ.

Kọlọsị 1:12

kẹ ịmịẹtẹ kẹ Ḍaḅọ ḅe ḅẹẹ, anie mịẹtẹ wa Tamụnọ atomi ma ḅụ sọ tẹ ò bele ama mẹ la ḅẹ apụ sọ ḅọ ḅe.

Kọlọsị 1:22

Kụma mịọkụ ọ̀ Tụḅọ ḅe oju akpakpa ḅụ kọn fịị mẹ ḅụ, Tamụnọ ọ́ kẹ ori ikiapụ sọma tẹ, mịẹtẹ ori ọ́ kẹ fịafịa, kpaịntẹ ḅẹẹ ḅẹẹ ye ḅụụ ḅụ ofori ḅara kẹ ọ́ kẹ ḅo ọ̀ tọrọkọ la ḅẹ ḅara.

Kọlọsị 3:12

Ọmịnị Tamụnọ atomi; ori ọ́ ḅẹlẹma tẹ ọ́ sẹlẹ-ọkị tẹ kẹ ori atomi sọmam. Ọkọẹrẹsị, ọmịnị ọkụrụkụrụ na, iḅi-yemịẹ-ḅara na, ḅụụ-iderima na, gbene na, ye-inema na kẹ kapa sọma tẹ sụa.

1 Tẹsalonịka 2:12

Wa ọmịna ḅiokpọmam, wa ó dedemam, tẹ sakị mamgba ḍuko ọ́ pịrị kụrọmam, mịnẹ ọ́ Tamụnọ ḅioḅẹlẹmarị ḍumo ḅara kọn, anie ọ́ sịn-arị mịnẹ ó ḅo ori Ama-da tẹ ḅẹrẹtọn-arị ama mẹ na ori ebube na nyana ḅẹẹ ḅọ ḅe.

1 Tẹsalonịka 5:27

KỊNỊNYANAḄỌ ḅe kụrọ ḅụ, à ḍuko kụrọma ọ́ pịrịarị mịnẹ ọ́ mị ḍiri mẹ go minini apụ mamgba pịrịị.

2 Tẹsalonịka 1:11

Anie wa gotẹ sakị mamgba tẹkẹ ọ́ pịrịarị. Wa wamịna Tamụnọ ḅara ḅiiarị mịnẹ ori ọ́ mịẹtẹ ọmịnị ori ọ́ sịn tẹ ọ́ kọn ḅẹ ḍumo mẹ gbẹẹ apụ sọ. Yee ori ọ̀ kụrọ ḅụ ọ́ mịẹ ḅẹ ḅii aị mamgba mịẹ tẹ arị mịẹ tẹ aị sọọ, tẹ ọ̀ pịkị ọmịna minini kọrịnama mẹ mịẹ tẹ anị bebe ye sọọ.

2 Tẹsalonịka 2:14

Wa ḍuko ọ́ pịrị Iḅi Oku mẹ ḅụ mie Tamụnọ ḅọrọ tẹ ọ́ sịn miemẹ ḅio suu ye; ori ọ́ sịnm ó ḅo wa Nyanaḅọ Jizọsị Kịrayịsị ebube mẹ ḅụ ọmịna kiri ọkị.

1 Timoti 6:12

Minini mangị ịrụa mẹ ḅụ í inetẹ ḅara, inetẹ ḅara mịẹ, tẹ sime gbamaso ḍumo nyana ị́ ḅụụ pịrịị; kẹ gotẹ ọkọ ḍukoarị, mị ḍumo mẹ nyana mie Tamụnọ gotẹ ị́ sịn ye, tọnwa-apụ tọrọkọ ḅụ í í minini mẹ mịẹ kụrọma sakị mẹ ḅụ.

1 Timoti 6:2

Kịrayịsị ḍukamẹnjịarị omoni ma ini ịn nyana apụ ma ḍiki-sima ma, ini ịna amịnapụ gotẹ. Anie nakara ini iḅiọkụ fịrịmẹnjị ịn pịrị tarị ḅara nẹngị, ịna kọrịnama mẹ ḅẹ iḅi fịarị apụ ma anie in pembema minini apụ tẹ ịn ḅẹlẹmarịapụ ẹrẹsị. Mịna ịn mịẹ ḅẹ aị ma toluma tẹ pịkị ḍuko kụrọmaa.

2 Timoti 1:9

Ori wa ḅọrọma tẹ wa sịnm wa ori atomi sọọ, wamịna kọrịnama ḅụ-a, kụma ori tọn ḅara na ó ḍiki-ḅụụjịrị na ẹrẹsị. Kịrayịsị Jizọsị ḅụ mie ọ̀ ḅọrọ tẹ mị ḍiki-ḅụụjịrị mẹ kẹ wa pịrị ye, tomikiri mẹ amụ tẹmẹ-a kụra-ḅio,

2 Timoti 2:7

À nwẹn ḍukoarị aị ma kẹ kuroma ḅụ suu, KỊNỊNYANAḄỌ ḅe sịḅị ḅio kẹ ị́ pịrị tẹ í inetẹ anịmgba fiearị ye naa ḅo ḅẹ ẹrẹsị.

Hiburu 10:19

Ọkọẹrẹsị, ị̀ amịnapụ, Jizọsị fịịm gotẹ, sọ Fịafịa-tẹịn Yọ mẹ mu ḅụ wa kiki gberie-sọ ḅarị ofori.

Hiburu 10:21

Wa gbọrụ opu agbamịẹḅọ nyana wararị, tẹ Tamụnọ-warị mẹ ḅẹ kụrọ-ḅara ḅụ simearị ḅọ.

Hiburu 10:23

Ó yee wa kụrọma wa ḍuko pakamarị ḅiokpọmaye mẹ ọlọ sịẹma, wa ḅiokpọ wararị mịnẹ Tamụnọ inetẹ ò minini ye mẹ mịẹ ḅa.

Hiburu 13:22

Àrị ọ́ tẹkẹm, ị̀ amịnapụ, ọmịnị ekpe deinma tẹ mị ḅiokpọma oku mẹ pokii; kẹ gotẹ ọkọ ḍukoarị, à kẹẹ tẹ kẹ ọ́ fịrịmarị ḍiri mẹ nangwọ ḅaka-a.

Hiburu 2:11

Ori anie tomina ḅụụ ịna asi sịkịrị sin-arị ḅọ, anịsakị ori ịn sịkịrị fịafịamarị ḅọ ḅe na ọ̀ sịkịrị fịafịama tẹ apụ ma na, gbọrụ Ḍaḅọ. Anie Jizọsị gotẹ ḅụụ-jịrị-a tẹ ori amịnapụ kẹ ịn sịn-arị ye.

Hiburu 2:17

Miemẹ fiearị ye anie ḅọkọ, ḅọkọ mamgba ḅụ ori ori amịnapụ ma na kịka fama ḅẹm, mịẹtẹ ò ḅioḅẹngbọ-kẹ-sịrẹrẹ-niḅi tẹ pịkị ọkụrụkụrụ nyana wararị Sịḅịda-Agbamịẹḅọ sọ ḅẹ ḅara, Tamụnọ fịrị mẹ ḅụ, mịẹtẹ Tamụnọ tomina asi wẹrịso ḅarị ḅara.

Hiburu 3:12

Ị̀ na sọ tẹ Kịrayịsị mininiarị apụ, ọmịnị ẹbị, mịnẹ ọmịna ḅụ gbọrụḅọ-sọ ọkọ sime minini-a si ḅioḅẹngbọ nyana tẹ ọḅụ pịkị ḍumo wararị Tamụnọ ḅe gbin-a.

Hiburu 3:14

Kẹ gotẹ ọkọ ḍukoarị, wa ye Suku-saakị ḅụ nyana ḅiokpọ mẹ ọlọ kụrọma mu kunoma la ḅẹḅẹ, wa nimii mịnẹ wa Kịrayịsị na gbọrụ ḅụ emi.

Hiburu 6:20

Jizọsị wa gotẹ tarị mu anịanga la tẹ, tẹ Sịḅịda-Agbamịẹḅọ sọ gbamaso tẹ, Mẹlịkizẹdẹkị agbamịẹ ọrụ sime-ḅara.

Hiburu 7:26

Mie ḅụ, Jizọsị anie wamịna ḅụụ-fụka mịẹ pẹlẹarị Sịḅịda-Agbamịẹḅọ ḅee. Ọ̀ fịafịa wararị; ọ̀ ḅụụ ḅẹẹ-ḅẹẹye anịanịa si ofori; si-mịẹapụ ḅụ Tamụnọ ọ̀ saakị ḅelema wararị, tẹ ori iwoma mu So ma ḅọrọ tẹẹ.

Hiburu 7:28

Mozizi Oloko mẹ la-a atomi tọn-arị ịn Sịḅịda-Agbamịẹapụ sọ; kụma Tamụnọ karị tẹ minini ye mẹ, anie Oloko mẹ ḅọrọ tẹrẹmẹ ḅo ye mẹ, Tụḅọ ḅe tọnm, anie Tamụnọ mịẹ tẹ laa gbamaso tẹ ḅọ ḅe.

Hiburu 9:11

Kụma Anịngẹ-kụraḅio Kịrayịsị mịọkụ simearị iḅi aị ma ḅẹ Sịḅịda-Agbamịẹḅọ ḅara kẹ ḅo la tẹ. Ò sime tẹ fịrịmẹnjịarị akpụrụ tẹkẹ-warị mẹ iḅi, pịkị kara-gbasị, osi ye mẹ nẹngịm; tomi ḅara kẹ nama Akpụrụ tẹkẹ-warị-a, anie fiearị mịnẹ mị tomikiri Tamụnọ tẹmẹ koroma wararị aị ma ḅẹ gbori pakịrị-a.

Hiburu 9:15

Miemẹ ẹrẹsị, Kịrayịsị ḅo ịwọ ọḅọkụ tọn-pakamaḅọ sọ tẹ, mịẹtẹ Tamụnọ sịn ḅụụ pịrị tẹ apụ ma sime gbamaso aboma ma, tẹ Tamụnọ minini tomi pịrị tẹ aị ma nyana ḅẹ ḅara. Miemẹ inetẹ mịẹ ḅa, Kịrayịsị fịị tẹ, elemu ọḅọkụ mẹ sakị ḅụ tomi mịẹ asi ma ḅụ ịn ḅọrọmarị ye mẹ gotẹ.

1 Pita 2:9

Kụma ọmịnị ma anie Tamụnọ sẹlẹ-ọkị tẹ furo, Amadaḅọ agbamịẹapụ, fịafịa sịẹ, sime Tamụnọ pịrị atomi, sẹlẹ pakama-ḅo tẹ Tamụnọ ḅụụ-buama amịẹaị ma ḍuko wasama ḅẹ apụ, anie kanakana ḅio ọ́ sịn pakama-ḅo ḅalafama bele ḅio suu Tamụnọ ḅe.

1 Pita 3:5

Kẹ gotẹ ọkọ ḍukoarị, ḅọrọtẹ sakị ḅụ Tamụnọ mangịma ḍumo kọn ereme ma, tẹ ọ́ kẹ ḅiokpọma apụ ma sịḅị-tuu ịna diapụ pịrị iḅi mẹ mie ịn kọn ye.

1 Pita 5:1

Yẹrị sọ omongiḅọ ḅara ḅụ, arị ọmịna ogboku simearị sọsị omongiapụ ma tẹkẹm. À ḅarana Kịrayịsị atọrụsiẹrị ma ẹrịm, anịsakị à pịkị ori ebube mẹ ḅụ kiri nyana ḅa anị tolu-paka sakị. Àrị ọ́ tẹkẹm,

1 Pita 5:10

Kụma ọ́ kẹlẹ kẹ tọrụsiẹrị tẹso, sakị, ḍiki-ḅụụjịrị ye mẹmgba Tamụnọ ḅe, tẹ ọ́ sịn-arị ó ḅo Kịrayịsị na gbọrụ ḅụ sime tẹ ó sime gbamaso ebube nyana ḅẹẹ ḅọ ḅe, ọ́ mịẹtẹ ó busunu ḅa, tẹ kụrọ-sịẹ na, ịnyọ na, jike jike-a kuno na kẹ ọ́ pịrị ḅa.

1 Jọnị 1:3

Wa ẹrị tẹ pịkị naa tẹ ye mẹ, wa ḍuko wasama ọmịnị sọ pịrịarị, mịẹtẹ ọ́ wamịnị na sọ tẹ wa Ḍaḅọ ḅe na ọ̀ Tụḅọ Jizọsị Kịrayịsị ḅe na nyanarị gbọrụ ḅụ sime mẹ nyana ḅẹ ḅara.

Judu 1:1

Yẹrị Judu, Jizọsị Kịrayịsị fịrịmẹnjịḅọ, pịkị Jemusị iyimbere ḅe, ḅara mie mị ḍiri mẹ ḅo yee: À kẹẹ tẹ kẹ Tamụnọ sịn ọ̀ ḅụụ pịrị tẹ, Tamụnọ Ḍaḅọ ḅe ḅẹlẹma ḅụ angarị, tẹ Jizọsị Kịrayịsị ḍikiḍikiarị apụ ma fịrịmarị:

Mịẹfinji 17:14

Ini owu kẹ Anana Tụḅọ ḅe paka ḅa, kụma Anana Tụḅọ ḅe sịn tẹ, sẹlẹ tẹ ḅioḅẹngbọ-kẹ-sịrẹrẹ-niḅi ḅara kẹ ò ḍukamẹnjịarị apụ ma ọ̀ jụ sọ tẹ owu mẹ sọ tẹ ịn nẹngịma ḅa; anị gotẹ ọkọ mịẹ ḅarịye, ori Anana Tụḅọ ḅe anie kịnịnyanapụ mamgba Nyana ḅọ, pịkị amadapụ mamgba Amadaḅọ.”

Mịẹfinji 18:20

So, ḅioḅẹlẹẹ, á fa tẹ ye mẹ gotẹ! Ọmịnị Tamụnọ atomi na, fịrịmẹnjịapụ na, ịkịankoroapụ na, ó ḅioḅẹlẹẹ! Kẹ gotẹ ọkọ ḍukoarị, Tamụnọ á kẹ ọ́ mịẹ-aị ma ḅẹ ḅẹrẹ pẹlẹ á ḅara sima tẹ!