Ditẹrọnọmị 9:3 - FỊAFỊA BAỊBỤLỤ

³ Anịẹrẹsị mịmgba ó nimi mịnẹ oriḅe tẹ ọmịna tọrọkọ tarị ye guluguluma kọrị fịnị ḅara kẹ saḅa ḅọ ḅe anie KỊNỊNYANAḄỌ ọmịna Tamụnọ ḅe; ori ịn ḅaa ḅa, tẹ mịẹtẹ ịn sịḅị-tuu ḅa ọmịna tọrọkọ, anieḅụ ọmịnị in dee pakama ḅa, tẹ mịẹtẹ ịn fọnya fịị fa ḅa, KỊNỊNYANAḄỌ ḅe kẹ wẹrịtẹ ọ́ karịma tẹ ḅara.

Ditẹrọnọmị 9:3 Iomraidhean Croise

Paka-so 23:23

“Ì enjẹlị ọmịna tọrọkọ tarị mu tẹ ọmịnị ọkị-ḅo Amọrayịtị apụ ma na, Itayịti apụ ma na, Pẹrịzayịtị apụ ma na, Kenanị ḅẹ apụ ma na, Hivayịtị apụ ma na, Jebusayịtị apụ ma na ogbo-ḅio suu, tẹ àrị ịn ḅaa siin sakị,

Paka-so 24:17

Mịọkụ KỊNỊNYANAḄỌ ḅe ebube mẹ tụndụ mẹ sịḅị ọgọnọ ḅụ Izirẹlịapụ ma tọrụ ḅio sime-ḅara gbala ye-yọ dọkịma gulugulumarị fịnị.

Ayịzaya 27:4

À ḅarị ịganị nyana girepu-ḍụọ mẹ pịrị tọrọkọ mu-a. Nangị na agarara na kịngẹ ḅọrọ sime-sime, arị owu kẹ arị paka tẹ gbọrsịḅị arị dọkịma sin ḅa.

Ayịzaya 30:27

Kịnị inetẹ ala anga sime tẹ KỊNỊNYANAḄỌ ḅe kụrọ na ebube na ẹrị ḅa. Kọrị fịnị na onwin na ori ịganị ḍie-pakamarị. Ori ẹkwẹn-arị, tẹ ori ẹkwẹn pakama ḅoarị sịẹ ma nwẹnị kọrị fịnị kịkarị.

Ayịzaya 30:30

KỊNỊNYANAḄỌ ḅe mịẹtẹ ḅẹḅọ-ḅẹḅọ ori opu kụrọ nyanatẹ pọkọ mẹ naa ḅa, tẹ ori ịganị mḅọ ḅụụ ịnọ ḅa. Fịnị aḅẹlẹ kọrị, kọrị paka ḅa, oḅuto turee-tureema paka ḅa, mgbọlị eene na, wọị-wọịma sararị eene na so.

Ayịzaya 30:33

Ala tẹ sakị ḅụ ịn gbọrụ yọ tẹlẹma wẹrịm, ini orumo kẹ Asiriya tomikiri mẹ dọkịma fama ḅẹ yọ. Anị pokolo tẹ finjima wararị, tẹ ịn pakịrị tan-tan anị ḅio sara tunduruma wararị. KỊNỊNYANAḄỌ ḅe ọwụ sara tẹ anị fịnị-ḅẹlẹ sọ tẹ veremuma anị kọrịma ḅa.

Ayịzaya 33:14

Zayọnị ḅẹ si-mịẹapụ ma tẹmẹ-naịn-naịn ḅụ oju-sẹkịarị. Ini mẹẹ, “Tamụnọ ḅẹrẹkọn kịkarị ye kọrị gbamasoarị fịnị. Wamịna ḅụ ọkọ kịka kọrị-fịnị ḅio sọ tẹ inetẹ fịị-a tẹ paka-ḅo ḅẹ ḅọ tụḅọ?”

Mayịka 2:13

Tamụnọ etela mẹ finji ịn pịrị ḅa, tẹ omoni-sọ anga mẹ ḅụ etela kẹ ịn ḍie pakama-ḅo ḅa. Ini opu ama mẹ ḅẹ ogigo-ḅọkọ mẹ kan finji, tẹ sịḅị nyana ḅara kẹ so ḅa. Ịna amadaḅọ, KỊNỊNYANAḄỌ ḅe ḅioju, tọrọkọ tarị ịn pịrị tẹ ịn ḅọrọma pakama ḅa.

Matiyo 15:10

Anịtẹso Jizọsị tomina-ogbo mẹ sịn ọ̀ ḅụụ pịrị tẹ ịn ḅẹẹm, “Ó poki tẹ anị fiearị ye naa!

Makị 7:14

Anịtẹso Jizọsị sin jen kẹ tomina-ogbo mẹ sịn ọ̀ ḅụụ pịrị tẹ ịn ḅẹẹm, “Ọmịnị-mgba ó poki tẹ anị fiearị ye naa.

Romu 8:31

Ma mamgba ḅụ wa tiye ḍuko ḅẹ? Tamụnọ wamịnị na emi ogbo tụḅọ inetẹ wamịnị na tụḅụrụ ḅẹ?

Ẹfisọsị 5:17

Ọkọẹrẹsị ọmịnị oḅori atomi ḅara sime ma, kụma ọ́ ḅụụkụrọma tẹ KỊNỊNYANAḄỌ ḅe ḅiiarị ọ́ mịẹ ḅẹ ye mẹ ḍọkị nimii.

Ditẹrọnọmị 1:30

KỊNỊNYANAḄỌ ọmịna Tamụnọ ḅe tẹ ọmịna tọrọkọ-tarịarị ḅọ ḅe ḅarana owu mẹ sọ ọ́ pịrị ḅa, ọ̀ wẹrịtẹ Ijiputi ḅụ ọmịna atọrụngbọ mịẹ ọ́ pịrị ḅara pembema ḅara,

Ditẹrọnọmị 20:1

Ọmịnị ọmịnị na fịya-a apụ na ọmụgbin ḅẹ sakị, tẹ ọ́ tọnwa asụ na, kirimẹnjị-ọmụarụ na, ḍụḅa ọ́ soku-ḅẹ ọmụ-ogbo nẹngị ọmụ-ogbo na ẹrị-ẹrị, ọmịnị in ḍiki ḅalafaa ma; kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe ọmịnị na emi, oriḅe tẹ Ijiputi ama mẹ ḅụ ó ḍikiḍiki pakama-ḅo ḅọ ḅe.

Ditẹrọnọmị 20:4

Kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe anie oriḅe tẹ ọmịnị na fịya-a apụ na owu sọ ọ́ pịrị ḅẹ ọmịnị na muarị ḅọ, owu-ḅara-iḅi mẹ kẹ ọ́ pịrị ḅẹ ẹrẹsị.

Ditẹrọnọmị 4:24

Kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe anie ye gulugulumarị fịnị, afana Tamụnọ.

Ditẹrọnọmị 7:16

Tomi-kụlọkụlọ tẹ KỊNỊNYANAḄỌ ọmịna Tamụnọ ḅe saḅama ọ́ pịrị ḅarị apụ goyegoye ọmịnị ịn ḅaa ḅa, ọmịnị ịn ḍiki sịḅị-jịrị ma, ọ́ pịkị fịrịmẹnjị ịna oru-atamụnọ pịrị ma, kẹ gotẹ ọkọ ḅẹẹarị, aniemẹ ḍiein sọ ọ́ pịrị ḅa.

Ditẹrọnọmị 7:22

KỊNỊNYANAḄỌ ọmịna Tamụnọ ḅe ọmịna tọrọkọ kẹlẹkẹlẹ mịna opu asịẹ ma ọfịn sin fama ḅa; ó kirina-kirina gbọrsịḅị ini ọfịn mu kunoma ḅịa, anieofori piri-ḅio-ḅẹ anama ma kịẹn-ḅịḅị ḅofa ọmịna aḅụụ ḅaka.

Ditẹrọnọmị 9:6

Anịẹrẹsị ó nimi mịnẹ KỊNỊNYANAḄỌ ọmịna Tamụnọ ḅe ọmịna karakara gotẹ mị iḅi ama mẹ kẹ ọ́ nyana ḅẹ tẹ ọ́ pịrị-a, kẹ gotẹ ọkọ ḅẹẹarị, ọmịnị anie kịnị na kura-a atomi.

2 Tẹsalonịka 1:8

tẹ ịn nwẹnị kọrị-fịnị kẹ fomu-ḅara kẹ Tamụnọ sịkịarị apụ ma na wa Nyanaḅọ Jizọsị Iḅi Oku mẹ ḍuko ye mịẹ-a apụ ma na pịrị ḅa.

Hiburu 12:29

kẹ gotẹ ọkọ ḍukoarị, karakara-ḅara-ḅụ, wamịna Tamụnọ ḅe anie ye dọkịma fama-fama kọrị-fịnị.

Jọsụwa 11:12

Arị amadapụ ma opu ama mamgba na, arịḅẹ amadapụ mamgba na Jọsụwa ini ọkịm, tẹ okologie mẹ kẹ ịkatakirikọn-a-ḅara kẹ ịn ḅaam. Mozizi, KỊNỊNYANAḄỌ ḅe fịrịmẹnjịḅọ ḅe wẹrịtẹ tọn tẹ ḅara.

Jọsụwa 11:8

KỊNỊNYANAḄỌ ḅe nwẹnị ịn kẹ Izirẹlị ḅara-ḅio ḅụ su, inima tẹ ịn ḅaa, tẹ ịn ḍuka mu gburo-gburotẹ Sayịdọnị na, Misirẹfọtimemu jụjụ-ḅio la tẹ ịn ḅaa, anịsakị ịrụa-saakịarị-anga ḅụ mu Mizipa ḅẹ Tụndụ-Ogboku la, nwenii kpọkpọ gbọrụḅọ-sọ wẹrịso kọnma-a apụ ma.

Jọsụwa 14:12

Anieḅụ mịọkụ mị tụndụ ọgọnọ ḅẹ opu sịẹ mẹ kẹ ị̀ pịrị aniemẹ tẹ KỊNỊNYANAḄỌ ḅe anị ene mẹ ḅụ anị gboloma ẹkwẹn kọn ye mẹ; kẹ gotẹ ọkọ ḅẹẹarị, anị ene mẹ ḅụ ḍụḅa tomi nẹngị-nẹngịtẹ nonji-atomi anịjụ ọmụ gotẹ mịẹ kụrọma kụrọmatẹ opu ama ma ḅio sime-ḅara ị́ naam. Sosi-ọkụma KỊNỊNYANAḄỌ ḅe ị̀nịna sime tẹ à KỊNỊNYANAḄỌ ḅe ḅẹẹ ḅara ḅụ in dee pakama ḅa.”

Jọsụwa 3:11

Ḍikii, tomikiri mẹmgba nyana KỊNỊNYANAḄỌ ḅe Ọḅọkụ-Igbe mẹ tarị ọmịna tọrọkọ mẹnjị ḅọrọ Jodanị mẹ ḅio koro mu ḅa.

Jọsụwa 3:14

Tomi ma Jodanị mẹ saḅa-ḅọrọ ḅẹ ḅara kẹ ịna akpụrụ-awarị ma ḅio saakị mẹnjị sakị, Ọḅọkụ-Igbe mẹ dogi agbamịẹapụ ma nwẹnị tomi ma tọrọkọ tarị.

Ḅẹrẹkọn-apụ 4:14

Anịtẹso Dibora nwẹnị Barakị ḅẹẹ, “Saakịị! Kẹ gotẹ ọkọ ḅẹẹarị, mịmgba anie ene mẹ tẹ KỊNỊNYANAḄỌ ḅe mịẹtẹ ị́ Sisera nẹngịma ḅa ene mẹ. Muu, KỊNỊNYANAḄỌ ḅe ị́ tọrọkọ tarị paka-muarị!” Anieḅụ kịnị gbọrụ puku sọnọa ẹndẹ finji (10,000) ma Tabọ Tụndụ ḅụ Barakị ḅụụ sọ tẹ ò ḍuka ideri-ḅom.