Ditẹrọnọmị 7:21 - FỊAFỊA BAỊBỤLỤ

²¹ Ọmịnị ịn ḍiki-ḅalafa ma, kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe ọmịna ogbo-ḅio emi, gburo-gburotẹ tẹmẹ-naịn-naịnmarị Tamụnọ.

Ditẹrọnọmị 7:21 Iomraidhean Croise

2 Paka-aị 32:8

Ori na simearị ye meni ḅara-kọngọ; kụma wamịnị na sime tẹ ḅarasụa wa pịrị tẹ wamịna owu mẹ sọ ḅarị ḅọ anie KỊNỊNYANAḄỌ wamịna Tamụnọ ḅe” Tẹ tomi ma nwẹnị Hẹzịkaya, Juda ḅẹ amadaḅọ ḅe ẹkwẹn-aḅịḅị ma ḅụ ḅiokpọ nyana.

Nehimaya 1:5

Yẹrị mẹẹ, “yei So-ḅio ḅẹ KỊNỊNYANA-TAMỤNỌ, gburo-gburotẹ tẹmẹ-naịn-naịnma Tamụnọ, tẹ ọḅọkụ koko tẹ jike-a ḅẹlẹma wẹrị kẹ ọ̀ ḅẹlẹma tẹ ori oloko koko apụ pịrị ḅọ,

Nehimaya 4:14

À nwẹnị ḍiki, tẹ saakị tẹ ama ḅẹ opu apụ ma na, opu fịrịmẹnjịapụ ma na, tomi ma ḅụụ kirikọn-apụ ma na ḅẹẹ, “Ọmịnị ịn ḍiki-ḅalafa ma. Ọ́ KỊNỊNYANAḄỌ ḅe tẹ gburo-gburotẹ, tẹmẹ-naịn-naịnmarị ḅọ ḅe tẹ owu-sọ ọmịna mịnapụ na, ọmịna owiapụ-awọmẹ na, ọmịna eremịna-awọmẹ na, ọmịna sime-ereme na, ọmịna ama ma na pịrị ḅọ ḅe kẹ ḅiokoromaa.”

Nehimaya 9:32

“Anịẹrẹsị mịọkụ yei wamịna Tamụnọ, gburo-gburotẹ kụrọ-nyanatẹ tẹmẹ-naịn-naịnmarị Tamụnọ! Tẹ ọḅọkụ na jike-a ḅẹlẹma na kokoarị ḅọ, yee Asiriya ḅẹ amadapụ ma sakị kụra-ḅio ḅo mịmgba la ḅụ wamịna amadapụ na, wamịna amadapụ awọmẹ na, wamịna agbamịẹapụ na, wamịna ịkịankoroapụ na, wamịna ḍapụ na, í atomi mamgba na ọgọnọ gbana ḅụụ-fụka mamgba ị́ ḅụụ kalịye sọma.

Devidi-Anume 27:1

KỊNỊNYANAḄỌ ḅe anie ì belee, pịkị ị̀ ḅọrọma; à gotẹ ḅalafa ḅẹ ḅọ ofori. KỊNỊNYANAḄỌ ḅe ye kẹ kịnị lama ḅẹ aị mamgba ḅụ ị̀ gbaịn-arị; gbala-gbala ị̀ ḅalafa ḅịa.

Devidi-Anume 46:11

Kụrọmamgba nyana KỊNỊNYANAḄỌ ḅe wamịnị na emi; Jekọbụ Tamụnọ ḅe anie wamịna ḅụụ-ḅọị-yọ.

Devidi-Anume 46:5

Tamụnọ anị opu ama mẹ ḅio emi, gbala-gbala anị fama-fama ye paka ḅịa; dede-funfun ḅụ ò ḅo ḅarasụa anị pịrị ḅa.

Devidi-Anume 46:6

Ama sịẹ-sịẹ ma tẹmẹ-naịn-naịn tẹẹ, amadapụ ma daarị anga ma jike tẹẹ; Tamụnọ so-alagba tẹịn-arị, tẹ kiri mẹ mẹnịma-faarị.

Devidi-Anume 46:7

Kụrọ mamgba nyana KỊNỊNYANAḄỌ ḅe wamịnị na emi; Jekọbụ Tamụnọ ḅe anie wamịna ḅụụ-ḅọị-yọ.

Devidi-Anume 47:2

KỊNỊNYANAḄỌ, Gele Tẹịnḅọ ḅe, ò mangịma na-iḅim; ori opu amadaḅọ, tẹ tomikiri mẹ kana-koro ḅụ ḅẹrẹtọn-arị.

Devidi-Anume 68:35

Ori ọ̀ fịafịa yọ mẹ ḅụ sime tẹ ḅoarị ḅara ḅụụ-gbiripuma ḅara ḍikii — Izirẹlịapụ tẹkẹarị Tamụnọ ḅe! Ori ịnyọ na kụrọ na kẹ ori atomi pịrịarị. Ọ́ Tamụnọ tokinii!

Devidi-Anume 89:8

KỊNỊNYANAḄỌ, kụrọmamgba Nyana Tamụnọ, gbọrụḅọ-sọ opu kụrọ nyana ị́ na gbasị-a; Yei KỊNỊNYANAḄỌ, ye mamgba ḅụ ḅioḅẹngbọ kẹ ị́ ḅụụ ḅụ gbana na-iḅim.

Devidi-Anume 95:3

KỊNỊNYANAḄỌ ḅe opu Tamụnọ ẹrẹsị, pịkị opu amadaḅọ, oru mamgba nẹngị ḅọ.

Paka-so 29:45

Anịsakị arị Izirẹlịapụ ma ogbo-ḅio ḅụ anga ḅa, tẹ ị̀ na Tamụnọ sọ ḅa.

Danẹlị 9:4

À KỊNỊNYANAḄỌ ị̀ Tamụnọ ḅe tẹkẹ tẹ ị̀ atomi ma asi ma ḍuko-pakamam. À ḅẹẹm, “KỊNỊNYANA-TAMỤNỌ, Ị́ ḍụḅam, tẹ wa ị́ kụn-arị. Í ḅioḅẹngbọ kẹ ḅụụ ḅụ gbana na-iḅi ḅara sime ị́ ọḅọkụ mẹ pịrịarị tẹ kuno-kuno-a ḅẹlẹma kẹ ị́ ḅẹlẹma tẹ í oloko kokoarị apụ ma ḍiearị.”

Kịẹn-aḅịḅị 13:9

Benijamịnị furo ḅụ, Paliti, Refu owiḅọtụḅọ ḅe

Kịẹn-aḅịḅị 14:14

anịsakị ịn ḍuko mị ama mẹ nyana apụ ma pịrị ḅa. Ịn naa tẹ mịnẹ Yei KỊNỊNYANAḄỌ ị́yẹrị mịna atomi ma ogbo-ḅio emi, kẹ gotẹ ọkọ ḅẹẹarị, Yei KỊNỊNYANAḄỌ, ị́yẹrị tọrụ kẹ ini na dama-dama tẹ ẹrịya tẹ, tẹ í oḅuto ini ọgọnọ-jụ ḅụ sịẹsimem, tẹ eneḅaka ḅụ ị́yẹrị oḅuto kpo ḅio ịn kẹ tọrọkọ-tarịm, anịsakị ḍin ḅụ kọrị-fịnị.

Kịẹn-aḅịḅị 14:42

Ọmịnị iwo mu ma, anieofori ọmịnị na fịya-a apụ tọrọkọ ịn ḅofa ó fomu, fomu gbin fama, gbala KỊNỊNYANAḄỌ ḅe ọmịna ogbo-ḅio ofori ẹrẹsị.

Kịẹn-aḅịḅị 14:9

Ọmịnị rẹ paa sịḅị-kụrọma KỊNỊNYANAḄỌ ḅe pịrị ma, tẹ ama mẹ ḅẹ atomi ma ḍiki-ḅalafa ma, kẹ gotẹ ọkọ ḅẹẹarị, ini anie sime wa pịrị fịye; ịna ḅụụ-ḍikiḍikiye mẹ ịna aḅụụ ḅụ sikima tẹ, anịsakị KỊNỊNYANAḄỌ ḅe wamịnị na emi; ọmịnị ịn ḍiki-ḅalafa ma.”

Kịẹn-aḅịḅị 16:3

tẹ ịna aḅụụ kobiri gboloma tẹ Mozizi da-paka, pịkị Erọnị na tụḅụrụ tẹ ịn ḅẹẹ, “Ó mu anga ala ḅaka tẹ! Kẹ gotẹ ọkọ ḅẹẹarị, tomina-ogbo mẹ ḅio simearị ḅọ goḅọ-goḅọ, inweni-mgba pilema-a ḅara ḅụ fịafịa wararị, anịsakị KỊNỊNYANAḄỌ ḅe pịkị ịna ogbo-ḅio emi, ọ́ nwẹnị anịtẹrẹmẹ tiegotẹ ọmịna aḅụụ saakị-gelema KỊNỊNYANAḄỌ ḅe kobiri-ogbo mẹ nẹngịmarị?”

Kịẹn-aḅịḅị 21:34

Kụma KỊNỊNYANAḄỌ ḅe nwẹnị Mozizi ḅẹẹ, “Ịn ḍiki-ḅalafa ma; kẹ gotẹ ọkọ ḅẹẹarị, àrị ori na ori atomi mamgba na, ori ama na kẹ ị́ ḅara-ḅio ḅụ ị́ pịrị tẹẹ; anịsakị ị́ kẹ Siyọnị Amọrayịtị apụ ma amadaḅọ ḅe tẹ Ẹsịbọnị ḅụ anga ḅọ ḅe mịẹ ḅara kẹ ọ̀ mịẹ ḅa.”

Kịẹn-aḅịḅị 23:21

Jekọbụ ḅụụ amụ ò si-fụḅara ẹrị-a; Izirẹlị ḅụ amụ ọ̀ ḅụụ-fụka ẹrị-a. KỊNỊNYANAḄỌ ịna Tamụnọ ḅe ori ini na emii anịsakị amadaḅọ oloku pọkọ mẹ ịna ogbo-ḅio emii

Kịẹn-aḅịḅị 9:20

Ja sakị boowa ḍin mịẹ oḅuto mẹ kẹ Akpụrụ-warị ọgọnọ-jụ simearị ye, anịsakị KỊNỊNYANAḄỌ ḅe wẹrịtẹ tọn ḅara ḅụ ini in kobiri anga ḅụ kobiri simem, anị tẹrẹmẹ mịẹ KỊNỊNYANAḄỌ ḅe tọn ḅara ḅụ in saakị mẹnjị ye.

1 Kọrịntị 14:25

tẹ ò ḅioḅẹngbọ suku-ḅio ḅọị wararị aị ma paka-ḅo tẹ ọ̀ kparakị tẹ Tamụnọ tẹkẹ, tẹ amịna si go tẹ ḅẹẹ ḅa, “Karakaraye mịanga Tamụnọ ọmịna ogboku emi!”

Ditẹrọnọmị 1:21

Ḍikii, KỊNỊNYANAḄỌ ọmịna Tamụnọ ḅe ama mẹ kẹ ọmịna tọrọkọ koroma tẹẹ; ọmịnị iwo muu, tẹ KỊNỊNYANAḄỌ ọmịna aḍapụ ma Tamụnọ ḅe ḍuko ọ́ pịrị ḅara ḅụ ọkị nyanaa; ọ́ ḅalafa, anịanịa, ḅụụ tukutuku nyana ma.

Ditẹrọnọmị 10:17

Kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe, tẹ tẹmẹ-naịn-naịnma Tamụnọ ḅe aḍụa nyana-a, ọ̀ pịkị ọḅụ-fị nyana-a.

Ditẹrọnọmị 20:1

Ọmịnị ọmịnị na fịya-a apụ na ọmụgbin ḅẹ sakị, tẹ ọ́ tọnwa asụ na, kirimẹnjị-ọmụarụ na, ḍụḅa ọ́ soku-ḅẹ ọmụ-ogbo nẹngị ọmụ-ogbo na ẹrị-ẹrị, ọmịnị in ḍiki ḅalafaa ma; kẹ gotẹ ọkọ ḅẹẹarị, KỊNỊNYANAḄỌ ọmịna Tamụnọ ḅe ọmịnị na emi, oriḅe tẹ Ijiputi ama mẹ ḅụ ó ḍikiḍiki pakama-ḅo ḅọ ḅe.

Ditẹrọnọmị 25:8

Anịtẹso ọkụma ori opu ama ḅẹ omongiapụ ma ọ̀ sịn tẹ ẹkwẹn ọ̀ pịrị ḅa; tẹ ọ̀ paa ḍukoarị, ‘Àrị árị ọkị ḅẹ ḅii-a’ ḅẹḅẹ,

Ditẹrọnọmị 31:17

Anịtẹso ọkụma ị̀ ịganị anị ene mẹ ḅụ kẹngẹma ịn ọgọnọ sara ḅa, tẹ arị ịn sịkị ḅa, tẹ ịna aḅụụ ị̀ tọrụ ḅọị ḅa, tẹ ini ịn ḅaa ḅa, anịsakị tọnwa asi-aị na, ḅụụ-fụka na, ḅo ini ọgọnọ gbana ḅa, anieḅụ anị eneḅaka ḅụ ịn ḅẹẹ ḅa: Wamịna Tamụnọ ḅarị wamịna ogbo-ḅio ofori ẹrẹsị mie mịna asi-aị ma gotẹ ḅo wamịna ọgọnọ gbana tẹ ye ọkọ-a?

Jọsụwa 3:10

Jọsụwa nwẹnị ḅẹẹ, “Mie ḅụ mie ọ́ nimi ḅarịye mịnẹ ḍumo wararị Tamụnọ ḅe ọmịna ogbo-ḅio emi, tẹ gbarị-a ḅara ḅụ ọmịna tọrọkọ Kenanị ḅẹ apụ ma na, Itayịti apụ ma na, Hivayịtị apụ ma na, Pẹrịzayịtị apụ ma na, Gagasayịtị apụ ma na, Amọrayịtị apụ ma na, Jebusayịtị apụ ma na dee pakama ḅa.

Jọsụwa 8:1

KỊNỊNYANAḄỌ ḅe nwẹnị Jọsụwa ḅẹẹ, “Ḅalafa, anịanịa ḅụụ-tukutuku ma; owu mẹ sọarị owiapụ mamgba ọkị ị́ ḅụụ sụa, tẹ saakị tẹ iwo Ayị muu. Ḍikii, à Ayị ḅẹ amadaḅọ ḅe na, ori atomi na, ori opu ama na, ori ama na kẹ ị́ ḅara-ḅio ị́ pịrị tẹ.

1 Samụẹlị 4:8

Ḅụụ-ḅalaḅala Wori-nume sime wa pịrịm! Tụḅọ inetẹ mịna kụrọ-nyanatẹ atamụnọ ma kụrọ ḅụ wa ḍụa-ḅọrọma ḅẹ? Mịna atamụnọ ma mie ịkpa mẹ ḅio kịrị-kịrị obi na, ḅụụ-fụka na kẹ Ijiputi-ḅẹ-apụ ma fomu atamụnọ ma.