Ditẹrọnọmị 7:13 - FỊAFỊA BAỊBỤLỤ

¹³ Ori ọ́ ḅẹlẹma ḅa, ó boma ḅa, tẹ mịẹtẹ ọ́ kama ḅa; tẹ ọ̀ pịkị mịẹtẹ ọmịna oju ḅe mgbọlụ na, ọmịna kiri ḅio ḅẹ mgbọlụ na, ọmịna sịnmgbọlị na, ọmịna iru na, ọmịna pulo na, ọmịna opu anama ma kịẹn-ḅịḅị mịẹ ḍụḅama ḅẹ aị ma na, ọmịna anana na oḅori na ogbo mẹ ḅẹ asambịrịma aị ma na boma ḅa anị ama mẹ tẹ ọ̀ kẹ ọmịna aḍapụ ma pịrị ḅẹ ye karị ḅara kẹ minini wararị ama mẹ ḅio.

Ditẹrọnọmị 7:13 Iomraidhean Croise

Nehimaya 9:32

“Anịẹrẹsị mịọkụ yei wamịna Tamụnọ, gburo-gburotẹ kụrọ-nyanatẹ tẹmẹ-naịn-naịnmarị Tamụnọ! Tẹ ọḅọkụ na jike-a ḅẹlẹma na kokoarị ḅọ, yee Asiriya ḅẹ amadapụ ma sakị kụra-ḅio ḅo mịmgba la ḅụ wamịna amadapụ na, wamịna amadapụ awọmẹ na, wamịna agbamịẹapụ na, wamịna ịkịankoroapụ na, wamịna ḍapụ na, í atomi mamgba na ọgọnọ gbana ḅụụ-fụka mamgba ị́ ḅụụ kalịye sọma.

Jobu 1:10

Amụ ị́ onu kẹ ori na, ọ̀ warị na, anga-anga ḅụ ọ̀ nyana aị mamgba na gbori-ikelema-a? Ị́ ori aḅara ḅẹ kọrịnama mẹ boma tẹẹ, tẹ ọ̀ nyana aị ma ama mẹ ḅio gburo-gburo tẹẹ.

Jobu 42:12

KỊNỊNYANAḄỌ ḅe nwẹnị Jobu kunoma ene ma boma ò suku-saakị ene ma nẹngị; tẹ ọ̀ nwẹnị anana gbọrụ puku, jei ẹndẹ finji (14,000) na, ike-sụa-anama jei ẹndẹ (6,000) na, maaịn maaịn kẹ ịn sịn kẹ kọngọ ḅụ kpọ gboloma anambulo maa ẹndẹ oyia asi finji (1,000) na, ịyọrọ yedogi-anama maa ẹndẹ oyia asi finji (1,000) na nyana.

Devidi-Anume 1:3

Ịn kịkarị ye minji akaka so-pakarị asịn, tẹ karakara sakị ḅụ mgbọlụ sụarị aị, tẹ arịḅẹ ịnyịnya ma pịkị kpatụ-kpatụ-a. Ịn mịẹ ye-mịẹ ye loloarị.

Devidi-Anume 107:38

Ori ori atomi ma bomam, tẹ ịn tọnwa awọ iyim; ọ̀ ḍụkụ tẹ ịna opu anama ogbo-ogbo ma kịẹn-ḅịḅị ideri-a.

Devidi-Anume 11:7

KỊNỊNYANAḄỌ ḅe anie karakara mịẹḅọ, tẹ ori iḅi amịẹaị ḅẹlẹmarị: arị mịẹarị apụ ma ini ọ̀ tọrọkọ anga ḅa.

Devidi-Anume 127:3

Awọmẹ anie KỊNỊNYANAḄỌ ḅe ḅara ḅo ḍiepịrịye; ini ma anie karakara boma.

Devidi-Anume 146:8

tẹ mịẹ tẹ tọrụngbọ-pụụntẹ-apụ ye ẹrịarị. Ọ̀ ḅịkị tẹ apụ nụnụ saakịarị; ori ori atomi tẹ karakaraye-mịẹapụ ma ḅẹlẹmarị.

Paka-so 23:25

KỊNỊNYANAḄỌ ọmịna Tamụnọ ḅe mie ọ́ fịrịmẹnjị pịrị ḅarị ḅọ, anịsakị yẹrị nwẹnị ọmịna fịye na, ọmịna minji na boma ḅa; anịsakị àrị ọmịna ogbo-ḅio ḅụ obi nwẹn-sịn ye saakị-siin ḅa.

Egberima-Ẹkwẹn 10:22

KỊNỊNYANAḄỌ ḅe boma mie mịẹ tẹ í ngọ-kọn-arị. Kụrọ-kụrọ kọrịnama inetẹ mịẹ tẹ ị́ kọn anị ḅara nẹngị ḅịa.

Egberima-Ẹkwẹn 15:9

KỊNỊNYANAḄỌ ḅe si-mịẹapụ mẹnjịarị etela ma ḍiki-ḅioḅuarị, kụma ò kuraye mịẹarị apụ ma ḅẹlẹmarị.

Lẹvitikọsị 26:9

Anịsakị arị ọ́ kẹ ye-sịn, tẹ ọ́ mịẹtẹ ọmịnị awọ iyi sara tẹ mịẹtẹ ọ́ kama ḅa.

Matiyo 6:33

Anie nakara, ọ́ mịẹ ḅẹẹye-ḅẹẹye nẹngị na-iḅi ye anie, Tamụnọ Ama-da mẹ na ò ḅiiarị ọ́ mịẹ ḅẹ kura-aị ma na ḍọkịị, tẹ ori nwẹnị ḅarana osi-aị mamgba mịẹ tẹ arị ḅo ọmịna ḅara la.

Jọnị 14:21

“Ì oloko ma ọkị tẹ arị ḅẹẹ ḅara mịẹarị ḅọ, mịẹarị ḅọ anie ị̀ ḅẹlẹmarịḅọ, ị̀ Ḍa ḅe ị̀ ḅẹlẹmaḅọ, ḅẹlẹmaḅọ ḅẹlẹma ḅa, yẹrị sọ mḅọ ḅẹlẹma tẹ ị̀ ḅụụ mịẹfinji mḅọ pịrị ḅa.”

Jọnị 15:10

Ọ́ kẹ ị̀ ḅẹlẹma mẹ ḅụ so ḅịa ye anie ọmịnị à tọn ọ́ pịrị aị ma mịẹ, ḅara anie yẹrị sọ kẹ ị̀ Ḍa ḅe tọn ye mịẹ tẹ ọ̀ ḅẹlẹma mẹ ḅụ simearị ḅara.

Jọnị 16:27

Ḍaḅọ ḅe ḅioju ọ́ ḅẹlẹmarị. Ò gotẹ ọ́ ḅẹlẹmarị ye anie ọmịnị ị̀ ḅẹlẹmarị tẹ minini tẹ mịnẹ Tamụnọ ḅụ à sime tẹ ḅom.

Ditẹrọnọmị 1:8

Ḍikii àrị ama mẹ kẹ ọ́ pịrị tẹẹ; ọ́ sọ-muu, tẹ ama mẹ tẹ KỊNỊNYANAḄỌ ḅe ye karị ḅara ḅụ kẹ ọmịna aḍapụ Ebira-amụ na, Ayịzịkị na, Jekọbụ na, ịn ḅọrọtẹ so ọkụma, kẹ ịna aḅụụ ḅụ paka-ḅo apụ ma pịrị nyana ḅẹ ama mẹ ọkị nyanaa.’ ”

Ditẹrọnọmị 13:17

Sime sima pịrị aị ma ḅẹ gberie-sọ ọmịna ḅara sọ ma; mịẹtẹ KỊNỊNYANAḄỌ ḅe ọ̀ ḅalafama ịganị ḅụ pịkị tẹ ọkụrụkụrụ na, ḍiki-ḅụụjịrị na nyana ọ́ pịrị, tẹ ọ̀ wẹrịtẹ ye karị ḅara kẹ minini ọmịna aḍapụ ma pịrị ḅara ori ọ́ mịẹtẹ ọ́ kama ḅẹ ḅara,

Ditẹrọnọmị 28:1

Ọ́ KỊNỊNYANAḄỌ ọmịna Tamụnọ ḅe ḅịḅị poki ḅụ, ḅụụ ẹbị-ẹbị ori oloko mamgba tẹ mịmgba à tọn ọ́ pịrị aị ma mịẹ-mịẹ, KỊNỊNYANAḄỌ ọmịna Tamụnọ ḅe ọ́ saakị-gelema tomikiri mẹ ḅẹ opu asịẹ mamgba nẹngị ḅa.

Ditẹrọnọmị 28:11

KỊNỊNYANAḄỌ ḅe nwẹnị ọ́ mịẹtẹ ọ́ lọkọlọkọ tẹ lolo ḅụ sime ḅa, ọmịna oju ḅẹ mgbọlụ ḅụ na, ọmịna opu anama ma ḅẹ mgbọlụ ḅụ na, ọmịna kịrị mẹ ḅẹ sịnmgbọlụ na ḅụ ama mẹ tẹ KỊNỊNYANAḄỌ ḅe kẹ ọ́ pịrị ḅẹ tẹ ye karị ḅara kẹ minini ọmịna aḍapụ ma pịrị ama mẹ ḅio.

Ditẹrọnọmị 30:5

tẹ KỊNỊNYANAḄỌ ọmịna Tamụnọ ḅe ọmịnị ọkị-ḅo ama mẹ tẹ ọmịna aḍapụ ma nyana ama mẹ ḅio koroma ḅa, mịẹtẹ ọmịnị anị nyana ḅẹ ḅara; anịsakị ọ̀ mịẹtẹ ó lolo ḅa, tẹ kịẹn-ḅịḅị ḅụ ḍụḅa ọmịna aḍapụ ma nẹngị ḅa.

Ditẹrọnọmị 7:7

Kịẹn-ḅịḅị ḅụ ọ́ ja atomi nẹngịm ẹrẹsị KỊNỊNYANAḄỌ ḅe ọ̀ ḅẹlẹma kẹ ọmịnị ọgọnọ gbana tẹ ọ́ sẹlẹ-ọkịm ọkọ-a, kẹ gotẹ ọkọ ḅẹẹarị, tomi mamgba ḅụ ọmịnị boowa tẹịnm.