Ditẹrọnọmị 4:25 - FỊAFỊA BAỊBỤLỤ

²⁵ Ọmịnị ama mẹ ḅio simetẹ omongi, tẹ awọmẹ na taa-awọmẹ na ile-awọmẹ na iyi sakị, ọ́ ḅẹẹye-ḅẹẹye kịkama tẹmẹ ḅụ si mịẹ ḅara kẹ ye mịẹ tẹ KỊNỊNYANAḄỌ ọmịna Tamụnọ ḅe ḍiki-tọrụ ḅụ siye mịẹ ma. Miemẹ anie siye tẹ ori ịganịma ḅa.

Ditẹrọnọmị 4:25 Iomraidhean Croise

2 Amadapụ 21:2

Ọ̀ KỊNỊNYANAḄỌ ḅe ḍiki-tọrụ ḅụ siye mịẹm, opu asịẹ ma tẹ KỊNỊNYANAḄỌ ḅe Izirẹlịapụ ma tọrọkọ dee pakama apụ ma wẹrịtẹ mịẹ-mịẹ tọn-tọn-aị ma.

Devidi-Anume 78:58

Oru tẹkẹ-ayọ tẹ ịn nama ḅụụ pịrị-aị ma ori ịganịmam, ini oru-afụḅara tẹmẹ ye mẹ pịkị kpọma ori ịganị owimam.

Paka-so 20:4

Ḅara kẹ tẹmẹ gbọrụ oru-fụḅara sọ ọ́ tẹmẹ ọmịna aḅụụ pịrị ma, ḅẹẹye-ḅẹẹye tẹ ọgọnọ-jụ simearị So mẹ ḅio sime ye na kịkaye-o, aniemẹ tẹ suku-ḅio simearị Kiri mẹ ḅio sime ye na kịkaye-o, anịanịa aniemẹ tẹ kiri mẹ suku-ḅio simearị minji mẹ ḅio simearị ye na kịkaye sọ.

Paka-so 32:7

KỊNỊNYANAḄỌ ḅe nwẹnị Mozizi ḅẹẹ, “Ideri-muu, kẹ gotẹ ọkọ ḅẹẹarị, ị́ atomi inima tẹ ị́ Ijiputi ama ḅụ pakama-ḅo apụ ma ịna aḅụụ sima tẹ.

Izikẹlị 8:10

Mie ḅụ à mẹnjị sọ-mu tẹ ḍikim. Bebe onu ma akaka ma ḅụ ini ododo amẹẹ na, ja fịafịa-a anama na, jaị na tẹ Izirẹlịapụ ma sunsin pịrịarị aị na kẹ kẹẹ-kẹẹ sara wararị.

Hosiya 9:17

À fịrịmẹnjị pịrịarị Tamụnọ ḅe ori atomi sịkị ḅa, amụ ini ò poki-a ẹrẹsị. Ịn sịẹ-sịẹ ma ogboku ikelekelearị apụ sọ ḅa.

Hosiya 9:9

Ịn mịẹarị siye ḅụ ịn kẹ mịẹ-mịẹ ye ḅarị ofori, anie Gibiya ḅụ in sime sakị ịn mịẹ-mịẹ gbọrụ ḅara mẹ. Tamụnọ ịna si kẹ ḅiokoroma tẹ anị gotẹ in fomu ḅa.

1 Kọrịntị 10:22

Anịanịa, wa ḅọrọ KỊNỊNYANAḄỌ ḅe ịganịma ḅẹ ḍọkịarị ḅoto? Wa ọkịarị wa kụrọ ọ̀ nẹngị wararị ḅoto?

Ditẹrọnọmị 16:22

Anịsakị ọmịnị ịḅalị tẹ KỊNỊNYANAḄỌ ọmịna Tamụnọ ḅe ḍiki-ḅioḅuarị gbọrụ ịḅalị sọ pike ma.

Ditẹrọnọmị 27:15

Wori-nume sime oriḅe tẹ ḅara kẹ ye kịkama kara, anịanịa tẹmẹ amịna ḅụụ pịrị ḅọ ḅe pịrị, KỊNỊNYANAḄỌ ḅe ḅụụ tọn-tọn-pịrịye, ḅara akanịḅọ aḅara mịẹ gberie, tẹ ḅọị ḅara kẹ saakị sịẹma ye. Anịsakị tomi mamgba pakịrị tẹ ḅẹẹ ḅa, “Amẹnị.”

Ditẹrọnọmị 28:45

“Mịna wori-anume mamgba ḅo ọmịnị ọgọnọ gbana ḅa, tẹ ó ḍuka tẹ ọ́ gbaịn nwenii ọ́ fịị fama ḅa, gbala ọ́ KỊNỊNYANAḄỌ ọmịna Tamụnọ ḅe pọkọ poki ḅụ ori oloko ma na, kẹẹ wararị oloko ma tẹ ọ̀ tọn ọ́ pịrị aị ma koko-a ẹrẹsị.

Ditẹrọnọmị 28:61

Obi goyegoye sọ, na ḅụụ-fụka goyegoye tẹ mị oloko mẹ ḅẹ ḍiri mẹ ḅio kẹẹ wararị aị ma na, KỊNỊNYANAḄỌ ḅe ọkị-ḅo ọmịnị ọgọnọ gbana ḅa, nwenii ọ́ fịị fama ḅa.

Ditẹrọnọmị 30:18

à mịmgba ḅụ mịẹfinji ọ́ pịrịarị mịnẹ ọ́ fịị fa ḅa ama mẹ tẹ ọ́ Jodanị mẹ saḅa-ḅọrọ tẹ nyana ḅẹ sọ-muarị ama mẹ ḅio ó ḍumo alama ḅịa.

Ditẹrọnọmị 30:19

À mịmgba So na Kiri na sịn ḅẹrẹ-kiri sime aị mịẹ ọ́ pịrịarị, mịnẹ à ḍumo na fị na, Tamụnọ boma na Tamụnọ wori-nume na kẹ ọmịna tọrọkọ koroma tẹẹ; anịẹrẹsị ó ḍumo sẹlẹ-ọkị, mịẹtẹ ọmịnị na, ọmịna aḅụụ paka-ḅo apụ na ḍumo ḅẹ ḅara.

Ditẹrọnọmị 31:29

Kẹ gotẹ ọkọ ḅẹẹarị, à nimi wararị mịnẹ, à fịtẹ so sakị ọ́ tụkụma ḅara ḅụ ó sime iḅi ḅara mẹ sima ḅara kẹ ye mịẹ ḅa; tẹ etela mẹ tẹ à tọn ọ́ pịrị ye mẹ ḅụ vuunma tọrụ pịkị akaka da ḅa; anịsakị ḅo ḅarị ene ma ḅụ siye ḅo ọmịna ọgọnọ gbana ḅa, gbala ọ́ KỊNỊNYANAḄỌ ḅe ḍiki-tọrụ ḅụ aniemẹ tẹ siye mịẹ ḅa ẹrẹsị, tẹ ọmịna aḅara ḅẹ kọrịnama ḅụ ori ịganị sịn saakị ḅa.

Ditẹrọnọmị 32:5

Ini ịn sime iḅi ḅara mẹ sima ḅara kẹ ori na mịẹ tẹ, ịna aḅụụ simearị ḅẹkụ gotẹ, ini ḅarị ori awọmẹ-a; ini anie karakaraye mịẹ-a, pịkị gbọrụ ḅụụ mu-a ḅụọ ḅẹ apụ.

Ditẹrọnọmị 4:16

ọmịnị ọmịna aḅụụ ẹbị anieofori ó ḅofa owiḅọ, anịanịa ẹrẹḅọ ḅẹẹye-ḅẹẹye kịkama ye tẹmẹ ọmịna aḅụụ pịrị ḅụ si mịẹ ḅara kẹ ye mịẹ,

Ditẹrọnọmị 4:23

Ọmịnị ọmịna aḅụụ ẹbị, anieofori ó ḅofa KỊNỊNYANAḄỌ ọmịna Tamụnọ ḅe ọḅọkụ mẹ tẹ ori ọmịnị na fị ye mẹ kẹ ḅioḅọrọma, tẹ ḅẹẹye-ḅẹẹye kịkama tẹmẹ ọmịna aḅụụ pịrị, aniemẹ tẹ KỊNỊNYANAḄỌ ọmịna Tamụnọ ḅe kẹ tọn-tọnye sọma ọ́ pịrị tẹ ye mẹ.

Jọsụwa 23:16

Ọ́ KỊNỊNYANAḄỌ ọmịna Tamụnọ ḅe ọḅọkụ mẹ tẹ ọ̀ tọn ọ́ pịrị ye mẹ ḅụ mịẹ-irima tẹ mu fịrịmẹnjị oru-atamụnọ pịrị tẹ sịḅị-tuu ịn pịrị-pịrị, anịrẹ mie KỊNỊNYANAḄỌ ḅe ịganị kẹngẹma ọmịna ọgọnọ sara tẹ ọ́ fọnya ḅara ḅụ iḅi ama mẹ tẹ ọ̀ kẹ ọ́ pịrị tẹ ama mẹ ḅụ fịị fa ḅarịye.”

Jọsụwa 24:20

Ori iḅi kẹ ọ́ mịẹ tẹ so tẹ ọ́ KỊNỊNYANAḄỌ ḅe sịkị, tẹ fịrịmẹnjị igoni oru-atamụnọ pịrị-pịrị, anịtẹrẹmẹ ọ̀ pịkị tẹ ye kẹ ọ́ lama tẹ ọ́ fama ḅarịye.”