Ditẹrọnọmị 32:4 - FỊAFỊA BAỊBỤLỤ

⁴ Ịkụ Ḅe, ọ̀ kọrịnama kara gbasịm; kẹ gotẹ ọkọ ḅẹẹarị, ori etela mamgba ḅụ, karakara ḅẹrẹkọn emii. Iri mịẹye-ofori, tẹ minini ḅụụ ḅụ ḅin wararị gbọrụ Tamụnọ; karakara na kuraye na anie orii.

Ditẹrọnọmị 32:4 Iomraidhean Croise

Suku-saakị 1:31

Tamụnọ nwẹnị ye goyegoye tẹ ọ̀ mịẹ tẹ ye mẹ ẹrị, tẹ arị kpọma iḅi lamam. Ḅoḅiri ḅọrọm tẹ dede ḅom, anie sonio aḍin karama ene mẹ.

Suku-saakị 18:25

Iḅieri, kuraye-mịẹapụ kẹ si-sịḅịḅio-sụapụ ḅụụ sụa ḅa guluguluma ḅụ ị́ ḅụụ wẹrị ḅelemaa, anie kuraye-mịẹapụ ma mịẹtẹ ịn si-sịḅịḅio-sụapụ ma mẹnjị ḅara mẹnjị! Iḅieri, anie ḅụ ị́ ḅụụ ḅelemaa! Tomi-juḅẹye, ị́yẹrị tomikiri mẹmgba kọn ḅarị ḅẹrẹkọnḅọ ḅe í kuraye mịẹ ḅa.”

2 Samụẹlị 22:47

KỊNỊNYANAḄỌ ḅe ḍumo-sime wararị, anịsakị boma sime ị̀ ịkụ ḅe pịrị, gele sime ị̀ Tamụnọ ḅe pịrị, ị̀ ḅọrọma ịkụ ḅe,

2 Samụẹlị 23:3

Izirẹlị ḅẹ Tamụnọ ḅe ẹkwẹn tẹ, Izirẹlị Ịkụ ḅe ị̀ ḅẹẹ tẹ: gbọrụḅọ karakara ḅara kẹ ḅẹrẹtọn tomi pịrị sakị goyegoye, tẹ Tamụnọ mangịma ḅụ ḅẹrẹtọn-arị ḅẹḅẹ,

2 Paka-aị 19:7

Anịsakị, yee KỊNỊNYANAḄỌ ḅe mangịma mẹ ọmịna ọgọnọ gbana; ọ́ ḅụụ ẹbị nyana-a, ọmịna amịẹaị goyegoye ḅụ, kẹ gotẹ ọkọ ḅẹẹarị, KỊNỊNYANAḄỌ wamịna Tamụnọ ḅe ḅụụ karakara pịkị-iḅo, anịanịa kịnị-inoma, anịanịa ọḅụ-fị ofori.”

Nehimaya 9:8

Ị́ tọrọkọ ị́ ò ḅioḅẹngbọ mẹ minini ḍọkị ẹrịm, tẹ ori na ọḅọkụ fịm ị́ Kenanị na Itayịti na Amọrayịtị na, Pẹrịzayịtị na Jebusayịtị na, Gagasayịtị na ama ma kẹ ori na ọ̀ ḅụụ paka-ḅo apụ na pịrị ḅa; ị́ ị́ karịma ḅara mịẹ tẹ, ị́ karakaram ẹrẹsị.

Jobu 34:10

“Ọkọẹrẹsị ọmịnị yefieye naarị atomi, ọ́ naa, mịnẹ Tamụnọ si-sịḅịḅio-sụarị ḅẹẹ ye mẹ, gbala-gbala paka ma; mịnẹ Kụrọmamgba Nyanaḅọ ḅe mịẹ-irimarị ḅẹẹ ye mẹ, paka ma.

Jobu 35:14

Matrụma, ị́ ḅẹẹm mịnẹ í ori ẹrị-a ḅẹẹ sakị, mịnẹ ḅẹrẹ mẹ ọ̀ tọrọkọ emii, tẹ í ò koruarị!

Jobu 36:23

Tụḅọ ori etela tọnma ọ̀ pịrị, anịanịa tụḅọ inetẹ ḅẹẹ ḅa: Ị́ mịẹ-irima tẹ?

Jobu 8:3

Tamụnọ, ọ̀ karakara ḅẹrẹkọn pịkị-iḅo-ḅo? Anịanịa Kụrọmamgba Nyanaḅọ ḅe karakaraye mẹ pịkị-iḅo-ḅo?

Devidi-Anume 100:5

KỊNỊNYANAḄỌ ḅe ori iḅim; ọ̀ ḅẹlẹma sime gbamasom tẹ ḅioḅẹngbọ kẹ ọ̀ ḅụụ ḅụ gbana na-iḅi mẹ sime mu ḅẹẹ-sakị ḅẹẹ-sakị laarị.

Devidi-Anume 138:8

Í minini tẹ ye goyegoye ị́ mịẹ ḅẹ; KỊNỊNYANAḄỌ, ị́ ḅẹlẹma sime gbamasom. Ị́ saakị tẹ kọrịnama mẹ kọrị busunumaa.

Devidi-Anume 145:17

KỊNỊNYANAḄỌ ḅe mịẹarị aị mamgba ḅụ ọ̀ karakaram, ọkụrụkụrụ ḅụ ori arịmgba mịẹarị.

Devidi-Anume 146:6

so na kiri na, tọrụ na arị aḅio simearị aị mamgba Tẹmẹḅọ ḅe. Sakị mamgba ori ò minini aị mịẹarị;

Devidi-Anume 18:2

KỊNỊNYANAḄỌ ḅe anie ì kikimarị ḅọ; ori owu inetẹ ḅo ị̀ la ḅịa anga sọ ị̀ pịrị tẹ. Ị̀ Tamụnọ anie ị̀ gbaịn-arị ḅọ, ọ̀ ḅara-ḅio ị̀ la-la ye ofori. Ori ekpeke sọ ị̀ pịrị wararị; ori ị̀ ḍụa tẹ ì koko kpaịnmarị.

Devidi-Anume 18:46

KỊNỊNYANAḄỌ ḅe ḍumo wararị! Ị̀ ḍụarịḅọ ḅe tokinii! Ị̀ ḅọrọmarị Tamụnọ ḅe opu mẹ ḍuko wasamaa.

Devidi-Anume 19:7

KỊNỊNYANAḄỌ ḅe oloko mẹ karakara famam, anị ịwọ ịnyọ pịrịarị. KỊNỊNYANAḄỌ ḅe tọn kuroma aị ma ḅioḅẹngbọ kẹ arị ḅụụ gbana na-iḅim, nimi kẹ ye-nimia-apụ pịrịarị.

Devidi-Anume 31:5

Àrị ị̀ ḅụụ kẹ ị́ ḅara-ḅio sụarị; KỊNỊNYANAḄỌ, ị́ ị̀ ḅọrọma ḅa, anie ḅioḅẹngbọ-kẹ-sịrẹrẹ-niḅi Tamụnọ.

Devidi-Anume 33:4

KỊNỊNYANAḄỌ ḅe ẹkwẹn ma karakaram: anịsakị ori akọrịnama mamgba ḅụụ ḅụ sịrẹrẹ na-iḅi aị famam.

Devidi-Anume 78:35

In nwẹnị kẹ ḅiokoroma mịnẹ Tamụnọ mie in gbaịn, gbaịn ḅọ; mịnẹ Kụrọ mamgba Nyanaḅọ ḅo ḅe ḅarasụa ịn pịrị, pịrịm.

Devidi-Anume 9:16

KỊNỊNYANAḄỌ ḅe amịna karakara aḅẹrẹkọn ma ḅụ ọ̀ ḅụụ ḍie-pakama tẹ, tẹ si-sịḅịḅio-sụapụ ma amịẹaị ma ọnya sọ tẹ in kun sịẹma tẹ.

Devidi-Anume 90:16

Yee wamịnị ị́ afịrịmẹnjịapụ ma í opu kụrọtẹ amịẹaị ma ẹrị, yee wamịna awọmẹ í ebube opu kụrọ mẹ ẹrị.

Devidi-Anume 92:15

Miemẹ ḍiearị mịnẹ KỊNỊNYANAḄỌ ḅe ḅụ inoma ofori, mịnẹ ị̀ gbaịn-arị ḅọ ḅe ḅụ iri ye ofori.

Devidi-Anume 97:2

Oḅuto na kanakana na ori ikelema-koro wararị; ọ̀ karakara mịẹ na aḍụa ofori ḅara na kẹ ḅẹrẹtọn-arị.

Devidi-Anume 98:3

Ò minini Izirẹlịapụ ma pịrịye mẹ ọ̀ mịẹm amịna ḅịḅị ḍima-a na kuno-a ḅẹlẹma nyana ịn pịrị na ḅụ. Anga, anga ḅụ simearị apụ mamgba owu wamịna Tamụnọ ḅe ḅara iḅi ye mẹ ẹrị tẹ.

Devidi-Anume 99:4

Opu kụrọ nyana Amadaḅọ, í kuraye ḅẹlẹmarị; ị́ tọn kuroma tẹ Izirẹlị ḅụ jụmọ-jụmọ inoma paka ma; ị́ karakara mịẹ na kuraye mịẹ na oloko tọn wa pịrị tẹẹ.

Paka-so 34:6

KỊNỊNYANAḄỌ ḅe ọ̀ tọrọkọ ḅụ mẹnjị-ḅọrọm, tẹ ḍuko pakamam, “KỊNỊNYANAḄỌ ḅe, Yẹrị anie KỊNỊNYANAḄỌ ḅee, sịḅị-kụrụkụrụ na ḍiki-ḅụụjịrị na nyana Tamụnọ, kpekele ịganị ịganị-a tẹ jike jike-a ḅẹlẹma nyana ḅọ, pịkị ḅioḅẹngbọ-kẹ-sịrẹrẹ-niḅi ḅọ.

Nimi Tolumaḅọ 3:14

À nimi wararị mịnẹ Tamụnọ mịẹ ye, mịẹ ye sime gbamasom; kẹ anị ḅụ sụa-sụa ye, anịanịa sin-sin ye ofori; Tamụnọ ọkọ kẹ anị mịẹm, mịẹ tẹ tomi ò ḍiki-ḅalafa na-iḅi ḅara kẹ ọ̀ tọrọkọ ḅalafa ḅẹ ḅara.

Ayịzaya 17:10

Izirẹlị, ị́ ị́ pụkọ-pakamaḅo tẹ opu ḍụḅarị kịka tẹ ị́ gbaịn-arị Tamụnọ ḅe kẹ ḅioḅọrọma tẹ. Anie nakara í oru aḍụọ ḍiḅiarị, ị́ ja asịẹ ḅẹ tamụnọ tẹkẹ ḅẹ ḅara.

Ayịzaya 25:1

KỊNỊNYANAḄỌ, ị́yẹrị anie ị̀ Tamụnọọ; Arị ị́ kụn tẹ ị́ ẹrẹ tokini ḅa. Ị́ ḅụụ-buama-aị mịẹ tẹ; ala lamatẹ sakị ị́ tọn aị ma ị́ mịẹ tẹ, ḅioḅẹngbọ-kẹ-sịrẹrẹ-niḅi ḅara ḅụ.

Ayịzaya 26:4

KỊNỊNYANAḄỌ ḅe kẹ ḅiokpọma gbamasoo; sakị mamgba ori ị́ gbaịn ḅọrọma ḅa.

Ayịzaya 28:16

Mie mịọkụ Tẹịn ḅẹrẹtọn KỊNỊNYANAḄỌ ḅe ḍukoarị ye, “À Zayọnị ḅụ jike ḅịa kụrọtẹ suku-saakịarị. Anị ḅụ arị anyị-anyị-a ḍụḅarị kẹ ịkọlị mẹ ḅụ sụarị, anie ma ẹkwẹn-aḅịḅị ma tẹ kẹ wararị aị ma, jike-jike-a minini mẹ pịkị ye-inemarị!

Ayịzaya 30:18

Anịsọ KỊNỊNYANAḄỌ ḅe paa koruarị ori ọkụrụkụrụ nyana ọ́ pịrị. Ọ̀ tẹlẹma wararị ò ḍiki sịḅị-jịrị, sakị mamgba ò kuraye mịẹarị ẹrẹsị. Ḅioḅẹlẹ sime KỊNỊNYANAḄỌ ḅe kẹ ḅiokpọmarị apụ ma pịrịm.

Ayịzaya 32:2

Ịna ḅụ ọrụḅọ-ọrụḅọ fẹrụ ḅụ ḅụụ kikima yọ sọ ḅa, pịkị erise fie sakị, fie sakị ḅụ ḅọị ḅẹ anga na. Ịkpa ḅio puu puu ḅọrọarị kuroro mie ịn kịka ḅarị ye, gbala gele lamatẹ ịkụ tẹ ịrụa kikima kịnị pịrịarị ye, piri ofori kiri ḅụ.

Jerimaya 10:10

Kụma ị́yẹrị KỊNỊNYANAḄỌ, anie karakara Tamụnọ ḅee, anie ḍumo wararị Tamụnọ ḅee pịkị sime gbamaso amadaḅọ ḅee. Ị́ ịganịarị sakị tomikiri mẹ jikearị; tomikiri ḅẹ asịẹ ma inetẹ ị́ ịganị mẹ da alama ḅịa.

Jerimaya 9:24

Gbọrụḅọ nwẹnị ḅụụ-boma ḅarị ḅẹḅẹ, yee mḅọ ḅụụ-boma mịnẹ mḅọ ì nimi tẹ à fie ye naarị, gbala ị̀ ḅẹlẹma kuno-kuno-a ẹrẹsị, tẹ à pịkị inoma ofori ye na kuraye na mịẹarị. Mịna aị ma mie ì ḅio ḅẹlẹmarị. Yẹrị, KỊNỊNYANAḄỌ ḅe ọkọ ḅẹẹm.”

Danẹlị 4:34

Amadaḅọ ḅe nwẹnị ḅẹẹ, “Sọnọma akụra ma ḅo ḅọrọ tẹso, à tọrụ sakị so dam, tẹ tomina ye-nimi nwẹnị ị̀ sịḅị ḅio sọ. À Kụrọmamgba-Nyana Tamụnọ ḅe tokinim, tẹ kụn na ebube na kẹ ḍumo gbamaso wararị ḅọ ḅe pịrịm. Ọ̀ ḅẹrẹtọn ma mu ḅẹẹ-sakị ḅẹẹ-sakị la ḅa, ori ama-daa sime gbamaso ḅa.”

Danẹlị 4:37

“Mịọkụ, yẹrị, Nebukadineza, tokini na, kụn na pịkị ebube na kẹ Tamụnọ pịrịm, ori So-ḅio ama-daarị ḅọ ḅe. Ọ̀ mịẹ ye goyegoye karakaram pịkị kuram, anị kụma ọ̀ pịkị inetẹ ḅaịn ḅara kẹ ye mịẹarị ḅọ iderima ḅa.”

Habakọkụ 1:12

“KỊNỊNYANAḄỌ, sukuyọ-saakị kụra-ḅio ị́yẹrị Tamụnọọ. Ị́yẹrị ị̀ Tamụnọ, fịafịa pịkị sime gbamaso ḅọ. KỊNỊNYANAḄỌ ị̀ Tamụnọ pịkị ị̀ gbaịn ḅọrọmarị ḅọ, Babịlonịya ḅẹ apụ ma sẹlẹ ọkị tẹ ịn mịẹ kụrọmam mịẹtẹ ini inetẹ wa fomu ḅẹ ḅara.

Habakọkụ 1:13

Kụma mịọkụ ndẹẹ í inetẹ mịna mbasịarị si-mịẹapụ na inema ḅẹ ḅara? Ị́ atọrụngbọ ma fịafịa ḅaka wararị ya, kẹ siye ḍiki ḅụ, tẹ ị́ inetẹ tọrụ-tọrụ kẹ kura-aye mịẹ ḍiki ḅịa sakị. Mie ḅụ tiye ẹrẹsị í ḅịḅị-fie-a tẹ ịn karakara mịẹ ịn nẹngị atomi ma ḅaa gulugulumarị ḅara?”

Zẹfanaya 3:5

Kụma KỊNỊNYANAḄỌ ḅe paa opu ama mẹ ḅio emi; kuraye, anie ọ̀ mịẹarị tẹ gbala-gbala iri-ye mịẹ-mịẹ-a. Dede goyegoye gbarị-a ḅara ḅụ, ori inoma ofori ye ọkị-ḅo ori atomi pịrịarị. Tẹ anịsọ anịanga ḅụ karakara mịẹ-a apụ ma paa iri-ye mịẹ tọrọkọ-tọrọkọ muarị tẹ ḅụụ-jịrị-a.

Matiyo 5:48

Iḅiye mịẹ ḅụ ọ́ kara-gbasị tẹ ḅara simee, anie ọmịna Ḍaḅọ So-ḅio simearị ḅọ ḅe sọ simearị ḅara mẹ!

Jọnị 1:14

Ẹkwẹn ḅe ḅo tomḅọ sọm, tẹ wamịnị na angam, tẹ ḍiki-ḅụụjịrị na karakara na ọ̀ ḅụụ ḅio ḅinm. Wa ori ebube mẹ ẹrịm, anie Ḍaḅọ ḅe kpọkpọ gbọrụ Tụḅọ ḅara ḅụ ọ̀ nyana ebube mẹ.

Jọnị 1:17

Mozizi ḅụ mie Tamụnọ ḅọrọ tẹ Oloko mẹ kẹ wa pịrị ye, kụma Jizọsị Kịrayịsị ḅụ mie ḍiki-ḅụụjịrị na karakara na ḅo wa la ye.

Jọnị 14:6

Jizọsị nwẹnị ọ̀ pakịrị, “Yẹrị anie etela mẹ, karakara mẹ, pịkị ḍumo mẹ; gbọrụḅọ-sọ mu Ḍaḅọ ḅe la la-a, mḅọ ị̀ ḅụụ ḅọrọ sikima.”

Jọnị 5:22

Anịsakị Ḍaḅọ ḅe pịkị gbọrụḅọ-sọ kọn kọn-a. Ọ̀ ḅẹrẹkọn kụrọ mamgba saakị ọ̀ Tụḅọ ḅe pịrị tẹ,

Romu 1:32

In nimi wararị mịnẹ Tamụnọ Oloko mẹ ḅẹẹm mị ḍumo ḅara mẹ kọn apụ, kọn apụ fịị na-iḅim. Anịsọ ịn paa ma amịẹaị ma mịẹ ma-muarị, tẹ pịkị ọkọ mịẹarị jen-apụ mịẹ kụrọmarị.

Romu 2:2

Tamụnọ ḅẹrẹ-ḅarasii pẹlẹ ọkọ sime apụ pịrịarị sakị, wa ẹrịm ọ̀ karakara ḅụ emi.

Romu 2:5

Kụma ị́ kọngọ kụrọ na kụrọ ḅioḅẹngbọ na nyana wararị, miemẹ mịẹtẹ Tamụnọ ịganị na ọ̀ karakara ḅẹrẹkọn mẹ na ḅo ḅẹ Ene mẹ ḅụ anị si ị́ pịrị tẹịn ḅa.

Romu 3:5

Mịọkụ wamịna amịẹ-irima nwẹnị iḅiọkụ Tamụnọ karakara mẹ pakama-ḅo ḅelema kụma, wa tiye ḍuko ḅẹ? Wa inetẹ ḅẹẹ ḅa Tamụnọ kẹ wa pịrịarị fomu-ḅara mẹ kura-a? (À nwẹn gbelarị ye mẹ, tomi kẹ ye gbela, gbela ḅara mie à gbelarị.)

1 Kọrịntị 10:4

tẹ pịkị gbọrụ tẹmẹ minji mẹ ḅuum. Ini na mẹnjị sime tẹmẹ ḅụ ḅẹ ịkụ ḅe ḅẹ minji mie in ḅuu ye, tẹ anị ịkụ ḅe anie Kịrayịsị ḅioju.

Ditẹrọnọmị 10:18

Ọ̀ karakara ḅẹrẹ kọn ḍaḅọ ofori tụḅọ ḅe na, diḅọ-fịtẹ-ẹrẹḅọ ma na pịrịarị, tẹ jen sịẹ ḅụ ḅo igoniḅọ ḅe ḅẹlẹmam, fịye na, kapa na kẹ ọ̀ pịrị ḅụ.

Ditẹrọnọmị 32:15

Kụma Jẹsurun ḅẹlẹkị sụam, tẹ ḅụọ tẹịnm; ị́yẹrị ḅẹlẹkị sụam, ị́ kpokorom, í ḅo welewelem; anịtẹso ori ọ̀ Tamụnọ ḅe tẹ ọ̀ tẹmẹḅọ ḅe sịkịm, tẹ ọ̀ ḅọrọma mẹ ḅẹ Ịkụ ḅe kombom.

Ditẹrọnọmị 32:18

Ịkụ Ḅe tẹ ọmịnị iyi Ịkụ Ḅe ọmịnị ọ̀ bala-a, tẹ ḍumo kẹ ọ́ pịrị Tamụnọ ḅe kẹ ḅioḅọrọmam.

Ditẹrọnọmị 7:9

Ọkọẹrẹsị ó nimi mịnẹ KỊNỊNYANAḄỌ ọmịna Tamụnọ ḅe anie Tamụnọ, minini nyana Tamụnọ, tẹ ọḅọkụ koko tẹ jike-a ḅẹlẹma nyana kẹ inima tẹ ọ̀ ḅẹlẹma tẹ ori oloko koko apụ ma pịrịarị mu ḅụọ maa ẹndẹ oyia asi finji finji laarị,

Jemụsị 1:17

Iḅi ye pịrị ḅara goyegoye na, iḅi ḍiepịrịye goyegoye na So-ḅio ḅoarị; Tamụnọ, So-ḅio ḅẹ abele ma Tẹmẹḅọ, tẹ ḍima ḍima-a ḅọ ḅe, anịanịa vuunma pịkị tẹ kanakana pakama-a ḅọ ḅe, ḅara ḅụ mie anị sime tẹ koro-ḅoarị.

Jemụsị 4:12

Tamụnọ ngẹrị anie Oloko-sụaḅọ, pịkị Ḅẹrẹkọnḅọ. Ori ngẹrị mie inetẹ ḅọrọma ḅarịye, pịkị guluguluma ḅarị ye. Ị́yẹrị tụḅọ tẹ ị́ ị́ pembe tomḅọ kọn ḅẹ?

1 Pita 2:6

Kẹ gotẹ ọkọ ḍukoarị, Fịafịa Ḍiri mẹ ḅẹẹarị, “À gbọrụ yelatẹ ḍụḅarị sẹlẹ-ọkịm, àrị anị kẹ Zayọnị ḅụ ịkọlị palị ḍụḅarị ḅara koromarị, tẹ ọ̀ ḅụụ minini ḅọ, minini ḅọ papaa ḅara ọlọ ḅịa.”

1 Samụẹlị 2:2

KỊNỊNYANAḄỌ ḅe fịafịa ḅara fịafịa gbọrụḅọ-sọ ofori í sikima gbọrụḅọ-sọ ofori; wamịna Tamụnọ pembema ịkụ ofori.