Ditẹrọnọmị 10:16 - FỊAFỊA BAỊBỤLỤ

¹⁶ Anịẹrẹsị ọmịnị ọmịna ḅioḅẹngbọ ḅẹ tarị ḅụụ mẹ sin tẹ ḅarị jen-maaịn kẹ kịnị na kura-a ḅara sime ma.

Ditẹrọnọmị 10:16 Iomraidhean Croise

Suku-saakị 17:11

Ọmịna oju meni ḅụ ọmịnị ọmịna tarị-ḅụụ sin ḅa, anịsakị anị yẹrị na, ọmịnị na ogboku ḅẹ ọḅọkụ mẹ ḅẹ elekima sọ ḅa.

2 Paka-aị 30:8

Mịọkụ ọ́ ḅarị kọngọ kuroma ma, ọmịna ḍapụ ma wẹrịtẹ sime-ḅara, kụma ọmịnị ọmịna aḅụụ sịkị KỊNỊNYANAḄỌ ḅe pịrịị, tẹ ọ̀ fịafịa yọ ḅoo, anịanga mẹ tẹ ọ̀ mịẹ fịafịama gbamaso tẹ anga mẹ, tẹ fịrịmẹnjị KỊNỊNYANAḄỌ ọmịna Tamụnọ pịrịị, mịẹ tẹ ọ̀ ḅalafama ịganị mẹ ọmịna ḅụụ ḅụ pịkị so ḅe ḅara.

Jerimaya 4:14

Jeruselemu, í ḅioḅẹngbọ ḅụ si mẹ sịkịrị-siin, mịẹ tẹ ị́ ḅọrọma ḅarị ḅara. Í si-aị kuroma mu tọ sakị la ḅẹ?

Jerimaya 4:4

Ọmịnị ị̀ na fị ọḅọkụ mẹ kokoo, ọ́ Nyanaḅọ ḅara ḅụ, tẹ ọmịna aḅụụ wẹrị kpaịnma ị̀ pịrịị, ọmịnị Juda na Jeruselemu na ḅẹ apụ. Ọmịnị ọkọ mịẹ-a ḅẹḅẹ, ị̀ ịganị fịnị kọrị ḅara kọrị ḅa, ọ́ mịẹ tẹ asi-aị ma ẹrẹsị. Anị kọrị ḅa, tẹ anị biinma ḅẹ gbọrụḅọ-sọ paka ḅịa.”

Izikẹlị 44:7

Ini ị̀ Warị mẹ kẹ tọn-tọn-a ḅara wẹrịtẹ wẹrịso tẹ tarị-ḅụụ sin-a kịnị-tọrụ-nimia igoniapụ, ị̀ ḅịḅị poki-poki-a apụ ma ị̀ Warị mẹ sọ-ḅo ḅụ, ịn ḅẹlẹkị na ọmbie na kẹ agba mịẹ-mịẹ ị̀ pịrịarị sakị ḅụ. Mie ḅụ ị̀ atomi ị̀ ọḅọkụ simatẹ ịn mịẹ tẹ sịḅị-ngụngụnma aị mamgba ḅụ.

Lẹvitikọsị 26:41

anie mịẹtẹ arị ini na tụḅụrụ ḅara mẹnjị tẹ ini ọkị-ḅo ini na fịya-a apụ ama ḅio suu ye; anị sakị rẹ ịn nwẹnị ịna ḅụụ-pẹlẹa ḅioḅẹngbọ mẹ ḅụụ iderima, tẹ ini ịna mịẹ-irima ḅụ ịna ḅụụ mịẹ tẹlẹma ḅẹḅẹ.

Ditẹrọnọmị 30:6

KỊNỊNYANAḄỌ ọmịna Tamụnọ ḅe ọmịnị na, ọmịna aḅụụ paka-ḅo apụ ma na ḅioḅẹngbọ ḅẹ tarị-ḅụụ sin ḅa, anieḅụ ọmịnị ọmịna ḅioḅẹngbọ mẹmgba na, ọmịna tẹmẹ mẹmgba na kẹ KỊNỊNYANAḄỌ ọmịna Tamụnọ ḅe ḅẹlẹma ḅa, mịẹtẹ ó ḍumo ḅẹ ḅara.

Ditẹrọnọmị 31:27

Kẹ gotẹ ọkọ ḅẹẹarị, arị ọ́ sịḅị-kụrọ la ḅara na, ọ́ kịnị na kura-a la ḅara na, nimi wararị; ḍikii, mịmgba à paa ḍumo tẹ ọmịnị na sime wararị sakị ḅụ sọ ọ́ sịḅị-kụrọma KỊNỊNYANAḄỌ ḅe pịrị tẹ, à fịtẹ so sakị, anị tọ-ḅara la ḅara kẹ ḅaka ḅa!

Ditẹrọnọmị 9:13

KỊNỊNYANAḄỌ ḅe nwẹnị pịkị siin ị̀ ḅẹẹ: Mịna atomi ma àrị ịn ẹrị tẹẹ, anịsakị ḍikii, ini anie kịnị na kura-a tomi.

Ditẹrọnọmị 9:6

Anịẹrẹsị ó nimi mịnẹ KỊNỊNYANAḄỌ ọmịna Tamụnọ ḅe ọmịna karakara gotẹ mị iḅi ama mẹ kẹ ọ́ nyana ḅẹ tẹ ọ́ pịrị-a, kẹ gotẹ ọkọ ḅẹẹarị, ọmịnị anie kịnị na kura-a atomi.

Kọlọsị 2:11

Kịrayịsị na gbọrụ ḅụ sime ḅụ ọ́ tarị-ḅụụ siinm, tomi sin-arị tarị-ḅụụ sin mẹ-a, kụma Kịrayịsị sin-arị tarị-ḅụụ sin mẹ ḅụ, anie ḅụ simearị ye anie, tomḅọ si sime-ḅara kụrọ mẹ kẹ mḅọ sọmarị ikoli mẹ ḅio paka-ḅo.