1 Amadapụ 6:5 - FỊAFỊA BAỊBỤLỤ

⁵ Tẹkẹ-warị mẹ ḅẹ etela da warị-anga ma ḅụ, maa akaka ma na pịkị ọḅụjụ mẹ na ḅụ, tẹra dẹkị ḅekin-warị ịn nwẹn nama tẹ kẹ Tẹkẹ-warị mẹ ḅụ sụa wararị, tẹra dẹkị ma ḅụ gberie-gberie sọnọma ḅụọ-kuḅu na ḅara-tụngbalị (2.2 m) na kẹ gele wararị.

1 Amadapụ 6:5 Iomraidhean Croise

1 Amadapụ 6:16

Tẹkẹ-warị mẹ ḅẹ ịlụkụlụkụ ḅụ gbọrụ kala-ḅio nama wararị ịn kẹ Fịafịa-tẹịn Yọ sịn anga mẹ. Anịḅẹ nangwọ anie ḅụọ-kuḅu asuei (9 m), tẹ ịn nwẹnị finjimatẹ sida ḍụḅọ pakịrị-pakịrị kẹ isun kikima ye mẹ ḅụ ọkị-ḅo kiri la ḅụ kiki-pẹlẹ anị pịrị sikima wararị warị-iyingi mẹ ḅụ.

1 Amadapụ 6:31

Ini olivu ḍụḅọ kẹ mịẹ wararị ḅọkọ maa apakịrị mie ịn kẹ Fịafịa-tẹịn Yọ mẹ ḅẹ ḅọkọ mẹ sụa ye; ḅọkọ mẹ ọgọnọ mẹ gbala arụḅa sime-ḅara mie ịn kẹ anị mịẹ ḅara.

1 Amadapụ 6:6

Tarị dẹkị mẹ ḅụ gbọrụ ḅio gbọrụ ḅio ḅẹ finjima anie sọnọma ḅụọ-kuḅu na pakịrị na (2.2 m); ogboku ḅẹ dẹkị mẹ ḅụ gbọrụ ḅio gbọrụ ḅio ḅẹ finjima anie esenia ḅụọ-kuḅu (2.7 m); anịsakị tẹrẹị karama dẹkị mẹ ḅio ma ḅẹ finjima anie oyia aḅụọ-kuḅu na pakịrị na (3.1 m). Tẹkẹ-warị mẹ ḅẹ warị-angama akpakpa sọ laa ḅara mẹ anị gele ma-muarị ḅara mie dẹkị-dẹkị ma ḅụụ akpakpa mẹ ḅụ ye sọ tẹ arị ịrụma iwoarị ḅara mịẹtẹ bio-bioma ja oluku sụa-a ḅara ḅụ arị arị ọgọnọ gbana ḅarị ḅara.

1 Paka-aị 23:28

Ịna kọrịnama tẹ in kọrị ḅarịye anie ḅarasụa kẹ Erọnị owiapụ-awọmẹ ma pịrị KỊNỊNYANAḄỌ ḅe warị ḅẹ kọrịnama ḅụ, ḅẹrẹkọn anga ma na, ḅio-ḅio ma na tẹlẹma, fịafịa aị mamgba mịẹ fịafịama, tẹ sime Tamụnọ warị mẹ ḅio ḅẹ kọrịnama pịrị fịrị goyegoye mẹnjị;

1 Paka-aị 28:11

Anịtẹso Devidi nwẹnị Tamụnọ warị mẹ ḅẹ iḅoma mẹ na, anị ḅe awarị ma na, anị ḅẹ ye koko anga ma na, anị ḅẹ ọgọnọ ḅẹ aḅio ma na, anị ḅẹ akala-ḅio ma na, ọkụrụkụrụ Emine mẹ sime ḅẹ Fịafịa-tẹịn Yọ mẹ na sime ḅarị ḅara ḅe elekima kẹ ori owiḅọtụḅọ Sọlọmọnị pịrị.

1 Paka-aị 9:26

Livayị furo ḅẹ ini apụ ma tẹ ḍikiḍiki onyo-sẹịnapụ ma ini na emi tẹ ḅio kiri ma na, Tamụnọ warị mẹ ḅio ḅẹ ngọ ma na ḍikiḍikiarị.

2 Paka-aị 31:11

Anịtẹso Hẹzịkaya nwẹnị tọn in pịrị in KỊNỊNYANAḄỌ ḅe warị ḅio ḅụ ngọ-koko-aḅio tẹlẹmaa; tẹ ịn nwẹnị arị tẹlẹma.

2 Paka-aị 4:20

tọnjọ sịẹma aị ma na arịḅẹ atọnjọ ma na sọ karakara golu mie ịn kẹ arị tẹmẹ ye mịẹtẹ arị Fịafịa-tẹịn Yọ mẹ tọrọkọ sime tẹ kọrị ḅarị ḅara anị wẹrịtẹ ḍuko ḅara.

2 Paka-aị 5:7

Anịtẹso agbamịẹapụ ma nwẹnị KỊNỊNYANAḄỌ ḅe Ọḅọkụ-Igbe mẹ kẹ Fịafịa-tẹịn Yọ mẹ ḅụ koroma, Sẹrubimu ma suku-ḅio ḅụ.

2 Paka-aị 5:9

Sịn ma nangwọ lama wararị ẹrẹsị Fịafịa-tẹịn Yọ mẹ ḅụ tẹrẹmẹ mu kala-ḅio mẹ la arị asịḅị waa paka tẹ kịnị ẹrị-ẹrịm, kụma kịnị inetẹ etela-ogbo ḅụ arị ẹrị ḅịa; arị emi nwenii ḅo mịmgba lam.

Nehimaya 10:37

Wa tarị kẹ fịye mịẹ ḅẹ gbẹẹ sịnmgbọlị ma na, opu asịn goyegoye ḅụ tarị paka asịnmgbọlị ma na, iru mẹ na, pulo mẹ na, wa kẹ wamịna Tamụnọ warị mẹ ḅio ḅo agbamịẹapụ ma pịrị ḅa. Anịsakị wa wamịna kiri mẹ ḅụ paka-ḅo aị ma kẹ oyia akiri ḍiya tẹ gbọrụ kiri kẹ ḅo Livayị furo-ḅẹ-apụ ma pịrị ḅa, kẹ gotẹ ọkọ ḅẹẹarị, Livayị furo-ḅẹ-apụ ma mie wamịna kala-ama mamgba ḅụ nyana aị kẹ oyia akiri ḍiya ḅẹ gbọrụ kiri mẹ daarị.

Nehimaya 12:44

Anị ene mẹ ḅụ mie in tomi tọn kẹ ngọ-koko-aḅio ma na, oso-aị oso suu ḅẹ aḅio ma na, tarị asịnmgbọlụ ma na, nyana-oyi-ḅụụ-gberie mẹ na ḍikiḍiki ḅẹ apụ pịrị ye. Mịna tomi ma mie ama-ama ma ḅẹ aḍụọ ma ḅio in oso agbamịẹapụ ma na, Livayị furo-ḅẹ-apụ ma na pịrị oso-aị ma daa-ọkị yee, oloko mẹ wẹrịtẹ ḅii ḅara. Juda ḅụ simearị apụ mamgba ḅioḅẹlẹ nyana agbamịẹapụ ma na Livayị furo-ḅẹ-apụ ma na pịrịm.

Devidi-Anume 28:2

Ị̀ naa, à ḅarasụa gotẹ owu ị́ pịrị sakị, àrị ị̀ aḅara saakị ị́ fịafịa Warị mẹ daarị sakị.

Paka-so 25:22

Anị yọ mie à ḅo ọmịnị na ẹrịya ḅarị anga, anịsakị ḅịḅị-gbaịnye mẹ ọgọnọ, maa Sẹrubimu ma tẹ Ọḅọkụ-Igbe mẹ ọgọnọ simearị aị ma ogboku mie àrị oloko mamgba tẹ à sụa Izirẹlịapụ ma pịrị ḅẹ aị kẹ ị́ na ẹkwẹn ḅarịye.”

Sọlọmọnị Ḅẹlẹtẹịn Nume 1:4

Ị̀ ọkị tẹ wa mangị-so; ị̀ amadaḅọ sọ tẹ ị̀ kẹ í ḅio muu. Wa ḅioḅẹlẹ gboloma ḅa; ḅuu gbẹdẹmaa, tẹ ḅẹlẹma ḅio sọ faa. Ereme mamgba ị́ ḅẹlẹmarị ye mẹ ḅụụ-buamaye-o!

Jerimaya 35:2

“Rekabụ furo-ḅẹ-apụ ma dama-mu tẹ ẹkwẹn ịn pịrị. Anịtẹso ini ọkị-ḅo Tamụnọ-warị mẹ ḅẹ aḅio ma ḅụ gberie ḅio suu tẹ iru kẹ ịn pịrị.”

Jerimaya 35:4

tẹ ịn kẹ Tamụnọ warị mẹ ḅom. À nwẹnị ịn kẹ ịkịankoro Hanani, Igidalaya tụḅọ ḅe ḍukamẹnjịapụ ma ḅio mẹ mu. Mị ḅio mẹ Masẹya, anie Salumu tụḅọ ḅe tẹ Tamụnọ-warị mẹ ḅẹ opu fịrịmẹnjịḅọ ḅe ḅio mẹ ḅẹ ọgọnọ-jụ ḅụ anị simem, tẹ anị osi opu fịrịmẹnjịapụ ma aḅio na kpekim.

Izikẹlị 40:17

Tomḅọ ḅe ị̀ ọkị tolu-ḅọrọ mu ogigo mẹ ḅio sọm. Anị anga ḅụ in ḅio asuei namam etela da onu mẹ bịan ḅụ, tẹ arịḅẹ nụngọ mẹ ḅẹ gbọrụ anga ḅụ ịn ḍụḅarị kẹ kiri mẹ dẹẹm,

Izikẹlị 40:44

Anịtẹso ori ị̀ kẹ ḅo ḅioju ḅẹ ogigo mẹ ḅio lam. Anị anga maa ḅio finji ḅioju ḅẹ ogigo mẹ dam, gberie tọrụ kẹ suku-jụ dam ọgọnọ-jụ ḅẹ ogigo-ḅọkọ mẹ akaka, tẹ osi ye tọrụ kẹ ọgọnọ-jụ dam suku-jụ ḅẹ ogigo-ḅọkọ mẹ akaka.

Izikẹlị 41:4

Ò ḅio mẹ tọnm, tẹ anị nwẹnị pakịrị oyi amita oyi amita (10 m) paka. Anịtẹso ori ị̀ ḅẹẹm, “Mie Fịafịa-tẹịn Yọ mẹẹ.”

Lẹvitikọsị 16:2

KỊNỊNYANAḄỌ ḅe Mozizi ḅẹẹm, “Ḍuko í iyimbere Erọnị pịrịị, ọ̀ sakị mamgba kiki-pẹlẹ-ḅịtẹ mẹ ḅio sọ Fịafịa-tẹịn Yọ mẹ ḅio ọkụrụkụrụ Emine mẹ tẹ Ọḅọkụ-Igbe mẹ ọgọnọ simearị ye mẹ tọrọkọ ḅo-ma ḅọrọ ma, anieofori ò ḅofa fịị, kẹ gotẹ ọkọ ḅẹẹarị, arị oḅuto ḅio ọkụrụkụrụ Emine mẹ ọgọnọ tolu-sịẹ ḅa.

Kịẹn-aḅịḅị 7:89

Tẹ Mozizi mẹnjị Kobiri Akpụrụ-warị mẹ ḅio sọ, tẹ KỊNỊNYANAḄỌ ḅe na ẹkwẹn ḅẹ mu tẹso, ọkụrụkụrụ Emine mẹ tẹ Ḅụụ ḍie-pakama Ọḅọkụ-Igbe mẹ ọgọnọ-jụ maa Sẹrubimu ma ogboku ḅụ ọ̀ nwẹnị ẹkwẹn ọ̀ pịrịarị pọkọ mẹ naa tẹ anị ẹkwẹn ọ̀ pịrịm.