1 Amadapụ 2:4 - FỊAFỊA BAỊBỤLỤ

⁴ Ị́ ọ̀ ḅịḅị poki kụma, KỊNỊNYANAḄỌ ḅe ọ̀ karịmam mịnẹ ọ̀ mịẹ ḅarịye mẹ koko ḅa anịsakị mẹ tẹ ò ḍuko ị́ pịrịm mịnẹ ị̀ ḅụụ paka-ḅo apụ Izirẹlị ḅụ ḅẹrẹtọn ḅa ini ịna ḅụụ ẹbị tẹ minini nyana ḅara kẹ ịna ḅioḅẹngbọ na, tẹmẹ na kẹ ọ̀ tọn aị ma ḅụ ọ̀ ḅịḅị poki mu la sakị la sakị la ḅa.

1 Amadapụ 2:4 Iomraidhean Croise

Suku-saakị 17:1

Ebiramụ sịḅị gbọrụ kụra ofori kụra sọnọa si ḅọrọ tẹso, KỊNỊNYANAḄỌ ḅe amịna ḅụụ pakama Ebiramụ ḍiem, tẹ ọ̀ ḅẹẹm, “Yẹrị anie Kụrọmamgba Nyana Tamụnọ ḅẹ. Ị̀nịna gbọrụ ḅụ mẹnjị tẹ ị̀ ḅịḅị pokii, tẹ sakị mamgba karakara mịẹẹ.

Suku-saakị 18:19

Àrị ọ̀ sẹlẹ-ọkị tẹẹ, mịẹtẹ ọ̀ tọn ori awọmẹ na ọ̀ warị-suku na pịrị ịn ò ḍikimatẹ karakara na kura ḅẹrẹkọn na ḅụ ì etela mẹ mẹnjị ḅẹ ḅara. Ịn ọkọ mịẹm ḅẹḅẹ, à kẹ Ebira-amụ karịma aị mamgba à mịẹ ọ̀ pịrị ḅa.”

2 Samụẹlị 7:25

“Anịsakị yei KỊNỊNYANA-TAMỤNỌ, mịọkụ ẹkwẹn-ḅịḅị mẹ tẹ ị́ fịrịmẹnjịḅọ na, ọ̀ warị na, gbolomaye ḅụ ị́ kọn tẹ ẹkwẹn mẹ mịẹ kụrọma gbamasoo, tẹ ị́ wẹrịtẹ ḍuko ḅara mịẹ.

1 Amadapụ 1:48

tẹ nwẹnị tẹkẹ, ‘Ó yee wa KỊNỊNYANAḄỌ ḅe tokinii, Izirẹlịapụ tẹkẹarị Tamụnọ ḅe, oriḅe tẹ mịmgba mịẹtẹ ị̀ ḅụụ paka-ḅo apụ ma ḅẹ gbọrụḅọ ḅo amada-kụlọ ḅụ ì kiri ọkị tẹ minini tẹ yẹrị sọ ì ḍumo sime tẹ anị ẹrị ye mẹ!’ ”

1 Amadapụ 11:36

Anịsọ à gbọrụ ibe kẹ wẹrị ori owiḅọtụḅọ ḅe pịrị ḅa, mịẹtẹ ị̀ fịrịmẹnjịḅọ Devidi ḅụ paka-ḅo ḅọ Jeruselemu tomi sunsin ị̀ pịrịarị gotẹ à sẹlẹ-ọkị tẹ opu ama mẹ ḅụ ḅẹrẹtọn ḅẹ ḅara.

1 Amadapụ 3:14

Anịsakị ị́ ḍa Devidi wẹrịtẹ mịẹ ḅara, ị́ nwẹnị ị̀ ḅịḅị poki tẹ ị̀ oloko ma na à toluma aị ma na koko ḅẹḅẹ, à nangwọ ḍumo kẹ ị́ pịrị ḅa.”

1 Amadapụ 3:3

Sọlọmọnị KỊNỊNYANAḄỌ ḅe ḅẹlẹmam tẹ nwẹnị ọ̀ ḍa Devidi kẹ ò toluma toluma aị ma ḍukamẹnjịm, kụma ori sọ nama ḅaa tẹ arị kẹ agba mịẹ tẹẹ, kịrị-kịrị agbamịẹ-anga ḅụ.

1 Amadapụ 6:12

“Ị́ nwẹnị ì oloko ma koko tẹ à tọn aị ma ḅụ ị̀ ḅịḅị pokim ḅẹḅẹ, arị à kẹẹ ị́ ḍa Devidi karịma ye mẹ mịẹ ị́ pịrị ḅa.

1 Amadapụ 8:23

tẹ ḅẹẹ, “Yei KỊNỊNYANAḄỌ, Izirẹlịapụ tẹkẹarị Tamụnọ, So-ḅio ḅẹ ọgọnọ-jụ ḅụ na suku-ḅio ḅẹ kiri mẹ na ḅụ í pembema Tamụnọ ofori! Ị́ ị́ atomi ma na fị ọḅọkụ mẹ kokom tẹ ị́ ḅẹlẹma kẹ ịn ḍiem ini ịna bebe ḅioḅẹngbọ mẹmgba kẹ ị́ ḅịḅị poki tẹ ị́nịna anga sakị sakị

1 Amadapụ 8:25

Mịọkụ Yei KỊNỊNYANAḄỌ Izirẹlịapụ tẹkẹarị Tamụnọ, à tẹkẹm mịnẹ aniemẹ tẹ ị́ kẹ ị́ fịrịmẹnjịḅọ ị̀ ḍa Devidi karịma ye mẹ tẹ ḅẹẹm mịnẹ, ‘À gbala-gbala ị́ tọrụ-ogbo ḅụ kẹ ị́ gbarịma ḅịa gbọrụ owiḅọ ị́ ḅụụ ḅo Izirẹlị ḅẹ emine mẹ ọgọnọ lẹgị mẹ. Í owiapụ-awọmẹ ma nwẹnị paa ịna ḅụụ ẹbị ịna amịẹaị mamgba ḅụ tẹ ị̀ tọrọkọ mẹnjị ị́ wẹrịtẹ mẹnjị ḅara.’

1 Amadapụ 9:5

àrị à minini aị ma koko ḅa à kẹ ọmịna Ḍaḅọ Devidi karịma tẹ ọ̀ ḅẹẹ sakị mịnẹ ọ̀ ḅụụ ḅụ paka-ḅo apụ mie sakị mamgba Izirẹlị ḅụ ḅẹrẹtọn ḅarịye.

2 Amadapụ 20:3

“Yei KỊNỊNYANAḄỌ, àrị ị́ tẹkẹm, à minini ḅụ ì ḅioḅẹngbọ mẹmgba kẹ ị́ tọrọkọ mẹnjị tẹ í ḍiki-tọrụ ḅụ iḅiye mịẹ ḅara kẹ ḅiokoroma ị̀ pịrịị.” Hẹzịkaya nwẹnị ye ḅụụ ḅụ akụ ḅara kẹ owu.

2 Amadapụ 23:25

Mozizi oloko mẹmgba wẹrịtẹ sime-ḅara kẹ vuunma pịkị tẹ ori amịna ḅioḅẹngbọ mẹmgba na, ọ̀ tẹmẹ mẹmgba na, ori ịnyọ mẹmgba na kẹ KỊNỊNYANAḄỌ ḅe da ò pembe amadaḅọ ọ̀ tọrọkọ ḅụ ofori; ọ̀ ḍa tẹ ḅọrọ sakị sọ, ọkọ sime pembe ḅọ amụ paka-ḅo-a.

2 Amadapụ 23:3

Amadaḅọ ḅe nwẹnị ḅeriye mẹ akaka sịẹsime tẹ KỊNỊNYANAḄỌ ḅe tọrọkọ ori na ọḅọkụ fị mịnẹ ori ò ḅioḅẹngbọ mẹmgba na, ọ̀ tẹmẹ mẹmgba na kẹ KỊNỊNYANAḄỌ ḅe ḍukamẹnjị tẹ ọ̀ tọn aị ma na, ò ḍuko aị ma na, ori oloko ma tẹ kẹẹ wararị aị ma na koko tẹ mị ḍiri mẹ ḅio kẹẹ wararị ọḅọkụ mẹ ḅẹ ẹkwẹn-aḅịḅị ma ḅẹẹ ḅara mịẹ ḅa; tẹ tomi mamgba nwẹnị ọḅọkụ mẹ ḅụ sọ.

1 Paka-aị 28:9

“Anịsakị ị́yẹrị ị̀ owiḅọtụḅọ, Sọlọmọnị, ị́ aḍapụ Tamụnọ ḅe nimii, tẹ í bebe ḅioḅẹngbọ na mịẹ pọkọ-tarị kuroma kẹ fịrịmẹnjị ọ̀ pịrịị; kẹ gotẹ ọkọ ḅẹẹarị, KỊNỊNYANAḄỌ ḅe ḅioḅẹngbọ mamgba ḍọkị ḍikiarị, tẹ ḅioḅẹngbọ ḅụ tọn tẹ mịẹ ḅẹ ye goyegoye fie ye naarị. Ị́ ọ̀ sịkị-sịkị, ori ị́ kẹ gbin nguma gbamaso ḅa.

2 Paka-aị 17:3

KỊNỊNYANAḄỌ ḅe Jehosafatị na simem, ori ọ̀ ḍa tarị-tarị mẹnjị etela ma ḅụ mẹnjịm ẹrẹsị; ọ̀ Balị oru ma kẹ ye-sịn-a,

2 Paka-aị 6:16

Anịẹrẹsị mịọkụ, Yei KỊNỊNYANAḄỌ Izirẹlịapụ tẹkẹarị Tamụnọ, aniemẹ tẹ ị́ ị́ fịrịmẹnjịḅọ ị̀ ḍa Devidi karịma tẹ ḅẹẹm, ‘Anị gbala-gbala gbarịma ḅịa ị́ ḅụụ gbọrụ owiḅọ ḅo ị̀ tọrọkọ Izirẹlị ḅẹ emine mẹ ọgọnọ lẹgị mẹ, ị́ owiapụ-awọmẹ ma nwẹnị ịna etela ḅụ ịna aḅụụ ẹbị tẹ ị̀ oloko ḅụ mẹnjị-mẹnjị, ị́ wẹrịtẹ ị̀ tọrọkọ mẹnjị ḅara’ ḅẹẹ ye mẹ mịẹ.

2 Paka-aị 7:18

anịrẹ àrị ị́ ama-da emine mẹ mịẹ pakama ḅa, à wẹrịtẹ ị́ ḍa Devidi na ọḅọkụ fị ḅara tẹ ḅẹẹm, ‘Àrị ị́ ḅụụ ḅụ ḅẹrẹtọn Izirẹlị pịrị ḅẹ ḅọ kẹ ị́ gbarịma ḅịa.’

Devidi-Anume 119:9

Ndẹẹ asambịrịma tụḅọ inetẹ amịna ḍumo wẹrị kpaịnma ḅẹ ḅara? Ị́ tọn kuroma aị ma poki tẹ mịẹ ḅụ.

Devidi-Anume 37:22

KỊNỊNYANAḄỌ ḅe boma tẹ apụ ma amakiri mẹ sime ịn pịrị ḅa: kụma ò wori tẹ apụ ma ini in dee pakama ḅa.

Devidi-Anume 37:9

KỊNỊNYANAḄỌ ḅe kẹ ḅiokpọmarị apụ ma amakiri mẹ sime ịn pịrị ḅa: kụma in si-sịḅịḅio-sụapụ ma dee pakama ḅa.

Devidi-Anume 39:1

À ḅẹẹm, “À mịẹ ḅẹ ye ḅụ àrị ẹbị ḅa, tẹ ị̀ ḅẹlẹ mịẹ tẹ à si mịẹ ḅịa ḅara; si-mịẹapụ ị̀ na kpeki wararị ogbo à gberie-sọ ḍuko ḅịa.”

Jerimaya 33:17

Yẹrị, KỊNỊNYANAḄỌ ḅe, minini tẹ mịnẹ sakị mamgba Devidi furo paka-ḅo Izirẹlị ḅẹ amadaḅọ sọ ḅa

Lẹvitikọsị 26:3

“Ọ́ nwẹnị ì oloko kẹẹ-koro wararị aị ma ḍiki mẹnjị, tẹ à tọn aị ma mịẹ ḅẹ tẹ kẹ elekima sụa ḅẹḅẹ,

Zẹkaraya 14:2

KỊNỊNYANAḄỌ ḅe sịẹ-sịẹ mamgba kobiri ḅo tẹ in Jeruselemu kẹ ọmụ kiri sọma ḅa. Ini opu ama mẹ ọkị ḅa, warị-warị ma fọịn, tẹ nwẹnị kụrọ ḅara kẹ ereme ma na tii. In tomi ma kẹ maa anga ḍie ḅa, gbọrụ anga kun-so mu jen sịẹ ḅụ angama ḅa, kụma ịna ḅụ kirikọn-apụ ma opu ama mẹ ḅio ini ini ọkị so ḅịa.

Matiyo 22:37

Jizọsị nwẹnị pakịrị, “ ‘KỊNỊNYANAḄỌ, ị́ Tamụnọ ḅe ḅẹlẹma, í ḅioḅẹngbọ mẹmgba ḅụ, ị́ tẹmẹ mẹmgba ḅụ, pịkị í kuroma mẹmgba ḅụ.’

Luku 1:6

Ini maa apụ mamgba Tamụnọ tọrọkọ iḅi ḍumo kọnm, anie ịn pịkị KỊNỊNYANAḄỌ ḅe oloko mamgba koko kpaịnma ḅara.

Ditẹrọnọmị 10:12

Anịsakị Izirẹlị, mịọkụ KỊNỊNYANAḄỌ ọmịna Tamụnọ ḅe ọmịna aḅara tiye ḅii? KỊNỊNYANAḄỌ ọmịna Tamụnọ ḅe ḍiki-ḅalafaa, ori etela mamgba ḅụ mẹnjịị, ọ̀ ḅẹlẹmaa, ọmịna ḅioḅẹngbọ mẹmgba na, ọmịna tẹmẹ mẹmgba na, kẹ fịrịmẹnjị ọ̀ pịrịị,

Ditẹrọnọmị 11:13

Anịsakị ọ́ nwẹnị KỊNỊNYANAḄỌ ọmịna Tamụnọ ḅe ḅẹlẹma, tẹ ọmịna ḅioḅẹngbọ mẹmgba na ọmịna tẹmẹ mẹmgba na kẹ fịrịmẹnjị ọ̀ pịrị ḅẹẹm tẹ ì oloko ma tẹ mịmgba à tọn ọ́ pịrị aị ma poki poki,

Ditẹrọnọmị 6:5

Anịsakị ọmịnị ọmịna ḅioḅẹngbọ mẹmgba na, ọmịna tẹmẹ mẹmgba na, ọmịnị ịnyọ mẹmgba na, kẹ KỊNỊNYANAḄỌ ọmịna Tamụnọ ḅe ḅẹlẹma ḅa.

Ditẹrọnọmị 7:12

Anịsakị ọ́ mịna kụrọ ḅara-ḅio sime apụ sụa oloko ma koko, tẹ arị mịẹ ẹrẹsị, KỊNỊNYANAḄỌ ọmịna Tamụnọ ḅe ọmịnị na, ọḅọkụ mẹ na jike-a ḅẹlẹma mẹ na, tẹ ò ye karị ḅara kẹ minini ọmịna aḍapụ pịrịm ịn koko ḅẹ ye mẹ, koko ḅa.

Judu 1:24

Ori tẹ inetẹ ọmịnị ọlọ-sịẹma tẹ ọ́ ḅarị ḅịkị ḅịa ḅọ ḅe, tẹ pịkị ḅụụ ḅụ ḅẹẹ, ḅẹẹ ye ofori ḅara na ḍereku na ḅụ ọmịnị ọkị-ḅo ori ebube tọrọkọ la ḅarị ḅọ ḅe,