Titodsa 2:2 - Kulina New Testament Brazil

² Rradauideni arrama quenauiuarrine mari ticanabaqquirro. Mouaraza madimanana. Naui madirra ouahadeni madierideni qqui toquenazapa: —Rrehe, poccadeni uima bica tani −quenauiuarrine. Bodideni uatome-manauissa taza uima bicanira tocatterrizade nauatoqquiri nauiuarrine. Pina arri Deocca uimassa narrarora icatterrizemananiuarrine. Rradauidenipa Zesoza rrehe quenauissa tauiuarrine. Deocca touati uanehema bazimaza uatideni uanaqquiri nauiuarrine. Uima ocassera tanicca naqui mouaraza inauanemana-zanaponiuarrine.

Culina Mádija

² Jadahideni ajama quinahijine mari ticanabaqquijo. Mohuaradsa madimanana. Nahi madija ohuahadeni madierideni qqui toquinadsapa: —Jehe, poccadeni ima bica tani −quinahijine. Bodideni huatoma-manahissa tadsa ima bicanira tocattejidsade nahatoqquiri nahijine. Pina aji Diocca imassa najarora icattejidsamananijine. Jadahidenipa Jesodsa jehe quinahissa tahijine. Diocca tohuati huanehema huapimadsa huatideni huanaqquiri nahijine. Ima ocassera tanicca naqui mohuaradsa inahanamana-dsanaponijine.

Titodsa 2:2 Iomraidhean Croise

Maraco 5:15

Nazapa qquide rrauirronazapa Zeso uauiuarri bacco narronemanarrari. Arra madirra poua bodiza tocorimedeni carriporraripa tonomiuira qqui toquenarrari. Nauiza uitta canarrari. Etero oro tozimapomarrari, bodi uatoue naco carripomarrari. Nazapa madirra bazima cappinemanarrari.

Roca 8:35

Nazapa madirra bazima qquide rrauirronana canarrari. Zesouarri bacco narronemanazapa arra madirra bodicca tocorime rrauinineza tonomiuira qqui toquenarrari. Naui Zeso uauiza uitta canarrari. Etero oro tozimapomarrari, bodi uatoue naco carripomarrari. Nazapa madirra bazima cappinemanarrari.

Tahimarideni 24:25

Nazama Paoro mari icanabaqquizapa uima 3 nehe uati tarrari: —Madirra uimari borocco tanina bica tarraro −narrari. —Madirra uimasiri inana-rreraniuarrine poua poua cacauade nauato tarrarina bica tarrari −narrari. —Nizaranibote Deouarri bazima idomo ueza Deona icatterriza-baqquiuitoui −narrari Paoro maride torraza. Naraha Perisi mittaza cappinazapa Paoroza: —Peperriua, ticcanina. Niza ozepe rrirapomezape titoui uaua onapomanitoui −narrari.

Romanodenidsa 12:3

Deo ouaza uati uana tarraria oua cazosseza tiadeniza uati onarraro. Ponima: —Deni orrani, ouana nauato onani –tiquenerrerarri. Mouaraza Deorrine nauatoto tinarraroccaza ticcadeni uima nattome tiquenarri. Zeso Cristoza parrissa tiquenarraroma tibodideni uatome-manarri.

1 Corintodeniza 15:34

Tibodideni uatome-mananissa tarri. Ticcadeni uimasiri naqui tinebomanarri. Deoza ssamoqquiri narrarideni tiadeniza animanaui. Narraridenirrine ticomehimana-rreraqui? onarraro.

1 Corintodeniza 9:25

Arra madirra ittometoui taide narroremanapozapa pouadeni nattome quenaporrari. Pouadeni assire dacoraqquiri nauiuarrine uaidira tanicca inebomaneza pouadeni cacauemanauissa tarrari. Nama quenarraripa ittomeza deni toquerrenauiuarrine touini quenarrari. Naraha deni torrarrariza totaticca bebe appani couanira da iquenarraro. Narrarope rricaca taniccaraha iape Deocca danirri rricaquera tanicca icarriniuarrine dameraqquiri inarraro.

2 Corintodeniza 5:13

Nazama madirra attideni iaza: —Bodideni tossamomanarrari −quenazapa paparra, pouadeni nama quenana. Arri izepe irrirrarope Deona deni torrauiuarrine. Madirra ouaha attideni naco iaza: —Nauatoto taui −quenazapa tiadeniza naqui bica tani.

Carasiadeniza 5:23

—Iana deni iquerrenani −inerrerarraro. Uimasiri inane-rreraniuarrine ia ecauarraro. Narraro uima bicani bazimape Deo Corimerrine icarrirraro. Narraro uima bazimaza Deo naco, madirra naco: —Uaidira tani, oppina tani −quena-rraraui.

Piripodeniza 4:8

Ouimecotedeni, rridacca uati onarrarocca uima tazarrani arrima tinanemanarri: Uima parrisseheccazara tibodideni uatome-manarri. Imadinissa taniuarrineccara tibodideni uatome-manarri. Parrirenissa tanicca uimatouira tibodideni uatome-manarri. Uima bicani ponira tiadeniza torrarizaniuarrine tibodideni uatome-manarri. Uima bica tanicca touira tibodideni uatome-manarri. Madirra pocca madie toccanissa tarraro touira tibodideni uatome-manarri. Uima bicani pina Deocca uimassa narraro touira tibodideni uatome-manarri. Deo ticcadeni uimaza uatizeuiuarrine tibodideni uatomanissa tarri.

1 Tesaronicadeniza 5:6

Pina narrarideni pouama cauadirrarrarissa inerrerana. Icca madie ecauanissa zanapona. Zeso Cristo touira ibodi uatoue imadina.

1 Tesaronicadeniza 5:8

Naraha iape ssiuarranicca madirra iquerrenarrarope inocco rranoraqquiri nehe imadirraro. Ibodi uatoue imadirraro bica tani. Iape pina isso teppeppe rrazireza biquera-rrarauiuarrine poua bacco cacauauiuarrine ccara tanicca carri, poua tati cacauauiuarrine ccara tanicca carri narrarissa inana. Uimasiri inana-rreraniuarrine ia ecauaniuarrinepe Deoza icca rrehenirri icarri, Deocca touati uanehe icarri narraro. Icassiuaueraniuarrine touini inarrorehe imadirraroparri.

1 Timoti 1:10

Arra uananehe inanemanarrarodeni, pina pocca amonerre rrereraha touini damera tarrari, ponicca maqqui rrararaha toui damera tarraro. Maqquiderreraha poua tesse zoto arrade damera tarrari, amonerre naqui poni tassani bequede damera tarraro. Narraro uaidirehe bazima auato taniuarrine Deo pocca zossenirri da inarraro. Madirra ouahadeni naco pina madirra ibotibaqquimanaza madirra ouahacca zozosse toquerrenauiuarrine manaconitoui da iqquimabaqqui-manarrarideni, mamaizadedeni, uima cacattemade baccouarri domo uaza uima maizehera uati toquenarrarideni. Rrehe, madirra namarridede rarraricca uimarrine Deo pocca zossenirri da inarraro. Narraridenipa imadinissa taniuarrinecca marinarra bicaniza iboqquiri nazapa uima oppina taniccara ihinanemana narraro.

1 Timoti 1:14

Nezape ia Zozossede Deo pocca touati uanehe motarehe ouaza inanarraro. Pouarrine naqui Zeso Cristoza rrehe onaniuarrine oparrirerraro. Pouarrine pocca touati uanehe ouaza inaneza naqui Pouatoui ouati uana taniuarrine oparrirerraro.

1 Timoti 1:5

Rrehe Timoti, tiaza dozo onarrarope Deoza toquerrenarrarideni bazima uatideni cauanerara canarizauiuarrine. Narraro touati uanehepe ibodi bicaqquiri naza, ibodi uima bicani touira ineza Deoza parrissehera rrehe inanissa tezape eti cauanerara canarizaniuarrine, onarraro.

1 Timoti 3:11

Narrarossa narraro bedimenideni naqui bicaqquiri naniuarrine. Nezape madirra ouahadeni ponideniza: —Rrehe, bicaqquiri nani, madimananissa tani −quequenanauiuarrine. Uima ponimacca naqui uati uati nanarizemana nerreraniuarrine. Bodinideni uato-mananissa tehe madimanana. Ponideni attini naqui maizeraqquiri nani, bazima inaparriremananissa tanipe bica tani.

1 Timoti 3:2

Nama nazapa Zesoza rrehe quenarrarideni cacauadecca madie arrima nanina bica tani: Pouapa madiuissa tazapa madirra ouaha attidenipa: —Pocca uima uaidira tani −quena-rrarauiuarrine. Pocca amonerre naqui orrarini carriuiuarrine. Uananehema madi-rrarauiuarrine. Nazama uarrirriraza poua bodi uatouissa tana. Uimasiri inana-rreraniuarrine poua cacauade nauato, madide naco nauato tazapa pouaza madirra ouaha attidenipa: —Pouapa bica taui, uima cappiraui −quequenanauiuarrine. Pouaza madirra bacco narronaza pouaza zamatapa da inauiuarrine, pocca ozaza uadauiuarrine naco bodi nanarrorapo nana. Deo Atti maride naco nauato tana.

1 Timoti 3:4

Pouapa pocca ozacca madirra cacauade nauato tana. Poua attiza pocca erredenideni naco iboraqquiri nauiuarrine. Pocca erredenidenipa poua noppine cappinaqquiri naza madimanauissa tauiuarrine.

1 Timoti 3:8

Rrehe, Zesoza rrehe quenarrarideni cacauade birri accodedeni naco madirra bicaqquiri narrarina ticatterrizabaqquina. Madirra attideni pouadeniza: —Bicaqquiri naui, madimanauissa taui −quequenanazapa pouadeni attiza naco iboraqquiri nauiuarrine. Pouadenipa maizeraqquiri nauiuarrine, attideni bica taniccara uati uati toquenauiuarrine. Zeze coma tanicca zerridede rarrarana. Ziniro uemani touini dameraqquiri narrarana, maizeheza ziniro denima carrimanauiuarrine touini quena-rrarana.

1 Timoti 5:1

Timoti, tetti bica teza ticca mamari tabaqqui mari ticanabaqquina. Rradauideni uima carrimanazapa pouadeniza rroua terrerana. Pina ticca abi noppine ticappinarrarossa teza mouaraza pouadeniza uati tinanissa tarri. Zabissodeniza naqui pina timecoteza uati tinarrarossa teza mouaraza pouadeniza uati tinarri.

Titodsa 1:13

Rrehe Tito, poua attipa parrissa. Nezape ticca madirraza tetti dacorehema uati ticanabaqquirro: —Parri, marinarra maizehecca maridedeni carri taui. Tiadeni tocamaizabaqquiuiuarrine touini quenarrari. Zeso tauimari parrisseheccazara rrehe tiquenarri −tana, onarraro. Daco tirrirarri. Tetti mittemanazapa poccadeni rrehenirri todacorapomaniuarrine.

Titodsa 1:8

Nazama arra Zesoza rrehe quenarrarideni cacauade ticatterrizarraripa madirra ouaha pocca ozaza bacco narronazapa: —Nirra, bica tinaqui? Tipemiqui? −nauina bica taui. Pouapa uima bica taniccaza uauatize nazana bica tarrari. Poua bodi uatomauissa taza uima bicanira tocatterrizade nauato tarrarina bica tarrari. Pouapa uimari borocco, Deoza uati uana, Deoza damera, uimasiri inane-rreraniuarrine poua cacauauissa tarrarina bica tarrari. Madirra nama narrarina Zesoza rrehe quenarrarideni cacauade torrauiuarrine ticatterrizarro, onarraro.

Titodsa 2:7

Tito, tia naqui timadinissa tarri, ticca madie pouadeniza auato taniuarrine. Naui zabissodeni ticca madie qqui toquenazapa: —Ia naqui nema inana −quenauiuarrine. Mari ticanabaqquiza naco maizehe rrirehe, rrizehe rrirehe, parrissehera Deo Atti ponira mari ticanabaqquirro.

Piremao 1:9

Arrima onanina bica tani: Deocca touati uanehema tiaza uati onarraro, ouattissa tinananiuarrine nacassa oneza. Ouape Paoro rradaui ocarrani. Zeso Cristo tauimariza damera onarrarorrine rridapanape toponi cocoroza ouezani.

1 Pedoro 1:13

Rrehe, icassiuaueraniuarrinecca uima timittemanezape narrarotoui tinarroremanehe timadimanarri. Uima bicani tinanemananiuarrine tibodideni uatonissa tarri. Niza Poua Bedi Zeso Cristo rrizera nanizapa Deo pocca biquehe onihi onihi tiadeniza da inanitoui. Narrarotoui tibodideni narrorana, onarraro.

1 Pedoro 4:7

Arrirraro zamape rricani touarrirarronani. Nema nezape tibodideni uatome-mananissa teza tiadeni tecauemanarri, uimasiri tinanemana-rreraniuarrine. Deoza uatide naqui dameraqquiri tiquenarri.

1 Pedoro 5:8

Parri, tinoccodeni panarri! Deoza uauadide, tiadeniza uadide naco Tocorime-Taminepa pina zomarri imehibotessa narrari. Ia quino nauiuarrine totororo narizarrari. Tibodideni uatome-mananissa tarri, Tocorime-Tamine tiadeni tonauaidirabaqqui-rrarauiuarrine.

2 Pedoro 1:6

Tibodideniza touini tiquenanicca uaidireheza poni tiquenaniuarrine ticauatterarri. Uima ocassera taniccaza, uima narro taniccaza tedimane-rrereza mouaraza tonauanade ticauatterarri. Ticcadeni madie Deoza tinanemanezape Poua nacassa tauiccassa tinanemanarri.