Titodsa 1:1 - Kulina New Testament Brazil

¹ Nirra Tito? Ouape Paoro. Ouape Deocca zozosse orrani. Bedi Zeso Cristocca zozosse orrarraro. Zeso Cristopa oua cazosserraria arri poua tauimari ouacomera-rizezape pouaza rrehe quenauiuarrine. Deopa taide nauato taporraria arra madirra icatterriza-baqquirrariparra. Narrarideni Deo pocca parrissehe tocauatterauiuarrine pouadeni mari ocanabaqquiuiuarrine oua cazosserrari. Rrehe, Deocca parrissehepe Deo Pouaza imadinissa taniuarrine ia mari tocanabaqquirraro.

Culina Mádija

¹ ¿Nija Tito? Ohuapi Pablo. Ohuapi Diocca medse ojani. Bedi Jesocristocca dodosse ojajaro. Jesocristopa ohua cadossejaria aji pohua tahimari ohuacomera-ridsadsapi pohuadsa jehe quinahijine. Diopa tahide nahato tapojaria aja madija icattejidsa-baqquijaripaja. Najarideni Dio pocca pajissehe tocahatterahijine pohuadeni mari ocanabaqquihijine ohua cadossejari. Jehe, Diocca pajissehepi Dio Pohuadsa imadinissa tanijine ia mari tocanabaqquijaro.

Titodsa 1:1 Iomraidhean Croise

Roca 18:7

Poua atti nama naraha Deopa nama narrararrari. Pouapa bica tarrari. Pocca tocatterrizabaqquinarra attideni mittarrari. Pouadenipa Deoza ssiuarra uati, zome uati totoquena narrari. Nazapa Deo pouadeni acco icanabaqquiuiuarrinepa narropazarra? Narro-rrarauitoui.

Tahimarideni 13:48

Paoro atti nama nazapa zodeo querrena-rrararrarideni mittemanazapa uatizemaneri narrari: —Ia Zozossede Zeso tauimari bica tani, bica tani −quenarrari. Nazama arra camittehe rricaquera tanicca carrimanauiuarrine Deo icatterriza-baqquiporrarideni Zesoza rrehe quenarrariparra.

Romanodenidsa 1:1

Nirra ouimecotedeni? Ouape Paoro, Zeso Cristocca zozosse, tiadeniza occa uima dozo onarraro. Zeso Cristocca zozosse orraniuarrinepe Deo otoui uaua narraride. Narraroa arri pocca uima bicani madirra tocassiuauerauiuarrinecca mari mari ohocanabaqquiriza nauiuarrine omadirraro.

2 Corintodeniza 1:1

Nirra, ouimecotedeni? Ouape Paoro. Tiadeniza dozo onarraro. Deo nacassa taza Zeso Cristocca zozosse orrarraro. Ouimecote Timoti tezerre tiadeniza: —Nirra, bicaqquiri tiquenaqui? −inarraro. Arrirraro uimape nani zama arobeni Acaiacca oza panani Corintouarricca Deo Attiza titiqueriqquimana narrarodeniza dozo inarraro. Narraro ticcadeni zama arobeniza Zeso Cristoza rrehe quenarrari madirizemanarrarideniza naqui dozo inarraro.

Epesodeniza 2:8

Abi Deopa titouideni uati cauanari canarraria tiadeni tonassiuauabaqquirrari. —Zeso Cristo parrissa itoui zoqquerrari −tiquenezape tiadeniza tossiuauehe inanarraro. Tirrinedeni rrerani. Abi Deo touini naza manaconi rrirehe tiadeniza inanarraro.

Piripodeniza 1:1

Nirra imecotedeni? Ouape Paoro. Otesse Timoti tezerre Zeso Cristocca zozosse iquerrenani. Tiadeniza: —Nirra, bicaqquiri tiquenaqui? −inarraro. Arri oza panani Piripocca Deoza tiquerrenarrarodeni Zeso Cristoza tirrariqquimanarraro tiadeniza uima dozo inarraro. Titiqueriqqui nanicca tiadeni maridedeni, tibirrideni accodedeni bazimaza naqui dozo inarraro.

Corosadeniza 2:2

Deo tibodideni tonauatizebaqquiuiuarrine, pocca touati uanehema tibodideni orrariqquinissa taniuarrine naqui touini onarraro. Deocca uima bicani auatora taporaha rridapape auato tarraro timittemananissa taniuarrine naqui damera onarraro. Narraro uima bicanipe Cristona parra. Pouaza tinoccodeni torrizera-zanapozape pouaza parrissa tiquenanissa taniuarrine titouideni Deoza uatide damera onarraro.

1 Timoti 2:4

Pouapa madirra bazima tocassiuauerauiuarrine touini narrari. Pocca parrissehe tocauatterauiuarrine naco touini narrari.

1 Timoti 3:16

Rrehe, pocca parrissehepe bica tani, deni torrani, inarraro. Taidepe iaza auatora taporaha rridapanana iaza auato tarraro. Narrarope Zeso Cristo tauimariparri. Narraroza parrissa inarraro. Pina rriri rriri inarrarossa narraro: Pouapa assire torrazapa pina madirra iassa naha torrarrari. Iaza Deo Corime Attipa: —Deo Bedipa Imehi Attiza ibora tarrari. Pouapa Imehiza pocca uima inaparrirenissa tarraro −narrari. Deocca zozosse tabaqqui memeuarricca naco Deo Bedi qqui toquenaui. Narrari tauimari madirra bazimaza ecomerarizarraro. Nazama arrirraro zamaza madimanarrarideni poua tauimariza parrissa quenarrari. Poua naco Deorrine memeuarri toccamacossanirrari.

1 Timoti 6:3

Arra madirra marinarra onihi mari mari narraripa ia Zozossede Zeso Cristo tauimari parrisseheccassa nerrerarraro mari mari nazapa pocca marinarrape maizehecca. Arri Deoza imadinissa taniuarrinecca marinarrassa nerrerarraro mari mari naza naco pocca marinarrape maizehecca.

2 Timoti 2:10

Nezape orri onerrereza ocasserehe uapima onauanarraroparri. Nema onarrarope Deo icatterriza-baqquiporrarideni Zeso Cristo tauimari icassiuaueraniuarrinecca mittemanaza parrissa quenazapa Deo inassiuauabaqquiuitoui, Deo Poua ssiuerrenema Pouaza madimana-zanapouiuarrine.

2 Timoti 2:23

Uima ponimacca pina madirra poua bodicca uati tarrari timitteraha parrissa terrerarri. Poni! tana. Nauato tinani uima nema naniccape uadie torra tani.

2 Timoti 2:25

Deoza iboqquiri narrarideni naco mouaraza mari icanabaqqui-zanapona. Nama nazapa Deorrine bodideni cacarriqquimerauiuarrine uitide. Nazana marinarra parrisseheccazara parrissa quenauiuarrine.

Satiacocca 1:1

Nirra ouimecotedeni? Ouape Tiaco tiadeniza dozo onarraro. Abi Deocca zozosse, ia Zozossede Zeso Cristocca zozosse orrani. Arri Izarraeo bedi 12 quenarrari potemaui tiquerrenarraro zama bazimaza timadirize-manarrarodeniza: —Bicaqquiri tiquenaqui? −onarraro.

2 Pedoro 1:3

Deo pocca dacoreheza ibodi acco tocanabaqquirrari, icca madie Pouaza inananiuarrine. Poua nacassa tauiccassa inananiuarrine naqui ia tonaparrire-baqquiuissa tarrari. Deo ibodi acco tocanabaqquirrarirrine Zesoza nauatoqquiri inarraro. Zesopa pocca deni torrehe, pocca biquehe icarriniuarrine ia uaua tabaqquirrari.

2 Pedoro 3:11

Nazama meme, nami rricani tauimarini timittemanezape nerrecoma tiquenani bica tani? Arri narrizoue tiadeniza torra-rreraniuarrinepe Deozara ibobora tineza uimasiri rrirehe timadimananissa tarri, onarraro.

1 Zouao 2:23

Nazama arra madirra attideni: —Zesopa Deo Bedi rraraui −quequenanarraridenipa Deo rriraha mamadimana narrari. Naraha arra madirra attideni: —Zesopa Deo Bedi –quequenanarraridenina Abi Deocca erredeni toquerrenarrari.

Apocalipsis 1:1

Deona Zeso Cristoza itezerremacca uima auato inanaporraro. Manaco Zeso Cristopa pocca zozossedeniza auato inananiuarrine. Arrirraro uima iaza auato inananiuarrine Zeso Cristo pocca zozosse memeuarricca zosse inaronazapa ouaza uati tarrari. Pouarrine qqui onarraro. Ouape Zouao, Zeso Cristocca zozosse orrani.