Tahimarideni 14:22 - Kulina New Testament Brazil

²² Uedaniza naco Zesoza rrehe quenarrarideni uatizemanauiuarrine bodideni acco icanabaqqui-rizapomarrari. Paoro attidenia: —Zesoza parrissa tizanapomanarri. Deorrine ticcadeni rrehenirri todacorani zanaponitoui. Ocasserani terizemaneraha nema nehe tinauanemanarizana. Tiadenizama ia naqui ocasserani inauananitoui. Nema inezana Deocca cacaueheza bacco inaniuarrine, inarraro −quenarrari.

Culina Mádija

²² Huedanidsa naco Jesodsa jehe quinajarideni huatidsemanahijine bodideni acco icamabaqqui-ridsapomajari. Pablo attidenia: —Jesodsa pajissa tidsanapomanaji. Diojine ticcadeni jeheniji todacorani dsanaponitohui. Ocasserani teridsamanaraha nema nehe tinahanamanaridsana. Tiadenidsama ia naqui ocasserani inahananitohui. Nema inadsana Diocca cacahuehedsa bacco inanijine, inajaro −quinajari.

Tahimarideni 14:22 Iomraidhean Croise

Mateo 10:38

Madirra ouaza damera tarrarazapa occa madirra torrauiuarrine parrire-rraraui. Occa madirra torrauiuarrinepa otauimarirrine ocasserani inauaneraha nema nehe otauimarizara damera tarrari. Pouaza: “Aua porimacossaniza tia inanazoqquena” quenaza naco poua attipa: “Peperriua ozoqquena. Zeso onebo-rraraui” nazapa narrarina occa madirra torrarrari.

Mateo 16:24

Nazapa Zeso poua uatimade iaza denima uati uati tarrari: —Arri “Zesocca madirra iquerrenana” tiquenezape tiadeni touini tiquenanicca toui tetideni rrimemanarri. Ouazara dameraqquiri tiquenarri. Madirra tiadeniza: “Aua porimacossaniza tizoqquerri” quenaza naco: “Rrehe, ozoqqueni bica tani. Zeso onebo-rraraui” titizanapomana nana, onarraro.

Mateo 19:24

Tiadeniza uati omanipomana: Pina bani imehibote cameropa etero ssessequi odiniza toqqueqquimauiuarrine parrire-rrararrarissa narrari madirra zepe sse tarraripa Deocca cacaueheza torrauiuarrine ssamo tani −nade Zeso.

Maraco 10:30

Nazapa niza zotode bazima poua ineborizarrarossa nehe Deo pouaza da inarizazapa carripomauitoui. Rridapana arrirraro namiza poua madiccaza uemani carriuitoui. Pouaza pina pocca oza touapirrarossa nanitoui. Poua imecotedeni naco touapirizauitoui, pouaza pocca amissa narraro carririzanitoui. Erredeni ouahadeni pina pocca erredeni toquerrenarrarissa narizauitoui. Zama naqui pina pocca zamassa narraro pouaza torrarizanitoui. Naraha otauimari pouaza torrarrarorrine pouaza narrizoue ssonarinitoui. Nema nanitouiraha niza zama zati torrezape camittehe rriquerreraniccaza madi-zanapouitoui. Parrissa −naui nade Zeso.

Maraco 9:47

—Nazama tinoccoza naqui touini tanicca qqui tineza uimasiri tinananiuarrine touini teraha daco tirrireza poni tarri. Nema tezape pina tinocco uari, rroca, rreo, coro tinarrarossa narraro. Tinocco orrariraha Deocca cacaueheza timadizape tetizenitoui. Neraha uimasiriza damera tinezape pina tinocco pamehe ticarrirrarossa neraha rrororoni rriquerreraniuarri tia coro tozimauitoui.

Roca 24:26

Deo Atti dozo naniza arrirraro uima auato tarraro: Narraroa arri madirra Tonassiuauade Cristo-Mesiatoui imadirraro ocasserani auauitoui, madirracca uaidirehe manaconi torrauiuarrine. Ocasserani aua-rraraza zoqque-rrarazapa Deocca deni torrehe pouaza auato-rreranitouiraha. Parrissa narrizoue imeni ocasserani auaza zoqquezapa nauatoniza Imehiuarri toccamacossanirrari. Nazapa pocca Abi Deo pocca deni torrehe pouaza inanarraro −narrari Zeso.

Huano 15:18

—Arrirraro namicca uimaza madimanarraridenipa tiadeniza nacasseraqquiri nazapa tibodideni uatomanarri: Pouadenipa ouaza nacasseraqquiri naporrari.

Huano 15:20

Arri tiadeniza uati onaporrarocca tetideni uatome-manana. Zozossedenipa pouadeni zozossedeza deni toquerrena-rraraui. Ouaza rrara rrara quenazapa tiadeniza naco rrara rrara quequenanauitoui. Occa marinarraza rrehe quenazapa ticcadeni marinarraza naco rrehe quenauitoui.

Huano 16:33

Arri uima uapima tiadeniza uati onarrarope tibodideni uatoto cane-rreraniuarrine. Ouaza tiquerrenezape rronehe, uatizehe parrissehecca ticarrimananitoui. Arrirraro zamaza timadimanaqquezape ocasserani temaneraha dacoco tirrirarri. “Peperri inana” tiquenerrerana. Arrirraro namicca zozossedepa arramani torraui. Ouana pouaza deni orrani −nade Zeso.

Huano 3:5

Naraha manaco Zeso Nicodemoza uati tarrari: —Parrissehera tiaza uati onana: Madirra bodidenicca uimasiri touissorizezape madirra Deo Corimecca nauatonarraza toquerrenazapa Deocca cacaueheza toquerrenarrari. Naraha madirra nama quena-rrarazapa Deocca cacaueheza toquerrena-rraraui.

Tahimarideni 11:23

Nazapa Banabe Atioquiauarri bacco taza Deo pouadeniza uima bicani inanani qqui tazapa uatizerrari. Nazapa pouadeniza uati tarrari: —Deoza parrissa tizanapomanana. Tibodideni dacoreza ia Zozossedeza dameraqquiri tiquenarri −narrari.

Tahimarideni 11:26

Pouaza bacco tazapa Atioquiauarri rrina inanirrari. Bacco nanimanazapa nauicca Zesoza rrehe quenarrarideniza uarrano orraria madimanaza madirra bazima mari icanabaqquimanarrari. Nazapa naui Atioquiazana Zesoza rrehe quenarrarideniza: Cristocca madirra, icanacanibaqqui-manaporrari.

Tahimarideni 11:29

Nazapa Atioquiacca Zesoza rrehe quenarrarideni Acabo atti: —Pemi torranitoui −naui mittemanazapa: —Zodeacca Zesoza rrehe quenarrarideni acco icanabaqquina −quenarrari. Uimahaha canazapa: —Iparrirenissa tanicca da inaqquina. Pina uemani carriuipa denima da inana, bazira tehe carriuipa bazira tehe da inana −quenarrari.

Tahimarideni 13:43

Nazapa queriqquimanaha rricaza zodeodeni motapa Paorodeniza rraui torrarrari. Zodeo querrena-rrararaha zodeodenicca marinarraza toquerrenarrarideni naco rraui torrarrari, uima denima mittemanauiuarrine. Nazapa Paorodeni attidenia: —Zesoza parrissa tiquenezape bica tani, nema tizanapomanana. Deo tiadeniza uati cauanari canauicca uima tinebomana-rrerana −quenarrari Paorodeni uati uati toquenaza.

Tahimarideni 14:20

Naraha arra Zesoza rrehe quenarraridenipa Paoro ponauiuarri qquide rrauirrona, bacco narronemanaza domo uauarraninarra Paoro totemaza ozauarri toccanirrari. Uada ssiuarrapa Paoro Banabe tezerre Derbiuarri touedarrari.

Tahimarideni 14:28

Nazapa naui Atioquiacca Zesoza rrehe quenarrarideniza abazico uapi taha madimana-zanaporrari.

Tahimarideni 15:32

Zoda Sira tezerrepa Deo Atti uauati toqquimadedeni toquerrenazapa Zesoza rrehe quenarrarideniza Deo Atti uati iqquimemanarraro. Poccadeni uatinarra arabo taniccaza uati uati toquenazapa Zesoza rrehe quenarrari bodideni inauatize-baqquimanaza poccadeni rrehenirri todacorani narraro.

Tahimarideni 15:41

Touedazapa zama Siriaza bacco toquenaza maride toquerrena, denimacca zama Sirisiaza bacco toquenaza maride toquerrena zanaporrari. Nauiuarricca Zesoza rrehe quenarrarideni inauatizebaqquirra zanapoui narrari.

Tahimarideni 18:23

Nazapa Atioquiaza bacco taniza nauiza madirrari. Madiui poua idi nazapa bobode torrapomarrari. Zama arobeni Carasiauarricca oza pananiza, oza capamema narraroza naco, zama arobeni Piriziauarricca oza pananiza, arri oza carrari carrari narraroza naco qquide ccarizapomarrari. Zesoza rrehe quenarrarideni bazima inauatizebaqquizapa poccadeni rrehenirri todacorani narraro.

Tahimarideni 6:7

Nezape Deo Atti torraribaqquirraro. Oza panani Zerozarecca madirra Zesoza rrehe quenarrari touapirrari. Dada toqquimadedeni naco Zesoza rrehe quenaui uapi tarrari.

Tahimarideni 9:16

Pouapa otauimari maride torrarizaraha ocasserehe oppina tanicca inauanarizanitoui. Narraro uima naqui niza pouaza noue onanitoui −narrari Zeso Ananiaza.

Romanodenidsa 8:17

Nazama Deocca erredeni iquerrenezape pocca danirri bicani iaza torranitoui. Uapima Deorrine pocca erredeni Zeso Cristoza torrarrarope iaza naqui torranitoui. Parrissa Cristo poua tezerre ocasserani ezape niza zotode pocca cacaueheza bacco ineza poua tezerre pocca deni torreheza ia naqui imadinitoui.

1 Corintodeniza 1:8

Ticcadeni rrehenirri daco torani zanaponiuarrine Deo tiadeni touacauabaqqui-zanapozapa arricca zama rricanicca uada bacco tiquenaniuarrine. Nani ia Zozossede Zeso Cristo ccanipomazapa uima ticappiremananiuarrine.

Piripodeniza 1:29

Deopa tiadeniza uima bicani inanarraro. Narraroa Deo Pouarrine tibodideni uatozape tettideni: —Zeso Cristopa occa uimasiri manaconi zoqquerrari. Rridapanape pouaza parrissa onani −tiquenarraroparri. Deopa uima bicani onihi tiadeniza inanarraro. Narraria arra Zeso Cristo ocasserani auaporrariparra. Nazama ia naqui Zeso Cristo tauimari torrarizaniuarrine ocasserani erizeza bica tani. Narraro uimazape etizerraro.

Corosadeniza 1:23

Nema tiquenaniuarrinepe Zesoza parri rrehe tizanapomanarini narri. Arri poua tauimari icassiuaueraniuarrinecca timittemanaporraro naqui tinebomana terrerarri. —Zeso Cristorrine icassiuauerezape Deoza bacco ineza etizenitoui −titizanapomana narri. Nazama poua tauimari uati uati onarrarona zama bazimaza ecomerarizaza torrarizarraroparri. Oua Paoro naqui Zeso oua cazosseza poua tauimari maride orrarizarraroparride.

1 Tesaronicadeniza 3:13

Ia Zozossede Deorrine tibodideni todacorani naniuarrine, inarraro. Nezape niza ia Zozossede Zeso Cristo pouaza toquerrenarraridenima ccanipomazapa icca Abi Deo baccouarri idomo ueza arri tibodideni uissoqquiri naza uimasiri rrirehe timadimana-rronarrarope auato taniuarrine, inarraro.

2 Timoti 1:8

Nazama madirra ouahadeniza ia Zozossede Zeso Cristo tauimari tecomeraza naqui comehi tina-rrereza mari ticanabaqquirizana. Arri oua toponi cocoroza ouezani tauimarini timitteza naqui ticomehi terrerana. Arri ouape Zeso Cristo tauimari mari mari onarizarrarorrine tozepe orrarrarode. Tia naqui Zeso Cristo tauimari icassiuaueraniuarrinecca tecomerarizarrarorrine ocasserehe tinauaneraha nema nehe orri terrerarri. Pina tetizeri narizana, onarraro. Deo tibodi inadacora-zanaponitoui.

2 Timoti 3:12

Arri ocasserani ouarrarope ouaza orrari-rrerani. Madirra Zeso Cristoza madimanauissa tauiuarrine dameraqquiri narrarideni bazimapa ocasserani inauanemananitoui. Parrissa nema nanitoui.

1 Pedoro 2:21

Deocca madirra tiquerrenezape ocasserehe tiadeniza ssonariraha mouaraza tinauanemananiuarrine Deo tiadeni tocatterrizabaqquirrari. Zeso Cristopa titouideni ocasserani auaporrari. Pocca madieza Deo touini nauicca noue inarraro. Nezape pina pouarrinessa tinanemananiuarrine dameraqquiri tiquenarri.

1 Pedoro 5:10

Rridapana ocasserehe tinauanemanaccani. Naraha niza rriquezape Deo tiadeni tonabicabaqquiuissa tauitoui. Ticcadeni rrehenirri inaparrirenissa tanitoui. Tibodideni inadacora-baqquinitoui. Zesoza dameraqquiri tiquenaniuarrine tiadeni acco tocanabaqquiuitoui. Abi Deopa uati cauanari canaza pocca cacauehe bicaniza imadi-zanaponiuarrine ia tocatterrizabaqquirrari. Zeso Cristo tezerre Deocca deni torreheza imadi-zanaponitoui.

1 Pedoro 5:9

Dacoraqquiri tiqueneza tiadeni uadideza tierrizemanarri. Deozara dameraqquiri tiquenarri, ticcadeni rrehenirri todacorani naniuarrine. Arrirraro uimape nauatoqquiri tiquenani: Timecotedeni zama bazimaza madirizemanarrari naco tiadenissa quenarrari. Ocasserehe ihinauanemana narraro.

2 Pedoro 1:11

Nezape niza zotode Deocca cacauehe rriquerreraniccaza bacco tiquenezape Deo uatizeza noccobirri nemanehe tiadeniza icanauabanitoui. Naniza rraui tirrezimezape ia Zozossede, ia Tonassiuauade Zeso Cristopa tiadeni touacauabaqqui-zanapouitoui.

Jodacca 1:3

Ouimecotedeni, titouideni ouati uana tani. Zeso Cristocca tossiuauehe ia bazimaza da inarizarraro tauimarini tiadeniza dozode touini oneraha uima onihi anizape narraro uimara tiadeniza dozo onarraro. Deo pocca marinarra parrissehecca iaza da inarrarope nema zanaponitoui. Narraroza icassiuaueraniuarrine. Arri Zeso Cristoza iquerrenarrarope narraro marinarraza parrissa inarraro. Narraro marinarra tecauemananissa tarri. Narraroza uima onihi inauariniuarrine bica terrerani. Madirrarrine cacarriqquimera-rreraniuarrine dacoraqquiri tiquenaza poni tiquenarri, onarraro.

Apocalipsis 1:9

Ouape Zouao timecotedeni orrani. Titezerredeni Deocca cacaueheza iquerrenarraro. Madirra Deo Attiza nacasseraqquiri narraripa ia totonarrizo-baqquimana narrari. Naraha Zeso Cristorrinepe uima inauananiuarrine iparrireni. Ouape ueni nocconiza zama uittacossani Patimoza oua inebomanezape pina toponi cocoroza ouezarrarossa narraro. Deo Atti maride orrarizeza, Zeso Cristo tauimari ouaccora-rizezape Pouaza nacasseraqquiri narraridenirrine tozepe orrarraro.

Apocalipsis 2:10

Niza otauimari acconi ocasserani temanezape ticappinemana terrerana. Tocorime-Taminerrine tiadeni mota sibera tinehe toponi cocoroza tiquerrenanitoui. Nama nauiuarrinepa tiadeni bazima tiadeni nattome tabaqquiuitoui. Uada 10 nehe pouarrine ocasserani temaneraha otauimaripe tinebomana terrerarri. Dameraqquiri tizanapomanarri. Otauimari tinebomana-rreraza tizoqquemanani bacco tiquenezape tiadeniza occa camittehe rriquerreranicca da onanitoui.

Apocalipsis 7:14

Naraha manaco pouaza uati onade: —Tiana nauato tinani −onade. Nazapa ouaza uati tapomade: —Arrarraridenipa namiza ocasserani imeni tonauane-manaraha Zeso Cristo tauimari nebomana-rrararrari. Eueue Bedi Zeso poua emene toccarrarorrine poccadeni uaidirehe tomossirraro. Narraria arra etero moponi carrimanarrariparra.