Tahimarideni 13:51 - Kulina New Testament Brazil

⁵¹ Nazapa Paoro Banabe tezerre narraridenicca uaidirehe auato taniuarrine pouadeni amoricca ssiqui catorraniuarrine pporo pporo quenazapa: —Peperriua! Ticcadeni uima uaidira tani −quenaza oza panani Iconiouarrina touedarrari.

Culina Mádija

⁵¹ Nadsapa Pablo Bernabe tedseje najaridenicca tabaccorehe ahuato tanijine pohuadeni amoricca ssiqui catojanijine pporo pporo quinadsapa: —¡Epejena! Ticcadeni ima tabaccora tani −quinadsa odsa panani Iconiohuajina tohuedajari.

Tahimarideni 13:51 Iomraidhean Croise

Mateo 10:14

Nazapa tiadeniza nacasseraqquiri naza: “Arriza timadimanarri” quena-rrarazapa, arra ticcadeni marinarra mittade nacasseraqquiri naza naco narraro ozaza rraui tirreqquimani bica tani. Madirra nama quenauicca oza tinebomanezape temoridenicca sadariaza ssiqui ma tarraro catorraniuarrine pporo pporo tiquenana. Naui poccadeni iboue bodideni uatome-manauiuarrine −nade Zeso.

Maraco 6:11

Naraha oza pananiuarri bacco tiqueneza madirra: “Arrizape timadimanarri” quena-rrarazapa, arra ticcadeni marinarra mittade nacasseraqquiri naza naco narraro ozaza ticadeqquimani bica tani. Madirra nama quenauicca oza tinebomanezape temoridenicca sadariaza ssiqui ma tarraro catorraniuarrine pporo pporo tiquenana. Naui poccadeni iboue bodideni uatome-manauiuarrine, onarraro −naui nade Zeso.

Roca 10:11

“Tiadenipe Deocca cacauehecca uima mittade nacasseraqquiri tiquenezape peperriua rrauirreqquimaniuarrine” tiquenana. “Tizamaridenicca ssiqui emoriza matarraro naqui catorraniuarrine pporo inana, nani ticcadeni iboue tibodideni uatome-mananiuarrine” tiquenana. “Naraha tiadenipe timittemananissa tarri! Deocca cacauehe tiadeniza uarrira teraha…” tiquenana, onarraro.

Roca 9:5

Nazama oza panani onihiuarriccapa tiadeniza: “Arriza timadimanarri, Deocca cacauehecca uima imittaniuarrine” quena-rrarazapa nani poccadeni oza pananiuarripe tinebomaneza rraui tirreqquimani bica tani, onarraro. Rraui tirreqquimeza naqui temoridenicca sadariaza ssiqui ma tarraro catorraniuarrine pporo pporo tiquenana. Naui poccadeni iboue bodideni uatome-manauiuarrine −narrari Zeso.

Tahimarideni 14:1

Nazama Paoro Banabe tezerre oza panani Iconioza bacco toquenazapa zodeodenicca Deo Atti mamariuarri totouedezima naza mari mari ihicanabaqqui narrari. Attideni bica taza Zeso tauimari mari icanabaqquizapa zodeodeni mota uapi taha, zodeo querrena-rrararrarideni naco mota uapi taha parrissa quenarrari.

Tahimarideni 14:19

Nanarra Atioquiacca, Iconiocca zodeodeni arra Paorodeniza nacasseraqquiri narrarideni nani Ristaraza bacco narronemanarrari. Narraro oza pananicca madirraza uati narizemanaza Paorodeniza uima inanemanapomarraro. Nazapa pouadenirrine Ristaracca madirra naco Paorodeniza uadimanarrari. Nazama arra uadimanarraridenina Paoro zoqqueuiuarrine sibaza iquenaqquimanarrari. Iquenaqquimanaza Paoropa pouadeniza pina parra uatiarirrarissa naza oza panani uapiuarri rroca coro iquenaza: —Rridapanapa zoqqueui −quenarrari.

Tahimarideni 14:21

Naui Derbiuarri bacco toquenaza naco Zeso tauimari bicani icassiuaueraniuarrinecca mari icanabaqquizapa madirra mota uapi taha Zesoza parrissa quenarrari. Nazapa Derbiuarri maride rriqueza pouadeni nattiuarri dozonimanazapa Ristaraza bacco, Iconioza bacco, Atioquiaza naco bacco nanimanarrari.

Tahimarideni 16:2

Nazapa arra Ristaracca Zesoza rrehe quenarrarideni attideni, oza panani Iconiocca Zesoza rrehe quenarrarideni attideni naco: —Timotipa zabisso bicaui −quequenanarrari.

Tahimarideni 18:6

Naraha Zeso tauimariza nacasseraqquiri nazapa Paoro itamassoqquimanarrari. Nazapa Paoro pouadeniza paparra naui auato tauiuarrine pocca etero ppoto ppoto naza uati tarrari: —Peperri! Nema tiquenezape tirrinedenina uimasiri tiadeniza tinassonarimanarraro. Deo tiadeni tonarrizo-baqquizapa orrine rrerani. Rridapanapa zodeo querrena-rrararrarira mari ocanabaqquina −narrari Paoro.

2 Timoti 3:11

Arri oza panani Atioquiaza, Iconioza, Listaraza naqui nanarrizo onauanarizani nauato tinani. Naraha oua Zozossede Deopa oua tonassiuauarraride.