Mateo 4:17 - Kulina New Testament Brazil

¹⁷ Nauiuarri Zeso bacco tazana Deo Atti maride taide torraporrari. Madirra mari mari ihicanabaqqui naza poua attipa: —Ticcadeni uima Deoza tecomeremaneza ticcadeni uimasiri tinebomanarri. Deotouira tizanapomanarri. Deocca cacauehepe iaza bacco narronabote nani −nanariza narrari Zeso.

Culina Mádija

¹⁷ Nahihuaji Jeso bacco tadsana Dio Atti maride tahide idimapojari. Madija mari mari ihicanabaqqui nadsa pohua attipa: —Ticcadeni ima Diodsa tecomeramanadsa ticcadeni imasiri tinebomanaji. Diotohuira tidsanapomanaji. Diocca cacahuehepi iadsa bacco najonabote nani −nanaridsa najari Jeso.

Mateo 4:17 Iomraidhean Croise

Mateo 10:7

Narraridenizara rraui tirrarizeza otauimari tecomerarizemananissa tarri. “Deocca cacauehepe iaza bacco narronabote nani” tarizemanana, onarraro.

Mateo 11:12

—Rrehe, Deocca cacauehecca uima zati madirraza torraniuarrine Zouao Batistapa taide mari mari narronaporrari. Rridapana oua naqui maride nema onarronarraroa arrirraroparri. Naraha madirrapa Deocca cacauehecca uimaza nacasseraqquiri naza pouadenirrine narrizoue ssonari ssonari narronarraroparri. Rricaniuarrine dameraqquiri naraha parriremana-rraraui.

Mateo 13:11

Naraha Zeso iaza ecomerade: —Rrehe maittaccazama Deocca cacauehecca uima zati narroraporaha madirra inauattabaqqui-rraraccade. Neraha rridapanana Deo Pouarrine pocca cacauehe tauimarini zati tiadenizana auato tani. Naraha madirra motapa Deo Pouarrine pouadeniza auatora teza mittemana-rrararrari −nade.

Mateo 13:24

Zesopa pocca marinarra arrirraro namiza imadinicca uima tazarrani madirra mari icanabaqquipomarrari: —Rrehe, Deocca cacauehe tauimarini onihi naqui pina uizarra rrinede pocca uizarrauarri zamatapa nocco bicaui uira inarizarraricca uimassa narraro.

Mateo 13:47

—Rrehe, Deocca cacauehe tauimarini onihi naqui pina aba cocoro imenibote ueni imehiuarri tappa icazippemaneza rroca icanimoranimanezape aba ouaha, ouaha naha uemarrari.

Mateo 13:9

Nazama teribodeni ticarrimanezape ouatti timittemananissa tarri, onarraro −nade Zeso.

Mateo 25:1

Nazapa Zeso madirra denima mari icanabaqquirrari: —Deocca cacauehe torrezape pina arrirraro uimassa nanitoui: Zouato 10 quenarrarope zabisso zouato cacarrireuicca rripaqquietoui narroremanezape ponidenicca rrorrororo equidirizemanaza zabisso uenabote narrari bacco irrizemanauiuarrine zome rraui torrarraro.

Mateo 3:2

Mari mari ihicanabaqquiriza nazapa arrama nanariza narrari: —Ticcadeni uimasiri tineborizemanarri! Deotouira tizanapomanarri! Deocca cacauehepe iaza bacco narronabote nani −nanarra narrari Zouao.

Mateo 6:10

Ticca cacauehe bazimaza tinanarizana, inarraro. Pina memeuarri Tiaza madimanarrarideni bazima Tettiza iboraqquiri zazanapomana narrarissa quenauiuarrine arri namiuarri imadirraro ia bazima naqui Tettiza iboraqquiri inana, inarraro.

Mateo 9:13

Naraha madirrapa: “Iape bicaqquiri inani” quequenanarraridenicca uima onanabicaniuarrine occarrona-rrerarraro. Uimasiri totonanadedenicca uima onanabicaniuarrinena occarronarraro. Rrari, arrirraro uima ticauatterarri. Maittaccazama Deo Atti cacomerabote Ozea dozo inarraro: “Touati uanehe, acco canehe touini onani. Moizecca marinarrassa tinanemanezape ouaza ticcadeni bani bedi ono torrauiuarrine da da titiquena naraha madirra ouahaza tetideni uaneraqquiri nezape ticcadeni danirriza nacassera onani. Madirra bazimaza tetideni uanaqquiri naniuarrinena nacassa onani. Pouadeni acco ticanabaqquimanaza naco nacassa onani” napoui nade Deo −nade Zeso.

Roca 15:10

—Nazama ouape tiadeniza uati onana: Narrarossa narraroa madirra uimasiri sse tarraripa: “Deoza orraniuarrine, occa uima onebona” nazapa Deo pocca zozosse tabaqqui memeuarri tezerre uatizemana taui −narrari Zeso.

Roca 15:7

Nazama parrissehera tiadeniza uati onarraro: Narrarossa narraro madirra uimasiri sseqquiri narraridenipa pina eueue rrano torraza amossi narrarissa quenarrari. Naraha orraria: “Deoza orraniuarrine, occa uima onebona” nazapa Deopa pocca zozosse tabaqqui memeuarricca tezerre uatizemana taui. Arra madirra taide Deoza toquerrenaporraridenicca uimaza naco memeuarriccapa uatizemana taui. Naraha arra madirra Deoza torrezatizapa denima uatizemana taui −narrari Zeso.

Roca 24:47

Narraro poua tauimari ecomerarize-manezape madirra bodideni cacarriqquimere-manauiuarrine naco uati toquenauitoui. Nazapa madirra pouadeni bodi cacarriqquimere-manaza: “Occa uimasiri onebona” quenazapa Deo poccadeni uimasiri peperri inananitoui. Narraro uima bicanipe madirra bazima mittarizemanauiuarrine Cristo-Mesiapa pocca zozosse tabaqqui mari narizemanauiuarrine zosse inarizabaqquiuitoui. Taidepa Zerozareza mari icanabaqquimanauitoui, zotodepa zama bazimaza maride rraui torrarizauitoui. Narrari Cristo-Mesiapa oua. Otauimari maridepa oua occa madirra zosse onabaqquiuiuarrine −narrari Zeso.

Roca 3:23

Zesocca uarrano 30 nazana madirra maride torrarizaporrari. Nauiuarricca madirra poua tossonaui tauimari ssamoqquiri nazapa pouaza: Zozecca erredeni, quequenanarrari. Nazama Zozecca abipa Eri,

Roca 5:32

Naraha madirrapa: “Iape bicaqquiri inani” quequenanarraridenicca uima onanabicaniuarrine occarrona-rrerarraro. Uimasiri carrimanarraridenicca uima onanabicaniuarrinena occarronarraro. Pouadeni bodideni acco ocanabaqquiza: “Uimasiri inebona” quenauiuarrine, onarraro. Pouadeni bodi cacarriqquimerazapa Deocca uima zatiza toquerrenauiuarrine, onarraro −narrari Zeso.

Roca 9:2

Pouadeni motta rraui torrarizauiuarrine Zesopa pouadeni zosse inabaqquirrari: —Deocca cacauehecca uima tecomerarizemanana. Madirra comaqquiri narrarideni tiadeniza bacco quenaza naco titinanomi-baqquimana nana −narrari.

Tahimarideni 11:18

Nezape narraro uima Zodeacca madirra arra zodeodeni Zesoza rrehe quenarrarideni mota mittemanazapa poccadeni boquehe nebomanarrari. Nazapa Deoza uatizemanarrari: —Rrehe, zodeo querrena-rrararaha Deopa pouadeniza naco uati uana tarrari. Deorrine bodideni cacarriqquimeraza Zesoza parrissa quenazapa camittehe rriquerreranicca carririzemanaui. Deopa bica taui! Deopa deni torraui! −quenarrari.

Tahimarideni 17:30

Madirrapa Deoza ssamoqquiri naporaha Deo pouadeni inarrizobaqquirra narronapoui narrararrari. Deo Pouana madirracca uimasiri inauanarronaporaha rridapanape zama bazimacca madirraza Poua Attia: “Ticcadeni uimasiriza peperri tiquenarri, tibodideni tecarriqquimera-rizemanarri” narrariparra Deo.

Tahimarideni 2:38

Nazapa Pedoro pouadeniza uati tarrari: —Ticcadeni uimasiri tinebomanarri, Deozara tiquerrenaniuarrine. Nazana Deo ticcadeni uimasiri peperri inanezape passo dopaniza niquide ticarrimanani bica tani. Zeso Cristo oniza passo dopaniza niniqui ticarrimanarri. Nazana Deo Poua Corime tibodideniza torrarizauiuarrine.

Tahimarideni 20:21

Arri zodeodeni, zodeo querrena-rrararrarideniza naqui Zeso Cristo tauimari mari mari onarizezape ouatti arrima ohonanarrarode: “Ticcadeni uimasiripe tinebomaneza Deozara iboraqquiri tiquenarri. Ia Zozossede Zeso Cristoza parrissa tiquenarri” ohonanarrarode.

Tahimarideni 26:20

Taidepa oza panani Damascouarri Deoza toquerrenauiuarrine uati onabaqquiporraride. Zotode oza panani Zerozarecca naco uati onabaqquirraride. Arrirraro zama Zodea bazimacca naco uati onabaqqui-rizarraride. Zodeo querrena-rrararrarideni naco uati onabaqqui-rizarraride. “Tibodideni tecarriqquimeremaneza ticcadeni uimasiri tinebomanarri. Deozara tiquerrenarri” ohonanade. “Ticcadeni rrehenirri, tibodideni cacarriqquimere-manani auato taniuarrinepe Deo Attizara iboraqquiri tiquenarri. Uima bicanira tinanarizemanarri” oneza mari mari ohocanabaqqui narraride.

Tahimarideni 3:19

—Narrarorrinea tiadeniza ouattipe: Rridapanape tibodideni cacarriqquimerarri, Deoza tiquerrenarri, onarraro. Nema tiquenezape Deo ticcadeni uimasiri sse inanitoui. Nazapa ia Zozossede Deo tibodideni rrassi tonanabaqquiuitoui.

Ebreodenidsa 6:1

Rrehe, Deocca marinarra denima icauatterana, pina rradauideni tocauattera-zanaporrarissa inana, onarraro. Zeso Cristoza rrehe inapozape Deocca marinarra narrora tanicca iattaporraro. Naraha: —Narrarora imittazanapona −inerrerana. Arri marinarra taidecca imittaporrarope arrima narraro: Icca uimasirirrinepe zoqquehe rriquerreranicca narrizoueza iquerrenaniuarrineraha icca uimasiri ineboza Deoza rrehe inezape icassiuaueranitoui.