Mateo 10:15 - Kulina New Testament Brazil

¹⁵ —Rrehe, parrissehera tiadeniza uati onana: Nizaranibote madirra bazimacca uima Deo icattemaniuarrinecca uada bacco teza Deo pocca narrizoue torrezape narraridenizapa denima oppina tanitoui. Arrina maittaccazama oza panani Sodomacca madirra, oza panani onihi Comorracca madirra, nauiuarri madirra madirizemanarrarideni naco uaidiraqquiri nazapa Deorrine rricarizaporrariparra. Naraha pouadenipa niza zama rriquezape poccadeni uimasiri manaconipa narrizoue oppina tarraro pouadeniza ssonarinitoui. Neraha ouattiza nacasseraqquiri narraridenizana narrizoue denima oppina tanicca ssonarinitoui −nade Zeso.

Culina Mádija

¹⁵ —Jehe, pajissara tiadenidsa huati onana: Nidsaranibote madija huapimacca ima Dio icattemanijinecca huada bacco tadsa Dio pocca najidsohue tojadsapi najaridenidsapa denima oppina tanitohui. Ajina maittaccadsama odsa panani Sodomacca madija, odsa panani onihi Comoracca madija, nahihuaji madija madiridsamanajarideni naco tabaccoraqquiri nadsapa Diojine jicaridsapojaripaja. Naraha pohuadenipa nidsa dsama jicadsapi poccadeni imasiri manaconipa najidsohue oppina tajaro pohuadenidsa ssonarinitohui. Naraha ohuattidsa jiperaqquiri najaridenidsana najidsohue denima oppina tanicca ssonarinitohui −nade Jeso.

Mateo 10:15 Iomraidhean Croise

Mateo 12:36

Nazama tiadeniza uati onarraro: Uima ponimacca uati uati tiquenezape niza madirra bazimacca uima cattemaniuarrinecca uada bacco teza Deo Poua baccouarri tidomodeni uezape arri uima ponimacca uati uati tiquenaporrarocca bazima zori terre canima-rreranitoui, onarraro. Deopa tiadeniza: “Rrari, ouaza ticcadeni uima tecomeremanarri. Nerrecotoui tettideni nema nema titiquena narraro?” nauitoui.

Mateo 5:18

Ouape parrissehera tiadeniza uati onarraro. Arri meme, nami rriquerreraqqueza Moizecca marinarrape nebo-rreranitoui. Meme, nami rriquezape Deo Atti dozo nanicca marinarra bazima parrirenissa tanitoui. Touatti orrarie zori terre canima-rreranitoui.

Mateo 7:22

Nazapa niza madirra bazimacca uima Deo icattemaniuarrinecca uada bacco tezape ouattiza iboqquiri narrarideni ouaza arrama quenauitoui: “Oua Zozossede, ticca uima bazimape ohouacomerariza naderra. Tia oni ua oneza naqui madirra bodidenicca tocorimedeni zosse zosse ohoninebaqqui naderra. Tia oni ua oneza naqui qqui toquenapo-rrararraricca ocanauatori canani uapi taderra” quenauitoui. Naraha narraridenipa Deocca cacaueheuarri rraui torrezima-rrarauitoui, onarraro.

Maraco 6:11

Naraha oza pananiuarri bacco tiqueneza madirra: “Arrizape timadimanarri” quena-rrarazapa, arra ticcadeni marinarra mittade nacasseraqquiri naza naco narraro ozaza ticadeqquimani bica tani. Madirra nama quenauicca oza tinebomanezape temoridenicca sadariaza ssiqui ma tarraro catorraniuarrine pporo pporo tiquenana. Naui poccadeni iboue bodideni uatome-manauiuarrine, onarraro −naui nade Zeso.

Huano 12:48

Madirrapa ouaza uattarroqquiri narrari. Ouatti mittemanaraha iboqquiri nazapa zama rriqueza Abi Deo uimasiri manaconi uatide torrazapa pouadeniza arrama nauitoui: “Tiadenipe occa erredeni atti mittade nacasseraqquiri tiquenezape narrizoue rriquerreraniccaza tiquerrenanitoui” nauitoui.

Huano 6:39

Oua cazosserrari poua touini naniccapa arrima narraro: Abi Deo ouaza madirra inanabaqquirraripa ouacauabaqquiuissa tazapa amossi narra canima-rrarauitoui. Niza uada rricarinicca bacco tezape bazima onauatoni-baqquiuitoui.

Huano 6:40

Nazama occa Abi poua touini nauicca onihipe arrima narraro: Madirra bazima Deo Bedi qqui toquenaza pouaza parrissa quenazapa camittehe rriquerreranicca carrimanauitoui. Niza uada rricarinicca bacco tezape narrarideni bazima onauatoni-baqquiuitoui −nade Zeso.

Tahimarideni 17:31

Deopa madirra bazimacca uima icattemanitoui. Niza Deo Poua nacassa tauicca uada bacco tezape zama bazimacca madirradenicca uima pocca parrisseheza nattome inanitoui. Madirra bazimacca uima cattemadepa Deo icatterrizaporrari. Narraria arra Poua Bedi zoqqueraha Deo Pouarrine nauatonirrari. Madirra bazima pouaza: “Parrissa, narraripa madirra Tonassiuauade torrauiuarrine Deo icatterrizaporrari” quenauiuarrine −narrari Paoro atti.

1 Corintodeniza 3:13

Naraha niza madirra uapimacca uima cattemaniuarrinecca uada bacco tezape Deopa zippo rrororoniza madirra bazimacca tozepe irrie nattome ippinitoui. Narraro rrororonirrine madirracca uima bica tarrarocca, uaidira tarrarocca, ponimacca naqui Pouaza auato tanitoui.

1 Tesaronicadeniza 5:4

Naraha imecotedeni, tiadenipe ssamoqquiri tiquenerrerani. Ziziniza timadimana-rrerani. Niza ia Zozossede Zeso Cristo ccaniuicca uada bacco tezape pina bobotiderrine oza rrinede uarro narrarissa tiquenerreranitoui.

Ebreodenidsa 10:25

Uima onihi naqui Deo Pouaza ihiqueriqqui zanaporraro inebo-rrerana. Pina arra motadeni neneboqquimana narraridenissa inerrerana. Iape uarrirriraza icatizerara canarizana. Ia Zozossede Zeso ccanibote naui. Deo madirra bazimacca uima icattemaniuarrinecca uada bacco tabote nani. Nema nezape denima icatizerara canarizana, onarraro.

2 Pedoro 2:6

Zotode oza panani Sodoma, Comorraza madimanarrarideni naco Deo inarricarrari. Narraro uima torrezape Rona Deo inassiuauarrari. Madirra bazimapa pouadeni touini quenauicca uaidireheza madimanaraha Ropa Deoza madiuissa tarrari. Madirradenicca uaidirehe pouaza ocassera teraha nama naha madirrari. Poccadeni uaidirehe qqui tarrari, mittarra zazanapo nazapa bodi orri naha madirrari. Nazapa narrarideni naco Deo inarrizo-baqquirrari. Poccadeni oza panani Sodoma, Comorra naqui bazima madirrama Deorrine dirri tocanireuissa tazapa ononedenira torrarraro. Deorrine nema narrarope zotodedenicca uaidireheza madimanarrarideni bodideni uatome-manauiuarrine. —Parrissa, Deopa uimasiri tonanemanarrarideni inarrizobaqqui taui. Iaza naco nama narana −quenauiuarrine, onarraro.

2 Pedoro 2:9

Rrehe, ia Zozossede Deopa Pouaza dameraqquiri narrarideniza uima ocassera tanicca inatappaniuarrine nauato tarrari. Uaidirehe inanemanarrarodeni naco inarrizobaqquiuiuarrine nauato tarrari. Pouarrine narrizoueza madimana-zanapozapa nizaranibote madirra bazimacca uima cattemaniuarrinecca uada bacco toquenauitoui.

2 Pedoro 3:7

Naraha rridapana arri qqui inarraro meme, namipe Deocca zossenirriza rrororonirrine dirri tehe rricanitoui. Narraro narrizouepe Deo Poua ecauaccani. Niza madirra bazimacca uima cattemaniuarrinecca uada bacco tezana Deo Pouaza iboqquiri narrarideni inarrizobaqquizapa meme, nami naqui dirri tehe rricanitoui.

1 Zouao 4:17

Parrissa imecotedeniza eti uana tezape arrirraro uima nauatoqquiri inaporraro: Niza madirra bazimacca uima cattemaniuarrinecca uada bacco tezape Deo pocca querrena-rrararrarideniza narrizoue inassonarinitoui. Naraha iape icappina-rreranitoui. Nema inarrarope pina Zeso Cristo arrirraro namiza madizassa inarraro.

Jodacca 1:6

Deo pocca zozosse tabaqqui memeuarricca mota naco pocca narrizoue tonauanemanarrari quenade. Taide Deo Poua uinoriza bazima madimanazapa cacauehe carrimanaporrari. Naraha motadenipa poccadeni cacauehe Deocca danirriraha pouadeniza pina ponimassa neza inebomanarraro. Nazapa Deo Pouarrine cadeiaza birrideni rrore naha zizini oppinaboteza madimanarrari. Nama zanapomanazapa niza madirra bazimacca uima cattemaniuarrinecca uada bacco toquenauiuarrine. Nazana narrizoue denima oppina tanicca carrimanauitoui.

Jodacca 1:7

Narraro uimassa narraro naqui oza panani Sodomacca madirra, Comorracca madirra, naui uarrira tanicca oza panani bedeni carri tarizarrarocca madirra bazimapa uaidiraqquiri narrari. Uananehe onihi onihiza dameraqquiri narrari. Uananehe rriza, oppina tanicca naqui inanemanarraro. Nama quenazapa Deorrine rrororoni rricaquera taniccauarri madimanarrari. Poccadeni uimazape zotodedenicca bodideni uatome-manauiuarrine. —Parri, iaza naco nama narana −quenauiuarrine, onarraro.